سنه و نص ارتباط بعدين سابني

انا بنت عندي ٢٠ سنه حبيت واحد من النت مع اني كنت في الاول رافضه المبداء خالص، المهم هو كلمني و قالي انه معجب بيا من زمان. شكيت فيه بس قالي انه عنده استعداد يكلم اهلي و فعلا كلمت عمي بما اني قريبه جدا منه بس قالي ابعد عن الشخص ده لأنه كداب. مسمعتش كلامه و فضلت اكلم الولد ده لحد ما بدأت احبه و بعدها جه قالي انه ٢٥ سنه مش ٢٤ و اني اقدر اسيبه لو ده مضايقني مع العلم اني كنت ١٨وقتها. انا عايشه بره مصر و عشان كدا قالي نتقابل لما تنزلي. قابلته و اول حاجه عمالها كانت انو شدني عشان يبوسني، انا خوفت جدا لدرجه اني صرخت بس ولا فرق معاه و باسني و دي كانت اول مره واحد غريب يلمسني. بعدها علي طول روح من غير ما يتكلم معايا حتي. كنت مصدومه مش قادره استوعب اللي حصل. لما روحت كلمته و اتخانقت معاه قالي انه بيحبني اوي و مش بيقدر يشوفني و يمسك نفسه. تاني مره اتقابلنا معملش حاجه. جه يوم العيد قالي لازم نخرج و اتفاجئت انه جايب صاحبه معاه و غصب عليا اركب العربيه و ركبت روحنا الكورنيش شويه و احنا راجعين قعد جنبي و فضل يرخم عليا و يطول ايده و كل ما اقوله صاحبك هايقول عليا ايه يقولي مش بيبص و باسني وحضني مره و ٢ و ٣ و انا مش قادره امنعه. قبل مااسافر خرجنا تاني بس لوحدنا و وداني السينما و زي كل مره مع فرق انه غصبني ابوسه. كنت بسمع كلامه في كل حاجه عشان حبيته جدا و مكنتش اقدر على زعله. قبل ما يشوفني طلب مني صور ليا بشعري في الاول (انا محجبه) و اتنازلت عشان ميزعلش. بعدها لقيته بيقولي عاوز صور ليكي بشورت اصلك واحشاني طبعا ماوافقتش و فضل يضغط عليا لحد ما عملت كده و كنت ومازلت بحتقر نفسي بسبب كل ده. كنت بقول لنفسي انه كده كده هيبقي جوزي و هو كمان كان بيقولي انه عارف قد ايه انا شريفه عشان كده هيتجوزني و لو كان شك في شرفي كان هينام معايا ويخلع. كلامه كان كتير بيصدمني و ارجع ادورله ع مبرر لاني بحبه.
وغير كل ده فهمني انه كان في كليه واكتشفت انه كان في معهد و حجات تانيه كتيره كذب عليا فيها، مع ان اهله متدينين جدا جدا.. ماكانش ابدا بيتصل بيا حتي و انا في مصر كان يقولي مش بتتصلي ليه ابقي كلميني و لو قلتله انت الراجل مفروض انت اللي تعمل كده يقولي لأ، كنا يوم ما نتخاصم اجري اصالحه مهما كان غلطان لحد ما جبت اخري . اتخاصمنا و كنت غلط فيه كلمته عشان اصالحه مردش قولتله كفايه لحد هنا و انا بره حياتك، فكرته هيمسك فيا لقيته ما صدق، زعلت بس كنت في نفس الوقت مبسوطه لأني حاولت اسيبه كتير و مقدرتش. جه بعد يومين كلمني و شتمني فا شتمته. كدا كدا الموضوع كان خلص بالنسبالي. بعدها بكام يوم بعتلي اس ام اس “ده كان اختبار ليكي و طلعتي انسانه زباله الحمد لله اني عرفتك ع حقيقتك و روحي شوفي واحد شمال زيك يحبك” و عملي بلوك من كل حاجه.
انا بجد مش عارفه حبيت الشخص ده ازاي، حتى اصحابي حاولو كتير يقنعوني انه مش كويس ولا نضيف بعد ما عرفو انه كان شغال في شرم الشيخ وكمان كان يعرف بنات كتير قبلي و يوم ما قلتله عايزه الباسورد للفيس اتخانقنا مع ان كان واخد بتاعي. كنت هبله و سزجه .
دلوقتي انا مش عارفه ازاي هيجيلي جراءه اكمل مع واحد تاني بعد ماهو لمسني. حاسه اني هاكون بخدعه و حتى لو مسألنيش عن اللي فات مش قادره اسامح نفسي. انا بصلي و عارفه ربنا و عارفه ان اللي حصل مش بسيط عند ربنا و توبت و بدعي ليل نهار ربنا يسامحني.
انا مش عارفه احدد هو كان فعلا حبني ولا لأ و لو كده ايه اللي خلاه يستمر معايا كل ده ؟ هو انا كده بقيت شمال خلاص ؟؟

مشاكل وحلول ذات صلة

• خائن ولكن لا أستطيع نسياته
• حاسس ان هيجيلي اكتئاب بسبب التفكير
• شاب مصري عرفته يهددني بنشر صور لي
• حبينا بعض على النت ورجعت قالت خلينا اخوات
• مش عارفة اخد قرار اسيبه ولا هارجع اندم
• حبيبي تركني وصديقتي ستفضحني
• ماذا افعل للتخلص من الحب الاول لكى لا اظلم خطيبتى