ضرورى اسمعونى لانى تعبانة اوى في حياتى وحاسة ان مشكلتى مالهاش حل
في البداية انا عندى 37 سنة ومتزوجة وعندى ولدين وبنت . تزوجت بعد الجامعة مباشرة يدوب سنة خطوبة وللاسف كان مسافر ونزل وعملنا الفرح معرفتش طباعه واخلاقه خالص غير بعد الجواز .. مشاكل لا حصر لها طول حياتى ضرب مبرح يترك اثرا .. اهانة جامدة لي ولأهلى .. بيحلف عليا بالطلاق انى احمل وفعلا ولادى التانيين حملت فيهم علشان الطلاق ميقعش .. ماكنتش رافضة الخلفة لكنى كنت عاوزة وقت بس ارتاح فيه واهتم بولادى دا غير انى بتعب جدا في الولادة والدكتورة اخر ولادة ليا حذرتنى من الحمل تانى لان كان هيحصل لي انفجار في الرحم واموت .. لحد ما جه بعد ابنى التالت وحلف بالطلاق وطبعا بيعمل مشكلة كبيرة في كدة وفي نفس الوقت كان سرق دهبي من ورايا ولما سألته فين دهبي قالي انا مديون واخدته علما بإنه بيسافر السعودية ومبسوط .. حلف بالطلاق انى اشيل الوسيلة واحمل رفضت اخدت موقف .. فلا ضرر ولا ضرار .. روحنى عند اهلى ووقع الطلاق وسافر وسابنى بولادى بدون مصاريف نهائي فضلت عند اهلى 3 شهور وفي النهاية قبلت ارجع زى كل مرة علشان ولادى .. حلف عليا انه مش هيخلف منى تانى وهيتجوز عليا .. وكنت عايشة معاه زى الخدامة فقط ورضيت بغيشة ذل ونكد باستمرار لانه غريب جدا وبيعشق النكد بدون اسباب .. كان بيتلكك لي وعمل مشكلة معايا وكل شوية يقولي غورى مش عاوزك وهطلقك وكان لما يشوفنى من غير ما اكلمه يقولي عاوز اديكى علقة موت .. خفت منه اوى سبت له البيت واخدت عيالي وطلعت من وراه وروحت عند اهلي مرضيش يطلق وقال قدامها المحاكم وسافر وسابنى بولادى من غير مليم ونزل في نص السنة فبعت ولادى يشفوه راح اخدهم معاه وسافر من غير ما اعرف وكنت هموت عليهم ونفسيتى بقت تحت الصفر وفضل بيهم باقي السنة وذلنى مبقتش عارفة اكلمهم .. كنت رفعت خلع لانه رفض يطلق مع انه في نفس الوقت قالي مش عاوزك .. اضطريت ارجع تااااانى علشانهم ولغيت الخلع ورجعت وراح اتجوز عليا بعدها علشان يخلف من واحدة غيري
وفعلا اتجوز عليا ولكن ربك مش بيتعاند والحمد لله مجابش منها عيال .. مكانتش بتخلف وسودت عيشتنا بصراحة واطلقت منه ومكملتش سنتين معاه ورفعت خلع عليه واخيرا طلقها .. لكن نفس اخلاقه ومشاكله وعدم احترام وقلة حقوق منه ليا في كل حاجة .. نفسيتى تعبت اوى صبرت كتير اوى علشان ولادى ومش قادرة اتحمل اكتر من كدة ومش لاقية حل لانى مش بقدر ابعد عن ولادى وهو لو سابهم لي مش هيصرف عليهم يا إما يا خدهم هو .. ودا كلامه فعلا
تعبت نفسيا ودراعي كان بينشف عليا وكإنه هيتشل وبوقي يتعوج وانا نايمة .. انا بحكى باختصار ليكم لكن كل من يعرف مشاكلى يقولي انتى من جبل .. لكنى بشر لم اعد اتحمل هذه الحياة .. انسان لا يقدرنى نهائي ولا بيقول حتى اي كلمة حلوة في حقي او ليا عديم المشاعر والعواطف اسفة لا يعرف سوى الاشياء الحيوانية فقط وممكن ياخدها بالغصب واحنا زعلانيين مش بنكلم بعض ويقولي يا إما اضربك ..
مطلبي بسيط اعيش … اعيش زى اي واحدة عيشة عادية مستقرة .. بقول اسيبه يمكن ربنا يعوضنى خير والحق ما تبقى لي من عمرى قبل ما اكبر واندم وتركبنى الامراض منه .. ولكن تبقى مشكلتى ولادى اللي مش قادرة ابعد عنهم ومش هعرف اصرف عليهم !!! عرفتوا ليه قلت لكم حاسة ان مالهاش حل .. بعتذر جدا عن الإطالة .. ولكنها نقطة من بحر
اختي ربنا يكن في عونك ويفرج همك وكربتك ويخلصك من هالحيوان السافل عديم المروه والرجولة ويعوضك خيرا نشالله اطلبي الطلاق منه دون تاخير حتى لوتطلب الامر الخلع اخلعيه فورا واولادك ملزوم بالانفاق عليهم والمصاريف لهم ده شرع ربنا بيقول كدا وانت شوفي حياتك مع الانسان ابن الحلال اللي يقدرك ويحترم مشاعرك وتلاقي معه كل الخير والهنا والسعادة في حياتك
فهمت من كلامك ان اولادك في حدود 12 سنه واذا كان لك مصدر دخل اطلبي الطلاق او اخلعيه واصرفي علي اولادك وربيهم ولكن لا تفكري في الزواج او اتركيهم موقتا ودعيه يتحمل مسوليتهم بمفرده واشك انه سيصمد لانه دائما مسافر ولانه ايضا تزوج عليكي وفشل واعتقد انه سيضطر للنفاوض معكي ولكن تماسكي وكوني لنفسك شخصيه وكوني صاحبه موقف وفي اسواء الاحتمالات اي طفل عندما يكبر ويمتلك قراره فانه يبحث عن امه اينما كانت والله معك
يا اخت انا قرأت مشكلتك كاملة مثل حالتك هذه تسمى ( كرب ) الانسان لما يكون في مشكلة كبيرة في حياته والم ومرض وضيق وظلم ولا يوجد له مخرج ولا معين له وكل السبل مغلقه امامه يسمى مكروب ويلجأ الا الدعاء , يوجد ادعية للكرب بالكتب , منها هذا الدعاء , ( لا إله إلا الله العظيم الحليم ، لا إله إلا الله رب العرش العظيم ، لا إله إلا الله رب السموات ورب الأرض رب العرش الكريم ) , ادعي به وكرريه بعد كل صلاة
ربنا معاكى انا اعرف واحده صاحبتى عندها نفس مشكلتك بس هى بتشتغل وشالته من دماغها خالص وعايشه حياتها عادى ومهتمه باولادها فقط ياريت انتى تستقلى كدا عشان ده مينفعش تعاشريه تانى تشترى نفسك وولادك
الحمد لله والصلاة والسلام على رسول الله صلى الله عليه وسلم وبعد :
فإن الحياة الزوجية مبنية على المودة والرحمة قال تعالى ” ومن آياته أن خلق لكم من أنفسكم أزواجاً لتسكنوا إليها وجعل بينكم مودة ورحمة ”
فإذا كانت هذه الحياة خالية من المودة والرحمة فستنعكس تلك الى ما ذُكِرَ ويبدو من كلامك أختي الكريمة أن زوجك سيئُ الخُلُق فإذا كان الحال كذلك ولم تستطيعي العيش معه فالحل هو البعد عنه ولكن الضحية هم الأولاد ؛ وعلى الزوج أن يتقي الله في أولاده وفي زوجته وأن يقيم شرع الله تبارك وتعالى ويجعل الأولاد في حضانتك الى سن البلوغ.
هذا وصل اللهم وسلم على نبينا محمد وعلى آله وصحبه وسلم.