انا في ثانوي عام رياضة معايا ولاد ف الدرس وحبيت واحد زميلى وهو حبنى لدرجة بقينا نتكلم في الفون بالساعات نعرف اخبار بعض كده لحد ما فضل يزن كل شوية عايز اعد معاكى لوحدي وانا سمعت كلامه ورحت معاه عند شقة اخته وكانت فاضية واعدنا تقريبا ساعتين وحصلت بينا تجاوزات انه حضنى وبسنى بس انا كنت بحاول اقاوم بس هو اقوي منى برضو بس هو وعدنى بالجواز وقلى مش هلاقى احسن منك ومش معيوبة علشان اسيبك بس انا ندمت ع اللى حصل ما بينا ومش عرفه اكمل معاه ولا اسيبه؟!
اتفق مع كل ماقال لك الاخ – نو نمي- فهذا هو الراي الصايب والسليم لحل المشكلة اللي وقعت بها وربنا يوفقك ويسترعليك ويكرمك بابن الحلال اللي يستاهلك
اول حاجة : الحمدلله انك ندمتي علي ذنبك لان دا يأكد علي ان قلبك لسة نظيف ومبقاش كله اسود ..توبي لربنا واستغفريه وهو هيقبلك دا الغفور الرحيم اللي مش هيزهق مننا لغاية لما نزهق إحنا من التوبة
(إن الله لا يمل من توبة العبد حتي تملوا)
تاني حاجة : الحب شئ جميل وانا حاسس بيكي انك بتلاقي حد يهتم بيك ويسئل عنك ويعرف اخبارك ويشاركك افراحك واحزانك.. لكن انتي دلوقتي في سن ومرحلة مينفعش تضيعي ثانية فيها.. انتي في ثانوية عامة.. ولسة قدامك وقت تموتي نفسك فيه عشان تخشي الكلية اللي نفسك فيها.. صدقيني مفيش اشد من الندم اللي هتحسي بيه لما لاقدر الله متجبيش المجموع اللي نفسك فيه … انا بحس الاحساس دا كل لما اخرج مع كل واحد من صحابي دخل هندسة او حاسبات.. بقول اني كان لازم اموت نفسي في الثانوية العامة ..لكن راضي بقضاء الله وعارف ان ربنا هيعوضني خير في الكلية اللي انا فيها ان شاء الله..كان نفسي حد ينصحني زي مانا بنصحك كدا لكن الحمدلله علي كل شئ.. قدر الله وماشاء فعل
تالت حاجة بقا ودي الأهم.:للاسف انتي يوم ما جيتي تحبي.. اسآتي الاختيار في الشخص اللي حبتيه.. الشخص اللي انتي حبتيه.. كل غرضه انا اسف في الكلمة (جسمك) وارضاء شهواته ..وصدقيني لو كان بيحبك كان حافظ عليكي وكان خاف عليكي وعلي سمعتك وخاف ربنا فيكي واستني لما يكبر بعدين يتقدملك ويتجوزك بالحلال.. لكن هو مراعاش كل دا ولا خاف علي سمعتك قدام الناس او حد يشوفك ولا من ربنا.
رابع حاجة : الحمدلله انك مضعفنيش وانك لحقتي نفسك وانتي لسة في اول الطريق.. عايز اقولك حاجة اخيرة مبيعرفهاش بنات كتير.. الولاد لما بيجوا يخطبوا مستحيل ثم مستحيل.. بتحصل بنسبة 2 في المية عشان اكون صادق.. مش هيخطب واحدة كان عارفها. مابالك بواحدة لمسها.. ليه بقا ؟ عشان هو لما بيجي يتجوز عايز واحدة تشيل اسمه قدام الناس وتربي ولاده احسن تربية والناس كلهم يضربوا بيها المثل..
صدقيني اذا كان ليكي الخير في انك تتجوزيه ربنا هيبعتهولك بس لما تتقي ربنا
حطي الاية دي في دماغك واوعي تنسيها
(ومن يتق الله يجعل له مخرجا ويرزقه من حيث لا يحتسب)
وربنا يوفقك وان شاء الله نشوفك مهندسة او مبرمجة او محاسبة الكلية اللي تحبيها بقا واللي ليكي فيها الخير قد الدنيا 😂😊
طالب منك بس تدعيلي بالتوفيق وان ربنا يثبتني علي دينه 😊