مشاكل الشباب قبل الزواج

خطيبتي مصاحبه وانا بحبها بس مش واثق فيها كفايه

خطيبتي خطبتها علشان والدتها مشهوره بالادب وست وعاقله ومحترمه جدا وانا شغلي كتير ومبقعدش في البيت فقلت هتصون غيبتي وكان في برود في الاول بس بمرور الوقت حبيتها وحبتني………… لبسها متوسط علقت عليه كتير وكانت بتقول سيبني اضبطوا واحده واحده وبعدين في كلامنا قالت………….. ان العادي انها تقعد قدام جوز اختها بهدوم البيت وشعرها مكشوف ولما اعترضت قالت برده سيبني تدريجي قعدنا اكتر من سنه ونفس الكلام لدرجه اننا اجلنا ميعاد كتب الكتاب قبل الفرح علطول مش قبلها بشهرين لاني مقبلش حد يشوف شعر مراتي وهي شايفه ان اي تغيير هيكون محرج لها خصوصا انه مجوز اختها وهي في اعدادي ……… الطامه الكبري انها ساكنه مع صاحبتها لان كليتها في القاهره وقالت لي ان لها زميل محترم معاهم وانه واحد من شلتها المكونه من ٤ بنات والزميل وانه خدوم وطيب وبيعاملهم زي اخواته وانهم ممكن يخرجوا كمجموعه مع بعض لكافيه او غيره اعترضت علي فكره الصحوبيه من النوع ده وقالت انه مجرد زميل وان الخروج قليل جداا ومع مجموعه وانها عارفه حدودها اوي وان بمجرد انتهاء الكليه مش هتشوف حد قلت لها ان اخر تعاملك معاه في الكليه ومتخرجيش اي خروجه يكون هو جزء منها وان بعد جوازنا هيكون باقي لها سنه في الكليه لو هيكون موجود في خروجه هبقي انا معاكم والا مفيش ….. بعدين طلبت موبايلها والباسورد قالت عادي بس ليه قلت لها هشوف مين اكتر حد كلمتيه النهارده اعترضت وقالت كدا عدم ثقه وعملت فيلم وان الموبايل خصوصيه ….. بعدين كنت معاها جالها تليفون ردت لا انا مش في البيت دلوقتي هكلمك لما اروح وكنا عشره بالليل وقالت لي من نفسها انه زميلها فلان وعاوز حاجه بخصوص الكليه …. بعد كده عرفت من سجل المكالمات من غير متعرف انهم كلموا بعض اكتر من مره زعلت وقالت انه طلب منها حاجه بخصوص الكليه وقالت انت كدا مش واثق فيا وبتدور ورايا واكدت ان علاقتهم زماله وقلتلها في فرق بين الصاحب اللي بيكون واخد علينا وبيكلمنا في اي وقت وبنحكيله اسرارنا ونخرج معاه وبين الزميل اللي بنعرفه ونكلمه بقدر الضروره واكدت انه زميل وانها نادر لما تكلمه واتفقنا علي الصراحه في كل امورنا …….. بعدين عملت لها مفاجاه واخدتها اجيب لها فستان لكتب الكتاب ومسكت تليفونها والفضول جبني ابحث عن المحادثات اللي بينهم لقيتهم واخدين علي بعض وبيقولها يا وسخه وبيبعت لها صور فساتين قصيره وخلي خطيبك يجبلك زيه وانهم بيتكلموا من اكتر من سنه يعني من وقت خطوبتنا ( انا عارف انه زميلها في الكليه من ٣ سنين ) وبتقوله يا منيل وبيدلعها باسم دلع وبتكلموا بشكل شبه يومي في اول سنه وبيتفقوا يخرجوا وبيقولها في نص الليل او الفجر هكلمك علي الموبايل وباعت لها رساله غراميه واحده بعتاها له وكمان في صور كانت حطاها علي الواتس لها ومرات اخوها بعتها لها وقلها عقبالك لما احضر فرحك ( للامانه مفيش كلمات جنسيه او حاجه تدل علي علاقه حب بينهم ) بس في صحوبيه مايعه بينهم نفسي تابي ان استحملها …… كل ده هي متعرفش اني شفت بعدين روحتها واتكلمنا مع بعض ورسمنا امال المستقبل وحياتنا بعدين قلت لها عاوز اشوف المحادثات اللي بينكم في الاول رفضت وان كده مفيش ثقه وبعدين قالت انها مسحتهم وبعد اصرار رهيب مني ورتهالي وكان فيها اللي انا قلته ….. سالتها ليه مقولتيش قالت انها نسيت تقولي لان الموضوع مش مهم بالنسبه لها…وقالتوعارفه اني بستهبل ساعات بس انا متربيه وعارفه حدودي كويس وشوف ايه يرضيك وانا اعمله بس حاول تبطل تشك فيا لاني تعبت من شكك ومراقبتك …………
انا بحبها بس مش واثق فيها كفايه خصوصا لما نتجوز هنقعد في القاهره سنه لحد متخلص الكليه واوقات كتيره هتكون لوحدها

مشاكل وحلول ذات صلة

اضيف بتاريخ: Tuesday, July 16th, 2019 في 15:26

كلمات مشاكل وحلول: , , , ,

5 رد to “خطيبتي مصاحبه وانا بحبها بس مش واثق فيها كفايه”

  1. البرنس
    26/07/2019 at 00:37

    يااخي دي فعلا ماتصلح تكن زوجة لك وام لاولادك وكل سلوكها مشين وغير اخلاقي افسخ خطوبتك منها وابحث لك عن بنت الحلال اللي تستاهلك وتشرفك امام كل الناس

  2. أبو عبد الله
    24/07/2019 at 01:31

    يا ابني اتق الله في نفسك،بلاش قرف،والله ثم والله سطر من الي كتبتو عن علاقة خطيبتك وصديقها الأنتيم بيبقى كافي تكره الدنيا بحالها،خلي عندك دم وروح فاش عن بنت الحلال.
    قال صديقها قال.

  3. dr.aaa
    23/07/2019 at 22:42

    إستخر الله وادعوه كثيرا..ربنايختارلك الخير

  4. ويزو
    17/07/2019 at 16:09

    جوازه فاشله يا محترم ومتنفعش تكون زوجه ليك ولا ام لاولادك ومش هتركز في شغلك والشك هيقتلك لان تصرفاتها كلها تدل علي حاجات مش مفهومه ومبهمه تراجع عن هذه الزيجة والحق نفسك من دلوقتي قبل ما تتحسب عليك جوازة وهيه فعلا جوازة فاشله لان الدين اولا والقيم والمبادئ والمجتمع بيحرموا كل تصرفات خطيبتك اللي اصلا هيه تعتبر خطيبة حد تاني مش انت جوازة فاشلة

  5. ابوالبتول
    17/07/2019 at 01:38

    ياابني عايز اختصرالموضوع عليك واجيب من الاخر خطيبتك دي اوفر بزيادة يعنى متحررة وغير متقيدة بالاخلاق ولا التربية تصرفاتها اللي ذكرتها تدل على ذلك ولن تقدر على تغييرها او الحد من جموحها وسلوكها الغير اخلاقي دا الافضل انك تفسخ خطوبتك منها قبل فوات الاوان وتدور لك على بنت الحلال الصالحة اللي تستاهلك وتصونك وتحافظ على اسمك وشرفك وسمعتك وتلاقي معها الخيروالسعادة طول حياتك

اترك رداً أو حلاً لهذه المشكلة