بصراحه أنا أول لما دخلت على موقع مشاكل وحلول ده عجبنى جدا وقررت فى الأول انا أبعت مشكلتى لكن كنت خايفه انى أقلاقى الرد من ناس فى سنى لكن لقيت فى ناس كبيره بتعاتب وتقول ده صح ولا غلط عشان كده انا قلت ابعت مشكلتى وعندى ثقه في ربنا وفيكم انكم تقولولى الصح من الغلط
أنا بنت عندى حاليا 16 سنه فى 2 ثانوى علمى من مصر انا مقدرش أقول انى متدينه أوى لأنى بصراحه بسمع أغانى وعايشه حياتى بس الحاجه اللى ترفضها العادات والتقاليد فى بلدنا ويرفضها الدين والله ما بعملها ولا بقرب منها مع ان أسرتى ( دون عيلتى ) متدينه جدا جدا جدا وانا غيرهم وده اللى خلانى ابقى بعيده عنهم وما يعرفوش عنى حاجه والأخطر أن ما فيش بنات فى عيلتى الا واحده بس واكبر منى بأكتر من 15 سنه( متزوجه وعندها عيال ) وكنت بحكيلها على كل حاجه وكانت بقولى على الصح من الغلط بس اللى حصل أنى اتعاركت معاها عركه كبيره من مده خلتنى قطعتها فبقى معنديش اى حد أحكيله عن حياتى .. ومحدش يقولى مامتك ماما على عينى وعلى راسى لكن غير متفاهمه على الاطلاق وما مبيعرفش تتعامل مع المرقين اللى فى سنى
المشكله انى كنت زمان لما كان عندى حوالى 12 أو 13 سنه حبيت واحد من قرايبى حب شديد قوى لكن خجلى منه وخجله منى منعنى انى أقله او ألمحله وكمان عيلتنا ما تقبلش حاجه زى كده وان جوايا بحس انى لما أقول لولد انى بحبه ده عيب وما ينفعش وغلط فقطعنها من أصيلها .. وكنت بتعذب عذاب لفراقه وكنت بدعى ربنا انه يكون من نصيى ليل ونهار أستمر الحب الشديد ده حوالى 2 أو 3 سنين .. كنت ساعتها لما كنت فى 6 أبتدائى ماما وديتنى معهد تعليمى ( مركز تعليمى يعنى ) يكون أرخص من الدروس الخصوصيه وكنت بحب المعهد قوى وكنت بفهم منه وكنت بجيب درجات عاليه جدا .. لحد لما دخلت 3 اعداى ماما أصرت انى لازم أخد مميز ( درس خصوصى مع مدرس غير المدرس الأساسى للمادة فى المعهد ) مميز فى ماده معينه وكانت بنت صغيره بس عقلها جبار وأكبر من بــ 8 سنين بس .. فدخلت المميز وهناك قبلت اللى مكنتش متوقعاه .. كان فى شاب هناك من متفوق وشيك جدا بس فى الحقيقه يعرف بنات كتير جدا وانا والله داخله مش فى دماغى مواضيع الحب والأعجاب خالص ( لانى كنت مش مشغوله بالموضوع الاولانى ) المهم بصراحه من اول حصه مكنش طبيعى معايا كان سايب الحصه وعمال بصصلى وانا قلت ساعتها يمكن متهيئلى أو فاهمه غلط وكبرت دماغى من الموضوع ونسيته لحد لما مره كنت قاعد فى الحصه ولقيته بجد بصصلى بصصلى يعنى ومكننش فى أحتمال 1% انه يكون باصص لواحده غيرى ودورت وشى الناحيه التانيه فى ساعتها وكانى مشفتهوش اساسا .. وساعتها وان بفكر فى الموضوع ده المهم الموضوع بقى بيطور وبقى بيبصلى عينى عينك كده حتى قدام المدرسين حتى ساعتها قلت لو حد لاحظ ان حبلغ مدير المعهد وبرده الموضوع بقى بيطور أكتر لحد لما مره أتحجج وكانت الميس ساعتها معاها كتاب الماده بتاعى وقال للميس : عايز الكتاب لو سمحت أشوف فيه حاجه .. انا عن نفسى قلت جوايا مفيش حاجه يعنى لكن لقيته ماسك الكتاب وعمال يلعب فيه ومابيدورش على حاجه زى الواحد لما يكون بيدور على حاجه كان مخبيها جوا كتاب معين وساعتها هوا طول قوى فبقيت بدأت أتنرفز ولما لاحظ خد الكتاب وجيه وقالى ووشه فيه تسبيل : ميرسى اوى أوى .. ففهمت الموضوع وكان ساعتها أول مره يكلمنى وانا أصلا عمرى ما كلمت اى ولد فى حياتى فخدت الكتاب بنرفزه من غير ما أقوله حتى العفو ووقف زى ما يكون بنت ضربته بالقلم على وشه ما بيتحركش خالص وطلعت وانا بضحك عليه بس من جوايا عشان محدش يلاحظ .. واستمر فى محولات لفت الانتباه وأنا عمله نفسى كانه مش معانا فى الدرس أساسا .. لحد لما فى يوم رحت قلت للميس انى مش حقدر اجى المعهد تانى لأنى حبدا المراجعات النهائيه لوحدى وكان ساعتها هوا ورايا وسمعنى وسلمت على صحابى لكن ان ونازله على السلم لمحته بزاويه عينيه وهوا ساند على الطرابزين وباصص عليا بتسبيل على الاخر وبيبتسم ابتسامه رقيقه جدا وبياخد نفس عميق جدا فمشيت وانا مش مصدقه نفسى وكان ساعتها ده اخر يوم فى 3 اعدادى
دخلنا على الصيف وانا ساعتها مكنتش عايزه أروح المعهد تانى مش حكايه انى مش عايزه اشوفه بس كانت فيه مشاكل بسبب الموضوع ده لكن ماما ساعتها أصرت على الاخر فقلتها خاضر الكلام ده كان بعد حوالى اسبوع بعد لما المعهد بدأ وفى يوم قبل ما أروح المعهد بحوالى كام يوم ماما قالتلى تعالى روحى معانا انا وجدتك الدكتور وانا وافقت وكان بابا معانا ولما دخلنا شارع الدكتور لقيت شاب وزميله ماشيين قدامنا جالى احساس انى اعرف الشاب ده فكبرت دماغى ساعتها لكن لقيت الشاب بيبص وراه عليا ويرجع تانى وكان ساعتها زى ما يكون شاكك فى حاجه ومش متاكد ومش مصدق فاستغربت جد فقلت انا لازم اعرف مين ده وفوجئت انه هوا ومصدقتش نفسى لأن الصيف كله مكنتش شوفته وبصراحه مكنتش مشتقاله حتى الكلام ده بيحصل وبابا وماما ورايا ولو عرفه انى فى حد بس بيبصلى أو معجب بيا وأنا ماليش ذنب حاورح جزيره مالطه فيها المهم لقيته وقف صاحبه قدامه وقاعد باصص عليا ما بيرفعش عينه خالص فقلت لماما انا حسبقكم على العياده لأانى ساعتها مكنتش عايزاهم ياخدوا بالهم من اللى حصل وبكده خلصت صيف 3 أعدادى
بعد كده بدات أروح المعهد وكنت ساعتها 1 ثانوى وبعد لما دخلت مالقتهوش وبعد شويه لقيته دخل وأول لما جت عينه عليا أتصلب فى مكانه حوالى 3 أو 4 ثوانى وقعد يجى ويروح وينكش ويتعارك مع اى شاب يكون مكانه شبه قريب منى كنوع من لفت الانتباه وان ولا كانى هنا وبرده كان مرتين كنت رايحه المعهد ويكون صدفه انى أنا وهو يكون رايحين فى وقت واحد الاقيه يتصلب برده فى مكانى مده أو لما أكون لبسا لبس جديد زى العيد مثلا وفضل على موضوع لفت الانتباه ده مده طويله جدا جدا جدا .. لحد لما فى كان المستر اتاخر شويه وكنت لابسه هدوم العيد الجديده ومن الملل فتحت البلوتوث وقعدت أشوف أسامى البلوتوث التانيه لحد لما لقيته بيتصرف بطريقه غريبه وانا شايفاه من زاويه عينيا قعد فجأه فى الديسك اللى موزايه للديسك اللى وراه الديسك اللى انا قاعد عليه وفجاه قام ومال ميله بسيطه جدا عليا زى ما يكون عايز يشوف بعمل ايه وفجاه فى ثوانى لقيت أسم بلوتوث بالاسم ده ( _ دلع أسمى _Lovly ) فا فوجئت بالأسم دة ومكانش فى حد على اسمى غيرى ومحدش يعرف أسمى برده غيره ولما رفعت راسى وبقيت طبيعيه شفته بزاويه عينيا باصص عليا ولما بدات الحصه كان واثناء ما كنا بنكتب حاجه راح باصص عليا برده ساعتها كنت طبيعيه جدا لكن من جويا لأ كنت فرحانه جدا واليوم اللى بعديه رحت ولا كأن حاجه حصلت وبالرغم من كده ما سكتش ولا حتى يئس وفضل على موضوع البلوتوث ده مده طويله جدا وبعد اللى كتبه فى المره اللى فاتت كتب بردو دلع اسمى وجمبيه اسمه لكن بحرف وارقام صعبه جدا جدا تتكشف لكن فهمتها والمره اللى بعديها دخلت الحصه ولا على حتى على بالى ان ممكن يعمل حاجه كبيره لقيته أول لما دخلت عدل هدومه كويس قوى وهوا بيبصلى ولما دخلت وفتحت البلوتوث وان أصلا بعمله على طول عدم اظهار جهازى يعنى أفتحه ومحدش يعرف انى فاتحاه لقيته كاتب ( I LOVE.U ) فا فوجئت جدا من اللى حصل وبقيت طبييعيه لكن جوايا بردو لأ بعد كده غبت مده ورجعت لقيته كاتب على البلوتوث ( YOU TAKE MY HEART) ترجمتها ( أخدتى منى قلبى )الجمله ديه أثرت فيا أوى اوى اوى هيا والاولى خالص وبعد مده لقيته كتب ( BA7BK MOOT ) ترجمتها ( بحبك موووت )الجمله ديه تعبتنى اوى ومن هنا حصلت جوايا نقطه تحول اولها أن نسيت خالص الحب الأولانى لانه بصراحه كان بيعملنى معامله بنت البواب وناس تقولى لأ ده بيتكسف منك خالص لدرجه انه بيلخبط خالص معاكى وبالرغم من المعامله ومقارنته بالشاب اللى معايا فى المعهد اللى الدنيا بتتقلب لما بيشوفنى كرهت الحب الاولانى خالص وبقيت بحن للحب التانى بعد الجمله اللى كتبها لأنى بصراحه كنت فى الاول خايفه ليكون بيلعب بيا لأنه يعرف بنات كتير وبعد الجمله اللى كتبها ديه قعد مده ويقاله مده ما يكتبش وفى مره فتحت البلوتوث مره وكنت غصب عندى نيسيت اعمل عدم أظهار جهازى وكنت مسميه جهازى باسم طويل جدا لقيته ماسك موبايله بيبص على حاجه ومابيدوس اى زرار عرفت انه بيقرا أسم البلوتوث بتاعى بس ما كنتش أعرف ان يعرف أن ده أسم بلتوثى ولا لأ وراح كتب حاجه ودخل الموبايل فى ساعتها لقيته كتب حاجه (i wish you ) ترجمتها ( بتمناكى او عايزك ) فرحت جدا جدا بالجمله ديه وبدأت حاجه جوايا تصدقه بس على بسيط وبعد كده جيت مراجعه ليله امتحان لماده هوا كان فاكر انى مش جايه ولما دخلت أتخض خالص واتصن فى مكانه زى زمان وخلصت على كده 1 ثاوى
دخلت بعد كده على الصيف وبصراح ساعات ببقى كنت عايزه أشوفه وساعات مش بيبقى على دماغى خالص كنت ساعات بشوفه وأنا واقفه فى البلوكونه لأ نه ساكن قريب منى والله أعلم إذا كان عارف انا ساكنه فى دور الكام ولا لأ لكن هوا عارف انا ساكنه فى العماره ديه لأنه شافنى قبل كده وفى مره قبل الما تبدأ دروس المعهد لــ 2 ثانوى نزلت أجيب الغدا من السوق وان وراجعه لقيته فى الشارع لكن باصصلى زى ما يكون ماشفنيش من حوالى سنين كان باصصلى زى مايكون ما فيش حد فى الشارع غيرى وزى مايكون طول ما هو شايفنى مش قادر يبص على الناس حتى انا كنت تقيله جدا ساعتها فقعدت ماشيه عادى جدا فى الشارع واول لما عدى بدأت أضحك وأعض فى شفايفى لقيت واحد صاحبتى فتكلمت معاها شويه ولأنى أصلا كنت يشوفه فى البلكونه وعارفه انه بيطول اوى فى لما بيروح بيشترى حاجه ساعات بتدخل ى 30 دقيقه عامله حسابى انه حيعدى بعد مده ولكن فجأ بعد حوالى 1 أو 1.5 دقيقه لقيته راجع وبيدور بعنيه على حد لحد لما لقانى وبص على برده زى الأول كل ده بزاويه عينايا وقفت أتكلم زيادة مع زملتى لحد لما عدى وهيا بصراحه وهيا ما تعرفش الموضوع ده خالص وكانت زى الأطرش فى الزفه ساعتها رجعت البيت طبيعيه جدا واول لما دخلت قوضتى وقفلت على نفسى أقعد اصوت من جوايا وأطنطت زى ما يكون جبت مجموع عالى فى ثانويه عامه ومكنتش مصدقه نفسى خالص ساعتها بدأت أصدقه وقلت مستحيل حد يبص على بنت ويعمل كده وهو متأكد ان هيا مش بصاله أساسا مشتحيل يكون بيضحك عليا أو بيلعب بيا وساعات بقول لأ ما تندفعيش لا يكون فعلا كداب وكده تكون خلصت اجازة الصيف بتاعت 1 ثانوى
ومن مده بدأنا الدروس بتاعه 2 ثانوى رحت اول حصه من مادة معينه ولقيته معانا وبصراحه كا بيبصلى من تحت لتحت مش عينى عينك زى الأول وكان متأكد أنى مش بصاله لكن للأسف أكتشفت بعديها حاجتين الأولى أنه فى المجموعه التانيه وأن فى المجموعه الاولى فى الماده ديه والحاجه التانيه انه طلع ادبى وانا فى علمى الموضوع ده مفرحنى انى عايزه اخد بالى من نفسى كويس قوى فى ثانوى واجيب مجموع عالى لأنى فى علمى وفى نفس الوقت انا أتعودت عليه فى حياتى ومفيش بنت تكره ان ولد يعجب بيها وخصوصا لو كان حب محترم من راى وخصوصا لو كنت وحيده ومبسمعش أى كلمه حلوه خالص لكن بعد كده لقيته فى ماده تانيه بيحضر معانا لكن حصلت حاجه غريبه فى الدرس كان كل ما المستر يقول أسمى ما أعرفش بيحصله أيه فجاه اقلاقيه باصص فى الأرض او مودى وشه الناحيه التانيه عكس الناحيه اللى انا قاعده فيها بالرغم انه كان اخر مره كان عادى جدا بس حاسه انه بردو ما طلعنيش من دماغه أو بمعنى أصح ما نسانيش وحاسه أنه حايعمل حاجات بالهب كتييير
لكن أنا دلوقتى مش عارف اذا كان ده حب وقصه وحيخلص الموضوع ده زى الأولنى ولا لأ ؟؟؟
وإذا كان ده حب حقيقى ولا مراهقه ؟؟؟
وإذا كان هوا بيحبنى ولا بيلعب بيا بعد كل اللى حصل ؟؟؟
أنا بعمل حاجه غلط أو تغضب ربنا ولأ انا على صح لحد دلوقتى ؟؟؟
انا اسفه أوى اوى اوى انى طولت عليكم
بس بصراحه انا بالرغم انى مش بحبه لكن اتعودت عليه انا برده فى شباب كتير قريبين منى ومعجبين بيا ومتأكده انه لا اول واحد يعجب بيا ولا اخر واحد انا بنت حلوه والحمد لله بالرغم من سنى ده فى ناس كتير اتقدمولى والله بس بابا رافض وانا كمان مش عايزه فى السن ده
انا عايزة رأيكم فى الموضوع ده وأعمل أيه .. وياريت لو اى ام أو واحده عاقله بجد تدينى نصيحتها وتعتبرنى بنتها عشان خاطرى
واسفه مره تانيه انى طوات عليكم وشكرا
ههههههههههه بصراحة انت مغفلة كبيرة وساذجة جدا لو فكرت ان هذة التصرفات الغير اخلاقية واللامقبولة من هولاء الشباب الساقطين المنحطيين دليل على حبهم لكي واعجابهم بك تبقي غلطانة وجاهلة وعبيطة اوي دي تصرفات بيعملوها مع اي بنت علشان يوقعوها في المصيدة وينالوا من شرفها باسم الحب المزيف والمشاعر الخداعة والعواطف الكدابة نعم دول كالذئاب المفترسة يتحيون الفرص للانقضاض على الفريسة حتى يعتدوا عليها انت لسه صغيرة وفي سن المراهقة وماتعرفيش مصلحتك فين ولا تفكري ازاي من السهولة خداعك والضحك عليك ولازم تفوقي من الغفلة والتوهان وحالة الضياع اللي انت فيها دي وتبقي بنت محترمة فعلا تحرص على سمعتها وسمعة اهلها وشرفهم وماتسمحش لحد كان من كان يتحرش بها او يتغزل بها او يعترض طريقها اذا كان التعليم مانفعك وماتعرفيش الحلال من الحرام والصح من الغلط فاايه الفائدة من ذهابك كل يوم للمدرسة عايزه تجيب المصايب والبلاوي لااهلك المساكين دول وتفضحيهم بهذة التصرفات المحرمة والغير اخلاقية ايه المسخرة وقلة الحياء اللي انت فيه يابنت صح لقالوا اللي ختشوا ماتوا نصيحة لك اتقي الله في نفسك وفي اهلك وحافظي على دينك وخلاقك وتربيتك وابعدي عن الحاجات دي ولاتشغل بالك بها ابدا اهتمي في دراستك ومستقبلك واياك ان تنخدعي في هولاء الاوغاد وكلامهم لك وتصرفاتهم معك ابلغي عنهم الادارة واشتكي عليهم علشان يعرفوا انك بنت ناس محترمين وربنا يسترعليك ويصلحك ويهديك ويكفيك شرهم