مشاكل الزواج

كنت متجوز وطلقت مراتي

كنت متجوز من سنتين واحدة اتعرفت عليها في إسكندرية ووالدتي عرفتني عليها وحصل قبول واتقفنا مع اهلها اننا هنزورهم عشان اخطبها وحصل نصيب واتخطبنا والامور كانت ماشية تمام مفيش مشاكل لحد ما وصلنا للمرحلة الاخيرة “القايمة” ابوها محامي كتب ورقة قايمة فيها ثغرات وانا أفسدتها بفضل الله وساعتها حسيت ان فيه حاجة غلط المهم نقلنا العفش وعملنا الفرح وحصلت مشادة أثناء كتب الكتاب بين ابوها وخالي واحنا قاعدين مع المأذون.. ابوها كان عايزني امضي ع القسيمة عمياني فخالي اعترض وطلب يشوف المكتوب في القسيمة فالمهم ان ابو طليقتي اعترض وحصلت مشادة ما بينهم لدرجة انه هدد ياخد بنته ويمشي بس المعازيم لمو الدنيا وعدت الليلة وروحنا شقتنا.. قعدت معاها مع بعض 15 يوم ونظرًا لان اهلها حرضوها على انها تتبلى عليا باني مش قادر ادي وظايفي كزوج و”كنت عامل عملية خصية معلقة ومقلتش لهم عليها” فلمت حاجتها ورجعت بيت اهلها وطالبوني بالطلاق واخد كل حقوقها المهم بعد 3 اسابيع كان حصل الطلاق لاني لاقيتهم ناس مش مظبوطين ورفعو عليا قضية طلاق ونفقة وتبديد عفش المهم استعوضت ربنا وطلقتها بالمعروف من غير مشاكل.. وبعد سنة رجعت طليقتي تكلمني تاني وحاولت تستسمحنى وبررت اللي عملته هى واهلها بانها مكنتش عايزة تخرب بيتها بس انا الي كنت معيوب وخبيت عليهم حوار العملية “الدكتور كان ماكد انها مش هتاثر بعد كده في الجواز” المهم طلبت مني اسامحها وانا بحسن نية سامحتها لوجه الله الكريم وعرفت منها انها اتجوزت بعدي كام شهر وخلعت جوزها لانه كان مبهدلها على حسب كلامها وبقت حرة.. بقيت تدخل من وقت للتاني تكلمني ع الفيس وتطمن عليا فحسيت انها بتحاول تحنن قلبي عليها عشان ارجعلها وقلت اقصر عليها الطريق وعرفتها اني فاهم قصدها فنكرت وقالت انها مبتكلمنيش عشان نرجع لبعض هى بتكلمني عشان تطمن عليا بس وانها بتعتبرني زي اخوها او صديقها المهم سبتها فترة لقيتها بتكلمني تاني وبتسألني “هتجوز امتى” فقلتلها “ربنا يكرم لما الاقي بنت الحلال اللي تستاهل” فكان رد فعلها “ربنا يرزقك ان شاء الله” وكررت السؤال ده تاني بعدها بكام يوم فحسيت انها بتحاول بطريقة غير مباشرة تقوللي انها عايزة ترجعلي فقلت احاول تاني واقصر عليها المسافات وقلتلها اني عايز ارجعلها زي ما هى عايزة ترجعلي بس فيه شروط ومنها ان امها تحاول تراضي على الاقل والدتي فهى طلبت وقت تفكر اديتلها فرصة تفكر وبعدين كلمتها انا بعدها بكام يوم عشان اشوف ناوية على ايه فكان ردها “اننا مش هننفع لبعض” وان اهلها مش هيوافقو يعملو اللي انا طالبو وانا كنت غشاش وكنت عاجز والكلام الاهبل ده المهم الكلام انتهى ما بينا انها عملتلي بلوك مسنجر وسابت صفحتها عادي.. انا عايز افهم تفسير اللي حصل لما هى بدأت تكلمني تاني.. كانت عايزة ايه مني بالظبط؟

مشاكل وحلول ذات صلة

اضيف بتاريخ: Wednesday, November 28th, 2018 في 23:50

كلمات مشاكل وحلول: , , ,

2 رد to “كنت متجوز وطلقت مراتي”

  1. hema
    29/11/2018 at 08:54

    اخى الفاضل الناس دى مش تمام واحمد ربك انك خلعت منهم متجريش ورا المشاكل برجليك ابحث عن بنت حلال وربنا يرزقك بيها ولاد الحلال كتير

  2. ابوالبتول
    29/11/2018 at 08:40

    شوف يااخي الزواج قسمة ونصيب وربنا عزوجل مااراد لك نصيب مع البنت دي وكل شئ راح لحاله قد يكون السبب في افشال جوازك منها اهلها واصرارهم على قائمة العفش والاشياء دي اكيد لها تاثير كبير على حياتكم الزوجية وقد تكون البنت فعلا احبتك وتعلقت فيك لكن اهلها هم العقبة الكبيرة في طريق حياتكم وده السبب اللي جعلها تفكر فيك وترغب في الرجوع لك هل عندك استعداد للرجوع اليها وتتحمل طلبات اهلها اذا كنت فعلا ترغب فيها تمسك بها وارضى بشروط اهلها في هذا الموضوع وان انت مش قادر على ذلك اتركها وبلاش تتصل بها واقطع علاقتك بها تماما وربنا بيكرمك بحسن منها ان شاء الله هتلاقي بنت الحلال اللي تستاهلك وتقدرك وتسعدك طوال حياتك

اترك رداً أو حلاً لهذه المشكلة