اخويا تزوج من يومين ومراته من محافظه تانيه وقبل الفرح اختلفنا على مكان الفرح عندنا او في محافظه العروسه ومن ساعتها اهلها قلقانين منى بسبب انها بعيد عنهم كل دة علشان نتاقشت معهاا بحده بالرغم احنا كنا اكتر من الاخوات بس من ساعه موضوع الفرح وهى اخده جنب وكل حاجه تحكيها لاخويا بالرغم انا قيللها لما يحصل حاجه بينا اخويا مالوش دعوه بيها احنا اخوات مع بعض مادخليش الراجل بينا وهي شخصيه متكبره وعنيدة ومابيهمهاش زعل الاخرين كل الى همها راحه اهلها وفرحتها وسط اهلها واحنا مش مهم وسبب انى كلمتها بحده انها جرحت فى اهلى وان اهلها مينفعش يسافرو من محافظه لمحافظه قالتلى مينفعش يركبو باص دول متعودين على ملاكى ويعرفوش يجيو عندكو بعربيتهم علشان مايعرفوش الطريق . المهم الفرح اتعمل عندها وقولنا معلش علشان خاطر اخويا ونريحو من الدوشه دى . يوم الفرح اهلها بدئو يضايقونى بالكلام ويقولولى خالى بالك منها احنا خايفين عليها من الغربه احنا هنبقا دايما معاها مش هنسبها فريسه سهله وكلام كتير من النوع دة , انا عايزة انسحب من حياتهم علشان اهلها يطمنو عليها وقطع علاقتى بيها نهائيا والعلاقه تبقا على قد اخويا بس يعنى يزورنى فى بيتى وانا اشوفو فى بيت بابا , انا مش عايزة اروح ازورو فى السبوع , يمكن يكون ده فى مصلحتو ويعيشو فى راحه بال وهدوء . بالرغم انا والله عمرى معملت مشاكل مع حد هى شخصيه مستفزه وانا دايما كنت اعديلها وقول معلش ماتقصدش انا مبحبش المشاكل الى من النوع ده ( على فكره انا وهى في سن واحد ) انا نفسيتى تعبانه مش عايزة اخسر اخويا بسبب مشاكل هايفه مالهاش لازمه
مشاكل عائلية
اهل مرات اخويا خايفين عليها منى
اضيف بتاريخ: Thursday, March 24th, 2011 في 10:38
كلمات مشاكل وحلول: الفرح, مشاكل اجتماعية, مشاكل عائلية
نفس مشكلتى لكن الفرق الى بينى وبينك انا لسه انسة بحس انها جاية علية خالص يعنى تقعد ماتحاولش تعمل حاجة فى البيت اقول مش مشكلة انا كده كده مش بحب حدي يساعدنى ابص الاقى هى تعمل الغلط وماما طبعا مش هتحسبها لانها خايفة على بيت اخويا تزعق فيا انا وهى تعمل نفسها الملاك الطاهر وماما نفسيتها تعبت منها لانه تصرفتها مش كويسه فى حاجات كتير بتسمع كلام مامتها فى كل حاجة لدرجة انها فى يوم كانت عايزة تزعق لماما لكن انا بصراحة مستحملتش ماشتمتهاش لكن قولت لماما سبيها تمشى انتى ماسكه فيها ليه وكل دة واحنا مش بنحكى لاخويا عن عميلها معانا عشان مايكرهاش بحس بنظرة الشماتة فى عيونهم لما مش بتكملى حاجة فى الشغل كنت مخطوبة اخوها سمع كلام وحش على خطيبى ماحبش يحظرنى سمعت من بره مش عارفة لية مش صاينين النعمة اللى فىايديهم فاكرين معاملتنا ليهم كده ضعف لكن والله انا عشان اخويا اللى ماليش غيره فى الدنيا وربنا يخللنا اخوتنا اهم حاجه يكونوا هما مبسوطيين وشكرا ليكى خلتينى افضفض عن نفسى شوية
انتي اخترتي الطريق الصح اقتصري عنها تمامًا ولا تعبريها واعملي الواجب اللي عليكي تجاه أخوكي بس ولا تتكلمي معاها إلا في حدود الواجب الاجتماعي ولو حاولت تفتح معاكي موضوع ممكن يوصلكم للصدام اسكتي وماتنطقيش ، حتى لو غلطت ماترديش عليها ولو وصلك كلام أنها بتقولو عليكي ماترديش وماتلوميهاش يعني اعتبريها مش موجودة إلا في الواجب الاجتماعي بس ولا تتصلي بيها ولا تفتحي معاها مواضيع لفترة بسيطة كدة وهي اللي هاتحك معاكي علشان تكلمك أو ترجع علاقتك بيها تاني ، يعني صباح الخير ياجاري انت ف حالك وانا ف حالي . بس الواجب ماتقصريش فيه .
على فكرة المشكله دى فى كل اسرة مش جديده ولا غريبه دايما اخت الزوج بتنظر لزوجه اخوها على انها اخت جديده لها وتحاول تقربها لكن مش بيبقى ده منطق زوجه الاخ لانها لا تعتبر اخت الزوج اخت لها يمكن اكون غلطانه فى رايى لكن ده اللى انا شوفته يعنى لو حاولتى تنصحى زوجه اخوكى بطريقه عاديه ممكن تكلمى بيها اختك تقلبها مرات اخوكى لزعله وتكبرها احسن حاجه انك تحافظى على السلام بينك وبينها علشان اخوكى يعنى روحى السبوع بتاعها وهاتى هديه حلوه وابتسمى فى وشها عادى جدا ومتدهاش فرصه تشتكى لاخوكى من حاجه وفى نفس الوقت اعملى حدود بينك وبينها يعنى السلام والتحيه وبلاش مناقشات وحوارات ونصيحه من اخت لكى فى الاسلام اوعى تتكلمى عن حياتك الشخصيه قدام مرات اخوكى اى حاجه تخصك متتكلميش فيها وكمان اى حاجه تخصها او تخص اخوكى متكلمهاش فيها ابدا تعرفى هترتاحى طول عمرك والله يا اختى فى مثل يقول الحقران يقطع المصران يعنى لو لقيتى حد عاوز يستفزك ويعمل فيكى حركات وكلام يضايقك ولا يهمك اكنه حيطه بتتكلم هل هتسمعى للحيطه يعنى لما اهلها او هى تحاول تستفزك اضحكى وابتسمى ومتضيقيش خالص على الاقل قدامها صدقينى هتلقيها تجرى وراكى وعاوزة تكلمك وهى اللى هتتفرس بس انصحك نصيحه اوعى تقطعى علاقتك بيها علشان ربنا لان لا يجوز هجر المسلم لاخيه المسلم فوق ثلاث وعلشان ربنا يقبل دعاكى يعنى متخصريش ربنا علشانها محدش يستاهل يخصرك علاقتك بربنا وكمان علشان خاطر اخوكى لان للاسف كل زوج بسمع لزوحته وبيصدقها وبيكدب اهله
هقولك حاجه انتى اقتصرى يعنى لاتتدخلى فى حياتهم ولاتبعدى الصله وتقطعيهابينك وبين اخوكى اعملى زى مااناعملت مراته نفس الحكايه بس الازيد بقى بتغير جدا منى ولماهو حتى يجيلى بيتى مش عايزه يجيلى ولسانها طويل حتى لماتتخانق معاه قدامى تغلط فيه اجبرتها تحترمه قدامى مكنتش بعبرها وقطعت دخول بيتها وبقيت استنقصها ده خلاها تغير وكمان حسيت انهامش محترم
المهم انى اناواخويا فى غربه يعنى ملناش غير بعض لكن هى بتموت لمايجى يزورنى و بنتى فى عمر بنتها لو لقت عليها ايه لازم تجيبوا لبنتها بس بصراحه انامقتصره جدا يعنى بروح للمناسبات وبس وبعدت عن مشاكلهم ووجع الدماغ وكده مريحه نفسى اناوجوزى وعيالى بس بسال عليه ديما بالتليفون ومبقتش مهتمه يجى او مايجيش اناديمااعمل الواجب وخلاص وهو حس دالوقت انها كل ده بتغير وطبعها زفت وبقى قرفان منها جدا بس بردوا ولابدخل