انا شاب عمري 28 سنه , خاطب بنت متدينه والحمد لله من 6 سنوات سافرت للخارج من 3 سنوات علشان اكمل بيتي و افرش الشقة و الحمد لله خلصت كل حاجة و فاضلي 3 شهور و ارجع بلدي لاتمام اجراءات الجواز
المشكله حصلت قبل سفري في ان خطيبتي كانت رافضه فكرة سفري و انها علي استعداد انها تتحمل الحياه معايا ايا كانت بس ما اسفرش و انا اقتعتها بان انا شايف ليها حياه احسن من سفري ده و سافرت . و تعبت جدا وشقيت و ده اثر علي معاملتي معاها اللي هي من وجهه نظرها اني مااهتمتش بيها و تجاهلت مشاعرها لاني في اوقات كتيرة كنت بتخانق معاها لانها بتطلب مني اني ارجع ليها .
نزلت اجازه من سنه ونص و لاقيتها متغيره معايا لدرجة انها مش عايزاني امسك اديها و بررت ده بان مشاعرها اتغيرت تجاهي واني السبب في ده
اديتني فرصه تانيه اني احاول ابطل تجاهل واني لما اسافر تاني ارجع بسرعه علشان تحافظ علي الحب ده .. انا بصراحه اتصدمت ووهمت نفسي انها بتعمل كدة علشان ارجع علي طول
سافرت و اشتغلت اكتر و راعيت ربنا فيها باني حتي معملتش صداقة مع اي حد مع اني في بلد الفجور ده غير اني ببعت فلوس للناس اللي بتشتغل في الشقة بشكل دائم لحد ما جه يوم واتعصبت عليها في التلفون و قولتلها لو انتي مش عايزاني انا كمان مش عايزك
فاطبعا هي رافضت في الاول بس بعد اصراري وافقت علي الانفصال وانها تعبت ونفسيتها كمان
وكلمت اهلها في سبب غضبي بس هما لاموها و اقنعوها خاصه اني فاضلي 3 شهور وارجع
هي وافقت ترجع تاني بعد ضغط اهلها عليها بس هي طلبت مني انها تاجل الجواز علشان مش حاينفع انها تتجوز وهي شايفة انها مش بتحبني
وانا وافقت … بس اللي حصل انها بعتتلي رساله بعدها باسبوع انها مش قادرة تكمل معايا و ان انا انسان كويس و مصلحتنا اننا ننفصل بس عايزاني اني اكلم اهلها وافههم ان ده قرارنا احنا الاثنين علشان يوافقم
علي فكرة هي مافيش حد تاني في حياتها وده انا متاكد منه و كمان هي كانت مستعجله علي الجواز و كل شويه تطلب مني اني ارجع لحد اخر مشكله
و زعلها مني اني حكيت لاهلها تفاصيل حاجات ما بينا كان المفروض اني ما قولهاش وكمان هي بتقول ان انا بموقفي ده نهيت اخر شويه حب كانوا عندها تجاهي
انا مش عارف اعمل ايه انا بنيت حياتي و مستقبلي عليها وحبنا كان حب اسطوري و شايفه بيضيع وانا مش عارف اتحرك وهي مش عايزه تسمع
وراجع بلدي كمان 3 شهور علي مجهول .. حاسس اني بموت
يااخي تبغا الصراحة انت غلطان في حق خطيبتك ومش قدرحبها ومشاعرها الصادقة لك وفضلت السفر لاجل تعمل زي الشباب الاخرين وكسرت بخاطرها وحطمت قلبها ومشاعرها ايه يعنى لو قعدت في بلدك وبحثت لك عن عمل اووظيفة في شركة محترمة وكونت نفسك مثلما انت تقول وتبقى بجوار الانسانة اللي احبتك وفضلتك دون الاخرين دي قمة الانانينة منك واعذرني على وصفي هذا لكنها دي الحقيقة وخصوصا وان البنت واهلها شارينك بالغالي اتمنى انك ترجع اليها فورا وتتصالح معها وماتفسخ خطوبتك منها ابدا وتحاول تراضيها وتدور على شغلانه محترمة في بلدك ونشاء الله ربنا هيكرمك ويوفقك ويجعلها من نصيبك ويسعدكم في حياتكم القادمة
اظن والله اعلم لو هيا بتحبك بجد مش هتيجى على ال3 شهور وتقرر الانفصال