الحب بين الاقارب

ابن خالتي باسني وقالي بحبك بس زي اختي

انا بنت عندي 20 سنة عندي ابن خاله عنده 24 سنة بقالي سنتين بحبه ومعجبه بيه من ساعة ما حضني ودا كان من سنتين بس كان حضن اخ لاخته لأن متربين من واحنا صغيرين أننا اخوات، عشان ماما مرضعة اخوه الكبير وكانت خلفة خالتي بعد ماما دايما بشهور، ماما جابت تلت بنات وولد التلت بنات كان بيجي وراهم التلت صبيان ولاد خالتو ف دايما بينا شهور الكبير بينه وبين الكبيرة شهور والمتوسط اللي بتكلم عنه بينه وبين اختي شهور وانا والصغير شهور ف اتربينا أننا اخوات ف الرضاعة بس احنا مش اخوات في الرضاعة.

المهم معظم حياتي معاهم لاننا قريبين من بعض بيحبونا كإخوتهم واحنا كمان، المهم طول السنتين وانا كنت منجذبه ليه اوووي حب بجد عمرى ما حسيته ناحية حد، وهو مرتبط وانا عارفة ف دايما بحاول انساه، وساعات كنت بقول اكيد مش هيكمل مع واحده من مكان بعيد كده ف بدي نفسي امل، وهو كان دايما بيهزر معايا وهزاره كان بالإيد أو يضرب هزار، فكنت م بحبش حد يلمسني بس مكنتش برفض منه وهو دايما كان يقولي بعمل معاكي كدا لانك اختي وبعتبرك اختي الوحيدة، وفعلا انا الاقرب في خواتي لعيال خالتو كلهم.

المهم طول السنتين كان بيقرب مني اكتر سواء بالكلام أو باللمس وانا مكنتش بحب كدا بقوله حرام يقولي انا بحب وجودك وبحب قربي منك وكلامي معاكي بحس براحه و حرام ازاي وانتي اختي ف لاننا دايما بنقولوا لبعض أننا اخوات.

ف من شهر ونص كان فرح اخوه الكبير فروحت قبل الفرح بشهر لان انا يعتبر اختهم وبنت خالتو الوحيدة لان فعلا انا اقرب حد ليهم.

في الشهر دا قرب ليا اكتر وحضني ولا يعتبر دا اول حضن يبقي حضن بجد فكنت بتضايق وازعل ودا كان بيحصل لما نسهر انا وهوا بالليل، حصل مره في شقته بس بعدت وتأتي كنت بكلمه بالعافيه ف فضل قلقان وخائف عليا، ولما الكل لاحظ اني زعلانه فوقت وقولتله خلاص مفيش حاجة وهو يقولي مش عاوزك تزعلي وقولتلوا مش زعلانه، وعشان يتأكد عاد الحضن تاني ودي تاني مره اكون موافقه واتفق أنها آخر مره ومش هيعمل كدا تاني فقولنا تمام.

وكان بيقنعني أن ده بين اخوات ولأن عادي بحضن اخويا فقولت عادي فعلا وتقبلت ده، بس من ابريل نص شهر وكان الفرح خلص وروحت رجعت ابات يومين كنت بعمل شغل في سناني في بيتهم كان أقرب لدكتور ف كنت ببات ف سهرنا مره بليل وساعتها قاعدنا نكلم وكان كلامنا مختلف لان سألته ازاي بنعمل كل دا وليه بيحصل كل دا مع اني مش بعمل كدا مع اخواتك ف قالي في حاجات بيبقى طعمها مختلف مع حد معين وانه بيحب اللي بينا ده وأنه بيستريح لوجودي جنبه، ف قالي يوميها انا وعدتك أن المره اللي فاتت اخر مره احضنك بس انا هخلف بوعدي لان بحب وجودك وربنا ما يحرمني منك وانت فعلا اختي ف انا تقبلت وقالي متبعديش لما احضنك ودي هيبقي اول حضن يعتبر لانك دايما بتبعدي اول ما المسك يعتبروا مش حضن ف سبيني احضنك وفعلا حضني وكان فعلا حضن طويل وكنت مغيبه وفجاة اتحول لبوسه وانا مصدومه من نفسي ازاي وافقت أن حد يبوسني وبعدين بعدت وهو اعتذر قالي مفيش حاجه حصلت احنا كنا بنكلم وبعدين حضنتك ونزلنا مفيش حاجه حصلت وكان بيهديني، نزلت وانا مش مستوعبه.

وتاني يوم نفس الحوار روحت من غير ما اشوفه ولما بقيت اشوفه اتجنبه ودايما يحاول يكلمني وبعدين يوم سألته من كتر ما مش قادرة لي حصل دا قالي مش عارف وفضل يسألني انا كدا كرهته أو فقدت ثقتي فيه، وانا مكنتش بفكر كدا كنت بفكر ازاي عملت كدا واعمل ايه والذنب ده بس بصبر أنه هيبقي نصيبي اكيد بعد اللي حصل، وهو قالي أنه هيفضل يعتبرني أخته ومش عاوز يخسرني وان عمل ده لأنه بيحس احساس حلو وميعرفش ليه بس كنت بحسبه مش فاهم مشاعره.

بس اللي حصل أنه امبارح راح قابل اهل البنت اللي بيحبها وجه وقالي قد ايه فرحان ب ده وأنه خلاص هيخطبها وانا دلوقتي باركتله وقولتلو قد ايه انا فرحانه.

بس انا حقيقي مخنوقة ومش عارفة ازاي هدخل حد تاني في حياتي ويلمسني، وإحساس بالذنب ناحية البنت وإحساس بالخيانه ناحية الشخص اللي هيكون من نصيبي، وانا حرفيا متعلقه بيه وبحاول ابعد عنه من زمان مش عارفة، وكرهت نفسي عشان سمحتله يلمسني وكرهت اليوم اللي حصل فيه كل ده وانا حرفيا تعبانه من كل اللي بيحصل دا.

مشاكل وحلول ذات صلة

اضيف بتاريخ: Saturday, September 4th, 2021 في 22:12

كلمات مشاكل وحلول: , , , ,

3 رد to “ابن خالتي باسني وقالي بحبك بس زي اختي”

  1. شيخ ابن باز رحمه الله تعالى
    16/03/2022 at 04:20

    انتي أخته بالرضاعة بما أن أخوه رضع مع اخوكي وي قلتي كلكم أخوة بالرضاعة ولا يحل لكي نفس اخوكي بالنسب ويلي تعمله حرام شرعا ياويلكم من الله

  2. lost
    03/11/2021 at 20:47

    بكل صراحة هو مجرد كان بيستغلك عشان يلمس ويعمل الحاجات دي، احنا شباب نفهم بعض، البنت بتفكر بالعاطفة، الشاب العاطفة عنده بعد الشهوة، المهم لو انتي متخيلة إن فيه حد مبيغلطش فساعتها بقي يبقي فيه مشكلة ،انتي غلطتي، كنتي ضحية، كلنا بنغلط بس لازن نتوب ونتجاوز ونتعلم، توبي لربنا وقربي أكتر، وابعدي عن القرب منه أو من أي شاب، إلا بالحلال، انتي صغيرة والعمر طويل إن شاء الله ولو فكرتي في اللي فات بس هتفوتي علي نفسك كل سنين شبابك ومتعها في الحزن والحسرة، فيه حاجة نفسية عندك اتغيرت ومش هترجع زي ما كانت إلا بالتعود والجهد والاستعانة بربنا، في طريقك للتوبة انسي اي شيء يفكرك بيه، او بالماضي، ولو افتكرتي متلوميش نفسك تاني ،اقنعني نفسك ان ده هيعلمك للمستقبل، واإياكي والشوق للمعصية، عيشي حياتك بعد التوبة عادي وإلا هتلاقي هو تجاوز وبيفىح وانتي لسة في مكانك، اعرفي مين هما المحارم وآداب الاختلاط، وابدا متسيببش فرصة للشيطان وتقولي احنا اخوات.

  3. دكتتور مؤمن
    10/09/2021 at 04:03

    بصي مفيش حاجه اسمها زي اختي والكلام ده طالما يحل ليكي يبقا مينفعش انه يحضنك او غيرو وهو بيعمل معاكي انتي كده وبيحب يعمل كده علشان شايفك بتستجيبي ومفيش رد فعل وهو بيعمل كده بيتسلي بيكي وبيحور وباصص لجسمك وللجنس فانتي تفكك منه وتبعدي عنه ومتسهريش عندهم ولا معاه وخليه يغني مع نفسه يقول ال يقوله وال انتي بتعمليه ده حرام

اترك رداً أو حلاً لهذه المشكلة