السلام عليكم ورحمة الله وبركاته انا فتاة عندي 21 سنة مشكلتي ان اهلي خانقني جدااا وكل حاجة عندهم لا لا مفيش نزول مفيش شغل متروحيش متجيش متكلميش مع العلم ان انا الحمدلله باصلي من صغري وكملن معمريش عرفت اي شاب ولا اي حاجة واجي اقولهم دا يقولولي خايفين عليكي وانا للأسف بسبب شدتهم ديه معايا دخلت جامعة مكنتش عايزاها ولا كليه انا عايزاها وكانت دراستها فوق طاقتي وقعدت سنه فيها وسقطت وجيت قولت لبابا دخلني معهد خاص ولا جامعة خاصة رفض رفض ف الاول بعد ماخدت الثانوية واجبرني اخش الكليه انا مش عايزاها وبعد ماسقطت نفس الموضوع وصمم برضه اني أكمل فيها وتعبت جدااا جدااا وجالي اكتئاب وروحت للدكتور وخدت أدوية وبعد ما سقطت سنتين وانا اساسا كنت داخله متأخرة وبعد ما تعبت دخلني معهد بالعافية قبل ما دخل المعهد كنت قولت للدكتور انا عايزة اشتغل وبابا رافض بعد ماقاله وافق بعد عذاب ونفسيتي كانت بدأت تتحسن جدا وبقيت اشوف الناس و الشارع وبقا معايا فلوس بعدها بست شهور لقيته قرر اني لازم اسيب الشغل وبدون اي سبب ماما نفسها استغربت وكله استغرب وقولتله ليه ليه انا مرتاحة فيه قالي هاتسبيه يعني هاتسبيه وفعلا نفذت الكلام وكنت طبعا دخلت المعهد وللاسف من ساعة ما سبت الشغل وهما مبقوش يدوني مصاريف واجي اشتكي ماما تقولي اصل ال معهد مع العلم أن بابا ليه دخل وهي كمان واجي اقولهم اشتغل مش موافقين والشغل دا بالنسبه لي كان مهم جدا اولا عشان مبيدونيش مصاريف ثانيا لاني كنت باخرج من الخنقة الي انا فيها ونفسيتي كانت مستريحة جدا كمان بابا مش موافق اني اتخطب ويقولي لازم بعد ماتتخرجي وانا المفروض لسه ف سنة أولى وعندي 21 سنه عقبال ماتخرج هايكون عندي 25 وانا اكتر حاجة مخلياني عايزة اتخطب اني عايزة اخلص من البيت بأي شكل انا عايشه بين اربع حيطان في اخر ارف وخنقه حياتي كلها تنضيف وترويق وطبخ وغرف مبخرجش مبلبسش مبكلمش مع حد مفيش حد ف حياتي كل حاجة مضيقنها عليا على طول عصبيين ومكتئبين وانا تعبت من الجو دا فكرت ارجع للعلاج تاني. عشان انسي وهما برضه مش راضيين انا باحب الحياة والدنيا وهما مكرهني فيها متدحكيش متروحيش متجيش مش هاتشتغلي مش هاتتخطبي وأنا كبرت علي الكلام دا انا كنت ممكن اقدر استحمل دا لما كنت اصغر من كدا لكن انا نفسي بجد حياتي تتغير انا تعبت اعمل ايه؟؟
أهلك واضح ان هما متدينين , التدين إياه اللزج الخنيق ,, للأسف يابنتي انتي مزنوقة زنقة زي الزيفت , خلاصك الوحيد هو انك تحاولي تشوفي اي حاجة تحبيها في دراستك وتهتمي بيها قدر المستطاع وتنجحي علشان تقدري تشتغلي وبعد ما تشتغلي تستقلي وممكن تشوفي سكن مع بنات وتبعدي عنهم وعن قرفهم — العمر مفيهوش كتير لما تبقى 25 سنه هيبقى لسه 25 زيهم وتبقي 50 وبعدها مش هيفضل كتير في العمر ,أهلك هما على قد ما ممكن بيحبوكي هما خايفين على شكلهم وسمعتهم قدام الناس أبوكي عايزك تتجوزي من الأخر ومتجيبيش له أي فضيحة كل همة نفسه , وأمك شكلها بتقول سمعا وطاعة وغالبا عاوزاكي تطلعي زيها, وتتجوزي وتخلفي بس هتخرجي من عبودية أهلك لعبودية عمود الخيمة جوزك ….. انتي شكلك بتحبي الحياه وعاوزه تعيشي فـ علشان كده حاولي تخلصي تعليمك دا يكون هدفك الأول علشان تقدري تستقلي , وبالنسبة لخروجك وكده ممكن تخرجي في ايام الكلية بتاعتك !! محلولة يعني .. أهم حاجة تخلصي ال4سنين هيفوتوا بسرعة سنه هتجيب سنه – المهم حاولي قدر المستطاع متتجوزيش حد زيهم نفس الكئابة والبضينة والتدين اللزج حاكم انا عارف النوعيات القاتلة دي من الناس ..
أهلك هيكونوا أعدى اعدائك لو مخدتيش بالك كويس وبقا ليكي قرار رقم 1 في مستقبلك وخصوصا موضوع جوازك مستقبلا
انا عارف رأيي دا هياخد أوسخ تقييم في تاريخ الموقع لأن اغلبية الناس في مجتمعاتنا دماغهم زي دماغ أهلك كده , وشكرا .. هتابع الموضوع علشان لو رديتي عليا – وانا بالمناسبة أول مره أعلق هنا – لأن موضوعك يستحق التعليق لأنه فعلا في خطورة على مستقبل حياة أنسان ..
ابنتي الغالية السلام عليكم ورحمة الله وبركاته كل سنة وانت طيبة عايزك تكوني واثقة من نفسك ومتوكلة على الله عزوجل ولاتزعليش من تصرفات اهلك فصدقيني هم يحبوك وخايفين عليك من البلاوي والمصايب اللي بتحصل في زماننا هذا واكيد انت عارفه ايه بيجرى لاغلب البنات من اعتداات وتحرشات واختطاف وابتزاز الى اخره انا لست مع اهلك في كبت حريتك ومنعك من الخروج من البيت اوالعمل بس يكون وسط ضوابط ومعايير انت تلتزمي بها لهم وتكوني محل ثقتهم مثلا يكون عملك في النهار ومحدد الوقت وماتتاخيرش عن الحضور للبيت ويكون مافيه اختلاط بالرجال يعنى مع مجموعة من النساء والبنات زميلاتك في العمل ويعرفون مين هم اصدقاك دول وارقامهم عند اهلك لوحصل لاقدرالله حاجة لك ممكن الاهل يسالوهم عنك ويطمنوا عليك كذلك انت تكون ملتزمة باللباس والافضل الحجاب لك وعدم وضع المكياج او الزينة المبالغ فيها وعندما تريد الخروج للاسواق اوالتنزه يكون معك احد من الاهل ولاتتاخري عن العودة للبيت اذا توفرت تلك الشروط فلاااظن اهلك يمانعوا في ذهابك للعمل مرة اخرى لانهم بكدا يكونوا مطمنين عليك وواثقين فيك تمام الثقة وربنا يصلح لك الحال ويسترعليك ويؤفقك ويكرمك بابن الحلال اللي يستاهلك ويرتبط بك عماقريب وتلاقي الخيروالسعادة والاستقرار معه طوال حياتك