السلام عليكم .. احب اشكر اداره مشاكل وحلول على الفكره الجميله والاهتمام بالشباب ..
انا مش عارف ابتدى منين ولا اقول ايه بس شاب 26 سنه خريج كليه حقوق واشتغلت فى المحاماه شويه وسبتها .. انا ليا علاقه بالاكتئاب الشديد حسب تصنيف الدكاتره من اول ما دخلت الكليه .. انا كنت ملتزم دينيا فى تالته ثانوى بس ما جبتش مجموع يدخلنى كليه وقفت معايا على نص درجه فابويا دخلنى كليه خاصه وهنا بدأ الذل لانه كان بيحبسنى فى البيت مفيش خروج خالص وكالكليه تلت ايام بمواعيد ولو اتاخرت ساعه كان ممكن يكرشنى برا البيت ده غير الضرب مع ان البنات زمايلى كانو بيخرجو براحتهم.. ويجيب الكتب ويقولى احفظ يا ابن الكلب نا دافعلك فلوس ولو عرف انى نزلت من البيت كان بيطلع عينى ووكل يوم خناق وشتيه وتهزيق وتقليل كرامه .. جالى اكتئاب ومش بقيت احس بطعم اى حاجه حلوه فى الحياه وافكارى بقت زفت لقيت كله بيبعد عنى وبقع فى مواقف محرجه اوى لما احس ان الناس مش عايزانى ما بقاش ليا اصحاب وسلوكى اتغير والناس قرفت منى اوى لدرجه انهم كانو بيتريقو عليا .. وعدت السنه ونجحت ولقيت نفسى مش حاسس بالفرحه خالص ومش حاسس باى حاجه .. وكنت اتعرفت على واحد من على النت وشربنى حشيش لقيته بيضحكنى وبيضحك الناس معايا فضلت اشرب كل يوم واشرب واجيب مع نفسى واشرب فى البيت ما انا مليش صحاب ولما اتخرجت من الكليه ابويا قالى اشتغل معايا اشتغلت معاه وقولت حبقى انسان جديد وعايز انجح فى شغلى , بس ابويا ما اتغيرش وبيعاملنى معامله وحشه جدا فى الشغل وقدام الناس ويطردنى كتير ويرجعنى تانى ويخلى شكلى وحش اوى قدام موكلينى , وفى اخر مره فضل يطلع فيا غله ويهزق فيا لغايه لما عيطت قدامه راح سايبنى وماشى وما كلمنيش بعدها لقيت نفسى ماشى فى الشارع تايه اوى ومحبط اوى اوى ومش عاارف اعمل ايييه احساس وحش اوى اوى كنت فى فتره الشغل كونت صداقه مع محامى من سنى واتصاحبنا بسرعه وقربنا من بعض جدا وبقيت مبسوط ان عندى اصدقاء شباب زيى شبهى و مستوى جتماعى متقارب .. بس لما دخلت عليه مكتبه اليوم ده لقيته بيضرب بودره هو ومحامى تالت انا كنت جربتها معاه قبل كده بس ما كنتش بشربها طول ما انا فى الشغل لانى عايز اشتغل كويس ومش عايز ابقى بودرجى بس اليوم ده قعدت اضرب كتير والشيطان اصطادنى وانضربت بيها وبقيت بودرجى سلف من طوب الارض وعيشه معفنه وبسيح فلوس البيت .. والله انا تعبت من الفراغ والاكتئاب والملل والمعاصى والبعد عن ربنا والاحساس بالفشل وانك تتصنف فاشل وموال الادمان ده قصه بنت كلب لوحدها ويا ريتها بتموت بسرعه ده بتموت بالبطىء .. انا الحمد لله ارتحت شويه بعد الكلام ده بس بصراحه انا لوحدى مش قادر وممكن اكون محتاج حد يساعدنى انا مش عارف انا روحت مصحه رخيصه كانت معفنه اوى وسلبيه اوى بتخليك عايز تضرب اكتر من الاول وروحت لدكتوره غاليه كل اللى عملته كتبتلى على ادويه وقالتلى اقعد فى البيت لغايه لما اخف … يا ريت يا جماعه تدعولى بجد انا والله من جوايا مش عايز شر لحد وعايز الخير للناس كلها وللبلد وعايز اكون قريب من ربنا لكن مش عارف الشيطان هزمنى ولا انا اللى ضعفت ولا انا ايه وليه اصلا !!1! ادعولى ولكم مثلها ان شاء الله
اللم اغفر لنا زنوبنا وتوب علينا يا رب ..
مشاكل الشباب النفسية
تايه وضايع ومش عارف اغير من نفسى
اضيف بتاريخ: Wednesday, November 29th, 2017 في 10:51
كلمات مشاكل وحلول: الاكتئاب, الشباب, شاب, كلية الحقوق, مشاكل
اخي انا والله نفس المشكلة بس انا عندي 16 سنة فقط ، ابوي بيتعدا عليا انا واخوتي صغار ويضربنا من سنتين بعد موت امي ويسبنا ويقول لقرا يا كلب احط عليك فاوس في المدرسة، لكن وجدت طريقة لتخفيف المشاكل ، قم بالاستغفار والله ما راح تندم استغفر بالحمد لله الف مرة و ان شاء الله بتشوف نتيجة فاقرب وقت ، و استغفر بلاحول ولا قوة الا بالله رح تساعدك كثير والله ان شاء الله حياتي بدأت مشاكلها تخف