السلام عليكم ورحمة الله وبركاته انا عندى مشكلة ومحتاجة مساعدتكم انا بنت عندى 20سنة ومخطوبة من شهرين ونص والمفروض ان فرحى فى شهر4اللى جاى كانت خطوبة صالونات خطوبة عادية يعنى مكنتش اعرف خطيبى بس حبيته اوى فى الفترة اللى اتخطبنا فيها واتمنيت ربنا يجمعنا مع بعض على خير بس انا قبل خطوبتى كان اخويا ناوى انه يبعتلى زيارة علشان اقضى معاه 3شهور هو مراته وبنته وابنه الصغيرين مع العلم انه مسافر الكويت وخلص الورق المطلوب خلاص بس مكانش لسة حدد ميعاد السفر وانا كنت موافقة انى اسافر بس دا كان قبل ما اتخطب علشان اغير جو فمكانش ينفع ارجع اقول لاخويا لا بعد ما خلص الورق كله وخطيبى عارف الموضوع دا قضيت معاه شهر و4ايام وبعد كدا سافرت بقالى شهر ونص مسافرة بس بنتكلم انا وخطيبى عالنت بس على طول بيتخانق معايا ونفسيته تعبانة وحصلت مشكلة بينا من اسبوع. انا كان ليا اكونت عالفيس بوك قبل ما اتخطب بس بصراحة كنت بكلم عليه شباب وبنات عادى يعنى فانا قولتله وصارحته بكل حاجة بعد ما خطبنى على طول وقولتله عالاكونت بتاعى والباسوورد كمان وهو مزعلش منى وفهم ان دى حاجة كانت قبل الخطوبة وخلاص ووعدته انى مفتحوش تانى وفعلا مفتحتوش تانى طول الفترة دى بس هو اللى فتحه من عنده ولقى واحد بعتلى رسالة فزعل واتخانقنا بسبب الرسالة دى وفضلنا كام يوم منتكلمش فانا قولت الاكونت دا هيعمل مشاكل بينى وبينه كل اما يفتحه ويلاقى حاجة هيزعل وهتحصل مشكلة ففكرت انى اقفل الصفحة دى الغيها ففتحت الاكونت بتاعى ومسحت الايميل القديم وخليته بايميل جديد وطبعا بباسوورد جديد وعملت تعطيل للصفحة لغيتها يعنى علشان ميعرفش يفتحها تانى فهو فى الوقت دا كان فاتح علشان يكلمنى ففتح الفيس بوك الاول لقاه الباسوورد اتغير لانى انا كنت لسة فتحاه ساعتها وبلغيه اتنرفز وزعل وبعتلى رسالة عالموبايل قالى انه فاتح اول مافتحت قالى هسالك سؤال انتى فتحتى الفيس بوك وغيرتى الباسوورد قولتله لا انا مفتحتوش قالى كدابة وشك فيا ساعتها فانا كدبت وحلفتله انى مفتحتوش لانى وعدته انى مفتحوش وقولتله ان واحدة صاحبتى هو يعرفها قريبة منى اوى انا حكيتلها وطلبت منها هى تفتحه وتلغيه واقنعته وفى اخر الكلام هددنى وقالى انتى متاكدة ان صاحبتك هى اللى لغت الصفحة مش انتى قولتله ايوة قالى لو عرفت بعد كدا مش هيحصل كويس ومش هيبقى فى بينا كلام تانى فخوفت وروحت قيلاله ان انا اللى مسحت الصفحة اتاكد انى كدبت عليه وهو اكتر حاجة بيكرها الكدب بس انا كدبت عليه علشان ميزعلش وعلشان معملش مشكلة بينا يعنى كان قصدى خير فراح قافل فى وشى وقالى انتى كدابة وكلكم زى بعض مع العلم انه كان خاطب واحدة قبل كدا وخانته وزعل منى جامد ونفسيته تعبت وقال هأجل الفرح سنة لحد مانقعد مع بعض ونفهم بعض بحاول اكلمه من ساعتها وابعتله رسايل ومبيردش عليا خالص وانا تعبت والله مش عارفة اعمل ايه هو زعله صعب اوووووووى وبيكبر الموضوع دا كان ممكن يسبنى والله لو كان الموضوع كبر شوية عن كدا مع انه بيحبنى اوووووى زى مانا بحبه بس مش عارفة اعمل ايه انا عارفة انكو ممكن تقولوا ان الموضوع مش مستاهل بس والله العظيم انا نفسيتى تعبانة اوى لانه زعله صعب اوى ولانى حاولت احل مشكلة عملت مشكلة اكبر منها بس بدون قصد وهو بيقول ان اللى يكدب فى حاجة صغيرة هيكدب فى حاجة كبيرة وانا مكنتش متعمدة انى اكدب عليه لانى كدابة لا والله انا مبحبش الكدب خالص وهو دالوقتى فقد الثقة فيا خالص وبيقول ازاى اصدقك بعد كدا اعمل ايه بس ازاى هنعيش مع بعض وهو بيشك فيا ومفيش ثقة بينا ارجوكوا تهتموا وتقولولى حل انا اسفة انى طولت عليكو بس انا ماليش غير ربنا وانتو
شوفي يابنت الناس نعم انت غلطت لما كذبت عليه وماصارحتيه بالحقيقة من الاول وهو فقد ثقته فيك وليس من السهل ان ترجع العلاقة بينكما زي الاول وطالما انه يشك فيك فلن تكون حياتكم سعيدة ومستقرة اذا تزوجتم لااريدك ان تنزلي من كرامتك وقدرك وتجري وراءه لاجل استرضاءه لو كان فعلا يحبك مثلما تقولي فسوف يكلمك هو ويصالحك ويسامحك على الغلطة اللي حصل منك بدون قصد فان استمر في تجاهلك ولم يكلف نفسه الاتصال بك او حتى الرد على اتصالك او رسائلك له فلا تعبريه ولاتهتم به خالص ويستحسن انهاء الخطوبة وكل واحد منكم يروح لحاله طالما انه مش عاوز يتقبل اعتذارك ويسامحك على غلطة وقعت منك دون قصد وربنا بيكرمك بحسن منه ماتزعليش دي سنة الحياة وكل شي قسمة ونصيب والف من يتمناكي ياست البنات