ياجماعة انا مشكلتى بتتلخص في الآتى:
انا الحمد لله بنت أشرف اى حد ،، وده كلام الناس الحمد لله.
من حوالى 3شهور اختي جابتلى عريس من طرف صحبتها
صحبتها دى تبقى خالة العريس ،، وكان طلبو انها تكون رفيعة وانا وقتها كنت مليانة فقولتلهم قولولو طلبو مش عندنا – فالمهم هوا كان طلبو اننا نتقابل برا البيت وانا قولت البيت احسن بس قالولى متقطعيش برزقك انتى بس وانزلى قابليه ،، المهم انا نزلت ومكنتش فكراه هيعجبنى وقولت اكيد هيطلع زي الى قابلو ومش هحبو
بس الى حصل كان غير كده خااالص قابلت شخصية 10 على 10 بصووا مفيهوش غلطة ،، لدرجة ان انا وانا قاعدة معاه قولت في بالى “ايوةةةة هوا دا بالملي الى انا عيزاه يبقى جوزى” وكنت فرحانةةة جداااا لأنه هصوره طبق الاصل مني وكنا مرتاحين ومتفاهمين على كل حاجه وانا كنت متأكده انى عجبتو لانى من خلال معرفتى بولاد ايام الكلية مع انى عمرى ماصاحبت بس زمايلي كنت ببقى فاهمة دماغهم انهم بيتسلو ونيتهم مش كويسة وكده لكن العريس ده كنت متأكدة اننا هنكمل!!!!!!! – بعد ما مشيت تانى يوم كان ردو ان انا بنت جميلة ومتدينة واخلاقي عالية وطيبة اوووى بس مشكلتها انها مليانة وانا عايزها رفيعة فالمهم قال ل خالتو طب سبينى اصلي استخارة وارد عليكي بكرة،، جم تانى يوم كلمته قالها لأ انا عايزاها رفيعة قعدت تقنعو وانى ممكن اخس واختى كانت زيي مليانة وبقت ناو رفيعةةةةة جدااااا ف كان مصمم برده ان لأ عايزاها رفيعة – محسسنى اننا في 1933م مش كأننا في 2014 وكل وسائل الخسية بقت سهلة ومتاحة !!!
المهم انا اتحديت وقولت طب هخس وهتشوفو كانت بتبجي عليا ايام مش باكل فيها وكنت اقول لنفسي معلش لازم استحمل مش هتيجي حاجه جمب فرحتى بيه لما يتقدم ،،، وهكذا.. وكنت بتمشى يوميا اكتر من 3ساعات ورياضة ايه وجيم ايه والله ربنا الى يعلم عملت ايه عشان في شهرين بس اخس 17 كيلو ،، والناس والعيلة وكل الى شافونى انبهرو وكان فرحانييين بيا جدا ،، كنت كل ما اسمع اغنية اتخيل واحنا بنرقص عليها في خطوبيتنا وكنت بشوفو في كل حاجه المهم جت خالتو شافتنى بعد الخسية وطلبت تاخد صورى وكانت مبهورة بيا ف طبعا انا وفالبيت عندي فرحنا جدا وتخينا انها اكيد عيزاها عشان توريها لعريسى قريبها ،، جت بعد اسبوع ف قالت لاختى انا جايبا ليها عريس فاختى قاللتلها وفين الاساسى قاللتها لا ما هو من فترة شاف واحدة رفيعة ومقتنع بيها وباباها مسافر ولما يرجع هيقرأو الفاتحة طبعا انا سمعت وعيااااط عيااااط عيااااط مش عايزة اقولكم ،، بجد حسيت ان فرحتى اتكسرت ومكملتش انا معاكم انى خسيت لنفسي ومستقبلى الى جاي بس برده – كان نفسي هوا الى يجي ونكمل ويخطبني ،، مع العلم ان اختى بتخبي عليا حاجات عشان مش عيزانى اتعلق اكتر زي مثلا الى عرفتو بالصدفة انهم مش موافقين بيه اوى لان طلباتهم كتير وهوا ع قد حالو بس كل ما اسألها طب خطب ولا لسه مترداش تقول ف انا محتاره هل تمموا الموضوع ولا هل سابها ..
انا تعبانة جداااا وساعات افكر اتكلم مع خالتو الى هيا صاحبة اختى واحلفها ماتقولها حاجه بس برجع اخاف عشان خاطر مصغرش اسرتى ،، وبعدين ارجع اقول لألألأ انا هروحلوا هوا على طول مكان شغلو او الكورس بتاعه واتكلم معاه وافهم منه ايه الى حصل بالظبط وافضفض معاه بس برجع اخاف واقول مهما حلفتو ايش يضمنلى انه ميقلش لخالتو وفضحتى تبقى بجلاجل !!!!! ياجماعة الله يخليكم ارشدوني اعمل ايه انا تعبت نفسيااااااا جدااااااااا ومش عارفة استقر بقالى اكتر من 3 شهور اهو وجالى بعدها عريس بس يادوب كلام امهات بس عالفون لكن مفيش اي خطوة جاده ومع ذلك انا مش فرحانة بيه خااالص لانى مش ببطل تفكير في الاولانى وبجد دعيت وصليت ومخلتش حاجه معملتهاااااش.
ارجوكم انقذونى انا بقيت بدعي ع نفسي اموووت عشان اخلص من عذاااب التفكير والتعاسة.
ارجوووكم انا زي اختكم دلووونى اتصرف ازاى
وآسفة على الاطالة غصب عنى عشان الموضوع يبقى متكامل
في الانتظاااار
1000 شكررررررررر
مشاكل البنات قبل الزواج
بفكر في العريس الاولاني وحابة اكلمه
اضيف بتاريخ: Monday, June 16th, 2014 في 05:00
كلمات مشاكل وحلول: الزواج, بنت, عريس
يمكن هو ما يستاهلك ولا يغرك شكله من الخارج اكيد من جوا يطلع زبالة لانو يعاملك زي ما لو كان بسوق الغنم يريد معزة سمينة والا صغيرة ولا راعي شعورك كانسانة ولا فكر الا في جسمك قبل كل شيء هذا النوع من الناس بعد سنتين يرميك في الشارع , لكن الشقى ابتعد عنك لا تعيطي ولا تندمي , كان ممكن تكون حياتك معاه كلها جحيم سنة واحدةبالكثير والباقي عذاب وهم وشقى ,
بصى يا بنتى مش شرط انه بان واحد كويس يبقى هو فعلا كويس وطالما تفكيره سطحى اوى كدة يبقى تتمسكى بيه ليه! …… انا فهماكى .. انا جالى واحد تحفة زى ما قلتى مفيهوش غلطة وبيفهمنى من اقل كلمة واتعاملت معاه لمدة 3 اسابيع بس ظهر غلطات ^_^ مش غلطة ما تندميش على حاجة ولو ربنا كاتبهولك هييجى غصبن عن مين … بس ما تقللييش من نفسك وتروحيله … ربنا كاتبلك اللى فيه الخير .. وربنا يسعدك ويديكى واحد كويس زى ما بتتمنى ^_^
الي ميرضاش ياخدك علي عيب من وجهة نظرة ميستهلش انك تفكري فية وتضيعي في الوقت
حبيتي تاكدي انه واد سافل وبلاعقل ولاتفكير ولايستاهلكيش ابدا احمدي الله انكم عرفتوحقيقته المريضة وعقليته الساذجة مايعرفش ان الدين والاخلاق اهم حاجةفي اختيارالزوجةوشريكةالحياة خليه يغور داهيةماترجعه واهتمي بحالك وماتقلقي ابدا ربنابيعوضك ويكرمك باحسن منه الف مرة ولادالحلال كثار وانت الف من يتمناكي والانسان باخلاقه ودينه مش بجسمه ولاتخنه اونحافته دي حجج الناس المعتوهين والمنحطين وربي يسترعليك ويكرمك بالزوج الصالح اللي يستاهلك ويقدرك
بصراحة انتى غلطانة انك قابلتية برة البيت المفروض هو اللى ياتى الى بيت اهلك ويشوفك
ثانيا لاتنزلى من قدرك امام اى عريس ولاتكونى سلعة رخيصة العرسان كتير ونصيبك سوف ياتيكى لحد بيتك ولاتتعجلى واياك ان تخبرى خالتة او اى احد انك عاوزة تقابلية ولا حتى تقابلية حتى لو شافك فى الشارع كونى عزيزة اللى مثل هذا لايصلح يكون زوج لكى (من الاخر)
اختى..
انتى اكيد بتئمنى بالقداء والقدر والنصيب لو مكتوبلك نصيب معاه لو اتقدم لاالف واحده هايكون ليكى لو مش من نصيبك لو هتعملى المستحيل مش هايكون ليكى … ارضى بالنصيب ومع ذالك ما ترضيش بأى شخص وخلاص لاازم عن اقتناع…. وعلى فكرة اغلب الشباب مش كلهم بيفضلو البنت الرفيعه مش التخينه …. وبحييك على عزيمتك فى موضوع التخسيس انتى قويه وعزيمتك قويه…. اولا واخير نصيب … والله يوفقك ويبعتلك ابن حلال
أنا أسف على الأخطاء الأملائيه أنتى أذا روحتى ليه هتنزلى من نظره وأدعى ربنا سبحانه وتعالى وربك يجيب الى فيه الخير وأبقى تطمنينا على الى وصلتى ليه
والله العظيم أنا حاسس بالى أنت فيه وعارف أد أيه نفسيتك تعبانه وعملتى رجيم وكان عندك هدف وكنتى بتتخيل بيها فى كل لحظه بمعنى أصح مشيتى امورك كلها وأكنه ليكى والله أحساس صعب بجد عارفه مين الى يخفف عليكى الموضوع ده الرحمن جل جلاله روحى لربنا وفضفضى ليه بكل حاجه جواكى وعيطى واحكيله على كل حاجه جواكى صدقنى هوا ده الطريق الوحيد الى هيخفف عنك لأن ربك ده سبحان جلاله عمر ما عبد هيروح ليه ويفضفض بكل الى جواه ويسيبه أنه الرحمن وسيبها على الله قربى من ربنا وأدعيله وهوا الى قادر على كل شئ وأوعى تروحى ليه أو لخالته لأن لو عملتى كده هتنزلى من نفسك وبل وممكن تنزلى من نظرى صدقنى حلك ألجائى لربك هوا الى هيخفف عنك وهوا قادر على كل وعمر ما تروحى لربنا وهتخسرى بل أنتى الكسبانه فى كل حال صلى ركعتين لله وفضفضى معاه بكل الى تعبك وأدعليى وبأمر الله سبحانه وتعالى هيجيب الخير وييسر الأمور أنشاء الله وربنا يكرمك