مشاكل عائلية

عاوزه اتغير ومش عارفه ازاي

انا ست متجوزه وعندي اربعه اطفال عندي 28 سنه وجميله الحمدلله , انا بعيش بعيد من ماماتي واخواتي يعني في بلد تاني ومعنديش من يساعدني , يادوبك بهتم بجوزي وولادي والبيت ويبقى الوقت خلص , مش بلاقي وقت اهتم بنفسي يعني انا كنت نحيفه بفيت ديلوقتي تخينه شويه وعاوزه انحف بس مش عارفه ازاي .

ولادي بيكسروا بالبيت وبيشخبطو في كل مكان حاولت اعلمهم كتير بس تعبت بيسمعو الكلام وبينسو وبيكرروا والشخبطه مش بتروح دا اللي خللى بيتي منظرو مش كويس لو حد جا عندنا بيفول ايه دا بقى البيت في شخابيط الوان وحكايات بتاعة اطفال ا شقياء , باباهم مش بيطلعهم بره عشان يتفسحو بيبقو كل وقتهم بالبيت حاولت اطلعهم بره مقدرتش عليهم الاربعه خايفه عليهم من العربيات عشان هما بيجرو في كل مكان , حاولت اروح بيهم بيت صحباتي عملو هيصه هناك وكانو حايكسرو عفشهم , بفيت مش باخرج كتير , حاجه تجنن . انا بقيت في حاله نقسيه صعبه , حاولت اعمل برنامج للفسحه مافيش فايده , اتكلمت مع باباهم هو كمان زهقان طب ايه العمل وبقى مش بيفهمني وكل ما ائولو موضوع بيعارض دايما وكل مائولو انا عاوزه اعمل حاجه بيئولي بلاش منها عشان مش هاتنجحي بيها بختار ليه لون اللبس حلو اوي بيئولي لاء مش كويس مره اشتريت ليه هديه قالي ليه منا معايا زيها وحاولت اكلمه ليه بقى بعيد اوي كدا قالي عشان انتي عناديه ومش بتسمععي كلامي ومش بتفهميني , قلت ليه انا بفهمك اوي ومعاك في كل حاجه بس الاولاد شاغلين وقتي مش عاوز يفهم , حاولت اقرب منه بس هو بيبعد , حتقولو لي خلفتي الاربعه هائولكم دي مشيئة الله منا عملت حلول بس ربنا اراد اني احمل من فوق الحلول الحمدلله , انا بحب اولادي اوي وفرحانه بيهم اوي . بس المشكله دلوفتي انا عايزه حل , عاوزه ادي جوزي كل الحب والاهتمام عاوزه البس احلى لبس وارجع زي الاول واعمل شعري زي الاول , بروح بيت صحباتي وبشوف ازاي بيتهم كويس والعفش حلو اوي ومش مكسر انا قادره اشتري واشتري عفش كويس بس هايتكسر من تاني انا عانيت من دي المشكل ه . هائولكم مشكله حصلت ليا , في مره جات وحده ست لبيتي وراحت تقول للناس التانيين ان بيتي مكسررر ومش حلو خالص بقيت بتكسف من الناس لما بيجو على بيتي يزوروني , ازاي اعمل بيتي كويس ؟؟؟؟ وانا عندي ولاد بيكسروا ؟ وازاي البس واهتم بنفسي ومش بلاقي الوقت , انا عاوزه اكون كويسه في عين جوزي وعاوزه بيتي يكون كويس عاوزه برنامج كويس وماقدرتش اعمله دانا لو حكيت حاتكلم لبكره . انا اول مره بشوف المنتدى دا قلت هاكتب مشكلتي يمكن هاتساعدوني بجد عاوزه مساعده عشان انا هابقى اختكم وانتو هاتكونو غاليين عليا . مرسي ليكم اوي .

مشاكل وحلول ذات صلة

اضيف بتاريخ: Sunday, October 3rd, 2010 في 12:19

كلمات مشاكل وحلول: , , , , , ,

12 رد to “عاوزه اتغير ومش عارفه ازاي”

  1. متفائلة دايما
    18/04/2013 at 00:04

    حبيبتي انتي لازم تنظمي وقتك عشان تئدري تعملي كل اللي عايزا لازم تعلمي اولادك الصح من الخطا ولازم تهتمي بنفسك اوي سدئيني دي اهم حاجة

  2. ماريا
    03/03/2012 at 23:37

    ينبغي ان تعرفي ان الاولاد هم كتلة طاقة يعني حاولي تحرميهم شوية مش بمرة بش شوية من السكريات واقفلي عليهم في غرفة لوحدهم كده واديهم صباغة بتتغسل بالمية وقولي لهم ارسمو في وراق واللي هيفضل هادي وبيرسم هديلو مصاصة ولا قطعة سكاكر عشان هما محرومين منها واحسبيلهم بالنقط قولي لهم اللي بغلط كثير يتشالو منو نقط وكده هيتحرم من حاجة لازم تخلي لهم حاجة يخافو يتحرمو منها وحاولي تخليهم ينشغلو بحاجة واديهم وقت ساعتين كده رقص ولعب وتعب عشان يتعبو ويروحو ينامو وخصصي ليهم غرفة لميهم كلهم فيهايبوزوها يحرقوها اللي نفسهم فيه واقفلي واعملي اللي قلتلك النقط والرسم وشغلي موسيقى اطفال وسيبيههم ومرةمرة طلي عليهم وارمي كلمة فكريهم بالهدية واقفلي الغرفة وروحي اعملي شغل البيت وفي الاكل متديهمش اكل في سكرياتعشان بينشط الاطفال وبخليهم هستريين صدقيني هذه خطوات بسيطة لكنها تجدي نفعا عوض جارتي اللي كانت بتحط لهم منوم اوعي تعمليها دي بتبوز نمو الدماغ في المرحلة دي

  3. loly
    27/03/2011 at 01:54

    اهم حاجة انك توني ف عين جوزك الاجمل واحسن في كل حاجة اهتمي بنفسك علي اد م تقدري علمي ولادك بالثواب والعقاب لازم بيتك يكون جنتك وجنة جوزك المكان اللي يريح اعصابه مع الانسانة اللي بيحبها واختارها تكون معاه طول حياته ربنا يسعدكو ويوفقكو في حياتكو

  4. sorour elbosaty
    27/11/2010 at 21:01

    الحقيقة الردود كلها ممتازة وحاسس ان فيها كل الحلول المناسبة بس الواضح من كلامك ان زوجك ملوش أي مواقف في تربية الاولاد أو ليه شخصية عليهم بجانب الحلول بتاعت الأخوة حاول انك تقنعيه انه يهتم بالأولاد شوية.

  5. شباب الدرب
    14/10/2010 at 17:43

    اسمعى ال عاوز توضب نفسها راح توضب انتى عندك اهمال اهم شىء عندك اولادك وجوزك راح يكرهك ويبص برة

  6. ahmed
    04/10/2010 at 10:39

    علميهم وحفظيهم القرأن وحبيبهم فى الله والصلاة وطبعا كل اللى الاتقال فوق كويس بس متتعوديش انك تخوفيهم لان الدنيا مش خوف وترهيب لالا لازم تحببيهم احسن فى كل حاجه

  7. حنان الأم
    04/10/2010 at 01:30

    انا حابقى اعرض مشاكلي هنا وياريت تساعدوني وتقولولي اعمل ايه وربنا يصبركم عليا (: , اشوفكم بخير .

  8. حنان الأم
    04/10/2010 at 01:26

    شكرا ليكم يا اخواتي على ردودكم بجد مش عارفه اقولكم ايه , انا هابداء من بكره وربنا يكون في العون ادعو لي ربنا يساعدني بصراحه بجد الغربه صعبه وربنا يساعدكم يا رب في مشاكلكم . اشوفكم بخير يا غاليات .

  9. dodo
    03/10/2010 at 17:03

    شوفى يا اختى بجد الله يكون فى عونك
    بس انا ممكن اقولك الى اقدر عليه
    عنى مثلا فى الاول لازم اولادك يتعلموا انهم يبطلوا تكسر وهرجلة
    ودا ممكن تعمله بانك وبكل جدة تشترى كل واحد هديه حتى لو تمانه رخيص حدا قصص مثلا بلالين برواز
    كدا عنى وتوعدهم بانهم لو رتبوا مكانهم وسعدوكى هتكفاسهم وخدى كل واحد من ورا التانى علشان يعرف انك حبة تكفئية هو لوحدة ويعمل بجدية تامة وفعلا كفاى الى بيعمل والى مش بيعمل عقبية بجد ومصعبش علكى وممكن كمان تخرجى الى بسعدك وتسبى المهمل مع باباه فى اى وقت
    النقطة التانية انك تخلصى شغل بيتك باليل وكلهم نايمين وتعملى اكلك وكل حاجة
    وطبعا مش هيكون كل يوم
    واهم حاجة بقى زوجك
    لو فى امكانك انك تروحى للكوافرة روحى وتلفى شعرك فى البيت طول مانتى بتشتغلى فية وقبل معاد زوجك افردية والبسى واتبرفنى واهتمى بية حتى لو كانوا الاولاد مش بسمعوا الكلام
    اقفلى الباب غرفتك ما دام ما فيش فايدة
    ومن حق زوجك انه لاقى الراحة
    لان انتى مهمتك فى البت وزوجك مهمتة برة البيت
    فهو حاسس بكدا انك مقصرة
    اتمنى اكون افدتك ولو بحاجة صغرة

  10. خليك قويه
    03/10/2010 at 14:59

    يااااااااااااااه اد ايه انت ست عظيمه ربنا يوفقك يا رب بس ف حاجات لازم نعرفها علشان نقدر نحللك مشكلتك
    يعنى حاجات عن شقتك وحاجات عن اسس تربيتك لاودلاك
    المهم يا ستى مثلا لو شقتك كبيره 5 غرف مثلا خصصى اوضه منهم للعب للاطفال وهاتى كل حاجه بيحبوها ويلعبوا بيها ف الاوضه دى وعرفهيم لو حد لعب بره الاوضه هيكون ليه عقاب قوى مثلا حرمانه من المصروف او الضرب واى حد يكتب على الحيطه او يشغبط عليها يكون له عقاب قوى
    وقبل ده شاركيهم ف نظافه البيت
    حببيهم ف البيت يعنى مثلا الشخاطبيت دى ف يوم نظافه خليهم معاكى وقوليلهم يمسحوا الشخابيط الموجوده
    مع مراعاه ف التجديد ادهنى بالبلاستك لانه سهل التنظيف بيتمسح والديكورات مثلا خليها ف اماكن تواجد الزوار وغرفه زى الصالون خليها دايما نظيفه ومقفوله وما يكون قلبك رهيف وانت بتعاقبى الاولاد لزم قسوه ف التعامل وحنيه بعد القسوه علشان يعرفوا انك لما تقولى كلمه هتكونى ادها
    وان شاء الله نتواصل دايما
    وده النسبه للاولاد
    انم جوزك ف لازم يكون ف توضيح اكتر بكتير وكلام اكتر بس ف مرات قادمه

  11. طريق النجاة
    03/10/2010 at 13:43

    في اكثر من طريقة لتنظيم اطفالك .. وحياتك .. وبيتك

    اولا : اذا كان المنزل الذي تسكنوا فيه يوجد به غرف مغلقة كثيرة فعليك بالتالي :

    يخصص لاطفالك غرفة خاصة داخل المنزل ولتكن غرفة صغيرة هذه الغرفة يوضع بها بعض الالعاب التي تصلح لسنهم بحيث تكون مناسبة لاعمارهم ولا تضعي بهذه الغرفة اي اسرة للنوم فهي غرفة العاب فقط واذا كانوا من هواة الشخبطة على الجدران فعليك بشراء لوحة بلاستيكية كبيرة وتعلقيها لهم مثل الصبورة ليخرجوا بها طاقتهم الفنية بدلا من تخريب شكل الجدران وان تضعي لهم اوقات خاصة ومناسبة لاستخدام هذه الغرفة تكون بعيدة عن اوقات دراستهم اذا كانوا يدرسون في مدارس طبعا اما اذا كانوا في سن صغبر فهذه الغرفة تغلق من الساعة الثامنة مساء وسوف يكون ذلك في البداية صعب نوعا ما على ان يتعودو على ذلك النظام الجديد .. وانت بقى واسلوبك في اختيار الطريقة المناسبة لهذا الوضع ..

    وفيما يخص باقي الغرف فعليك بغلق هذه الغرف من الخارج بعدما تقومين بتنظيفها وترتيبها على الشكل المناسب واللائق بك ولا تفتح الا فيما يخص فتحها مثلا غرفة خاصة باستقبال اصدقاؤك وغرفة خاصة بالطعام وغرفة نومك فهذه الغرف خطوط حمراء على اطفالك لا يقربوا منها ..
    وطبعا يجب عمل دهانات جديدة لكامل المنزل حتى يكون التغير مناسبا مع الوضوع الجديد ولا تقولين ان اطفالك لم يتركوا هذه الاشياء بلا عبث وقتها لا ينفع الا العقاب الشديد حتى لا يكرروا ما يفعلوه وعلى راي المثل اضرب المربوط يخاف السائب .. واقصى حدود لنوم اطفالك هي الساعة التاسعة او العاشرة مساء .
    وفيما يخص حياتك الخاصة وعلاقتك بزوجك فسوف يبدأ يومك بعد نوم اطفالك لهذا كنت حريص ان انبهك لموعد نومهم لانهم اذا تمادوا في سهرهم فسوف يكون ذلك على حساب حياتك الخاصة .. المهم هو ان تجعلي من غرفة نومك المكان الذي سوف تكملي فيه يومك مع زوجك ويفضل ان يكون في جو رومنسي ومناسب لذلك وهذا بالطبع من خلال تنظيف الغرفة بشكل دائم ووضع بعض اللمسات البسيطة التي تطفي على المكان الجو المناسب والمريح للجلوس فيها والباقي يتوقف على اسلوبك وطريقة جذب زوجك لك من خلال الشكل والاناقة والحوارات الهادئة ولا تنسي التنوع في اشكل الطعام التي يحبها زوجك بشكل خاص .. واتمنى لك التوفيق ……….

  12. حياه
    03/10/2010 at 13:36

    اختى العزيزه انا مقدره كل اللى انتى فيه لانى ف الغربه وحاسه بيكى اولا عندك حل الاول انك لازم تودى اطفالك حضانه هناك هيتعلمو وهينتظمو فى كل شئ ثانيا انتهزى فرصه ولادك ف الحضانه ووضبى نفسك والبيت وهما طبعا هيرجعو تعبانين مش هيخربو كتير لانهم هيفرغو كل طاقتهم هناك اما بالنسبه لعقابهم انا لا انصحك ابدا بالضرب الشئ الوحيد والتربيه الصحيحه هى الحبس احبسى اللى يغلط فى اوضه واقفلى عليه فتره بالكتير ربع ساعه اذا كان سنتين ونص كده اما لو اكبر احبسيه اكتر شويه والله الحل ده جاب معايه نتيجه وبعدين لازم تعودى او لادك انهم ليهم غرفتهم يلعبو فيها بس وهاتيلهم سبوره كبيره عشان يلونو ويكتبو عليها وحاولى دايما تكون الالوان بتتمسح او تتغسل بالميه
    واللى فيهم يشخبط ع الحيط هاتيه واديله ليفه وصابون وخليه يشيلها بنفسه ويتعب استعملى الشده ولازم تكون فيه حاجه يخافو منها ولازم يكون فيه حاجه بيحبوها عشان تحرميهم منهاوحاولى تلاقى مكان مقفول يتفسحو فيه ومتعتمديش على جوزك فى اى حاجه لانه ساعتها هيتهرب منك الا انو يوصلكم لاى مول فقط وعوديهم على النظام عشان ترتاحى وشدى حيلك المهمه مش سهله

اترك رداً أو حلاً لهذه المشكلة