وحيدة ومليش اصدقاء

انا طالبة جامعية في اخر سنة في الكلية،، مشكلتي اني لما دخلت الكلية مكنش معايا اي حد من صحابي بتوع ثانوي و كمان انا كليتي في محافظة تانية و تقريبا مكنتش اعرف اي حد هناك و بعدين اتعرفت على واحدة من بلدي و بقينا على طول مع بعض و اتصاحبنا على بنات تانيين بس هي سقطت في سنة اولى و مبقتش بتيجي الكلية ،، و انا فضلت مع البنات التانيين،،و مع الوقت قربنا من بعض و دلوقتي دي خامس سنة ليا في الكلية و كان كل ما الوقت بيعدي اكتشف غيرتهم من بعض و كلامهم على بعض في اوقات كتير و لكن انا كنت في منأى عن الحوارات دي،،كانت مشكلتي الكبيرة اني كنت بحس غربة جوايا من ناحيتهم و مبحسش اني مبسوطة معاهم معظم الأوقات،،و كان الكلام اللي بيقولوه على بعض قدامي و تعليقهم على تصرفات بعض بيخليني اخاف و اكون حريصة اوي في تصرفاتي معاهم خوفا انهم يقولو عليا حاجة انا كمان،، و دلوقتي انابقضي تقريبا كا وقتي في الكلية مع واحدة بس منهم بحكم ظروف الدراسة و هي معايا في السكشن بحس ان لما بحكي حاجة حلوة حصلتلي في عنيها انها مضايقة او بتقارن ده مع نفسها،،لو شافتني بتكلم او بهزر مع ناس تانية و هم ما شاركوهاش في الكلام او مثلا حد بيحكيلي حاجة ليا تضايق و تقول انا همشي انا و كدة رغم ان هم لو عملو كدة معاها هي بتبقى مبسوطة و مبتسألش فيا و بالعكس اوقات بتتعمد تسيبني قاعدة لوحدي مثلا و تقوم تهر مع بنات تانية في السكشن مثلا و لو لقتني بسلم على حد متعرفوش لازم تتعرف عليه حتى لو كانت قبل كدة مبتطيقش البنات دي او كدة،،انا تعبت من أسلوبها ده و بقيت مش عارفة اتعامل معاها و بحس ان انا مش مرتاحة و مخنوقة و هي قاسية اوي لما بتلاقيني حزينة او مكتئبة بحس انها بتتعمد تضايقني اكتر ،،والله عمري ما أذيتها و بالعكس جيت على نفسي اوقات كتير عشانها و ربنا شاهد،،و انا علاقتي بقت ضعيفة اوي مع صحابي بتوع ثانوي بحكم الكلية و كدة ،،انا حاسة بوحدة فظيعة و مش عارفة ليه بيحصل معايا كدة؟؟

مشاكل وحلول ذات صلة

• تشتت ذهني، قلة الحظ واكتئاب
• حبيتها واتقدمتلها واهلها وافقوا وهي لا
• بعد عنى من غير ما يقولى اى حاجه
• مستغربة ومصدومة من تصرفات جاري
• هل انا فعلا معقده ومريضه
• الكسوف من البنات هل يمنعني من الزواج
• انا فقيرة بمجتمع غني