انا في مشكله مسيطرة علي حياتي كلها
انا متجوزة من سنتين و نص ، عندي طفل عنده سنه
انا وجوزي كنت قصة حب عنيفه ايام الدراسه و كل الناس كانت متنبألنا بجواز سعيد
بعدت عنه شويه و هوه حاول بكل الطرق بعد التخرج عشان يرجعلي و يخلي ارتباطنا رسمي و عشان بحبه و شفت انه قد كلمته اقنعت اهلي انهم مايضغطوش عليه في تكاليف
و عشان هوه كان مسافر في بلد عربي بابا اكتفي انه يدفع اقساط شقه و نتجوز قبل مانستلمها و الاجازات السنويه نقضيها شويه عن اهلي و شويه عند اهله
عشان ماطولش هوه جوزي كويس و محترم و برضو لازم احكي الحته دي عشان تفهمو المشكله : في اول جوازنا انا كان عندي اكتئاب اني سبت شغلي و حياتي و جيت بلد غريبه مافيهاش اي حاجه كويسه ولا فيها شغل ولا اي حاجه فجوزي كان دايما يعرفني علي مرات اصحابه و يقولي اختلطي بالناس و ضيعي وقتك و اخرجي معاهم و كده
وفعلا عدت فترة بسيطة و اتعرفت علي كذا حد و كانت خروجاتنا عائلات
المهم في ناس جيرانا معانا في نفس العمارة واحدة برضو بنفس ظروفي عشان كده كنت دايما مع بعض و عند بعض لحد ما لقيت ان جوزي بقي بيهزر معاها اوفر و عملها ادد علي الفيسبوك و بقي يقولي اتصلي بيها تيجي تقعد معانا او تتغدي معانا او تخرج معانا
اكيد هاتسألوني فين جوزها ، هوه ده المشكله جوزها كانت ظروف شغله مختلفه فبيكون ياإما في الشغل ياإما نايم عشان عنده شغل بدري
و كمان عشان جوزها عارف جوزي فممكن يتصل بيه يقوله معلش مراتي متخانقه معايا خلي مراتك تتصل بيها و تتغدا معاكو انهاردة او مثلا خدوها خرجوها معاكو عشان متضايقش اني هنام و هكذا
المشاكل ابتدت تدخل مابيني انا وجوزي بسببها اني كل ماجي اقلل من علاقتي بيها جوزي يعمل بالعكس وحتي لما كنت بادخل ناس جديده حياتنا و احاول اني ابعد عن جيرانا دول بناس تانين و خروجات تانيه كان يحرجني معاهم و ميرضاش يخرج او نخرج و يستأذن و ياخدني للجيران اياهم دول
وابتدت المشاكل عشان بعد ماكانت صاحبتي و بعمل معاها اي حاجه من منطلق حسن النيه و الجيره و غربه مع بعض بقيت كل حاجه تطلبها او جوزها يطلبها من جوزي ندب خناقه مع بعض
كل خروجه نرجع نتعارك بسبب هزار زياده و كلام مش لازم يتقال
الكلام ده من سنه وتسع شهور يعني لما كنت حامل
وانا في الشهر السابع لقيت بالصدفه جوزي سهران لوقت متأخر و بيكلم جارتي دي علي النت وبيتكلمو في حاجات جنسيه و كلام سافل جدا ساعتها انا كان معايا الباسوورد بتاعه و كنت شايفه الكلام الي بيتكتب في ساعتها
قمت دخلت عنده و شتمتهم هما الاتنين و قفلت الباب علي نفسي و فضلت ماكلش ولا اشرب لحد ماجوزي كسر الباب و وداني المستشفي لان ضغطي و طي و جالي هبوط
ماتتصوروش كانت الصدمه عنيفه قد ايه سبته و سافرت لاهلي وماقولتلهمش علي حاجه كل الي عرفوه اني مكتئبه من الحمل وانه مش عارف ياخد باله مني و قررت اني اولد في مصر
بس عشان مشاكل في الاقامة كان لازم ارجع تاني البلد دي وهو اتحايل عليا ارجع له و اولد عنده و فعلا جاب مامته تقعد معايا الشهر الي كان فاضل و جاب مامتي لما ولدت
في الوقت ده
جارتي دي جتلي و اعتذرتلي و قالتلي ده كان شيطان و مش عارفه انا عملت كده ازاي و انها بتحب جوزها وومن اهماله ليها لقت نفسها بتتكلم بالطريقه دي وفي الحاجات دي
وسامحتها ورجعنا نتقابل في اضيق الحدود لان جوزها ماكانش يعرف الي حصل
ومرة في مرة لقيتو كل يوم يجيبهم و هما كمان كل مناسبه يعزمونا او يقولولنا تعالو اخرجو معانا و نرجع انا و جوزي نتخانق تاني بسبب انه مدخلهم في حياتنا زياده و ان مهما كنا مرتبين هانعمل ايه في يوم اجازة و اي مكان واعدني اننا هانروحه او حتي هانفضل في البيت يغير الخطط عشان جيرانا
انا جه عليا وقت ومابقتش اكلمها خالص ولا ارد علي تليفوناتها و قاطعتها
بس جوزي بيروح وفضل فترة يروح كل يوم و يفضل معاهم من بعد الغدا لحد الساعه ١ بالليل لحد مافيوم انهارت و قعدت اعيط و الطم و ابني اتخض و قعد يعيط و جه جوزي لقاني كده و كان واحده قريبته في نفس البلد الي احنا فيها و كانت جايه فاتصل بيها اعتذرلها و قالها انه مش هاينفع يستقبلها اليوم ده
قريبته دي راحت حكت لاهله اني مش عايزاها و منعت جوزي انه يستقبلها في بيته و عشان هيه عارفه جيرانا دول و بتودهم و عارفه اني متخانقه معاهم راحت قالت لاهل جوزي اني مانعه جوزي يشوف جيرانه و كاتمه علي نفسه و منكده عليه
راح باباه كلم بابايا و قعد يزعق له و قاله ازاي بنتك تعمل كده في ابني و بنتك مش بتحبنا و عايزة ابننا يقاطعنا و عايزة تقطعه من جيرانه و النبي وصي علي سابع جار
طبعا بابا ميعرفش حاجه و ماما كنت قولتلها علي اجزاء من المشكله فمكانتش متخيله ان الموضوع كبير كده
طبعا اهلي زعلو مني اني ماقولتش من الاول
و الموضوع كل مدي مابيتطور
انا دلوقتي بقيت اسيبه يروح يقعد معاهم كل يوم وانا بفضل في بيتي مع ابني بكون متضايقه منه جدا بس بحاول مابينلهوش ده و برضو مش عاجب جوزي مصر اني اتعامل معاهم زي زمان واكتر وافتحها علي البحري و كذا مره نتخانق و يقولي لو مش هاتكلميها هاطلقك و هاوديكي عند اهلك
يوم عيد ميلاد ابني خلاني اعزمها غصب عني عشان حلف لو مش هاتيجي هايلغي عيد الميلاد يومها انا انهارت و روحت قولتلها اتقي ربنا بيتي هايتخرب بسببك حلي عن جوزي عشان ربنا يباركلك
و فهمتها اني مش طايقاها و هاقابلها في مناسبات رسميه بس عشان جوزي مش قادر يستغني عنها
وفعلا باخرج معاهم مره في الاجازة بس طبعا طول الاسبوع جوزي سهران معاهم وانا لوحدي
دلوقتي احنا رايحين اجازتنا في مصر
طبعا حماتي كلمتني في مره و قالتلي لو هاتفضلي تمنعي ابني من الجيران الي بيحبهم و تنكدي عليه هاخليه يطلقك و هاشوفله عروسه تانيه واجوزه و انتي الي هاتتبهدلي انتي و ابنك
انا دلوقتي عايزة فعلا اتطلق ماما بتحاول تهدي الموضوع و تقولي ماتحوطيش العقدة في المنشار دي مهما كان جارتك دي متجوزة يعني مش هاتخطف جوزك ولا حاجه
بس انا فعلا مابقتش حاسه اني ممكن اكمل الحاجه الوحيده الي تعباني ابني مش عايزة اظلمه في الانفصال ده
هل انا معايا حق ولا انا مكبراها ياريت تنصحوني
ملاحظه قررنا نعزل كذا مره وكل مره جوزي يرجع في كلامه و اخر مره خلاني الم الحاجات كلها و شفنا الشقه و تاني يوم قالي انا مش عايز ابعد عنهم
مشاكل الخيانة الزوجية
زوجي و جارتي ودلوقتي عايزة اتطلق
اضيف بتاريخ: Wednesday, December 20th, 2017 في 16:22
كلمات مشاكل وحلول: الدراسة, الزواج, زواج, طفل, متزوجة
الاخت العزيزة السلام عليكم ورحمة الله وبركاته قرات مشكلتك كاملة وتالمت جدا لما يحدث لك كل تصرفات زوجك تدعوا للشك والريبة فايه يخليه يتمادى في علاقته بتلك المراة جارتكم جارة السوء ويسهر عندهم لساعات متاخرة من الليل او يدعوه لزيارتها المتكررة واصراره على انها تخرج معاكم وتشارككم كل حياتكم لاتكوني مغفلة او عبيطة لهذة الدرجة فزوجك ياهانم يخونك من الولية دي جارتك الغير محترمة والخاينة لزوجها والاايش تفسري ذهابه المستمر لها والكلام اللي دار بينهما على النت من كلام جنسي وهزار وضحكات واموراخرى لايعلمها الا الله وكمان مصر انك لازم تكلميها او تعزميها او تروح لها حتى لوكان ده ضد رغبتك ولو ادى الى طلاقك ماعندوش مانع انه يطلقك شخص سافل ومنحط وخاين وحقير زوجك ده ولايستاهل ان يكون زوج محترم لوحده زيك انت صدقينى لن يتركها او ينساها حتى لو انتقلتم لشقة اخرى في مكان اخر سوف يجي لعندها او هي لن تقدر ان تبعدعنه تلك الساقطة الفاسقة لاخيار امامك سوى طلب الطلاق منه حتى لو كان ده ضد رغبة اهلك لانك المتضررة الوحيدة في العيشة دي وانت على حق في كل ماتفعلينه او تقوليه ولاشي عليك ان طلبت الطلاق منه الدين والقانون في صفك واما حاجة على الانسان الكرامة لازم تحافظي عليها وتصونيها وتاكدي ان ربنا عزوجل بيرزقك باحسن منه مليون مرة وتلاقي نصيبك مع ابن الحلال الصالح اللي يخاف الله عزوجل ويقدرالحياة الزوجية ويصونها ويسعدك معو طوال العمر ربنا معاك ويخلصك من هذا الحيوان الخاين السافل وينتقم منه على كل ماعمله فيك ويفضحه ربنا على رؤس الخلايق وله في الاخرة عذاب عظيم وحسبنا الله ونعم الوكيل