انا شاب مش عارف احيانا بحس ان انا فيه حاجه غلط ولا الغلط من الناس اللى حواليه ولا هو سوء اختيار منى . انا ليه ثلاث قصص لما بفكر فيهم ساعات بحس انى مش عارف فين الغلط . اولهم كان فى حد ورانى واحده لقيتها باسم الله ماشاء الله جميله وسالت عليها لقيت الناس قالوا انها كويسه وبناء على كده بعت الشخص ده لاهلها وعرفتهم انى عايز اتقدم لها ووافقوا ورحبوا جدا جدا وقالو خليه يجي يقعد معاها الاول علشان هى مش عارفاه .
المهم . روحت وقعدت معاها واتكلمنا كلام عادى جدا . ومشيت واتكلمنا كام مره فى التليفون قعدت فى الموضوع ده تقريبا 10 ايام وفجاه لقيت حد قريبي من الدرجه الاولى راح اتقدملها وهما وافقوا عليه وخطبها .والحاجه الاغرب من كده انى كنت معزوم . ما علينا … كبرت دماغى وقولت ان دول ناس مش شارينى ومش مظبوطين وعادى انا زعلت شويه من قريبي بس خلاص كل شئ نصيب . ثانيهم اتقدمت لواحده كنت اعررفها واعرف ابوها واعرف امها وهما بصراحه ناس محترمه جدا . دخلنا فى مشاكل علشان حد قريبها من الدرجه الاولى كنت بغير عليها شويتين من الشخص ده وهى مكانتش عامله اى اعتبار للغيره دى كانت هى وابوها وامها يقولوا انها طول عمرها كده وانت لازم تاخد الموضوع ده ببساطه وان ده زى اخوها .
المهم انا ما استحملتش وقولتلها كل شئ نصيب . وعرفت بعدها انها اتخطبت لقريبها . عادى . كل شئ نصيب . ودلوقتى انا خاطب بنت كويسه جدا
واهلها ناس محترمه جدا جدا بس حاسس انى مش عارف احبها . فى حد تانى دايما بيجى فى بالى وساعات بكلم خطيبتى على انها هيه . مش عارف هل ده علشان كنت دايما فى مشاكل وخدت على كده ؟ ولا علشان انا فعلا بحب الحد التانى ده بجد ؟ ولا ايه ؟ ياريت حد يرسينى على بر ؟
مشاكل الشباب مع البنات
خطيبتي كويسة جدا بس مش عارف احبها
اضيف بتاريخ: Sunday, January 13th, 2019 في 22:11
كلمات مشاكل وحلول: الحب, الغيرة, بنت, حب, شاب
شوف يااخي انت لم تحسن الاختيار في المرة الاولى ولا الثانية اما الثالثة فهي ان شاء الله ثابتة بس انت ابعد عن القلق والاوهام اللي مسيطره على دماغك وتقرب من البنت وعاملها كويس وبعد الزواج ياتي الحب الحقيقي ربنا يجعلها من نصيبك ويتمم لكم بالخير ويؤفقكم ويسعدكم في حياتكم اللي جايه