بسم الله الرحمن الرحيم
عاوز النصيحة منكم فى مشكلتى انا شاب 31 سنة عرفت فتاة عن طريق الاهل واول مقابلة بينا كان فى راحة نفسية من كلا الطرفيين وحدثت الخطوبة فى اول لقاء لينا وعيشت معاها اجمل شهر فى حياتى بعد الخطوبة وبعدين طلبت منى ققدملها شبكة المهم جبت الشبكة ومن بعدها ابتدت المشاكل البنت اتغيرت مبتردش على التليفون مش عاوزة تخرج معايا مش بيعجبها كلامى كل شوية زعل ومشاكل على اى شىء تافه مع العلم هى تعليمها اقل من متوسط وانا خريج جامعة وهى عايشة فى دور مش لايق عليها خالص مغرورة جدا مع ان اهله ناس عاديين خالص حاولت كتير قربت منها واشوف ايه مشكلتها مقدرتش مش عاوزة تتكلم ولا تفهمنى حولت حياتى لجحيم علشان ارضيها وخسرت المشروع اللى كنت فاتحه علشان استرزق منه انا ولدى توفى وسابنى انا وخواتى على الحميد المجيد وكافحت كتير وتعبت فى حياتى – المهم لاقيت امها بتسالنى انت جبت شبكة بكام قلتلها انتى عارفة قلتلى بنتى مش عاوزاك اصل انت كل شوية تزعلها قولتها خلاص كل شىء نصيب امها خدت الدهب وجت رمتلى شوية فلوس اصلا ميجوش نصف حق الشبكة قلتلها ماشى مفيش مشكلة قلتلى هانجبلك الهديا اللى جبتها قولتلها مش عاوز حاجة -اقسم بالله صرفت عليها فلوس كتير اغلى واحسن لبس وبرفانات وهدايا وكروت شحن للموبيل وفسح -اضايقت جدا من الحصل وملقتش سبب لاى حاجة- انا كنت بعمل علشانها كل حاجة تسعدها
بعد فترة عرفت انها اتخطبت لواحد وبعديها واتفشكلت الخطوبة ولاقيت امها بتكلم ناس قريبى انى ارجع لبنتها تانى انا مساءلتش فيهم وقعدت امها تكلم كل واحد اعرفه لدرجة انها كانت بتكلم جيرانى علشان افكر فى الموضوع تانى بصراحة زهقت وسابتلهم مصر واللى فيها وسافرت بلد اوروبى ونسيت الموضوع وقلت افكر فى مستقبلى احسن وقعدت حوالى 4 سنين برة مصر وعرفت انها اتخطبت مرتين كمان وبرده اتفشكلوا وامها بعتالى رسالة ان البنت كل مابيجلها عريس بترفوضه علشانى انا فى عقلى قولت اكيد دى نصابيا جديدة عاوزين يعملوها عليا علشان انا سافرت ومفكريين راجع مليونيير المهم امها جابت رقمى من اخويا ولاقيتها بتتصل وعاوزانى اكلم بنتها المهم كلمتها عادى جدا وسلمت عليها وبعديها بقت الاتصالات ورسايل بتجينى على الموبيل ولاقيت ولدتى بتقولى فكر فى الموضوع يمكن يكون فى نصيب اتصلت بالبنت وكلمتها لاقيت مفيش اى شىء اتغير فى اسلوبها زى ماسبتها مبتتكلمش ولا انا فاهم هى عاوزه ايه انا كنت متوقع انها تقولى انا لسة بحبك انا مستنياك انا بفكر فيك مسمعتش اى كلمة من دول واكن انا اللى متصل بيها اتراجها ترجعلى – ياريت يا اخوانى تقولولى اعمل ايه واتصرف ازاى انفض للموضوع ده ولا اديها فرصة تانية انا عارف ان فى فى مصر بنات زى الماظ واحسن منها كتير وعاوزيين يعيشوا بس انا مش عاوز اظلمها -شكرا لكل واحد ادانى من وقته علشان يقرا مشكلتى او يدينى حل
مشاكل الشباب مع البنات
خطبتها و فشكلت و بعدها سافرت لكن هي تريد الرجوع
اضيف بتاريخ: Wednesday, January 11th, 2012 في 23:25
كلمات مشاكل وحلول: مشاكل الحب, مشاكل الخطوبة, مشاكل الشباب مع البنات
ممكن تكون البت عندها ظروف خاصة او فى مشكلة مش عايز تقولها لحد اديها فرصة تانى وحول تعرف هى لية بتعمل كدة يمكن تكون عندها عقد
الي زي دي عمرها ما هتتغير وبعدين شكلها مغروره جدا .سيبك منها وربنا هيرزقك باحسن منها
الموضوع واضح جدا شخصية زي دي لا تناسبك تماما ربنا يوفقك مع حد تاني سيبك منها ولا ترد علي احد من ناحيتها اغرضهم مفهومة ومتدنية جدا ويا ريت البنت شخصية قوي لا كمان مش متعلمة ومغرورة يبقي علي ايه تتعب نفسك مع العالم ده في ناس احسن منها كتير وتتمني نص اللي انت عملته معاها انا لما كان خطيبي يجبلي هدية بسيطة كنت ببقي في عالم تاني مش فاهمة الناس دي عايزة ايه ربنا يوفقك لبنت الحلال اللي تصونك
انا ما بأردش على مشاكل كتير بس مشكلتك استفزتني
انا مش هأقولك سيبك منها والكلام ده زي ما بعض الأخوه قالوا لك
أنا ها أقولك خليك راجل وانت ومفهوميتك يعني تبقي راجل ازاي
أولا انت ناس باعت واشترت فيك ازاي تفكر انك ترجع لهم تاني
انت ازاي اصلا سمحت لنفسك انك تكلم البنت دي تاني
لما أمها كلمت كان المفروض الرد يكون في منتهي القسوه معاها لأن دول عالم زباله ما اشتروكش وما قدروش ظروفك ولا لما انت ما كانش معاك فلوس كنت كخه ودلوقتي لما سافرت ورجعت وظنا منهم انك بقي معاك فلوس واصبحت ثريا بقيت حلو دلوقتي وزى العسل
يا ابني اللي ما يقفش جنبك في وقت المحنه والشده ويتخلى عنك يبقى انسان خسيس
هأسألك سؤال افرض ان الدنيا قلبت عليك وإفتقرت تتفتكر عالم ماديه وزباله زي دول هايبقى تصرفهم ازاي
وكمان في نقطه تانيه في غاية الاهميه انت بتقول اني البنت زي ما هي -خلاص ما فيش كلام تاني يتقال ما هي واضحه قدامك زي الشمس
الدنيا مليانه ناس محترمه وتقدر الانسان لذاته وليس من أجل ماله -الزواج مشاركه وقرار صعب فأحسن الاختيار حتى لا تندم
اوعى ترضى ترجع لها تاني
اللي زي دي مش هتتغير ابدا وبعدين ازاي ماتديش لك الشبكة كلها وازاي ترضى تاخد الهدايا
هتتعب معاها صدقني
زي ما قلت في بنات كتير زي الالماظ في مصر ولاد ناس محترمين
اسمع كلامي هتتعب
الا اذا كنت بتحبها خلاص سامحها وارجع لها تاني
اما لو مش بتحبها خلاص سيبك منها
ربنا يوفقك باحسن منها
السلام عليكم اخي في الله مش هطول عليك في الرد بس انا زيك في غربة وحاسس بيك المهم هندخل في الموضوع مع بعض انت عارف كل عيوبها وشوفت انها زي ما هيا مفيش اى تغير لية تظلم نفسك مع واحدة مغرورة وبعدين انت بتقول اتخطبت 3 مرات بعديك يبقي ازاي بترفض تتخطب لحد عشانك ونصبوا عليك في الشبكة كمان وماشاءالله ربنا كرمك بعد ما بعدت عنها يبقي ليه ترجع لماضي مات والماضي دة مفهوش حاجة كويسة انساها وشوف مستقبلك وحياتك وربنا يرزقك ببنت الحلال اللى تقدر شاب في اخلاقك وفي احترامك صدقني ربنا هيكرمك بس مع واحدة غير دية وحتى لو كانت كويسة هقولك مقولة شوفتها عجبتني جدا وديةبالفعل حصلتلي مع بنت حبتها بس حياتها غير حياتي ………..
أعلم بأنني لم و لن أصادف مثلك لكني علي يقين بأن خسارتي لك هي أجمل ما يمكن أن يحدث بيننا
لأن كلانا لديه أسلوب حياة كافيا لإتعاس الآخر !!
…..
انا قولتها عشان تعرف حتى لو هيا كويسة اسلوبها غير اسلوبك حياتها غير حياتك طريقتها غير طريقتك ربنا يوفقك وتلاقي بنت الحلال قريب وادعيلي معاك الاقي بنت الحلال السلام عليكم
ماتزعلشى منى بس انا وانا وبقرءفى المشكله بتاعت بضحك مش لاسمح الله بشمت ولاشئ بس علشان الموضوع واضح جدا جدا البنت ياراجل مش عايزاك مستنى ايه تانى هاااااااااا؟وبعدين هى مش عايزاك انتا ولا غيرك دى اكيد فة دماغها حد تانى بس مع ضغط السره وكده بتحاول تتقبل اى واحد لغايه ماتطفشو سسيبك منها واللى يبيعك بيعه انتا عايز واحده تخاف عليك وتصونك وخاصه انك هتبقا راجل متغرب يعنى مش دايما معاها …..والله الموفق والمستعان