فى البداية انا حابة اوصف احساسى اللى خلانى الجأ انى اكتب مشكلتى للناس عشان يشوفوها اولاً لانى احترت انا صح او غلط ثانيا لانى حاسة بإحباط وبضعف جوايا وثالثا لانى بجد مليش اى حد احكى معاه …
انا وبإختصار شديد توفت والدتى من اربع سنين وانا كبيرة اخواتى وعندى بنتين اصغر منى وبعد كده اتقلبت الحياة جداااااا كان عمرى وقتها 16 سنة وكنت حبيت واحد ف السنة اللى امى ماتت فيها واتعلقت بيه اكتر بعد وفاتها لانه اكتر حد وقف جنبى طبعا عيشنا مع والدى اللى هو وبإختصار انسان شهوانى جداااا وانانى لأبعد الحدود كل تفكيره الجواز ومعرفة الستات والنت انا كنت ف ثانوية عامة وقتها طموحى اتحطم كله حتى الانسان اللى بحبه صحيح هو لسه معايا لحد دلوقتى بس ولا مرة قدر احساسى اللى جوايا خانقنى وتاعبنى اوى وكان بيبعد عنى ف اكتر وقت بحتاجه فيه بس برضه بحبه وهو برضه بيحبنى بس شخصيته كده هو مبيحبش المشاكل والنكد ولا انا والله بس ظروفى كده المهم.. اختى الاصغر منى بدأت تتعبنى لانها ف مرحلة المراهقة وتعرف ولاد وتخرج وتروح وتيجى وبقت عنيا ف وسط راسى بسببها واختى الاصغر منى بعشر سنين اعتبرتها بنتى ودخلتها المدرسة ورعيت شئونها ووسط كل ده كنت فى ثانوية عامة ومباخدش ولا درس مع ان خيلانى وخالاتى كانوا بيساعدونا مادياً بس انا كنت باخد الفلوس وبصرف على اخوات منها وكنت ف تانية ثانوى نظام قديم طبعا ووقعت ف مادة وواقعة اصلا مجموع وف سنة تالتة برضه وقعت مادة ومجموعة ميدخلنيش الا معهد مع انى اقسم بالله كنت دايما من المتفوقين حتى المدرسين زعلانين عليا جدا وفضلوا يكلمونى عارفين الانهيار اللى انا فيه ..
المهم .. انا حاليا عندى 21 سنة حياتى تحت الصفر (حبيبى) مش طايقنى وبيقول عليا نكدية وفقر عليه … اختى الاصغر منى سابتنى وراحت قعدت مع جدتى … دراستى وقفت وبحلم بيها ليل نهار ولما بشوف ناس رايحة الجامعة الصبح بتحصر على نفسى … اختى الصغيرة خالص بسبب انى عايزاها تتعلم صح ومتتأثرش بالظروف زيي بنزل اشتغل حاجات كتير ممكن اشتغل ف محلات او اشتغل ف بيت لمدة يوم بس واخد فلوس بس عمرى الحمدلله مافى اى ظروف هتخلينى اوصل لطريق مش صح …. (المهم ان وسط كل ده بيقولوا عليا ذكية جدا وكل اللى بيكلمنى بيفتكر انى ف جامعة وبيقولوا عليا جميلة وهتجوز بسرعة هههههههه رغم انى قررت نهائيا مش هتجوز خالص خلاص وبلاش حد يصبر فيا ولا يقولى خلى عندك امل لانى لو معنديش امل ف ربنا كنت انتحرت اصلا بس الحكاية كلها انى تعبانة اووى وحبيت افضفض بجزء صغير من اللى جوايا.
مشاكل عائلية
انا ضحية غبائي وظروفى
اضيف بتاريخ: Sunday, January 11th, 2015 في 02:59
كلمات مشاكل وحلول: الثانوية, الثانوية العامة, الزواج, النت, بنات, بنت
ابنتي الحبيبة السلام عليكم ورحمة الله وبركاته لقد قرات معاناتك وتالمت جدا لما حصللك وكل مومن في هذة الدنيا معرض للبلاء والامتحان من الله عزوجل فاصبري واحتسبي مااصابك عندالله من موت والدتك رحمها الله واسكنها فسيح جناته و ان يصلح حال ابيكم ويتوب عليه مماهو فيه ويحنن قلبه عليكم ويبارك لك في اخواتك ويسترعليكم جميعا انت الان الحمل عليكم ثقيل تجاه اخواتك البنات كونك الاخت الكبرى لهم وبمكانة الام لهن يتحتم عليك رعايتهن والاهتمام بهن وخصوصا انهن في مرحلة المراهقة وقد مريت بها وعارفه خطورة تلك المرحلة من العمر للبنت ومايكون فيها من طيش وتهور واندفاع لابد ان تحتوي اخواتك وتعدي بهم الى بر الامان بالمناصحة والتوجيه والمعاملة الحسنة وتعرفيهن الحلال من الحرام والصح من الغلط وتكوني خير قدوة لهن والمثل الاعلى في الحياة عشان يصيروا زيك ومن رايي انك توجل فكرة الارتباط باي احد حتى تطمني على اخواتك بنات وعلى مستقبلهن الحياة تتطلب التضحية والحمد الله قلت ان اخوالك وخالاتك مش مقصرين معكم انت واخواتك في شي وده يساعدك على اداء رسالتك ومهمتك تجاه اخواتك البنات وعاوزك ترجعي للمعهد وتكملي دراستك من جديد وتبعدي عنك الياس والاحباط فلا ياس مع الحياة وبالعزيمة والارادة والاصرار تحقق الطموح اللي تحلم به في حياتك وتسعدي نفسك وكل المحيطين بك وربنا بيوفقك وبيكرمك ان شاء الله وبسترعليك انت واخواتك ويسعدكم في هذة الدنيا ولايحرمكم من بعض اللهم امين
اختي الفاضلة اتفق مع كل ماقالته الاخت -اشرقت- لك نعم الراي وعين الصواب اسال الله ان يبارك فيك ويسترعليك ويعوضك كل خيرجزاء ماعملتيه مع خواتك ويرزقك الله بابن الحلال الصالح اللي يستاهلك ويقدريسعدك
قولي الحمد لله
واضح عليكي بنت ذكية و جدعة هههه مشالله عليكي ربنا يحفظكو و يختارلكو اللي فيه الخير و حطي في بالك دايماً ” ما ابتلاك ليعذبك ولكن ابتلاك ليهذبك” ديماً و ابدا احمدي ربنا علي النعم اللي مغرقاكي
يا عمري انا حاسه بيكي عشان حكايتي شبه قصتك و نا اكبر منك بسنتين عارفة اوي يعني ايه انو الواحد يكون يتيم الام بذات البنت عشان محتاجة حنان و حد يحسسها بأمان و نا كمان لسه مش في الجامعة و الموضوع داه تعبني جامد جداً بس لسه عندي امل هشتغل علي نفسي اوي و هثبت لنفسي اني استحق الأفضل شدي حيلك ركزي أوي في المذاكرة و خليها رقم واحد في حياتك عشان الشهادة سلاح و هتعملك قيمة في وسط ناس ما حدش هينفع وانت وشطارتك بقي عشان تقدري تروحي كلية عن طريق المعهد بعدين و ربنا يهدي ابوكي علي فكرة الظروف الصعبة بتطع ناجحين عشان تحدو ظروفهم و تغلبو عليها أقرئ عن حياة العلماا و المخترعين و كل الناس الناجحين في العالم بدو من صفر و بعد كفاح و إصرار و عزيمة و معاناة وصلو انسي الشاب بتاع ايام المراهقة داه مدام مش مقدر ظروفك ان شالله ربنا هيعرضك بأحسن منه في الوقت المناسب انسيه ورمزي في نفسك اختك المراهقة كلمي حد قريب منك من خالاتك عماتك حد يقدر يؤثر فيها و اللي عند جدتك خليها اتطمني عليها من وقت لتاني ادعيلهم “اصبري و ربنا ابتلاكو عشان بيحبك وعشان بيختبر صبركو اشتغلي علي نفسك و قولي يا رب ربنا مش هيضيعك اكيد هيكرمك كثير بالدعا و صلي و دايماً افتكري ان الله لايضيع اجر من احسن عملا” وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا”
“اسعي ياعبدي وانا اسعي معاك” “الضربة اللي ما تقتلش بتقري ” و اهم حاجة الأخلاق عشان البنت من غير ام بيكتر عليها الكلام ادعي كتير للماما و اتصدقي لها كل داه هيعد انت خليكي واثقة من نفسك و قوية عشانك اولا و عشان اخواتك بكرة ربنا هيعوضك خير واضح عليكي بنت ذكية و جدعة هههه مشالله عليكي ربنا يحفظكو و يختارلكو اللي فيه الخير و حطي في بالك دايماً ” ما ابتلاك ليعذبك ولكن ابتلاك ليهذبك” ديماً و ابدا احمدي ربنا علي النعم اللي مغرقاكي لو تابعت الأخبار وبعض البرامج هتشوفي مصائب لا تعد و لا تحصي ملايين البنات في سنك متشردات مريضات لا اهل و علم و لا عمل الشيطان ديماًً بيوريك الجانب الي فيه نقص التعدي عن السلبيين خليكي ديماً متفائلة و املك في ربنا كبير و كلمي نفسك بطريقة أدعمك “انا واثقة من نفسي انا احسن بنت ” عشان المخ ليصدق اي فكرة تدخليه و أقرئ كتير عن التنمية البشرية عشان عشان بتشجعك للإمام و تديكي دعم معنوي اتفرجي ع اليوتوب “طريقا لنجاح ” لدكتور ابراهيم الفقي الله يرحمو و “عمار الارض ” لمصطفي حسني
بتمنالك كل الخير و ربي يسعدك و يرضي عليكي 🙂
احمدي ربنا واهتمي بدرستك ولو تفوقتي في المعهد ممكن تنتقلي لكليه
بنات غيرك امهم ماتت مكنوش لقين اللقمه فحمدي ربنا واجتهدي واشتغلي وبكره ربنا هيعوضك