عارف عارف المشكله دي اتكررت 70 الف مره هنا وفي مليون مكان تاني، بس مهو انا مش لاقي حد يساعدني يعني ومش عارف اتكلم مع مين
باختصار كنت من فتره مرتبط ببنت وانا متاكد انها بتحبني لكن هي كانت خجوله جدا ومش بتبين حبها ولا بتعبر عنه، رغم انه كان بيظهر في ردود فعل معينه، كنت مدايق من الموضوع ده لحد ما بسببه سبنا بعض، وكنوع من انواع العلاج قررت ارتبط بغيرها علشان انساها في الاول كنت عاوز ارتبط بغيرها بس تكون هي، دخلت على الفيس دورت على كل اللي اسمهم زي اسمها الثنائي وضفته واتكلمت مع كتير منهم، وبعدين بدات افرزهم حسب شخصياتهم وكل واحده قريبه من البنت دي قد ايه، وايه الصفات المشتركه في الشكل والطباع وطريقه الكلام لدرجة اني خرجت باتنين منهم شبها شكلا وصفاة وشخصيه بدرجة كبيره جدا، ولدرجة اني كنت بتوقع ردود على اسئله انا بسئلها بنائا على شخصيه البنت اللي بحبها وسبتها دي
وبعدين ناس قالولي كده مش هينفع انتا لازم تنساها وعلشان تنسى لازم تغير كل حاجه وحتى صورها امسحها -اينعم مقدرتش امسح صورها بس حاولت اعمل كده، واخترت النقيد تماما مش بتكلم عن النقيد في الخجل، لكن في التعبير عن الحب والاهتمام والحاجات دي (وبصراحه الجديده دي مش مخلياني محتاج حاجه، يعني بالبلدي كده ايدالي صوبعها العشرين شمع مش بيطفي) ، وبقالنا مع بعض 3 سنين ولسه اول امبارح واخد معاد من والدها علشان يبقى الموضوع رسمي، بس الكارثه اني عمري ما حسيت انها تنفع زوجه ليا لاني عمري ما حبيتها .. برغم انها تتحب وكل حاجه بس مش نوعي مش عارف مش قادر احبها، كمان المصيبه الاكبر اني معدتش عليا لحظه في الفتره من يوم ما سبت الاولانيه لحد تاريخ كتابة المشكله وانا مش بفكر في القديمه
كلمت صحابي كتير اللي يقولي سيبها في حالها ولنصيبها، واللي يقولي خليك مع اللي انتا هتخطبها وخد اللي بتحبك وبلاش اللي بتحبها والكلام ده
بس الظاهر اني عاوز اسمع النصايح على مزاجي لاني بدور على اللي يقولي ارجع لها ويديني طرق ممكن اوصل لها بيها
اه هي مخاطره مش محسوبه ممكن تكون نسيتي برغم اني اشك في ده، وارتبطت وانا وجودي تاني في حياتها ممكن يسبب مشاكل لانها ممكن تكون نسيتي وكل الكلام الحلو ده، بس مش قادر وتفكيري مشلول .. انا اساسا عمري ماكنت اتخيل نفسي اني هفضح نفسي باني اكتب مشكلتي على النت واستنى اراء ناس معرفهاش وده اثبات اني تفكيري مشلول وبدات اتجنن بس اللي حصل بقى
كمان انا بظلم البنت اللي مرتبط بيها حاليا او انا حاسس بكده، لاني عمري ما حبيتها وكدبت عليها في كده، وكمان حسيت اني بقالي فتره كبيره .. حوالي سنه، بتلكك لها وبحاول انكد عليها ليل ونهار واللي بيدايقني اكتر انها مستحمله وراضيه وهي اللي بتصالحني
المهم تنصحوني بايه، انا بس عاوز كل واحد يحط نفسه مكاني ويقولي هو هيتصرف ازاي، مش مجرد نصيحه وخلاص
مشاكل الشباب مع البنات
عايز ارجع للبنت اللي حبيتها
اضيف بتاريخ: Sunday, October 16th, 2011 في 10:55
كلمات مشاكل وحلول: الحب, الشباب, بنات, بنت, شباب, مشاكل الشباب
انت شخص انانى و صفيحه ### متحركه .. الاول لعبت ببنت و معجبتكش طريقتها فسبتها و تكيد اتوجعت .. بعدين بنت تحبك تلات سنين من عمرها فتيجى تتجوز تقول لا اصلى بحب الاولانيه .. انت ظالم و انانى .. ربنا يرحم الاتنين من وش واحد زيك يارب تقرى الكومنت عشان انا اتظلمت بسبب ### زيك الله لا يوفقك
خليك مع الي انتي مرتبط بيها علشان مش هتلاي حد يحبك ويستحمل النكد والزعيق. دة ف انسي الماضي وخليك في الحاضر الفات مات والفات لو عايزك هيرجع لوحدة خليك معاي الي مرتبط بيها ومتجرحش مشاعرة دي نصيحة انا كنت زيك بس نسيت وبدور علي بنت الحلال
طيب وربنا انا زيك بالظبط واقسم بي الله انا زيك بي الظبط ومش لاقي حل
مش عارف اقولك ايه انا ف نفس الحوار بس مش عارف اخليها ترجع تاني ازاي
بص طبعا كل التعليقات ديه فيها كويس وفيها لأ واغلب التعليقات اللي معمولها لايك هتلاقي مكتوب فيها ارجع لاول واحده هو ممكن ميكونش حل صح بس عجب الناس علشان ممكن يكونوا مروا بنفس التجربة وكان نفسهم يعمله كده انا نفس المشكلة ديه عندي بس انا اتجرأت وكلمت باباها في الشارع بس قالي لما هي تخلص دراستها الاول بس المشكلة انها متعرفش اني كلمته ومش عارف رد فعلها معرفش هي بتحبني ولا لأ ومعرفش لو هي رفضت ممكن اتعب نفسيا قد ايه محسبتش اي حاجة بس علشان فعلا نفسي ارجعلها وكمان يبقي اسمي عملت اللي عليا علشان مارجعش اندم واقول اني معملتش اللي عليا
ماينفعش تلعب بعواطف ومشاعربنات ناس معك اماتتزوج منهااوتسيبهافورا وكل شي قسمةونصيب ومدة3سنوات كافية للحكم على اخلاق البنت وتعاملهامعك خلك صادق في اتخاذ القرار اما الاستمراراوفسخ الخطوبةوكلا يذهب لحال سبيله وربي يسترعليك ويوفقك
حرام عليك الي ظلمتها دي معاك هتشيل ذمبها بس الخوف الاكبر اما تسيب الي بتحبك دي وتروح للي كنت بتحبها تلاقي الي كنت بتحبها ارتبطت ونستك واما ترجع للي كانت بتحبك مش ههتردى فكر كويس بس انت الي عملت في نفسك كده كنت من اول متعلقش حد بيك سوري كلامي مش هيسعدك بس انا مريت بتجربتك دي وعلقت ناس كتيلا بيا وفي الاخر افتكر اني احساسي مات متعذبش حد معاك تاني لو سمحت
بص يا معلم مع احترامي لكل الردود بتاعة الاخوه سيبك من الكلام ده واعمل الي انت حاسس بيه غمش عينك وفكر في الموضوع وال تشوفه اعمله
اسمع يا باشا انا مرات زيك بالظبط اسمع كلامى سيب الى يسيبك وحب الى بيحبك وشكرااا
انا كنت بحب حبيبي بقالى سنة ونص حب اكبر في الوجودمع انه بتكلنى كتير وبتنكد عليا وكل شوية يتخانق معايا ويسيبنى ويرجعلى تانى حوالى 3 مرات …واستحملت كتير
صدقنى ياصاحبي هى لسة بتحبك كما في حالى … ولازم ترجعلها لو كنت ظلمتها
احذر ياصاحبى دعوة المظلوم مستجاب ليس بينه وبين الله حجاب
صدقنى ياصاحبي انك مش هتقدر تنساها لانها بتحبك
وهتفضل يتكلم عليها لانها حاولت للوصول اليك وانت لم يحاول الوصول عليها وهتندم لانك مش هتلاقي بنت زيها في حياتك
ارجعلها واعتذرلها واتقدملها رسمية وهى هتسامحك صدقنى ..
البنات الخجولات دايما متسامحة من قلوبهم جرب وهتكسب حياتك 🙂
هقول انا لو مكانك هاعمل ايه و انت المفروض تعمل ايه
اول حاجه انا لو مكانك كنت هبقي زيك كده مجرد علشان انسي واحده هظلم واحده و الاغلبيه هيعملوا كده بس صدقني لو عايز ترتاح اوصل لحبيبتك الاولانيه و من كلامك معاها هتعرف انت هتعمل ايه
لانك لو عرفت انها مش بتحبك هتعرف قيمه حبيبتك اللي معاك
و لو عرفت انها بتحبك كرامتك هتوجعك برضه و هتعرف قيمه اللي معاك
جرب و صدقني مش هتخسر و لو حاسس انك لسه مش بتحب حبيبتك دي
ياريت تسيبها و متظلمهاش معاك اكتر من كده بس لو عرفت قيمتها بجد هتتعلق بيها اوي
فجرب الاول و بعد كده قرر هتسيب حبيبتك دي و لا لأ
بص سيبك منها لانى بصراحه انت متستحقهاش بجد سورى متزعلش منى بس دى الحقيقه وانا معاك فى اى استفسار
بص ياصحبى انا عاوزك تحب تانى وتنسى الى كنتا بتحبها دى ونتا انشائ الله هتلاقى الى احس منها وتحبها اخوك عادل
طالما مش قادر تحبها يبقي تسيبها فورا ولو عرفت ترجع لحبيبتك الاولانيه ارجعلها الخجل صفه حلوه مش وحشه لانك لو فضلت مع التانيه دي هتظلمها معاك وحياتك وحياتها هتبقي جحيم قلها بطريقه كويسه انكم متنفعوش لبعض وحاول تشوف لحببتك الاولانيه اي مدخل تقلها انك عاوز ترجعلها وبتحبها وموافق بيها كده زي مهي ولو بتحبك هترجعلك ربنا يوفقك يارب ويسعدك وبلغنا اخبارك
انت عملت غلطه كبيره انك سبت الاولانيه ومصرحتهاش بحبك ليها واللي نصحك ان تحب غيرها غلشان تنساهاوالله (مجنون) سوري في اللفظ بس انت لو سبت التانيه دي هتيقي ظلمتها وخصوصا انك بتقول انحا تحبك فحرام عليك ترمي قلب بيحبك وتري وري قلب تاني انت مش عارف ميال الي ايه انا بنصحك كمل مع التانيه ومع الوقت والله هي بحبها ليك انت هتحبها من غير ما تحس وده هيبقي ثمن الغلطه الاولي وربنا يسامحك علي الغلطه دي وربنا يوفقك
بص بقى انتا غلطان وحبيت تصلح الغلط بغلط اكبر منه وهى البنت دى ذنبها اى علشان تظلمها كل ده وكمان مش مكفيك وبتنكد عليها كمان واللهى ده حرام والبنت دى انتا تسيبها علشان بتتكسف انتا المفروض تمسك فيها باديها واسنانك لان دى حاجه نادره انك تلاقى بنت بتحبك انتا حرام لو كملت مع البنت دى لانك بجد هتظلمها وكده كتير اوووووى وروح كلم البنت اللى بتحبها لانها ممكن تكزن لسه بتحبك ونتا غلط لما قولت انك فضحت نفسك على النت دى مش فضيحه انا نفسى كتبه مشكله وبقولها وانا مش مكسوفه لان كلنا اخوات وبنساعد بعض وربنا معاك ويساعدك
السلام عليكم (كم تدين تدان) ال انت عملته ده اسمه ظلم وربنا يهدبيك ارجوك حافظ على الصلاه وانشاء الله ربنا هيسر لك الامور وكل خير وعسا ان تكرهوا شىء وهو خير لك وعسى ان تحبوا شياء وهو شر لك
طالما فضلت معاها 3 سنين ومعرفتش تحبها وقلبك مع غيرها يبقي سيبها فورا وبلاش تجني عليها انها تكمل بقيت حياتها مع انسان قلبه مش ملكها صحيح حتتالم وتنجرح بس اهون بكثير من العيش بقيت عمرها مع واحد مش بحبها وبيحب غيرها دي نقطه تاني حاجه بالنسبه ليك انا بجد مش عارفه اقولك ايه ليه كده ليه طالما انت مش بتحبها تعلقها بيك الفتره دي ضميرك راح فين بس عموما ربنا حيرزقها بواحد احسن منك واحده زي دي تستاهل واحد يحطها جوه عيونه ويعيشها ملكه وتبقي كل حياته سيبها لو بتحترمها وبتعزها سيبها وبلاش تظلمها اكثر من كده وانت ابقي ارجع للي بتحبها حاول توصل ليها بائ طريقه يمكن تكون لسه بتحبك او نسيتك اعرف منها احسن