جرح تانى بسبب حبى الاولانى

يا جماعه انا شاب عندى 23 سنه كنت بحب وحده اوى لفتره طويله وخطبتها لكن ما حصلش نصيب للجواز لانها كان عندها طباع كثيره مش كويسه خلتنى ما قدرتش اكمل معاها يعنى بمعنى اصح ما فهمتنيش ومش هى دى اللى انا عايزها

المهم بعد كده لما قررت اخطب من تانى لقيت بنت قريبتى واحنا قريبين من بعض اوى ومن خلال كلامنا مع بعض لقيت ان هى دى البنت اللى انا عايزها فيها كل الصفات اللى انا عايزها وتفكيرها نفس تفكيرى فى موضوع الحب والخطوبه والجواز وايضآ من كلامى معاها لقيت ان كل المواصفات اللى هى عايزاها فى الانسان اللى هتتجوزه متوفره فيا وبدقه الا صفه واحده ودى اهم صفه عندها وهى انه ما يكونش ليه ماضى يعنى ما يكونش حب قبل كده طبعآ انا اول ما سمعت الكلام ده اتصدمت وحسيت انى انجرحت لتانى مره

بعد ما قلت خلاص لقيت اللى هتسعدنى وتفهمنى وتعيشنى الحياه اللى انا نفسى اعيشها

وقلبت عليا المواجع وحسستنى ان ماضيا بقى عقبه فى حياتى

طبعآ هى ما تعرفش انى بحبها وعايز اخطبها عشان كده حاولت اتناقش معها فى موضوع ماضى الانسان وقلتلها ان ماضى عن ماضى يفرق وان المعامله الكويسه من الطرفين بتنسى الانسان ماضيه والانسان مش بالماضى يعنى ممكن اللى ليه ماضى يسعدك واللى مالوش ماضى ما يسعدكيش قالت بردوا لا انا عايزاه يكون مالوش ماضى خالص قلتلها انتى ممكن يبقى ليكى ماضى فى يوم من الايام هل معنى ذلك انك فيكى عيب وبعدين ماضى الراجل مش عيب قالت لا انا عندى عيب عشان هو عمره ما هينسى حبه القديم وممكن يبقى معايا وبيفكر فى حبيبتوا الاولى وكده يبقى بيخونى ومش بيحبنى اوى زى ما بحبوا

قلتلها بس مفيش انسان كامل يعنى ممكن يكون مالوش ماضى بس هتلاقى صفات تانيه مفقوده فيه وممكن يكون ليه ماضى عادى بس فيه كل اللى الصفات التانيه اللى انتى عايزاها فالسعاده الزوجيه مش بالماضى وبس لكن بتفكير الانسان ومعاملتوا وكلاموا الحلو وغير ذلك المهم فى اخر المناقشه ماقدرتش اقنعها بالموضوع

وانا دلوقت محتار عايز اتقدم لها بس بعد اللى سمعته مش قادر مع انى شايف ان انا اللى هسعدها وان هى اللى هتسعدنى وكمان الموضوع ماشى فى صالحنا يعنى اهلى موافقين عليها واهلها حسيت من كلامهم قبل كده انهم هيوافقوا عليا وكمان انا صليت استخاره ولقيت نفسى مرتاح لها وربنا محببنى فى الموضوع لكن المشكله فيها هى

ارجوكم تقولولى اعمل ايه ابعد عنها بس صعب الاقى وحده زيها فى مواصفاتها

ولا احاول معها تانى طب هقولها ايه تانى بعد اللى قلته وخايف احسن تحس بحاجه ويبقى شكلى وحش قدامها

انا بجد مخنوق وحاسس انها لو ما بقتش من نصيبى خلاص هتجيلى عقده نفسيه من البنات والحب والجواز لان فى المره اللى فاتت والمره دى كنت بحب بجد ونيتى كويسه وعايز اسعد اللى اتجوزها واحافظ عليها واعيش معاها عمرى كله بس يظهر انى حظى وحش

مشاكل وحلول ذات صلة

• انا السبب فى تعذيبى انا وخطيبتى
• اهل حبيبتي عايزين شقة في القاهرة
• ماما عايزة تفرئني عن الحب الاول
• يارب إذا كان الموت خير لى فاميتنى
• فرق السن بيني وبين خطيبي 18
• خطيبى مظلوم معايا بسبب طباعى معاه
• انا عمري ما حبيت ومش عارفه احب