انا عمري 18 سنة، اختي عمرها 13 انا و هي كنا علي طول قريبين من بعض و مبنخبيش علي بعض حاجة، لغاية ما قابلت صاحبتها، تعالو نسميها مرام.
مرام دي بقالها كتير صحبتها و بتعتبرها البست فرند بتاعتها، فجأة اختي قالتلي ان ابو مرام مش بيحبها و مش عايز مرام تبقي صاحبتها تاني، من غير سبب؟ قلنا ماشي، بس لسة فضلو صحاب.
من قريب، كنت باجي اقعد جنب اختي الاقيها بتكلم ناس و تخبي مني، بس بتعمل نفسها مش مخبية حاجة، انا حسيت بالفضول بصراحة فدخلت علي موبيلها و هي نايمة، شوفو بقي عرفت ايه!! المصيبة ان اختي بتتأثر جدا باللي حواليها!
1- مرام عملة نفسها مريضة نفسيا، و بتقول ان عندها اكتئاب، بتقعد تعور في نفسها (self harming) قعدت تعمل كدة لحد ما حسست اختي انها مكتأبة هي كمان (علشان اختي بتنام كتير) و بقت اول ما اي حاجة تحصل، تقعد تقول لمرام انها هتعور نفسها و ان هي عيزة تقتل نفسها و مرام تشجعها.
2- احنا عيلة محترمة، مش بنكلم ولاد، حتي اختي اللي في الجامعة مش بتكلم ولاد، بس مرام مصاحبة اتنين!! بتقعد تاخد منهم شكولاتة و هدايا و بتخلي اختي هي اللي تروح تاخدهم و تديهم ليها علشان طبعا سمعتها متبوظش، لما تيجي تقف مع صحابها الولاد، لازم تاخد اختي معاها!! و صاحب مرام جاب لاختي شوكولاتة برضو.
3- مرام قالت لاختي انها عيزة تشرب سجاير!! و عيزاها تجرب مرة معاها.
4- مرام قالت انها زهقت من الصور العادية و عيزة تتصور صور sexy!! المصيبة انها قالت لاختي تلبس هدوم عيب و تتصور هي كمان و تبعتلها، عرفت ان ام مرام اتخانقت معاها و خدت موبيلها لانها نزلت صورة مش محترمة علي الانستاجرام.
5-مرام قالت انها هتنزل صور sexy ليها علي الانستاجرام و قالت لاختي تعمل زيها، بس اختي قالت ان انا ممكن اشوف و اقلها متصاحبيش مرام تاني فمرام قالت انهم يعملولي بلوك!! و قعدو يتكلمو عن الهدوم الsexy و مرام قالت انها عيزة تلبس حجات cup و شورتات
6-اكتشفت ان اختي مدية رقمها لولاد و بتكلمهم و صاحب مرام ده واحد منهم.
7- مرام بتحب واحد معاهم في الفصل، المشكلة ان الهي بتحبه ده قعد يطلع عليها سمعة وحشة و علي بنات تانية كمان و يقول انها طلعت السطوح معاه في المدرسة و عملو حجات عيب
8- اختي طبعا اتأثرت بمرام و بقت بتحب واحد هي كمان، لما اختي قالتلها عليه، مرام دخلت و كتبت في الشات مبينهم ان اختي بتحبه، اختي طبعا اعدت تتحايل عليها علشان متبعتش ، في الاخر مبعتتهاش بس قالتلها: شوفتي بقا انك مش بتحبيه و مش جريئة!!
9- اختي بقت بتقول الفاظ مش كويسة و لما تيجي تقول حاجة عادية تقوم مرام قيلالها لفظ وحش تقوله بدل الكلمة دي.
10- اختي بقت عيزة تصاحب، و كل شوية تقول لمرام زي ما انتي مصحبة 2 بيجبولك حجات انا كمان عيزة اصاحب.
11- مرام بتاخد هدايا و تدي اختي العلب بتاعتها علشان اهلها ميعرفوش
12- مرام حكت لاختي علي وحدة صحبتها راحت بيت ولد علشان درس، فخدها و اغتصبها،صورها صور و بيهددها انه هيفضحها بيهم ، اختي خافت و لكن كل اللي مرام قالته هو”انا عيزة اجرب”!!
13-لاحظت ان مرام بتعامل اختي غير المعاملة اللي اختي بتعاملهالها، يعني مرام تتضايق، اختي تفضل تحاول تصالح فيها و تضحكها، لما اختي تتضايق، مرام تقولها كلام مستفز زي معلش،كفاية او تغير الموضوع، اختي اتخانقت مع مرام قبل كدة لانها مش بتفتح الواتس اب غير علشان تكلم حبيبها و بترد علي اختي بالصدفة!
14-مرام عملت نفسها اتخبطت بعربية قبل كدة و خلت اختي تقول لكل الناس ان هي في المستشفي
15- مرام بتشتم اختي بالام.
16- اختي طبعا بقت بتعد تقول ان محدش بيحبها و كدة (هي اصلا عندها صحاب اكتر مني) و مرام بتوافق عادي!
انا خيفة علي اختي و عيزة ابعدها عن البتاعة دي، بس هي بتحبها جداا مش عرفة علي ايه، مش هينفع اقول لماما او بابا لانها هتعرف ان انا اللي قولت و هتكرهني، و لو قلت لماما متقولش لحد، ماما ممكن تقع بلسانها و خصوصا ان هي مش بتعرف تخبي حاجة، يعني ممكن جدا لو هي قالت لاختي انها عملت حاجة و اختي قالت انها معملتهاش، تقول ان انا اللي قولتها،و الموضوع ده حصل قبل كدة.
اعمل ايه؟
