انا شاب عندى 23 سنه خاطب بنت عمتى عندها21 سنه وبنحب بعض وكويسين مع بعض واهالينا كمان كويسين مع بعضهم البعض احنا مخطوبين بقالنا عشر شهور وانا خلصت الجامعه السنه دى وحاليآ بعمل دبلومه تكمله بعد الكليه وبعد ما اخلصها ان شاء الله هسافر بره مصر عشان اشتغل واكون نفسى ونتجوز
المشكله بقى ان خطيبتى فاضيه ما بتعملش حاجه عشان كده هى زهقانه من البيت ومن القعاد كده من غير ما تعمل حاجه عشان كده اخواتها اللى مسافرين بره مصر عرضوا عليها انها تروح عندهم وتشتغل هناك اهو منوا تضيع وقت وتستفاد فلوس وهى بتحب الشغل
المشكله بقى ان انا رافض موضوع سفرها لكن هى مصممه على السفر واهلها مشجعينها على كده
وانا حاولت معاها مفيش فايده لانها عنديه شوى
طبعآ انا رافض موضوع سفرها عشان بخاف عليها وبقلق عليها جدآ وكمان بغير عليها وخصوصآ انها هتبقى فى شغل بره وكمان هتبعد عنى الفتره دى الوحيده اللى انا قاعدها فى البلد لان انشاء الله لما اسافر مش هنزل الا على الجواز على طول وفى السفر بره مصر بتكون وسيلة الاتصال بتكون صعبه طبعآ انا مخنوق من كده وخايف بعد ما تسافر وتتعود على السفر والشغل ما اعرفش اسيطر عليها بعد كده بمعنى انها ممكن تتغير من ناحيتى مع انى واثق فيها بس الغربه بتغير زى ما بيقولوا
دا غير ان العادات والتقاليد فى بلدنا ما بتسمحش ان البنت المخطوبة تسافر بره مصر تشتغل… البنت ما تسافرش الا مع جوزها مثلا
حاولت اتكلم مع اهلها لقيتهم مشجعينها على كده وقالولى الراى راينا هى لسه ما بقتش مراتك وقالولى اجهز انت بس للجواز واحنا نجيبهالك فى اقرب وقت
المهم بعد ده كلوا انا مش عارف اعمل ايه ارضى بالموضوع وخلاص واستحمل المتاعب اللى هتحصلى و كلام الناس وتتريقتهم اللى بدآت من دلوقت
ولا اقولها انا هسيبك لو سافرتى واخسر حبنا اللى مش هيتعوض ومش هيتنسى واخسر قرايبى واقعد بقى اتعذب واحب واخطب من جديد ولا ايه؟
انت مالك عليهاحكم وامرهابيداهلها واذاكنت مش واثق فيهاوفي اخلاقهاوتربيةاهلهالهاافسخ الخطوبةدي وكلا منكم ينام على الجنب اللي يريحه ومسالةانك مش عاوزها تسافر لاجل الشغل ماتقدرش تمنعهالانك لم تشترط عليهامن البداية انهاماتسافر اوتعمل وان كنت اشترطت عليهاوعلى اهلها فمن حقك الزامهابهذاالشرط وكمان دي بنت عمك كرامتهامن كرامتك ومش تعمل حاجةتسي لك ولكرامتك دع عنك هالافكاروخلهاتسافرلاجل ماتعمل وتساعدك في اتمام الزواج وتكاليفه الباهظة والحياة تعاون وتكاتف بين الطرفين من اجل حياةكريمةوالعيش بدون مشاكل اوخلافات وربي يوفق الجميع ويتمم لكماع الخيروالسعادة
اخي انا اويد كلام الاخ الشافي في كل ماقال وارجومنك تعمل به لاجل يطمن قلبك وتعرف ان الحياة تكاتف وتعاون مشترك بين الاثنين لاكمال الزواج وتسهيل كل الصعاب في طريقه وتاكد انه لاقيمةللزواج بدون التفاهم والثقةوالكسب الحلال وفقك الله ويسرامرك
حضرتك دة راي
شيخ في موضوعك
أولاً السلام عليك ورحمة الله وبركاته
ربنا يكرمك وتخلص الدبلومه ويوفقك فى حياتك كلها
موضوع الفراغ ممكن يتحل بحاجات كثير جدا غير السفر للخارج والشغل
فتشغل نفسها بما ينفعها في دينها ودنياها
فممكن تستغل الوقت في تعلم أمور دينها الأساسية وفي حفظ القرآن
وتعلم واجبات الزواج لإن بنات كثير بتتزوج وهى مبتعرفش تطبخ ولا تدير أمور البيت
وفكرتها عن الزواج بتكون فكرة غير واقعية بالمرة ، ومبيكونش عندها قدرة على معاملة الزوج ولا أهله ولا التصرف في المشاكل بالطريقة الصحيحة وده بيكون سبب في الكثير من المشاكل .
وللإنصاف الأمر ينطبق على الشباب أيضا
أنت ملكش حكم فعلي عليها لإنك مازالت خاطب
ولكن
المفترض إنه فيه تقدير أدبي لك ورأيك يراعى ولا يتم تجاهله
ربما لتقارب السن وكونكم أقارب بتتعامل بشىء من الندية
لكن العلاقة مينفعش إطلاقا يكون فيها (عند ) لا من طرفها ولا من طرفك
لإن الأمر هيكون متعب وغير مستساغ بعد الزواج ، وضغوط الحياة كافية فلا تحتاج إلى عند !
فالأمر أهون من ذلك
والهدف المفترض إنه واحد للطرفين :وهو الإستمرارية بأفضل طريقة
كما إن عمل المرأة يكون للحاجة وله ضوابط كثيرة
فهى مش مطلوب منها تكون نفسها ولا مطالبة بالإنفاق
فمجرد شعورها بالفراغ لا يستوجب نزولها للعمل في بلد أخر وإحتكاكها برجال منهم الصالح والفاسد
هو الموضوع له أبعاد كثير جدا
سواء إجتماعيا أو دينيا أو درجة تأثيره على علاقتكم فيما بعد
ففي مشكلة تانية ربما لم تنتبه لها إنك لسه مسافرتش ولسه مشتغلتش ولا بدأت فى تكوين نفسك ، ظروفك بعد كده ممكن تكون محدودة نسبيا كأى شاب في بداية حياته
فالمشكلة إنها لو اتعودت على قدر معين من الإنفاق هيبقى صعب تتأقلم مع ما هو أقل
وممكن يكون في إحساس بالضيق وأحيانا عند البعض إحساس بخيبة الأمل إن زوجها لم يحقق ما تريده وهيكون أسرع بديل عندها هو الرجوع للشغل مرة تانية بعد الزواج ، وده هيأثر بشكل مباشر على حياتكم
ولعل إصرارهم على موقفهم لإنهم مش حاسين إنه ممكن يسبب مشكلة من ناحية
ومن ناحية تانية شايفين إنك مش مصر على الرفض وموقفك مش واضح من ناحية تانية
فأنت ممكن حد من أهلك يروح يتكلم مع أهلها
فلازم يكون عندك شخصية قويه , وقولهم بكل صراحه هو ده اللى أنا عايزه مفيش سفر بكل ذوق وأدب ولازم يحترمو وجهة نظرك فمينفعش توافق وتيجى بعد كده العواقب اللى أنت قولتها وهمــــا لو باقيين عليك هيقنعوها , وهى لو باقيه عليك هتوافق
فاستخير ربك وقرب من ربنا وأدعى كتييييير جداً وأنت ساجد أنه يوفقك للخير وأدعى بأى حاجه أنت عايزها
عَنْ أَبِي هُرَيْرَةَ رَضِيَ الله عَنْهُ، أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ: “أَقْرَبُ مَا يَكُونُ الْعَبْدُ مِنْ رَبِّهِ وَهُوَ سَاجِدٌ فَأَكْثِرُوا الدُّعَاءَ”. أخرجه مسلم
سيبك من كل اللي بيقول ومالها…..دي حياتك انت وانت بدام مش موافق خلاص دي حريتك انت..زوهي لو عاوزه تسافر ومصصمه يبقى هي حره وسيبها طبعا لانها هتحصل مشاكل بعد كده …وخلي بالك وقت الفراغ مدمر وخاصه للبنت وايضا الشغل للبنت وحش جدا لو في اختلاط………
والله انا مع الاخ عزوز انا فى الغرب برضو وشايف لعينى حجات بلااااااااااوى والله سفرها معناه فى كتير بقلك ايه ريح نفسك وفكك من المشوار ده والبنات على قفى من يشيل بلا حب بلا بطييييخ ياراجل حب ايه انسى ياعم والله احنا فى زمن ما فى حد ما بيفكرشى الا فى نفسو
انا انسان موجود حاليا في الغربة وشفت كتير -والله سوف تتغير بعد السفر ومعرفة طعم الفلوس- والامثلة كتير عندي هنا في الخليج – سوف تشعر انها افضل منك لانها تأتي بالفلوس وهي الافضل
-بداية الامر سوف تجعل لها حسابا في احد البنوك- سوف تكلفك اكثر من طاقتك لانهامعها فلوس
طالما أنها مسافرة إلى عند إخوانها ، فما المانع ؟
تنهي أنت دراستك وتلتحق بها .. وسفر المرأة لم يكن محرما لطلب العلم أو العمل . .وهل ستخرب أخلاقها للحظة إن بقيت بعيدة عنك ؟ هل أخلاقها وتربيتها هشة إلى هذه الدرجة ؟ إذا كانت إجابتك نعم ، فارتباطك بها من أساسا خاطئ لأن صاحبة الأخلاق الهشة ستخرب في أول فرصة سانحة لها سواء سافرت أم لم تسافر ، سواء كانت مخطوبة أو متزوجة أو أم..
دعها تسافر ، وتواصل معها عبر النت .. فما أسهل التواصل عبر النت في هذه الأزمان .. وفترة وتمر وتصير ذكريات…
تحياتي
etha safarat ,mish 7artga3lak tani .ana 3ayesh felgorba ,esalni ana ,hena kol eshi geer elbald
هو انا مش فاهمة جملة ” بعد ما تسافر وتتعود على السفر والشغل ما اعرفش اسيطر عليها بعد كده “؟هل تقصد ان شخصيتها حتكون قوية وانت مش عايز كدة؟ولا ان اخلاقها حتبوظ؟مفهمتش .
لكن عموما,هى الفترة اللى انتو بتتخانقو عليها دى اد ايه ؟لو فترة قصيرة خليها تأجل سفرها شوية لغاية مانت تسافر واديك بتقول رايحة لقرايبها يعنى الموضوع مفهوش تقييد ,لو الفترة طويلة بقى و انت بتقول انها زهقانة فده معناه انك كدة كدة مش قاعد معاها و مشغول عنها (والا ايه اللى يزهقها)فيبقى سيبها تغير جو و تستفيد من الوقت,واديكو ولاد عم يعنى مش لسة حتدرسو بعض
وبعدين سؤال,انت خايف عليها و لا منها؟
لو البنت محترمة خلاص,لو مش محترمة فده معناه انك حتفضل تحلق عليها طول العمر عشان متغلطش و ده مش طبيعى يعنى
مسألة انك خايف لما تسافر تشوف غيرك و تسيبك ,طب ما انت كمان حتسافر ,ده معناه انك ممكن تعجب بغيرها و تسيبها ؟ولو سابتك يبقى خير عشان ده معناه انها مكنتش متمسكة بيك من الأساس
انت بتقول هم مصممين على سفرها خلاص سبها تسافر وانت تسافر وى اجل الجواز سنة ورا سنة هم معتمدين انها مسفرة وحجزة عريس تحت الطلب يعنى لو انت سبتها هتطرها تفضل فى مصر عشان تحجز عريس تانى وهم اهلها بيقولو يالى مصلحة فلوس وجية سبحان الله الاهل بقت بتبيع عشان الفلوس مسلمين بمواصفات غربية !
والله انا مقدر الى انتا فيا ما احنا فى زمن غريب
انتا من الاخر خايف لتسافر وتشوف حد غيرك وتعجب
به وتسيبك وده احتمال اكيد الشخصيات النجحه بره كتير
وما بيقولو الحب عطاء وراحه انتا هتديها العطاء وتسيبها تسافر بس خليك ديما مراهن على حبك
يا تكسب كل حاجه يا تخسر كل حاجه
يعنى كمل درستك وسيبها تشتغل لحد ما تشوف الحب هيوصللك انتا وهى لفين لو بعد ده كله اتمسكت بيك
واتجوزتو فاعلم ان انتا مرتبط بانسانه هتصونك وتحبك العمر كله
اما لو الدنيا بره غرتها فتاكد ان لو كنتوا اتجوزتوا المستقبل ……………………
بجد انا اسفة انك عندك حق البعيد عن العين بعيد عن القلب هى مفروض تعد جنبك علشان انت هتسافر بعد كدة ودى احلى فترة بنكم ومفروض واحد يشد وتانى يرخى
م مفيش اي مشكله في سفرها بالعكس دي ممكن تساعدك وشيء جميل ان تكون ام اولادك تقدر تجيب دخل هينفع اولادك فيما بعد وهتكون علي الاقل الاعتامد كله مش عليك وبعدين
هيا هيجي وقت وتقعد في البيت
وهوا وقت الولاده فسيبها تشتغل وتسافر وبعدين خلي ثقتك فيها كبيره وبكده هترتاح نفسيا لقرار سفرها
يااخي الحبيب اسمحلي اغلطك في تفكيرك هذا
مالضرر اللي هيجيلك من سفرها وانت قلت انكم بتحبوا بعض
وهي كمان بنت عمك يعني كرامتك من كرامتها وعمر الفلوس او
الغربه هيخليها تتكبر عليك او تتغير من ناحيتك
فلو كانت مابتحبكش اقولك من حقك تشك في انها تتغير من ناحيتك
او تتكبر عليك لكن انت قلت ان الحب متبادل وليس من طرف واحد
ثانيا انت قلت انك هتسافر بعد ماتخلص الدبلومه يعني هيكون معاك
مال زيها ويمكن اكتر علشان كده باقولك طلع الشكوك دي من راسك
ثانيا هي لما تسافر هتكون قرش هينفعكم في الزواج ومابعد الزواج
وافضل ليها انها تستثمر وقتها بشيء نافع ومفيد
وبعدها عنك هيزود حبكم وهيكون فيه شوق وغرام ووحشه تلهب مشاعركم
والموبايلات قربت المسافات يعني ممكن تكلمها وتطمئن عليها كل اسبوع
واكيد ستجد متعه ولهفه في التحدث اليها وهي بعيده عنك
ثالثا اسمحلي اكلمك بصراحه
كل شاب بيظن انه طالما خطب فمن حقه يأمر وينهي خطيبته دون الرجوع
لولي امرها قبل الزواج وهو والدها
فالولايه يااخي الحبيب مازالت عند والدها حتي يتم زواجكما فتنتقل
الولاية لك
رابعا انا فرحت في بداية كلامك لانك قلت ( بنحب بعض ) ولم تقل انا بحبها
او تقول هي بتحبني لان عبارتك تعني الحب المتبادل ودي حاجه حلوه
وزعلت منك في آخر كلامك وانت بتقول ( ولا اقولها انا هسيبك لو سافرتى )
بالبساطه دي تفرط في حبك علشان حاجه تافه زي دي
هل ده الحب الايام دي ؟ اصبح رخيص لهذه الدرجه
طيب ولما تفابلكم مشاكل بعد الزواج هتعمل ايه ؟ والمشاكل والخلافات وارده
في كل بيت وكل اسره وهي دي بهارات الحياه اللي بتحليك الايام مع زوجتك واولادك
تقدر تقولي هتعمل ايه لو قابلتكم اي مشكله ؟
لابد ان تكون اقوى من كده وتتغلب على اي مشكله بالعقل والصبر والنصيحه
اتمنى ان اكون قد استطعت توصيل مااقصده بسهوله ويسر
وبدون اي زعل من كلامي ونصايحي لاني في منزلة والدك او اخوك الكبير
وفي الختام ادعو لكما بالتوفيق في حياتكم الحاليه وحياتكم المستقبليه
المملوءة بالفرح والهنا والسعاده والسيرور وان يجمع الله بينكما على خير
ويرزقكم الذرية الصالحة