مشاكل الحب الفاشل

حبيته وشخصيتي اتغيرت وحاسة اني بخون اهلي

كان يا مكان كان في الزمان في واحدة أعرفها كانت تعرف واحد محترم جدا جدا الصراحة شوية شوية حبو بعض كانت تفرح لفرحه تزعل لزعله بتحكيله على كل حاجة كبيرة وصغيرة ، ولكن حصلت بعض المشاكل فالحب انهدم وسابو بعضيهم لمدة معينةكانت اشد واصعب اللحظات اللي مرت بحياتها ، مكنتش بتنساه لحظة واحدة ، خياله عمره ما فارق خاطرها ، كانت بتفتكره في كل وقت وكل مكان : صاحية نايمة قاعدة واقفة بتذاكر بتصلي فاضية مشغولة ، مكنتش عارفة تطلعه من دماغها، كانت بتسرح سعات وتفكر فيه ، تسرح معاه ومع كلامه لدرجة ان في مرة المعلمة بتاعتنا هزقتها ( بهدلتلها يوميها مقولكش خصوصاً انها كانت بتراجع وهي مكنتش هنا خالص ولا كأنها معانا في الواقع ،كمان دي كانت اكتر سنة تغيب فيها بالشكل دة ، يعني بالعربي البسيط كانت واقعة في حبه لشوشتها خآلص لأنه تقريبا حسب كلامها يعني كانت بتشوف فيه معاه حنية الاب والام والاخلاص ( المهم اني شكلي اندمجت في الحكاية انا كمان ) وبعدين هو افتكرها تاني كان عايز يرجًٌع القصة اللي كانت مابينهم ، فهو كلمها تاني وحاول يوصلها ومعلومة زيادة :هي اصلاً كانت هتموت وتتكلم معاه ، تتطمن عليه ، تعرف عنه اي حاجة بأي وسيلة ،ـ ونسيت اقولك ان من ساعة ما سابها وهي بتحاول تغير من نفسها ولغاية الآن بتحاول تبقى احسن واجمل واحدة في الدنيا قلباً وقالباً ، بتحاول تغير اي حاجة مكنتش بتعجبه عشان لو رجعلها تبقى جديرة بحبه ليها ( بسم الله ماشاء الله انا بحسد الراجل دة)
لما كلمها تاني كانت هتموت من الفرحة ولكن ………… عملت بعض المشاكل معاه من نحيتها رخمة شويتين ، عشان ميرجعوش لوجع القلب اللي حصلهم تاني ، ولكن بعدما رأت كم العذاب والجراح اللتان تذوقاها من تلك الحكاية ، ندمت لأ بجد ندمت ندمت المرة دي بجد واندهشت لأنها في منتهى منتهى الصراحة مع اي حد وكل الناس فازاي حبيبها اللي ملك روحها واستحوذ على عرش قلبها تخدعه بالشكل دة ( لأ انا هبكي نكد بعيد عنك ) وخصوصاً لما كانت السبب في مرضه ( مرض مش لطيف ابدا بصراحة ) المهم انها ندمت وتابت توبة نصوحة وحرمت و وعدت نفسها مش هتعمل كدا تاني معاه ولو حتى بهزار او بكلمة
الملخص : اتكلمو مع بعض تاني عادي جداً لكن كان شوية عايز يعترفلها بحبه ، وسعات بيحاول يتأكد من حبها ليه “كانت تصده شوية ، تتهرب من الموضوع شويتين كدا يعني “|(بصراحة انا حسة انها تقول للعالم كله وتصرخ بحبه بس هبلة بقى نعمل ايه) هي مش عايزاه يحبها تاني ولا هي تغامر بيه في قصة حب /هي عايزاه يفضل معاها على طول من غير جدال في الموضوع دة ، بتقول (هي اللي بتقول )ان كفاية عليها انها اكون مطمنة عليه (يخربيت الحب ) ويكون نايم مش زعلان منها ولا من اي شئ تاني
هي عايزة تبقاله الصديقة المخلصة والاخت الطيبة ، لكنها في صراع مستمر داخلها ،نفسها تنزل تاخد رصاصة الراحة الابدية “الــــــــمــــــــــــوتــ” او تعترف بحبهما لبعض ودة اعتقد بعيد المنال لكن مش مستحيل
المهم انها خايفة من حاجتين:- نامبر وان :ان ممكن يكون دة خيانة لثقة اهلها (بصراحة من رأيي الشخصي ان الموضوع مش كبير للدرجة دي ) وممكن يكون دة حرام من الاساس
نامبر تو :انها خايفة انه يكون مجرد حب مراهقة عادي جدا هيمشي ويروح لحاله ويمكن يكون مجرد تجربه شوية وهيبعد عنها وظروف الحياة تاخده وهي مش عايزة تتعلق بيه زي الاول
ومعلومة اضافية :هي استخارت ربنا كتير جدا جدا (هي اللي بتقول ) اذا كانت تكلمه وتستمر معاه تاني ولا لأ ، وبردو بتبقى عايزة توصله وتكلمه
فهي عايزة تعرف اذا كان دة اختبار من عند ربنا مثلاً،أو ربنا مبارك وميسرلها الامور معاه (خصوصاً انهم باقو سمن على عسل خآآآآآآآآآآلص ولا كأن حاجة حصلت ) على فكرة انا اسفة اني طولت عليكم بس انا اللي حصل معايا كل دة انا اسمي ن*** وهو *** المشكلة انه من محافظة وانا محافظة تانية خالص والمسافة بعيدة جدا جدا جدا . دلوقتي انا بكلمه فون كل اسبوع تقريبا وبكلمه عالياهو والفيس لما يكون فاتح وانا فاتحة بمحض الصدفة انا اتغيرت اوي مبقتش ** بتاعة زمان الهادية الرزينة الحكيمة اللي تقدر تتحكم في نفسها بقيت عصبية جدا وبقيت سوري في اللفظ سافلة اكتر بعيدا عن التكلم مع الشباب وكدا بس بقيت بفكر فيهم فعلا يعني ببقى عايزة اكون احلى واحدة والشباب كلها تقول اني احسن واجمل واحدة انا عمري ما كنت بالسطحية دي انا عمري مكنت عصبية ولا صوتي عالي ولا كنت بعترض على اي شئ زي اليومين دول المشكلة الاكبر والكبيرة اوي يعني اني معنتش بصلي زي زمان معنتش بقرب من ربنا كمان حاجة معلش انا اليومين لما بكلم معاه بيقولي اني متغيرة اوي وهو حاسس بالشئ دة بيقولي ان **** بتاعة زمان الطفلة البريئة المحترمة وحشته بيقولي اني اتغيرت للأسوء وللأسوء جدا مش عارفة اعمل ايه ارجوكم ساعدوني

مشاكل وحلول ذات صلة

اضيف بتاريخ: Saturday, March 3rd, 2018 في 15:47

كلمات مشاكل وحلول: , , , ,

ردود to “حبيته وشخصيتي اتغيرت وحاسة اني بخون اهلي”

  1. ابوالبتول
    09/04/2018 at 20:49

    شوفي يااختي العزيزة قرات قصتك كاملة وتالمت جدا لما يحدث لك والى ماوصل عليه حالك الذي لايسر عدو ولاحبيب ولافي بنت محترمة تتمنى ان يكون ده هو حالها ماتزعليش من صراحتي لاني لااحب اجامل احد ولا انافق ابدا هذا هو ديدني في الحياة نعم انت غلطت كثيرا في حق نفسك وفي كرامتك وفي حق اهلك وسمعتهم وكرامتهم وخنتي ثقتهم الكبيرة اللي اعطوكي اياها للاسباب التالية 1- اقمت علاقة مع الشاب سوا من خلال النت او الموبايل دون رابط رسمي ودون علم الاهل 2-اي علاقة بالشكل ده تكون نهايتها الفشل ومابنى على غلط فهو غلط في النهاية 3- ماتعرفيش ان الحب الحقيقي يكون للشخص اللي يرتبط بك رسمي من خلال الخطوبة او الزواج وبعلم ورضا وموافقة من الاهل علشان ربنا يبارك لهم هذا الارتباط ويؤفقهم ويسعدهم طوال حياتهم 4- لم تستفيدي من كل ماحصلك او لغيرك من البنات اللواتي يقمن علاقات مع الشباب من وراء الاهل وبرضو مستمرة في تلك العلاقة وسوف تندم على كل تصرفاتك دي المحرمة والغير اخلاقية انصحك بالتوبة الصادقة لله تعالى وقطع علاقتك بهذا الشاب او غيره من الشباب وتحرصي على الحفاظ على دينك وخلاقك وشرفك وعلى سمعة اهلك وكرامتهم وتقلع عن تلك السلوكيات المحرمة والغير اخلاقية وهي التكلم مع الشباب والتعارف عليهم وتحمدي الله عزوجل انه سترك وحماك من هذا الشاب ولم تتورطي معاه في العلاقة الى علاقة جنسية اولم يحصل بينكما شي من هذا القبيل ارجعي لربك يابنت الناس وتوبي اليه قبل فوات الاوان واستغفريه واصلح من حالك والتزمي بالاخلاق والتربية والادب والاحتشام فالمراة شرفها غالي جدا اذا فرطت فيه فسدت واصبح لاقيمة لها ومكروهة من الجميع ولن يقبل احد بالزواج منها والتفكير فيها وتاكدي ان البنت المحترمة والمؤدبة ابدا ماتعملش كدا حتى لو تموت واياك ثم اياك والجلوس على النت فكل البلاوي والمصايب منه واحذري فالشيطان لم يمت ويجري في عروق البني ادم مثلما يجري الدم اشغل اوقات فراغك بطاعة الله عزوجل من اداء الصلاة والعبادات في اوقاتها وكثرة الصوم وقراءة القران وكثرة الاستغفار لله عزوجل والدعاء له بان يسترعليكي ويؤفقكي في حياتكي ويكرمكي بابن الحلال الصالح اللي يسعدكي في هذة الحياة وتخلق باخلاق الفتاة المسلمة في كل شوون حياتك والتزمي بالحجاب والعفاف فهو سترة للفتاة في كل حياتها واحسن الاختيار لصاحابتك من البنات يكونوا محترمات وعلى دين وخلاق وابعدي عن مصاحبات البنات الفاسقات الغير محترمات فدول رفيقات السوء ولاخير فيهن ابدا وربنا ان شاء الله يسترعليكي ويؤفقكي ويسعدكي انت وكل بنات المسلمين ويحميكن من كل سوء ومن شر شياطين الانس ويحفظكن ويصلح احوالكن ويهديكن اجمعين

اترك رداً أو حلاً لهذه المشكلة