الحب من طرف واحد

يحبني بجنون ولكن

بسم الله الرحمن الرحيم
السلام عليكم ورحمه الله وبركاته اخواني واخواتي

في البدايه : انا بنت عندي 20 سنه طالبه جامعيه الحمد لله بفضل ربنا سبحانه وتعالا وبفضل تربيه اهلي بشهاده الاخرين واتمني يكون فعلا انا محترمه ومتربيه وعلي خلق والجميع يشهد بده
بس انا مشكلتي ابتدت من يوم ما اتعرفت علي شاب محترم وعلي خلق انا عرفته عن طريق شغل يعني كنت بعمله وكده والانسان ده انا بعتبره اخويه بجد وبحترمه جدا حتي والدتي بتقولي انها تتمني يكون اخويه محترم زي الانسان ده
بس المشكله بقي ان الانسان ده اصبح بيعملني بشكل غريب شويه ممكن اقول لو مكنتش ببالغ انه بيحبني لدرجه الجنون وده اللي انا عرفته وحسيته هو بيوضحلي بستمرار بس انا بحاول ديما ابين اننا اخوات وبس وان مفيش احسن من الاخوات
هو انسان لا غبار عليه والناس بتقول انه كويس جدا بس في مشاكل انا صعب اني اتجاهالها وهي

اولا المؤهل هو خريج 5 سنين صانع وانا جامعيه

ثالثا مجال شغله صعب يتماشي مع مجالي او بمعني ممكن مينفعش والله انا مش متكبره بس صعب ان الواحد ياخد حد اقل منه في كل شئ
ده غير السن اكبر مني ب 12 سنه هو ماديا مرتاح بس هو بيشتغل في مطعم وكمبيوتر ونت بعد الضهر

ولما سئلته عنده استعداد يكمل دراسه ولا لاء قالي انا مش فاضي

انا حاسه بالذنب هو معترفليش بحاجه بس انا حاسه وفي ناس كمان قالتلي انهم خايفين عليه انه يتصدم وانا ديما بقوله احنا اخوات والله بس انا قلبي بيوجعني عليه جدا رغم اني لا دفعته انه يحبني ولا لمحت حتي اني بعتبره غير اخ انا بعتبره اخويا والله وصعبان عليا جدا كل ما اكد ان احنا اخوات يضايق وعنيه تدمع بس انا اعمل ايه انا بايدي ايه هو شخص ميتعيبش بس الاسباب اللي انا قلتها تخليني اقول لاء خاصه اني يتقدملي ناس مؤهلا عاليه وانا برفضها علشان مستقبلي :”انا حعتمد علي الله ثم انتم ” بالله عليكم قولولي اعمل ايه ؟؟

اختكم في الله

مشاكل وحلول ذات صلة

اضيف بتاريخ: Sunday, June 26th, 2011 في 13:47

كلمات مشاكل وحلول: , ,

28 رد to “يحبني بجنون ولكن”

  1. بوسى
    14/06/2012 at 18:23

    انا قابلت شخص لاول مرة بس هو بيحبنى جداجداجدا وعايز يعملى اى حاجة هو مقالش انة بيحبنى وكل تصرفاتة باينة وبيجى اى حتة علشانى ومش عايز يسيبنى ابد بس انا الصراحة مش بحبة او بمعنى ااصح شعورى تجاهة عادى جدا زى اى حد بس هو بيحنى جد ف حد يقولى اعمل اية اقولة يبعد عنى او ازعقلة ولا اسيبة ولا اية وخايفة اكون بظلمة ف حد يقولى اعمل اية انا محتارة جدا؟؟؟؟؟؟؟

  2. الوردة البيضا
    03/12/2011 at 00:26

    بسم الله هو ف البداية احب اقولك على نص الحل بعد ما تعرفى ان اهم حاجة انك تستخيرى ربنا الاول بركعتين استخارة والجاى لربنا وقوليله وهو هيدلك ثم ان الموضوع محتاج منك انك تطلبى منه انه يكون شاب مكافح بمعنى اطلبى واشرطى عليه وقوليله انا عايز اتشرف بعلمك وبمخك مش بفلوسك وحاولى تخليه يكمل تعليمه حتى لو علشانك فيه مثل بيقول خد اللى يحبك وما تاخدش اللى تحبه بس ف كل الاوقات لو عايزك يبئا هيكون مستعد انه يكون شخص تعلى بيه مش يعلا هو بيكى لان المسالة مسالة قوامة مش اكتر

  3. مجهولة
    09/10/2011 at 18:22

    شوفي يا أختي اللي يحبك رح تكوني سعيدة معاه و رح يقدملك كل شي عاوزاه و اللي تحبيه انتي و ما يحبكش رح يتعبك بس اتكلي على الله و حاولي أن تحبيه و أطلبي منه الزواج فبعد المعاشرة الزوجية رح تحبيه أنا أؤكد ذلك موفقة

  4. ارحميه وارحمي نفسك
    24/09/2011 at 13:02

    السلاك عليكم
    اولا اللي فيه الخير يقدمه ربنا
    ثانيا ليه كل ده المفروض تطلبي منه يدخل البيت من بابه زيه زي اي حد ولامور تمشي طبيعي واهلك يفكروا وانتي تاخذي قرار ةخذي في بالك ان الدين ولاخلاق والحب الحقيقي والاخلاص صعب تلاقيهم في شخص في الزمن ده ايه يعني المؤهل التعليم في زمنا دي شهادات فقط وهو شاريكي وانتي اللي بايعه الحب ليه فكري انتي بتاخذي قرار عمر
    ثالثا الحب هو السبب في صنع حياه سعيده ورومانسيه خاليه من المشاكل لان الحب بامكانه التغلب علي المشاكل اي كانت حجمها والمؤهل والتعليم ليس قادرين علي صنع هذااااا لان هو تعلم من الحياه اكثر اتمني لكي التوفيق
     

  5. الملاك الحزين
    20/09/2011 at 01:58

    بصى انا هقولك حاجه انتى معاكى حق فى كل كلمه قولتيها وكلامك صح وف ناس كتير بتفكر زيك بس بردوا هقولك حاجه ممكن يكون رغم انه مش معاه مؤهل عالى بس بخبرته فى مجال شغله ممكن تكون زودت ثقافته واحتمال كبير يكون احسن من الى معاه مؤهل عالى لان بردوا الدنيا بتعلم كتير وبردوا ممكن الى معاه مؤهل عالى ممكن يكون مش مكتسب الخبره دى وانتى كمان بتقولى انه مرتاح مديا يعنى كويس من كل حاجه اما الشرط الى انتى بتقولى عليه مش اساسى ابدا وكمان دا معاه مؤهل فوق المتوسط ذاءد خبرته فى شغله وفوق كل دا ودا بيحبك وهيحافظ عليكى ويمكن كمان دى تكون ميزه انه يحافظ عليكى اكتر ياريت تفكرى كويس ومش تضيعى الانسان دا من ايدك عشان مش ترجعى تندمى وربنا يوفقك

  6. صاحبه المشكله
    25/07/2011 at 09:25

    انا بشكرم كلكم وبجد مش عارفه اشكركم ازاي والله شكرا انكم قولتولي رئيكم كل الموضوع انا صعبان عليا قوي بجد بس احنا دلوقتي اخوات ده من نحيتي انما هو كل يوم بيتعب اكتر وانا بجد مش عارفه اعمل ايه عموما الايام اكيد حتخليه يلاقي انسانه احسن مني ولو مكتوب ليا ده حيكون امر الله بس دلوقتي هو بالنسبالي اخ وبس متشكره تاني بجد لكل انسان رد واهتم اشكركم اخواني

  7. مجنون بيكى
    24/07/2011 at 14:33

    هوا بئا المؤهل عائق دلوقتى فى الجواز والارتباط وكده ممكن يكون مؤهلو مش عالى بس يكون على درايا باشياء كتير فى ناس معاها مؤهلات عليا بس فقيرة جدا فى حاجات تانية والراجل بيشتغل ومكافح مش يمكن تلائى معاه حب العمر فكرى بواقعية شويا ولو مش حتقتنعى بيه بلاش منه علشان متجيش تقولى بعد كده دى كانت لعبة بيخا

  8. salah
    21/07/2011 at 06:16

    والله صاحبى ده متعزب جامد جدا وصعبان عليا فانا حاسس بالشخص اللى بيحبك ده فالله عليكى بلاش تعزبيه بس ووافقى انه يجوزك وربنا يوسه عليكم ويرزقكم بالذريه الصالحه

  9. salah
    21/07/2011 at 06:14

    اذا كان هذا الانسان قادر ان يفتح بيت ومحترم فحرام عليكى تعزبيه وكفايا انه بيحبك اوى وقال صلى الله عليه وسلم (من جاءكم من ترضون دينه وخلقه فزوجوه فان لم تفعلوا تكن فتنه فى الارض وفساد كبير )انا لياصحبى ليه نفس المشكله بس هوا اعلى منها فى المؤهل لدراسى بس حالت البنت الماديه احسن من حالت صاحبى

  10. الاخ
    18/07/2011 at 23:32

    الدنيا موقفتش وربنا مش خلقنا علشان ينسانا تفهمى الوضع وكلميه وفهميه وهو هيقتنع وانتى كمان انا واثق لكن برحتك

  11. الاخ
    18/07/2011 at 23:30

    رجاءا تفكرى ف كلامى كويس وتدعى ربنا وربنا يهىء الفرص ودى ارادته بس منعملش الغلط ونقول ترتيب ربنا اوك هستنى ردك

  12. الاخ
    18/07/2011 at 23:29

    انا اخوكى الصغير بس نصيحة بلا ش الجوازة دى لاسباب المؤهل الماديات وغيرها ودة يدل انه مفيش توافق علشان بعد كدة لو اتجوزتوا ممكن لا دة اكيد مش هتتفقوا ولما قصة حب تفشل احسن من جواز ومسئولية مش ادها وتفشل وتهدم بيت كامل دى نصيحتى حكايتك حصلت كتييييييييييييير اوى ونفس كلامى هو اللى حصل وربنا عارف احتياجنا كلنا ولما تسيبيه ربنا هيبعتله شخصية احسن منك بالنسباله وتوفقه وتعيش معاه فى سعادة وانتى ربنا هيرزقك بالشخص المناسب جدا ولو بعد فترة ميهمكش وربنا هيبعت ويوفق وربنا معاكى وقصة حب تفشل احسن من خراب بيوت واطفالك بعد كدة يا عالم يحصل ايه انا محترم مشاعركم بس ربنا ادانا عقل نوزن بيه لانه هيسئلنا بعدين ومش هنعرف نرد ربنا يوفقك

  13. نرمين
    16/07/2011 at 12:27

    كونك تمنتيه يكون ليكى زوجاً. ودعيتى الله لذلك اى هناك قبول من ناحيتك أنه يكون زوجك وهذا شىء مهم جداً فى الزواج(وجود قبول).
    أما كونه ليس لديه مؤهل عال فأعتقد أن له مؤهل فوق المتوسط أى ليست الفجوة بينكم كبيرة.
    أولاُ : يجب أن تخبرية بموافقتك ورضاك بأن تقبليه زوجاً لكى وليس أخاً.
    ثانياً : يأتى ليقابل الرجال أى الأب الأخ العم أى يجلس مع من سيكون وكيلك فى الزواج ويتحدث معه لأن جلوسة مع الرجال سيختلف عن رأى والدتك لأن والدتك لها مقاييس مختلفة و لكن عندما يقتنع وكيلك فى الزواج أى أقصد رجل العائلة سيكون من السهل إقناع والدتك لإنها فى الأول و الأخر هى أم و تتمنى أن ترى أبنتها مع زوجها فى بيتها. و تربى أولاد أولادها وهذ هى سنه الحياه.
    وربنا يوفقك ويكتبلك الخير

  14. على يوسف
    16/07/2011 at 00:32

    انتى فعلا رقيقه المشاعر والاحاسيس بس مشكلتلك فرق الموهل بتتكلمى على اساس فرق عمله لكن اذا كنتى تحبيهوهو بيحبك لا يكون هناك فرق بين العمله اقصد الموهل وحياتكم ستكون سعيده بحبكم لبعض حتى لو انه (أميى)

  15. gyut
    11/07/2011 at 12:47

    حاولى تقوليلوا ان انتوا اخوات بشكل لطيف بشكل ميخاليهوش يتضايق

  16. صاحبه المشكله
    03/07/2011 at 07:49

    وهو كمان قالي انا بقبظ 1500 جنيه في الشهر وانا مبسوط وكل حاجه وقالي لو احنا مكتوبين لبعض وفي نصيب حتكوني ليا مهما حصل اعمل ايه بقي انا مش عايزة اجرح حد ومش عايزة اتجرح ده اول حد اعرفه والله ودلوقتي احنا اخوات اعمل ايه ؟

  17. صاحبه المشكله
    03/07/2011 at 07:48

    انا بشكركم كلكم والله والجميع رئيه جميل بس المشكله انا لما قلت لماما بقي قالتلي لاء هو مينفعكيش وانتي تستهلي احسن من كده ومتسترخصيش نفسك ابدا قالتلي اهله والسن والمؤهل وكمان مش مرتاح ماديا وشغله في المطعم وغيره وغيره متظلموش ماما لانها ام وانا بنتها وهي خايفه عليا ونفسها تشوفني في احسن حال
    بس انا بحبه والله بحبه وعرفت اني بحبه لما لقتني بصلي وبعيط علشان ماما توافق معرفش ليه لقتني بعيط وبدعي وبتمني يكون ليا لو مكتوبلي
    وللاسف قلتله انه انسان محترم واي بنت تتمناه بس انا لاء وقلتله السن والمؤهل ما ينفعش قالي ممكن حد مؤهل ويبهدلك وانا بحبك ومش كل الناس زي بعضها في السن وقالي انه حيفضل اخويا ومش حيسبني واننا حنفضل اخوات وهو مش حينساني وانه موجود علطول ليا وانه مش حيفكر في حد تاني
    ودلوقتي بنتعامل اننا اخوات لان مينفعش ننفصل او ابعد بخوص الشغل اللي بنا طيب اعمل ايه قولولي ارجوكم انا بقول فيها ايه لو قالي حذاكر سنتين لو هو شاريني بجد انا حتجن بجد وماما مش موافقه بتقولي اشمعني انتي متخديش حد مظبوط زيك انتي تستحقي الاحسن يارب ارجوكم قولولي

  18. صاحبه المشكله
    03/07/2011 at 03:15

    أنا بجد بشكركم جدا والله العظيم انا مش عارفه اشكركم ازاي
    وانا اتاكدت اني بحب الانسان ده وخايفه تكون شفقه بس انا لما قلت لماما قالتلي انتي تستحقي الاحسن من كده انتي تستحقي الافضل قالتلي السن كبير والمؤهل مش كويس ومعندوش استعداد يكمل واهله علي قدقهم ماما مش ماديه ولا حاجه بس انا بنتها وانا قلتلها اني معجبه بيه جدا بس ماما قالتلي ده طبيعي لانه قالك انه بيحبك بس انا والله مايله ليه جدا وانا قلتله خلينا اخوات وخلينا اصحاب وانساني قالي انا مش حقدر انساكي ابدا وانتي اختي علطول وعمري ما حبعد عنك انتي اختي وانا موجود وعمري ما حفكر في حد غيرك ولو ربنا كاتب لينا نصيب حتكوني ليا مهما حصل انا مش بحب اعمل حاجه غلط وانا بعامله زي اخ بس انا معجبه بيه جدا غصب عني وماما مش موفقه ابدا بتقولي هو اخوكي وبس اعمل ايه بقي ؟؟

  19. الحائرة
    02/07/2011 at 11:09

    بصي يا بنتي اللي انتي بتقوليه ده كله مقنع و لازم اي واحدة تفكر فيه بس برده فكري من ناحية تانية و ادي نفسك فرصة تحبيه مش ممكن لما تحبيه تتغاضي عن كل ده …. ده انا و الله اعرف اللي متجوزين ناس بمؤهلات عالية و حياتهم جحيم و لو لاقيتي نفسك مش عارفة تتأقلمي مع الوضع يبقى لازم تبقي صريحة معاه فورا و انهي الموضوع

  20. ملك
    01/07/2011 at 18:30

    هو انتى هتتجوزى اهله المهم هو كويس خلاص

  21. حابس ابليس فلكيس
    01/07/2011 at 11:36

    يلي عجبني ان انتي بنت عندك احساس ما هان عليكي هذا الشخص انامن جهتي بأيدو ان يعشقك
    يلي بيشتريك اشتريه ويلي ببيعك بيعوووووووووهذا هو الحل الاكيد

  22. انا وبس
    01/07/2011 at 09:06

    ربنا معاااة والله هو فى احساس محدش حاسس بىة خالص غيرك انت انا شاب برضة طالما
    اقدراكفى بيتى كفاىة الحب والحنان والعىشة الكويسة وطالما بيحبك هىكمل والله
    تعليم وربنا يوفقك وخفو على الشباب ياجماعة احنا بنتعب والله اوووووووى

  23. حسام الران
    28/06/2011 at 22:16

    ادن انتي تحبيه بس انتي ما حاسه بده الاحساس علا فكره بس فكري وخدي القرار الصحيح من اجل لا تضلميه وتضلمي نفسك

  24. حسام الران
    28/06/2011 at 22:12

    السلام وعليكم ورحمة الله وبركاته
    اختي انا انصحك بان تبتعدي عن هدا الشاب لانه ادا كان يحبك وانتي ما تحبيه وتعتبيريه مثل اخوك من اجل لا ينصدم ويتعدب اكثر واكثر ويكون يعرف بانيك تحبيه مثل اخ واحسن شي انيك تصارحيه بكل شي وتقوليله الحقيقه وهو با يتقبل الوضع بكل احترام وشفافيه والقرار لك وانا حبيت المساعده بس

  25. صاحبه المشكله
    28/06/2011 at 09:58

    انا متشكره للي اهتم بالموضوع بجد بشكر حضرتكم جدا بس في جديد
    انا تقريبا معجبه بالانسان ده وعرفت ده لما قررت ابعد عنه
    والمصيبه اني عرفت انه مش مرتاح ماديا يعني هو وسطي وعنده شقه بس اهله مش متعلمين انا حتجنن
    هو طلب ايدي امبارح وانا معرفتش ارد ولا اقول حاجه الغريب اني مقلتلوش مينفعش معرفش ليه انا قلتله انا حقول لماما ولو محصلش نصيب متزعلش قالي وانا حكلمها وحتي ولو محصلش نصيب انا مش حزعل ومش حرتبط باي حد تاني وانا موجود انشالله اكون اخر حد تفكري فيه
    وانا لسه مقلتش لماما انا مش عارفه اعمل ايه بجد حتجن وصليت استخاره بعدها طلب ايدي انا مش فاهمه حاجه

  26. على
    27/06/2011 at 07:50

    ربما الحب بعد الزواج افضل من الحب قبله..انا هقولك على راى .

  27. حازم الاهلاوى
    27/06/2011 at 00:42

    اختى
    والله احنا في زمن غريب جدا ومبقاش فيه كل حاجه الشهاده معظم شباب الجامعه ” تافهين ”
    بس لو انتى عاوزه تريحي ضميرك وتريحيه جيبيها من اخرها
    وقوليهالوا انت ممكن تتقدم وتخطبنى هو هيفرح اكيد وشوفي الرد هيكون ايه
    لو قالك اه قوليله احنا مننفعش نكون لبعض لاسباب خاصه
    لو قالك لاء يبقي جابها هو من نفسسه
    اصل حرام تعلقيه بيكي اكتر من كدا خليه يشوف مستقبله
    ويدور ع واحده تانيه لو انتى رافضه الموضوع ده نهائي
    بس والله لو انتى فكرتى بعقلك شويه وقولتى كدا في نفسك
    ده حد محترم واخلاق وبيحبنى وماديا كويس وصراحه في الزمن ده قليل اللى زى كدا
    ممكن يكون شهاده عاليه بس اخلاق زفت
    برضوا الحل في ايدك انتى يا اه يا لاء
    ربنا يكرمك

  28. etqan54
    26/06/2011 at 14:08

    ابنتى العزيزة انصحك بقطع علاقتك بهذا الشخص نهائياُ ولا تتركيه متعلقاً بك لان قناعتك الداخلية انه ليس الشخص المناسب لك من كل الوجوه ليست الشهادة وحدها هى السبب ولا تقبلى به من باب الشفقة لان الزواج المبنى على الشفقة والخوف على المشاعر نهايته الفشل ولا تجعلى من نفسك حقل تجارب مع ان الفرق فى المؤهل ليس عيباً لانه قد تعجب المرأة بشخصية الرجل وعقله وطريقة تفكيره وتعامله مع الاخرين وادعو الله ان يرزقك بالزوج الصالح

اترك رداً أو حلاً لهذه المشكلة