مشاكل البنات قبل الزواج

عندي رعب هستيري من الجواز التاني

أنا عندي 20 سنة و بعد 4 شهور هبقى 21.. مخطوبة و هجوز المفروض كمان 6 شهور..
مشكلتي.. رعب رعب رعب غبي من الجواز التاني.. رعب بعيات و قرف و كوابيس على الصاحي و النايم..
خايفة من الجواز الأولاني عشان خايفة إن جوزي يجوز عليه.. ممكن أموت لو حصل كدة.. أو أجنان على الأقل.. جنان رسمي..
أنا حساسة جداً و طبيعتي إن أما بزعل بطلع الزعل في نفسي.. يعني اشتم نفسي و أخربش نفسي أو أعور نفسي عموماً..
و ديه من مشاكل عادية.. يعني اتخانق عشان خطيبي كلمني وحش أعمل كدة.. أتفرج على حد موهوب و أحس اني مش موهوبة أعمل كدة..
مش بكلم أوي مع الناس أما بزعل كلو كلو جوا.. و فعلاً خايفة من الجواز التاني دة.. خايفه أتشرد.. عيشة في رعب دائم..
رغم اني كلمت خطيبي و قالي هو مش بيفكر في كدة خالص.. و لو عايزة تشترطي فالعقد اشترطي.. بس الشرط لا يودي ولا يجيب..
لو حب يجوز هاخد قرشين على الجزمة و هتشرد.. مش هتفرق..
أنا خايفة أوي من الموضوع دة.. أعمل إيه؟؟
و بنسبة للولاد إيه إلي ممكن يخلي الرجل مش يجوز على مراته؟؟ و ازاي أعرف لو كان رجل عيونه زايغة أصلاً قبل الجواز..
أنا أمي و أبي مطلقين.. مش عايزة أطلق أنا كمان و خصوصاً لو عندي ولاد.. أنا عايزة يبقلي مكان.. و حاسة اني واحدة و نفسي يبقى عندي مكان..
و نفسي اصحى كل يوم قلاقي زوجي جمبي.. مش عايزة اصحى لوحدي ولا أنام لوحدي.. أنا خايفة.. أنا محتاجة حد معايا ديماً.. أنا غيورة جداً…
مش عايزة أبقى واحدة حتى بعد الجواز.. يبقى حرام أوي.. يبقى بلاهة جواز أصلاً.. و خلنا في العادي..
و حاجة كمان ليه الرجالة بيستسهلوا الجواز التاني دة بغض النظر عن إحساس البني ادما إلي معاهم؟ و شايفين شرع ربنا في الجواز و بس..
بس مش شايفين شرع ربنا في إنه ياخد بالو من نفسية الست إلي معاه.. ليه شرع ربنا عند بعض الرجاله بحس إنه بيروح عند ترزي يتفصل عليهم و يرجع..
أنا حاسة إن ربنا إستحالة يكون راضي إن الست تزعل.. امال إيه استوصوا بالنساء خيراً و إيه رفقاً بالقوارير.. معطش شايفة رفقاً ديه خالص..
حاسة اني عايشة في غابة و الرجل عشان المجتمع ديماً بيفضله هو إلي بياكل معظم الوقت.. أنا ليه أنا أبقى خايفة كدة.. ليه أنا أحس بعدم الأمان للدرجة ديه..
يرضي ربنا دة طيب..
و كمان للبنات انتو بتحسو انتو خايفين كدة زي.. يعني لو انتي متقبلة الموضوع ماشي.. بس لو انتي مش حبة إن جوزك يجوز عليكي بتبقي حسه بخوف كدة أو حتى بخوف بسيط..
ولا أنا إلي فيه حاجة..
و الرجالة بتبقوا خايفين من البنات في إيه؟ في انها متبقش شاطرة في شغل البيت؟ ولا في حاجة أكبر من كدة عندكوا بتخفوا منها؟
يا ريت تجاوبني عشان أنا مرعوبة..

مشاكل وحلول ذات صلة

اضيف بتاريخ: Wednesday, January 9th, 2019 في 14:58

كلمات مشاكل وحلول: , , , ,

2 رد to “عندي رعب هستيري من الجواز التاني”

  1. hema
    10/01/2019 at 07:49

    السلام عليكم ورحمه الله وبركاته لا تتشائمى واتركى الامور للواحد الاحد وكل شئ فى حياه الانسان نصيب اولا ده كله من الشيطان ويمكن علشان الاباء مطلقين ثانيا كونى لزوجك كل نساء الكون بنعم وحاضر وطلباتك جددى فى بيتك فى لبسك فى مظهرك كونى له انثى واخت وصديق ولا تتركى الشيطان يوسوس لك مع تمنياتى لك بحايه سعيده وهادئه

    قَـيّـم هذا الحل: Thumb up 0 Thumb down 0

  2. ابوالبتول
    09/01/2019 at 22:33

    هوني عليك يااختي العزيزة بارك الله فيك وابعدي عن تلك الافكار والتخيلات التي سوف تدمر حياتك وتجلب لك المشاكل والهموم والغموم والاحزان الدنيا حلوة وجميلة وخير متاعها المراة الصالحة ارجو ان تكوني منهن ان شاء الله من حقك ان تشترطي على زوجك عند عقد النكاح ان لايتزوج عليك بااخرى فقد افتى كثير من العلماء والفقهاء بجواز ذلك وقالوا اذا لم يوفي الزوج بالشرط الذي اشترطته عليه الزوجة فلها حق الفسخ واما ان تتنازل عن هذا الشرط وترضى بمافعل الزوج لحديث -احق الشروط ان توفوابه مااستحللتم به الفروج – ومسالة الخلفة والانجاب فدي امرها بيد الله عزوجل هو الرزاق المعطي يهب لمن يشاء الذكور ويهب لمن يشاء الاناث ويجعل من يشاء عقيما ومسالة كيف تعرفي هل الرجل عيونه زائغة ام لا هذا يرجع في المقام الاول لدينه واخلاقه وتربيته وحبه لزوجته واخلاصه لها اما ان كان والعياذبالله فاسق وبلادين ولاخلاق ولايقدر الحياة الزوجية ولايحترمها فتاكدي انه لايستاهل الارتباط من اصله وليس اهلا للمسوولية على الاطلاق ومسالة الخوف اللي انت فيه والغيرة الزائدة التي عندك لاانصحك بها ولابد ان تتخلص منها فورا ولاداعي للخوف والتوجس من مسالة الزواج فدي سنة الحياة وكل بنت ومصيرها الزواج وهو سترة وعفة للمراة في هذة الحياة لاتجعل طلاق ابوك وامك يوثر عليك وعلى حياتك الزوجية ماحصل لهما قضاء وقدر وكلواحد ياخذ نصيبه في الحياة الارتياح والتفاهم ماكانش بينهما على مايرام فحصل الطلاق ودا شئ طبيعي يحصل بين الازواج في الحياة اما سوالك ليه الرجالة تفكر في الجواز الثاني والجواب ليس كل الرجال مثل بعض كما ان النساء لسنا مثل بعض وعايزك تعرفي ان بعض الرجال يكونوا مجبرين على الزواج الثاني لعدة اسباب منها 1- الزوجة الاولى لاتلبي له رغباته في المعاشرة ولايرتاح معها 2- عدم التفاهم والارتياح وجفا المشاعر والعواطف بينهما 3- كثرة الخلافات والمشاكل بينهما 4- اهمال الزوجة في نفسها وفي البيت والاولاد 5- عدم الانجاب اذا كان السبب منها 6- اذا كانت الزوجة تفشي اسرار زوجها وبيتها للاخرين 7- كثرة خروج الزوجة من البيت بدون اذن من زوجها 8- سلوك الزوجة غيراخلاقي وكثرة الشك والظنون من الزوج لها كلهذة العوامل تجعل الرجل يفكر في الزوجة الثانية ولاحد يمنعه من الشئ دا لانه شرع ربنا عزوجل وهي مخيرة اما ان تقبل بالعيش معه او تطلب الطلاق منه والاسلام اعطى للمراة حقوقها وانصفها وجعل القوامة للرجل والرسول الكريم قال – استوصوا بالنساءخيرا – وقال -رفقابالقوارير – كلهذة اشارات على الرفق بالنساء والاحسان اليهن فليه انت متشائمة لهذة الدرجة وتسئ الظن بالرجال بكلامك هذا اتقي الله ياامراة فيما تقولينه واحسنى الظن برب العالمين وبالشخص الذي سوف يكون زوجك وابو لعيالك وشريك حياتك استهدي بالله عزوجل واطردي الشيطان من حياتك وكل تفكيرك وابتدي حياتك بالتفاول بالخير والانشراح والطمانينة وبالتوكل على الله قبل كل شئ وحافظي على صلاتك واداها في وقتها وقراءة القران والصوم ولزوم الاستغفار وقراءة الاذكار في الصباح والمساء وبالرضا والقناعة بما قسمه الله لك في هذة الحياة وربنا يصلح حالك ويهديك ويسترعليك ويتمم لك بالخير ويبارك لك في زوجك ويرزقكم الله الذرية الصالحة في هذة الحياة انه ولي ذلك والقادر عليه

    قَـيّـم هذا الحل: Thumb up 0 Thumb down 0

اترك رداً أو حلاً لهذه المشكلة