مشكلتى انى من البداية ماتربتش على التفاهم كل ما اتذكره هو الخناقات من بابا واخى الاكبر وطلعت الى سن الرابعة والعشرين معقدة لا ارغب فى الزواج حتى لا اقع مع شخصية عنيفة فى تعاملتها مثل ابى حاول اخصائى معالجتى سنتين من هذه الافكار وكنت بحب ابى جدا لكن كلما اكبر لا استحمل عنفه وقسوته فى التعامل واصبح لدى ستة وعشرين عاما فكنت ارفض كل من يتقدم لى لكن فى لحظة بعد علاجى وافقت على شخص ودخل بيتنا وارتباطنا ولكن لم تكتمل فرحتى لان العريس بعد ان جعلنى احبه واتعلق به قرر فسخ الخطبة ليه لا اعرف وبعد شهرين خطب غيرى وواحدة اكبر منه بست سنوات وممتلئة جسما عنى وحاول مرارا يتصل بى ويفهمنى انه عايز يرجع لى ولكن فى كل مرة اكتشف حقيقته انه فقط يلعب بمشاعرى ونقطة ضعفى حبى ليه وهذه الخطةبة مر عليها اكتر من سنة ونصف وبعد الخطوبة الاولى تقدم شاب لخطبتى ولكن عكسه تماما لا يعرف اى شئ فى الدنيا من سوء ولديه اخلاق وارتبط به فى شهر سبعة اللى فات بس الخطوبة لم تستمر الا شهرين وهو انسان طيب بس وجدت ان جوايا جرح كبير من الشخص الاول خلانى مش قابله حد بس لما تركته قعدت مع نفسى وتذكرت ما كان الشخص يفوله لى مش هخليكى تتجوزى هتفضلى قاعدة جمب امك ونظرت لنفسى على وجهى البشوش اصبح مكتئب جدا من كتر الحزن على شخص دمر نفسيتى نفسى اخرج من الحالة النفسية دى بس ارادتى ضعيفة فكرت الجا انى ادخل كلية ادرس لغات لعشقى لها ولانها رغبة لم احققها بس ارادتى ضعيفة جدا ومحتاجة المساندة لانى بجد وحيدة بس افراد عائلتى اصبحوا مليين من حالتى علما بان عمرى الان 28 عام لكن اشعر كانى عجزت وللاسف ليس لى اصدقاء الا اتنين او تلاتة ولا احبهم يعرفوا خصوصياتى
بصي يا قمرايه انتي
فكك من اللي عدي………ونقطه ومن اول السطر بقي
وربنا هيكرمك بحد احسن من اللي قبله واحسن من أبوكي كمان :*
بصي انتي المشاكل اللي مريتي بيها في حياتك ابتداء من ابوكي متخزنه جواكي وعامله لك مشاعر سلبيه المشاعر السلبيه دي لازم تخرج عشان تفضي مكان لمشاعر ايجابيه جديده تدخل اقعدي في مكان هاديء
هاتي كشكول وقلم واكتبي فيه كل المواقف اللي ضايقتك في حياتك موقف موقف وعاوزاكي تفتكري الموقف وتعيشي فيه لغاية ماتطلعي كل الدموع والانفعالات اللي جواكي عيشي موقف موقف كأنه حقيه وخرجي كل اللي جواكي الطريقه دي اسمها حرق المعتقدات دي من اقوي العلاجات النفسيه خدي وقتك ان شالله تفضلي تعملي الطريقه دي لمده شهر او اتنين لكن بعد كل مره هتحسي براحه كبيره
حرام عليك تعملي في نفسك كلهذايااختي الفاضلة خليك مومنةبالله عزوجل وفوضي امرك له واستعيني به في كل لحظةمن لحظات حياتك وانسي ماحصل لك في الماضي تماماوارميه وراءظهرك نهايا وابتدي حياة جديدة ملئية بالتفاؤل والسعادةواترك عنك التشاؤم والاوهام المدمرة واهتمي بنفسك وبادبك واخلاقك وتربيتك الحسنة وتاكدي ان الله بيكرمك ويعوض صبرك خيرا وبيرزقك بالزوج الصالح اللي يخاف الله فيك ويستاهلك ويقدريسعدك
شوفى يا بنت الناس اهم حاجة اليومين دول تحفظى على صلاتك بربنا جدا وقراءة القران والأسعانة بالله ضرورىأوى الكلام ده لازم وسيبها على الله وربنا انشاء الله هيرزقك بأبن الحلال وصدقينى كتير من الأباء بيكونوا قاسى جدا فى بيته بس والله العظيم من جواه بيكون طيب جدا حاول تكلميه براحه وتصحبيه وأدعى ان ربنا يهديه والله الأنسان العصبى ده ممكن تملكيه بس بالهدوء
نصيحة لا تفكري بالماضي فهو لن يرجع
لازم تهتم بجوزك لأنه إذا حس ببرودة مشاعرك اتجاهه رح تكبر مشكلتك لأن رح يعاملك متل ما بعامل أي حدا من أهله ما رح يعملك كحبيبته
كوني له حبيبة يكون لك حبيب
الوردة إذا ذبلت لا تنفعها السقاية
توكل على الله وحبي جوزك واحرصي على سعادة زوجك وعندها ستجدين السعادة
هو انا مش هحاول أقولك كلام يشجعك أو كلام تنمية بشرية بس انا هاخد من كلامك حاجات معينة يا ريتك تركزي فيها , اول حاجة انتي خدتي موقف سلبي من اللي حواليكي بسبب المشاكل اللي كنتي بتشوفيها و إنك مش عاوزاها تتكرر تاني , و رغم الموقف السلبي ده حصل الحاجة اللي مكنش نفسك انها تحصل و اللي انتي خدتي الموقف السلبي ده بسببها أساسا و هي انك ارتبطي عاطفيا بشخص مش كويس حتي من وجهك نظرك و بكدة نستفيد حاجة مهمة اننا بناخد مواقف سلبية نتيجة لتجارب وحشة بتحصلنا في الحياة و بنرجع نبرر المواقف دي علي أساس انها بتحمينا من حاجة في الحقيقة المواقف دي ملهاش أي لازمة و لازم الواحد يتخلص منها و يغير أسلوب حياته و حاولي تدخلي موضوع اللغات و متحطيش في دماغك موضوع الارادة و احتمالات الفشل و سيبيها علي الله و حتي لو في اسوأ الاحوال فشلتي فانتي مش هتخسري حاجة و مين عارف ممكن تطلع جواكي طاقة كبيرة تساعدك انك تنجحي و اوزني الامور بعقل سليم و لو اتقدملك حد مناسب اقبليه و مترجعيش للشخص المختل اللي كنتي اتخطبتي ليه قبل كدة و اعرفي ان كل حاجة ارزاق في ايد ربنا و من ضمنها الجواز او غيره
معلشي مش تزعلي ربنا هيرزقك بانسان كويس انشاء الله وحاولي يكون ليكي اصحاب اكتر من كده واتكلمي واحكي ليهم ومش تخافي من حاجه ومش انتي لوحدك اللي بتحسي بالوحده بين عائلتك كلنا بنحس برضو بالاحساس دا لازم يكون ليكي صداقات علشان هما اللي هيخركوكي من اللي انتي فيه واشغلي نفسك باي حاجه علشان مش تحسي بالوحده ربنا يكرمك انشء الله
بصى ياقمر الرجاله مش زى بعض يعنى فكرت انك ممكن تتجوزى واحد ويطلع زى بابكى دى ملهاش اساس لان محدش زى حد وممكن يطلع كويس وممكن يطلع وحش وفى جميع الاحوال الحياه تجارب واحنا بندخلها وبنجرب يعنى مفيش وحده اتجوزت وهى عارفه ان جوزها هيعاملها حلو بعد الجواز ولالا بس ده هى بتكتشفه بعدها وما عليها سوى حسن الاختياريعنى تختار رجل من عيله كويسه اخلاقهم كويسه وتتخطب وتحاول تفهمه وهكذا فمتعقديش نفسك زى مابابكى صعب وقاسى فى ابهات حنينه زى والدى ربنا يخليهولى وهكذا الازواج تانى مشكله سبب تعلقك بخطيبك الاول هو انه الراجل الوحيد اللى امنتيلو واللى دخل حياتك مش اكتر انتى اتخطبتى فتره صغيره فاانا لااعتقد ان حالتك دى حب ممكن تعلق والتعلق بيخف مع الوقت خصوصا لو كنتى صاحبه اراده قويه انتى صغيره وبكره تتخطبى تانى ووتدى نفسك فرصه وتحبى وتتجوزى وتخلفى ولما تخلفى عيالك هينسوكى اى عذاب او اى جرح من اى شخص حتى من جوزك ساعتها هتقولى عيالى وبس وممكن ربنا يكرمك ويبقا ابناء وزوج كويس ربنا يوفقك ويسعدك