انا عندى 18 سنه بحب بنت اوى من 3 سنين تقريبا، ومش قادر اعترف بحبي لها واتمنى من حضراتكم تساعدوني.
الحكايه بدات من 3 سنين، شوفت بنت معايا فى درس ومن اول نظره حبتها، معرفش ليه بس بقيت بحب اشوفها اوى.
ومع مرور الوقت هى كمان اعتقد انها بتحبنى من نظراتها ليا، المهم خلصت السنة وما شوفتهاش فى الاجازة ولا السنة للى بعديها خالص غير نادرا جدا.
المهم انا السنة دى فى تالته ثانوى، وبقيت بشوفها مرتين فى الاسبوع بس على طول بتمشى مع صاحبتها، وانا بتكسف جدا انى اكلم اى بنت، لان انا معروف عنى انى محترم و متفوق دراسيا فبتكسف حد يشوفنى واقف مع بنت، وكمان هى محترمة اوى وعمرى ما شوفتها واقفه مع ولد.
بس ف مره قلت انا لازم اعترف لها بحبى وزى ما تيجى، وفعلا فضلت ماشى وراها من غير ماتاخد بالها لغايه ما بقت لوحدها وكلمتها يا دوب دقيقة واحدة قولتلها اسمك ايه قالتلى اسمها، قولتلها انا عارفك من سنتين قامت قايلالى انا بردو عارفاك، قمت بكل غباء قولتلها ممكن تليفونك هى طبعا قالتلى مش هينفع، قولتلها مش هعمل بيه حاجه انا عايز اكلمك، بردو قالتلى مش هينفع، قومت قايلها انا اسف لو ازعجتك ومشيت.
بجد انا مش عارف قولتلها كده ازاى، بس انا كنت متلخبط اوى، ومش عارف اقول ايه، والكلام كان بيطلع بالعافيه.
لكن شوفتها تانى بس ماقدرتش اكلمها، وهى كمان كانت عادية جدا ولا كان فى حاجه.
وانا دلوقتى مش عارف اعمل ايه يا ريت تساعدونى وانا مش مسامح اى واحد يقرا الموضوع وميردش عليا، بهزر طبعا بس بجد يا ريت كل واحد مر بمشكلتى او ممكن يساعد مايبخلش عليا علشان انا مش قادر ابطل تفكير فيها
