انا بنت عندى 22 سنه يعنى ممكن اكون على قدر من الجمال ولو بسيط ومن عيله محترمه جدا ومتدينه ومستوى اجتماعى ومادى الحمدلله كويس المهم انا كان بيقدم لى عرسان كتير اوى ومنهم ناس مستويات كويسه بس مكنش بيبقى فى نصيب لانى مكنتش ببقى مرتاحه المهم اتخطبت مره وانا عندى 20 سنه والخطوبه مكملتش 20 يوم لانى اكتشفت انه بيشرب حشيش وكان بياخد منى فلوس وكان عيل اوى ومينفعش بكل المقاييس زعلت شويه انى مريت بتجربه زى دى واخدت وقتها وعدت خلاص وبعدها بردو اتقدم لى عرسان كتير ومن 4 شهور اتقدملى واحد عادى جدا سواء فى مستواه المادى او الاجتماعى بس لما قعدت معاه اتبسط اوى ووافقت عليه لكن اهلى رفضوه اوى لانى اتقدملى قبله ناس احسن منه كتير وهو مش عنده شقه ولسه كمان هيكون نفسه بسان وخالى اقعنا ماما واخواتى لما وافقوا واتخطبت وكنت مبسوطه فى الاول بس بعد كدا ابتدت المشاكل وبقينا بنختلف كتير ونقف لبعض على الواحده وبقى يعاند معايا ويتحدانى ويقلل من عقلى يعنى مثلا يقولى ان انا عقلى صغير (مع العلم انى اهلى بيقولى عليا انى عاقله اوى وبستحمل) ولو اتفتح موضوع ورايى كان غير رايه يستغرب رايى اوى ويقول عليا انى غريبه وبقينا نتخانق كتير وبقى يبان عليا انى زعلانه ومهمومه مع العلم بردو انى كنت الاول مش ببطل ضحك وهزار .. كمان حاسه انى مش قادره احبه خالص ومبحسش انى مبسوطه وانا خارجه معاه ببقى مخنوقه اوى وماما واخواتى وخالى اتكلموا معاه بسبب المشاكل اللى بينا بس اوقات بيرد عليهم انه بيحبنى ومبيحبش يزعلنى بس ان انا اللى مش بستحمله وبقف له على الواحده بس انا مش كدا معاه.. ياريت تفيدونى تقولولى اعمل ايه انا مش حاسه بوجوده فى حياتى خالص ومش حاسه انى عايشه فترة خطوبه حلوه زى اللى الناس بيتكلموا عنها وبردو مش عايزه افسخ خطوبتى علشان دى تانى مره ومش عايزه حد يتكلم عليا ويقول انى مدلعه ومش عايزه ازعل ماما واخواتى كمان وخايفه من ربنا انى اكون بظلمه لو سبته بس بجد مش عارفه اعمل ايه؟؟
التفاهم والارتياح مطلوب اثناء فترة الخطوبة واذا كنت مش حاسه بهذا مع خطيبك في فترة الخطوبة فلازم تفسخ خطوبتك منه فورا وماحدش يجبرك على الاستمرار معاه توكل على الله وافسخ هذة الخطوبة معه وكل واحد يروح لحاله وانت لسه شابة ومثل القمر والف من يتمناكي ياست البنات تلاقي نصيبك مع ابن الحلال اللي يستاهلك ويسعدك ويقدرمشاعرك
مش مرتاحه خلاص كلام الناس مش حيفيدك لما تعيشى تعيسة وفى كل الاحوال الناس بتتكلم ومفيش مشكلة اتخطبي مرة والف لغاية ما تلاقى اللى يناسبك وياريت مترضيش باى حد الا اللى يملى عنيكى وقلبك وربنا يرزقك بزوج صالح باذن الله