مشاكل الحب والزواج

حبيته واهلى وافقوا لكن ماما مخوفانى منه

السلام عليكم ورحمة الله وبركاته
مشكلتى كبيرة وصغيرة فى نفس الوقت .. ارتبطت من سنتين بشخص كان بيحبنى جدا فوق ما انا اتخيل .. لكن انا مكنتش بحبه .. لكن وافقت انى ارتبط بيه لانه فعلا كان بيحبنى .. وبعدها حكيت لأهلى وهو حكا لاهله وكل حاجة كانت كويسة .. ومر ع ارتباطنا كإرتباط عاطفى سنة ونص بالظبط .. وفى اخر 8 شهور من العلاقة كانت كل حاجة بدات تبوظ … للأسف حبيته جدا جدا .. واول لما هو عرف انى خلاص حبيته .. بدا يتعامل معايا بأسلوب مش محترم .. بدا يهينى أدام الناس .. وبعدها يقولى انا اسف .. واسامحه
اتنازلت عن كرامتى معاه كتير جدا .. واتحملت حاجات مكانش ينفع اتحملها .. كنت بشوفه بيخونى .. واكدب نفسى .. وسبته من 3 شهور .. كان يومها تكريمى فى الكلية .. بسبب تفوقى الدراسى .. وطلبت منه انه يحضر التكريم .. رفض .. اتحايلت عليه كتير .. وافق بشرط .. اننا منحضرش الحفلة من اولها .. واننا ننزل من بدرى نفطر الأول وبعدها نبقا نروح الحفلة
وده اللى حصل ووافقت عليه .. ووافقت انى اتنازل عن الحفلة من اولها .. واحضر الجزء الخاص بتكريمى وامشى .. بس انه يبقا معايا
وبعد ما خلانى محضرش الحفلة من اولها .. قالى سوررى انا حاسس انى عاوز انام .. روحى انتى التكريم وانا هروح انام
طبعا كنت مزهولة من موقفه .. وحسيت بقمة الذل والإهانة .. وبعدها بيومين قابلنى صدفه هو وزميله .. وبدا يخلى زميله يقولى كلام مش محترم .. ويجرحونى بكلامهم .. وانا مبعرفش ارد لأنى متعودتش ارد ع حد بيهنى بالشكل ده
وقررت انه مينفعنيش وسبته
فضل بعدها بشهر كل يوم يتأسف .. ويحاول يوصلى .. غيرت رقمى ومبقتش اروح كليتى عشان منتكلمش نهائى .. وبعدت عنه .. وصليت استخارة وعرفت انه مينفعنيش
فى نفس التوقيت اتقدملى حد ابن حلال وطيب جداا
وانا طلبت منه مدة انى اتعرف عليه اكتر
وفعلا اتعرفت عليه واكتشفت انه شاب محترم اوى وطيب اوى من جواه .. وفى البيت عندى موافقين
لكن هو فيه عيوب
1- باباه ومامته منفصلين .. وكل واحد فيهم متجوز وهو عايش مع باباه … لكن هم اصلا اسرة غنية جدا … يعنى الإنفصال مالوش علاقة بالماديات
2- قبل ما يتقدملى رسمى .. عرف بنات كتير جدا .. وكلهم مش كويسين .. هو معملش معاهم حاجة غلط لأنه بيقولى انه عنده اخوات بنات وانه ميرضالهمش بكدة … لكن يكفى انه كان كل يوم مع بنت فى ديسكو لحد الفجر ..
3- باباه راجل شديد .. وكان عاوز يجوزه لبنت عمته .. واما لاقاه رافض وعاوزنى … فقاله انه مش هيساعده وانه يبنى نفسه بنفسه .. وده قالقنى يكون باباه بيقوله كدة لحد ما يخلص دراسته وبعدها يرفض ..

الفترة اللى كان فيها معايا هى فترة الـ 3 شهور .. 24 ساعة معايا … مبيعملش حاجة غير انه معايا .. يا اما فى كليته .. يا اما معايا .. وكليته مافيهاش بنات لانها كلية عسكرية .. وقته كله معايا ومشوفتش منه حاجة وحشة .. وشبه كنت براقبه ومافيش حاجة غلط عملها طول الـ 3 شهور
لكن ماما مخوفانى منه .. انه متعود على انه يعرف بنات كتير فبتقولى انه ممكن تفضل الخصلة دى فيه .. حتى بعد الجواز
ودى اكتر حاجة قلقانى منه جدا
هو طيب جدا معايا .. لكن مبحسوش طيب مع اى حد بيحاول يأذينى .. يعنى مثلا الولد اللى كنت مرتبطة بيه فى الاول ده .. بيحاول حاليا انه يأذينى فى حياتى ..

فلاقيته اتحول لحد تانى .. حد ممكن ياذى اى حد ياول يضايقنى او يأذينى
ودى حاجة برده مخوفانى منه انه ممكن يتحول فى يوم من الايام من الإنسان الطيب .. للإنسان الشرير ..
خايفة اكمل معاه الفترة اللى اتفق فيها مع بابا لحد معاد خطوبتنا .. وهى فترة كبيرة .. واكتشف انه بيخونى او اهله يكونوا بيهاودوه حاليا وبعدين يرفضوا وابقا انا كدة ضيعت نفسى
هو بيحبنى وده واضح من افعاله .. وانا حبيته فعلا .. وحاسة انه انسان كويس .. بس خايفة .. اعمل ايه؟

مشاكل وحلول ذات صلة

اضيف بتاريخ: Friday, December 29th, 2017 في 03:03

كلمات مشاكل وحلول: , , , , ,

اترك رداً أو حلاً لهذه المشكلة