مشاكل الخيانة الزوجية

مشتت ومش متأكد هل مراتي خاينة

السلام عليكم ورحمة الله وبركاته …
اخواني واخواتي في الله , انا عقلي وقف عن التفكير , مش قادر اعمل حاجة غير اني الجأ الى الله ثم اليكم ,, انا متجوز بقالي 4 سنين وربنا رزقني بطفلة عمرها سنتين ونص , بدأت مشكلتي مع زوجتي لما كنت جالس مع احد اصدقائي في الكافيه , ورجعت البيت علشان اجيب حاجة كنت ناسيها
اتصلت بزوجتي عشان تنزل الحاجة اللي انا عايزها في ( سبت البلكون ), لاقيت رقمها مديني انتظار , مارديتش اكرر الاتصال لاني كنت خلاص قدام البيت
دخلت لاقيتها سايبة التليفون جانبها , سألتها (انتي ليه مش بتردي عليا , التليفون مديني انتظار ليه , بتكلمي مين ؟ ) واخذت منها التليفون وماكانتش عايزة تديهولي بحجة انها بتهزر , واخذته بالعافية , قالتلي ( انا كنت بكلم اختي , عشان جوزها ضاربها ) بصيت في الموبايل لاقيت رقم , سألتها وقولتلها ( دة رقم مين ؟ ) قالتلي ( دة رقم جوز اختي , وكنت بكلمها عليه , مانت عارف ) قولتلها (ليه مش مسجلاه ؟ ) قالتلي ( مانت مسجله عندك , ماشي هاسجله ) مع العلم اني ماليش صله ولا اي كلام مع جوز اختها خالص , وفعلا انا كنت مسجله عندي لما لاقيته على تليفونها قبل كدة وسألتها عليه , قالتلي نفس الكلام , بس انا مش في نيتي حاجة ,, المهم قولتلها ( انا هاتصل ب أختك عشان اشوف ايه المشكلة اللي عندها ) وبالفعل اتصلت , اتفاجئت بصوت شاب
بيقولي دة رقم سنترال > قولتله شكرا وقفلت , بصيتلها وادتها التليفون وقولتلها اتصلي تاني , ولما رد عليها , قالتله ألو مين حضرتك , هو انت فلان ؟ > على اسم جوز اختها , اخذت منها التليفون وكلمته تاني , وقاللي ياأستاذ دة رقم سنترال > قولتله (هو رقم دة كام ؟) راح قاللي معاك صاحب السنترال , رد عليا وقاللي مين حضرتك انت اللي متصل >قولتله هو رقم حضرتك (…………..)؟, قاللي لأ>قولتله شكرا , وقفلت
روحت مزعقلها وضربتها وقولتلها ( انا هاعرف الرقم دة بتاع مين ) قالتلي حسبي الله ونعم الوكيل , انا بيني وبينك ربنا > قولتلها ماشي , ونزلت
اتصلت برقم امها , ردت عليا اختها , وقولتلها ( انتي كنتي بتكلمي مراتي من رقم غريب ؟ ) قالتلي ( اه , دة رقم جوزي بس انا واخداه من وراه ومايعرفش اني وخداه ) قولتلها طب اديني الرقم , قالتلي ( انا مش حافظاه والله , انا قفلة تليفوني عشان عاملة مشكلة مع جوزي ,هو في حاجة ؟ )
قولتلها ( طب افتحي التليفون ورني عليا ) قالتلي ( طب لما اطلع عند ماما عشان انا دلوقتي شايلة حجات ) قولتلها ماشي , اتصلت بيها تاني , قالتلي ( انا عند ماما لسة طلعة ) قولتلها اديني الرقم , ( قالتلى انا رميته , عشان انا خايفة جوزي يعرف انه معايا عشان مروحة دلوقت ) , قولتلها اديني اخوكي اكلمه , كلمت اخوها وطلب منه يجي عشان اقوله على المشكلة , بالفعل جالي بعد ساعة في بيت والدي ووالدتي , وكان اخويا موجود وامي وابويا , وزوجتي , قولتلهم على المشكلة , كلهم استغربوا بين انها مش ممكن تعمل حاجة زي كدة ابدا , وان الموضوع في حاجة غريبة , اديت اخوها الرقم , وراح اتصل بيه , رد عليه نفس الشاب وقاله دة رقم سنترال , راح قاله ( هو فين السنترال دة ؟ ) قاله على مكان بعيد جدا عننا , قفل معاه وكلنا في حيرة , فضلنا نتناقش كتير وندخل في مشادة انا وزوجتي , وفي الاخر اخوها خدها معاه عند امها , ونزلت انا واخويا نتناقش مع بعض في الموضوع , لحد ساعة متأخرة , اخويا حاول يتصل تاني بالرقم , والمفجأة انه الشاب غير كلامه وقال ( ياجماعة الرقم دة ابني لاقاه في الشارع وركبه في التليفون من ورايا ) سألته قولتله ( هو ابنك لقاه فين ؟ ) قاللي ( مش عارف , ده هو كان مع مامته بيتسوقوا وبيجيبوا حاجات رمضان ولقاه ) قولتله ( طب كانوا بيتسوقوا فين ؟ ) قاللي ( مش عارف والله , هم كانوا بيتسوقوا مع قرايبهم ) , قولتله ( طب انا عايز اجيلك ) قاللي ( تشرفني , بس ممكن انا و الحاج نسافر نعمل عمرة قريب ) قولتله ( وماله اجيلك بكرة ) قاللي (تنورني ) , تاني يوم بالليل اتصلت بيا زوجتي وقالتلي (( انا عمري ماعملت حاجة زي كدة ولا عمري فكرت لاني بتقي الله فيك , انا عزراك في اللي انت بتعمله , بس انا هاتجنن زيك انا معرفش ازاي دة حصل ومين دة اصلا , اقسم لك اني مظلومة , وان شاء الله قريب هاتتأكد اني فعلا مظلومة ,,,, )) وقعدت تبكي طول المكالمة , لحد ماقولتلها (( انا مش قادر اصدقك , ومش قادر اكدبك , انا مش ههدى غير لما اعرف الحقيقة , وان شاء الله عن قريب )) ,,, ولحد النهاردة يا اخواتي انا مشتت , مش عارف اعمل ايه , ومش عارف اتأكد ازاي ,, عقلي بيقولي انها كانت بتكلم واحد , وقلبي بيقولي لأ لأ لأ ,, ساعدوني ارجوكم وقوليلي ايه الحل؟؟؟؟؟؟؟؟؟ انا اسف اني طولت عليكم , بس كان لازم احكيلكم كل حاجة بالتفصيل ,, اشكركم لسعة صدركم لي , واتمنى الرد السريع ,,,,اخوكم في الله m.k.b

مشاكل وحلول ذات صلة

اضيف بتاريخ: Monday, November 6th, 2017 في 06:33

كلمات مشاكل وحلول: , , , , ,

8 رد to “مشتت ومش متأكد هل مراتي خاينة”

  1. ابوالبتول
    14/10/2018 at 00:21

    مش عاوزك تتسرع في ظلم زوجتك واتهامك لها بالخيانة لازم تتاكد اولا من عديلك زوج اختها وتساله انت عندك رقم صفته كدا وكدا او كان عندك الرقم ده في يوم من الايام فان قالك ايوه نعم فزوجتك صادقة وان قالك لا ماعرفش الرقم ده ولاعمري شفته فعندها الموضوع معروف ومراتك كدابة وتهرب من قول الحقيقة

  2. صارح نفسك
    26/11/2017 at 09:38

    سامحها وانسى الموضوع حتى لو كانت غلطت مره فلا تقفل في وجهها باب التوبه المهم تخليك حريص ومراقب لها ولا تثق بها ثقه عمياء راقب تليفونها باستمرار وتحركاتها لكن متهدمشي بيتك بايدك واتقي الله انت في نفسك وزوجك ينعكس عليك في اهلك واولادك .

  3. المصري 74
    19/11/2017 at 21:11

    كاذبة لا تصدقها

  4. مستشار
    08/11/2017 at 11:52

    الكلام واضح جدا اوعي تتخدع في دموعها والاسلوب الكاهن دا .. والدهاء بتاع الحريم دا هي كلمت اختها واتفقت علي نفس الكلام بدليل ان اختها قالتلك انها رمت الخط لما لقت نفسها اتزنقت ف الكلام

  5. رجل بسيط
    08/11/2017 at 09:47

    السلام عليكم
    أولا لو هي صادقة مترفضشي تديك الموبايل ع الأقل انا بكلم اختي ايه المانع اديك الموبايل تتاكد وايه قصة الراجل اللي فضل 4 مرات يقول ده سنترال وفجأة غير كلامة وايه ان اختها رمت الخط
    صراحة الموضوع مش مريح منطرف زوجتك اما كلامها انا بخاف ربنا والكلام ده فسل يتقال
    ونقطة أخيرة لو زوجتك كانت مظلومة كان المفروض يكون لها ردة فعل قوية إزاي هي مظلومة في شرفها من ناحيتك وترجع كمان هي اللي تبكي وتقول لك انا عذراك
    المووضع صعب بس في حاجات مخفية
    ربنا يصلح الحال

  6. محمد
    07/11/2017 at 17:29

    شوف يا زعيم الموضوع واضح وضوح الشمس وسيبك من دموع التماسيح بتاعتهم دي ومينفعش حتى تسال زوج لاختها لانهم ممكن يحوروا عليك الا اذا بقى كانت هي مش حافظة الرقم
    وحتى لو بتكلم جوز اختها ف ده مش مبرر اصلا

  7. ابوالبتول
    07/11/2017 at 07:41

    شوف يااخي ان بعض الظن اثم انت ليه ماتسالش زوج اخت مراتك هل يعرف الرقم ده اوكان عنده في يوم من الايام فان قالك ايوه نعم الرقم ده كان عندي فزوجتك صادقة في كل ماقالت لك وان قال لك لا عمرمايعرف الرقم ده فزوجتك كذابة وتخفى عنك الحقيقة وعندها لك حرية القرار

  8. الشناوى
    06/11/2017 at 13:29

    بص ،،يابا ،،،،،الكلام الجد والواضح طريقه قصير لا يحتاج للف ولا دوران ،،،، لو مراتك صادقه انها كانت بتكلم اختها م على رقم زوجها ،،، اسال. عديلك مباشره. انت عندك رقم صفته كذا. او كان عندك الرقم. ده فى يوم من الايام ،،، لو قلك لا ،، خلاص بقى الموضوع. معروف. وكده تكون مراتك بتهرب من الحقيقه. ،،،اما لو كان جاوبك باه ،،، يبقى مراته صادقه

اترك رداً أو حلاً لهذه المشكلة