بصلى وبدعى ربنا يقدرنى على نسيانه مفيش فايدة

السلام عليكم ورحمة الله وبركاته
معلش انا هاطول عليكم شوية لانى هاحكى بالتفصيل وياريت تساعدونى….
حبيته وهو حبنى قررنا ان احنا بإذن الله هانكون اسعد اتنين على وجه الارض اتفقنا من البداية ان الصراحة تكون نور حبنا ووعدنا بعض بكده ، اتفقنا ان اى حاجة فاتت قبل ما نعرف بعض مش مهمة ومش عايزين نعرفها وان احنا لينا بيوم ما عرفنا بعض وبس ، مر حوالى شهر واحنا كويسين مع بعض ما فيش بينا مشاكل ولا خلافات الحمد لله ، لحد ما جه اليوم اللى عرف ان كان فيه واحد فى حياتى قبله ، وبعدين واحنا بنتكلم فى يوم قالى احكيلى عن حياتك قبل ما تعرفينى حكيتله كل حاجة من يوم ما وعيت على الدنيا لحد الوقت اللى بكلمه فيه وفى كلامى قولتله طبعا انت عارف ان سن المراهقة البنت ممكن تحب وما بقاش فى الزمن اللى احنا فيه بنت اسمها ما بتحبش…سألنى انتى حبيتى قبلى…افتكرت ساعتها ان احنا اتفقنا على الصراحة وقررت انى اقوله وقولتله ايوة حبيت بس ما حكتش ليه التفاصيل قولتله اسم الولد وسنه واتعرفت عليه ازاى بس حاجات بسيطة لاقيته بيقولى بس كده (هو تقريبا كان عرف كل حاجة عن الولد ده وعن علاقتنا وكان منتظر انى احكيله كل حاجة بالتفصيل )قولتله ايوة بس كده وبعدين الموضوع انتهى ومش لازم نطول فيه واحنا اتفقنا على الصراحة علشان كده قولتلك..بدأت المشاكل بقى من اليوم ده وبدأ الخناق وبدأ يتعصب وما كنتش عارفة ليه…فى يوم كنت عندهم فى اليبت مسك تليفونى ولقى رقم غريب بيرن عليا رد عليه ولقاه ولد وبعدها بشوية رن رقم تانى ولقاه ولد ، جنونه طارت بس ما وضحش قوى… كنت هاتغدى عندهم فى اليوم ده وبعد كده يروحنى لقيته بيقولى يلا علشان اروحك ولما اهله قاله هاتتغدى معانا قالهم لا عندها مذاكرة ولازم تروح وفعلا روحت وطول الطريق ما كلمنيش ولا كلمة..لما روحنا برضه ما اتكلمش خالص معايا وسلم على كل العيلة واتكلم معاهم وكأنى مش موجودة..ما قدرتش اصبر وسألته فى ايه لقيته طبعا متضايق من الارقام الغريبة وفتح بقى موضوع علاقتى القديمة وقالى كلام وجعنى قوى ، طبعا ما قدرتش امسك نفسى وبكيت وقلت الارقام الغريبة وانا ما ليش يد فيها وممكن تحصل مع اى حد وعلاقتى القديمة خلصت واتقفلت خلاص وندمت انى قلت ليه عليها بس ساعتها عرفنى انه كان عارف من قبل ما اقوله وانه سألنى وفكر انى هاقوله الحكاية كلها بالتفصيل وكان مفكر انى هاكون صريحة معاه زى ما اتفقنا قولتله ان حنا اتفقنا ان اى حاجة قبل ما نعرف بعض مش مهمة واتناقشنا فى الموضوع شوية وفى النهاية اتصالحنا وقولتله انى فعلا بحبه وعمرى ما اخبى عنه حاجة ابدا وانى هاخليه اسعد انسان فى الدنيا وكمان غيرت رقم تليفونى وجبت رقم جديد وما عرفتش الرقم الا ليه ولأهلى بس حتى صحباتى ما عرفوش الرقم ووعدته ان ما فيش حاجة هاتحصل بعد كده تزعلنا من بعض..وهو كمان قالى انه بيحبنى وانه عايزنى اكون اجمل بنت فى الدنيا فى كل حاجة ورجعنا تانى كويسين..(الشخص اللى كان فى حياتى قبل كده كان لسه بيحاول يتصل بيا على تليفون البيت بعد ما سيبنا بعض وكان يقول انه مش قادر ينسانى وانا كنت بصده بكل الطرق بس باحترام لاننا خرجنا من حياة بعض بكل احترام وقلنا ان ما فيش نصيب وطلبت منه انه ما يتصلش تانى خالص عليا بس هو للاسف كان بيتصل كل يوم وتقريبا فى نفس الميعاد بس لما عرفت كده ما بقتش برد خالص على تليفون البيت مهما حصل وقلولتله على الاتصالات دى وما خبتش عنه لانى اتفقت معاه على كده وهو اتضايق جدا ولما لقيته اتضايق ما بقتش اجيب ليه سيرة الشخص ده خالص ) فى يوم وانا بكلمه كانت الساعة حوالى 11 مساء تليفون البيت رن وكنت عارفة ان الشخص ده هو اللى بيتصل وما قمتش ارد بس هو سمع صوت التليفون وقالى ردى قولتله التليفون ما رنش زعل وقالى انتى بتكذبى عليا هو لسه بيتصل وانا عارف وانتى بتكلميه قولتله والله ما بكلمه خالص ودى فعلا كانت الحقيقة بس هو ما صدقشى وزعلنا وفضلنا كام يوم زعلانين وما بنتكلمش وبعدين ورجعنا تانى واتفقنا نفتح صفحة جديدة وننسى اللى فات خالص …بس هو ما نفذش الاتفاق وكان يوم حلو و10 وحش بدأ يوجهلى اهانات كتيرة وحسيت فى كلامه بالذل بعلاقتى القديمة وكنت يستحمل وحتى لو هو الغلطان كنت بخلق الف حجة علشان اقنع نفسى انى ممكن اكون انا الغلطانة واروح اعتذر وابتدى بالصلح حبيته لدرجة جنونية ببقى مستعدة اعمل اى حاجة علشان ارضيه بحب خوفه وغيرته عليا اتعلقت بيه فوق ما تتصوروا….بس دايما كل ما يحصل بينا حاجة يفكرنى بعلاقتى القديمة بطريق غير مباشر وفى يوم وفى اخر مكالمة بينا قالى كلام كتير قوى يوجع ومنهم كلمة وجعتنى جدا ما قدرتش اسكت عليها ورديت عليه لأول مرة من يوم ما عرفنا بعض ولقيته بعدها قالى انسينى خلاص ما بقاش فى بينا كلام كل حاجة انتهت اوعى تتصلى عليا فى يوم انسى انى كنت فى حياتك وانا نسيتك خلاص…..الخ قولتله ايه كل ده انا عمرى ما رديت عليك دى اول مرة وانت استفزتنى بكلامك وما قدرتش بس ما كنش قصدى واتأسفت كتير قوى وهو ما قبلش الاعتذار وقفل فى وشى وبعدين كلمته تانى ما ردش عليا وقعد كام مرة يكنسل فى وشى وبعتله رسايل اعتذار كتيرة قوى بس ما قبلهاش واتصلت عليه تانى رد وقالى خلاص انسينى اللى بينا خلاص انتهى شوفى بقى حياتك بعيد عنى وانا هاشوف حياتى انا كمان واول واحدة هاقابلها هارتبط بيها علطول وقفلنا وقعدت كل يوم اتصل عليه وما يردش ورد عليا فى يوم وقالى خلاص ياريت تفهمى بقى ( ولما ما لقتش فايدة بطلت اتصل عليه خالص ودعيت ربنا انه يقدرنى واكمل من غير ما اتصل عليه وفعلا ربنا قدرنى وبقالى 21 يوم ما بتصلش عليه ولا ببعتله رسايل بس مش قادرة انساه وكل يوم حبه بيزيد عن اليوم اللى قبله رغم البعد بموت فى اليوم 100 مرة حاسة انى اللى بيربطنى بيه حاجة اكبر من الكلام والرسايل مش قادرة ابعده عن تفكيرى يوميا بحلم بيه (بذاكر وشايفة مصلحتى علشان خاطره مش مقصرة فى اى حاجة بحاول اخلى دراستى ومذاكرتى ينسونى حبه ما فيش فايدة اول ما اخلص بيسيطر على كل تفكيرى لدرجة ان ما بقاش يجيلى نوم من كتر التفكير فيه بصلى وبدعى ربنا يقدرنى على نسيانه ما فيش فايدة حياتى بقت صلاة ورجاء لربنا بدموع انى انساه وما فيش اى فايدة خالص بحس انى ادمنته لدرجة ان بقى صعب انساه وهو مش سائل عنى خالص بستنى كل يوم يمكن يكلمنى وما بيكلمنيش بس حاسة انه مش ناسينى وان حبى لسه جواه انا بحبه قوى فى الله وبدون اى اغراض حبى ليه انقى واطهر مما تتخيلوا وبجد كل اللى بتمناه انه يرجعلى “ارجوكم ساعدونى وقوليلى بعد كل محاولاتى انى انساه وما قدرتش …..اعمل ايه ؟؟؟؟ “

مشاكل وحلول ذات صلة

• اقول لماما على حبيبي ولا استنى شويه
• مدرسي بيحبني وبفكر اهرب معاه
• قطع علاقتي معه لان الحب حرام
• بحب زميلي وهو بيحب واحده تانيه
• هل فقدت القدرة على الحب
• من حبى اريد الانفصال ولم استطيع
• خايفه زوجي يعرف علاقتي السابقه