بدأ الموضوع يظهر فى فترة الخطوبة بعد فتره طويله جدا من ارتباطنا
فكرت كتير انى ما اكملش الموضوع لكنى كنت بصلى صلاة استخارة وكنت برجع تانى, ظهر الموضوع ده بشكل كبير فى موضوع الشغل لانه مانزلش يدور على شغل او كان بينزل وهو متخيل انه هيشتغل رئيس جمهورية لحد لما احد اقربه جاب له شغل لكن مرتبه كان ضعيف اوى
كنت دايما بقف جنبه واطلب منه انه يصبر وكنت دايما بقول له انى بدأت بالشكل ده والحمد لله ربنا كرمنى وبأ مرتبى كويس
لكنه كان متشأم جدا وكنت دايما بقضى وقت كبير فى انى ادور له على اعلانات الشغل بالرغم من انه كان يقدر يعمل هو كده لكنه ما كانش بيعمل كده خالص كان بس بيفضل يشتم فى الشغل والظروف بدون ما يحاول يغير
عشان ما اطولش عليكو فكرت كتير اوى انى ما اكملش معاه وكنت خايفه اوى انى بعد الجواز الاقى نفسى بتعامل مع واحد ما عندهوش اى تحمل للمسؤلية وخصوصا بعد ما هو ماباش ملتزم حتى فى الشغل ده وكان رغم قلة مرتبه بيتخصم له نصف المرتب نتيجه عدم التزامه لكن هو كان عنده ظروف خاصه وكان دايما هو بيتلكك بالظروف ده وبيقول ان هيا السبب فى عدم التزامه وانا كنت برده بخاف اظلمه معايا وكان كمان عندى ظروف فى بيت اهلى كنت عاوزه اسيبه باى شكل.
وبعد اقتراب الجواز بدأ كمان يظهر اوى ان خطيبى غير متحمل للمسؤليه باى شكل من الاشكال وده ظهر لما كان فاضل على زواجنا اقل من شهر وهو لسه ما اشتراش حاجات كتير اوى وما حضرش اى حاجه وفضل الوقت يمر لحد لما با فاضل على زواجنا اسبوع بس وهو برده لسه ما عملش اى حاجه .
لكن المفجأه كانت فى القائمة اللى بتتكتب على العريس بالعفش والشبكة حصل فيها مهزلة .
كان المفروض انه ييجى يوم الخميس يكتبها لكنه اتصل بامى وسألها على شوية حاجات فيها يوم الخميس بالليل وقالها انه هيجى الصبح وجه الصبح وهو ماجاش وجه الظهر وهو ماجاش وجه العصر وهو برده لسه مجاش
المهم انه جه بعد العشاء متأخر اوى هو وواحد صاحبه وبس وفضل يتكلم فى التفاصيل بشكل غريب ويتهمنا اننا بنستغله وعاوزين نكتب حاجات غير منطقية ده رغم ان الحاجات اللى اتكتبت كلها موجوده وكنا متفقين عليها بداية الخطوبه وبالرغم كمان انه ما دفعش فى الحقيقة فى الحاجات اللى جت كلها اكتر من 8 الاف جنيه والحاجات اللى جت باكتر من 60 الف جنيه انا اللى دفعاهم كلهم عن طريق فلوس كاش فى ايده او حاجات انا اشترتها حسيت انى خفت منه اوى وخصوصا انه رفض انه يوقع طول الليل وحتى الساعة السادسة صباحا من اليوم التالى رغم ان اهلى معاه وحاولو يتحايلو عليه ويفهموه, ساعتها حسيت انه مش شارينى وما قدرتش اثق فيه وائتمنه علي نفسى وقررت انى اسيبه قبل الفرح ب 4 ايام واهلى طردوه من البيت.
لكن هو اليوم التالى جه مع خاله وده بعد ما طلب من خالتى الوساطة مع امى عشان تسمح له انه يجى تانى المهم ان القائمه اتمضت ودلوقتى فاضل يومين بس على الفرح وفى حاجت كتيره اوى لسه ماجاتش وبالرغم من عدم تحمله للمسؤليه وانى شلت تقريبا كل المسؤليه .
المهم اننا بعد الزواج كان طبعا مفيش فلوس فى البيت لكن انا قبضت بعد زواجنا على طول وساعتها ماكنش فى وقت نفكر فلوس مين ولا اى حاجه.
حاولنا نقضى كام يوم عسل لان اجازته كانت اسبوع واحد وفعلا حجزنا فى مكان كويس وسافرنا وقضينا 4 ايام عسل كانو حلوين اوى .
وبعد رجوعنا كان فى مشاكل كتير اوى فى الشقه كل شىء غير منظم لاننا فرشنا فى يوم واحد بس قبل الفرح وده كان شاغلنى جدا رغم انى كنت بحاول اعمل الحاجات ده وهو نايم مثلا عشان ما يحسش انى ببعد عنه ولما كنت مضطره انى اعمل شىء ادامه عمره ما حاول يساعدنى خااااااااااااااااااالص.
مضى اسبوع وهو نزل الشغل وانا لسه عندى اسبوعين اجازة كمان كنت بقوم الصبح معاه وبعد ما ينزل ابدأ فى استئناف اعمالى فى المنزل وبحاول انه مايلاقيش اى شىء ناقص عشان لما انزل الشغل يعرف انى مش شاغلنى عنه غير بس الوقت ويمكن يساعدنى.
لكن ده ماحصلش بالعكس كان بيلوم عليا ازاى مش بلحق اخلص كل شىء علما بانى بنزل الشغل معاه وبرجع برده معاه لكن الفرق انه بيرجع يتفرج على التليفزيون وانا برجع ادخل المطبخ وافضل اعمل شغل البيت لحد لما احس انى هموت خلاص.
طلبت منه يساعدنى اكتر من مره, كان فى الاول بيستجيب خصوصا انى ماكنتش بطلب منه اشياء ثقيله لكن بعد مرور اسبوع وانا مش لاقيه وقت خالص اعمل اى حاجه بدأت انى اخد الموضوع بعصبية جدا وخصوصا بعد ما كنت تعبانه جدا فى يوم وطلبت منه انه يساعدنى لانى تعبانه لكنه بعد ما وافق على المبدأ بدأ يقول على كل حاجه اطلبها انه ما يعرفش يعملها رغم انها بسيطه اوى
اتخانقت معاه اوى وخرجته من المطبخ وعملت كل حاجه لوحدى وبعدها رقدت على السرير من التعب اكتر من يوم ورحت للدكتور والحمد لله عدت على خير لكنه ما تغيرش برده وبرده لسه مش بيساعدنى
والزيادة اوى انه يوم لما قبض مرتبه طلبت منه يدينى مصروف للبيت لكنه قال ان المرتب مخصوم نصه وانه مش هينفع يدينى حاجه وقلت له ادينى اى حاجه لكنه رفض رغم انه اخد منى فلوس كتير
ودلوقتى انا فى انتظار القبض للمرة التانيه وانا متأكده انه مش هيدينى برده اى فلوس لكن المره ده انا اتلككت بموضوع ظروف البلد وقلت له انى ما قبضتش وانى مش معايا فلوس مش عارفه هيكون ايه رد فعله هيدينى فلوس ولا مش هيدينى برده.
دلوقتى مشكلتى تتلخص فى انى
– محتاجه زوجى انه يتحمل مسؤليه بيته ماديا ( اى يدفع على الاقل نص مرتبه وانا هكمل معديش مشكله)
-يتحمل مسؤليه انه يساعدنى فى البيت وياخد باله انه مفيش وقت اعمل كل حاجه ويعرف انه بيجرحنى اوى لما يعد ما يحسش بيا وانا بعمل كل اللى فى وسعى عشان يكون بيتى كويس وهو ما يكونش محتاج حاجه
-يتحمل مسؤلية شغله ويصحا بدرى لشغله ويبطل يتأخر عليه او لو شغله فعلا مش عاجبه يدور على غيره ده رغم ان مرتبه اضاعف دلوقتى
-محتاجه احس انه بيحبنى لانى دلوقتى مش حاسه خالص انه بيحبنى ولا حتى ربع الاول
مشاكل الازواج
زوجى شخص غير مسؤول خااااالص
اضيف بتاريخ: Wednesday, February 9th, 2011 في 16:44
كلمات مشاكل وحلول: الازواج, زوج, فترة الخطوبة, مشاكل, مشاكل الازواج, مشاكل الخطوبة
اولا انت لم تحسني الاختيارالصحيح لشريك حياتك -ثانيارغم كل السلبيات التي فيه قبل الزواج وعدم تحمله المسووليةمعك واعتراضه على الشبكةولوزام عش الزوجية والمصاريف التي تحملتيهاانت واهلك برضواتزوجتيه وقبلت به ثالثاوهوالاهم بعدالزواج لايريد ان يساعدك في شوون البيت وتارك الحمل والعب عليك ولايريد ان يعطيك من راتبه كي تصرفي منه على البيت ومتطلبات الحياة اسمحي لي ياعزيزتي اقول لك ان زوجك هذااناني مايحب الاروحه وغيرجديربالاحترام والعيشةمعه اطلاقا واحمدي ربك انكم متزوجين حديثا ولايوجدمعكم اولاد عشان تبقي معه اطلب الطلاق لوباقي عندك كرامةحرام تضيع عمرك وشبابك ماواحد جبلةونكرة كهذالاكثرالله من امثاله ولاخيرفيه ولاخيرفيك انت ان بقيت معه ساعةبعدكلهذا اين عقلك عندمافكرت في الارتباط به هل عدمواالرجاله من الدنياعشان ترضي بهذاالاناني المنحط زوجالك اشتري راحتك وسعادتك قبل فوات الاوان وارمي هذاالوغدالاناني الغير مكترث بالمسولية وغيرجديربتحملهاارميه وراءظهرك واخلصي منه ومن حياته جاته القرف
يابنتي انت اختيارك خاطي الزوج دالايستاهل منك التضحيةولاجديرانويكون زوج ويتحمل المسولية اطلبي الطلاق قبل مايكن في ولاد يربطك به وتاكدي ان الله بيكرمك بالرجل الصالح اللي يهنيك ويسعدك ويستاهلك
السلام عليكم
أنت من الأول أخطأت خطأ كبيرا وفادحا وقد صليت صلاة الاستخارة والحمد لله كل الأمور اتضحت لك ونبهتك بأن لاتكملي مع هدا الشخص وأنت تماديت كثيرا .والحل لمشكلتك هو أن تحاولي معه أن يغير من سلوكه وان لم يتغير فمن الأحسن لك الفراق و مادام هو انسان متشائم فلا أضن بأن الحياة معه سهلة
اختى العزيزه بصراحه مش عارف اقولك ايه بس انت غلطتى انك قلتيلو انك مش هتقبضى الشهر ده انت كده مش مقتنعه ان اسلوبه غلط ياريت تحاولى متخليش فى بينكو كدب بالذات من ناحيتك انت اكيد تعرفى من بنى على باطل فهو باطل بس انت ممكن تقبضى وتصرفى الفلوس وتشوفى هو ممكن يتصرف ازاى وانا اسف فى الكلمه دى معلش ياجماعه ياريت تعلميه اللى اهله معرفوش يعلمهولو ولا الدنيا عرفت تعلمهولو واذا كان مش قد المسؤليه برضو انصحك انك لازم تاخدى موقف ايجابى فكرى بعد كده اما يكون معاكى اطفال ان شاء الله هتعملى ايه
اخوانى تسلم ردودكم
الاستاذ زائر عجبنى ردك اوى لكن احب اوضح شىء
انا لم اذكر ان فيه العيوب التى ذكرتها ولكنه بالفعل خائن لو حتى لم يصل لمرحلة الزنا ولكنه يفكر فى غيرى ويخرج مع احدى زميلاته ويتكلم تليفونيا بشكل مثير للشك ودائما يخفى موبايله ولا يوافق ان امسكه منه
بجد صعب لازم تاخدي موقف مش انتي اللي بتصرفي علي نفسك روحي بيت اهلك واشترطي لو عاوزك ترجعي يبقه يتعدل ويتحمل مسئولية نفسه ومسئوليه البيت
اختى السائله أشعر بكل ما تقوليه وعندك حق لكن موضوعك بسيط لان زوجك واضح انه فى بيت أهله لم يتعود على تحمل المسؤليه وعلى مصاعب الحياه وانتى على العكس ولكنكى لم تذكرى أن فيه عيوب خطيره مثل البخل الشديد أو الخيانه أو الاسائه لكى بالضرب أو السب . فأنا أرى أن تجاهدى نفسكى وتحافظى على بيتك وتعتبرى زوجك قضيتك وتتحدى نفسك انكى ستغيرى طباعه وأكيد ان شاء الله يتغير مع الوقت
كان لازم تسيبيه من الاول وانتى تعلمى انه لا يتحمل المسؤليه ربنا معاكى
حرام عليكى نفسك انتى قضيتى على نفسك بدرى ما تزعلى منى ده تنبل واستحاله هيسعدك ولا هيدفع مليم فى البيت طول ماهو عارف انك بتدخلى فلوس البيت نصيحه اتركيه قبل ما تجيبى اولاد وهتسبيه برضه لانك مش هتقدرى تتحمليه هو والبيت والاطفال