مشاكل البنات مع الشباب

بحبه بس حاسة اني هضيع عمري معاه

انا بنت جامعية عندي 19 سنة وانا ف ثانوي كنت بحب حد وارتبطنا شهرين وبعدها اكتشفت انه كان خاطب وبعدها انهارت وبعدها بكام شهر كنت بعذب اي حد يقرب مني ع اساس ان انا بنتقم وكده ومكنش ف اي حد بيفرق معايا كنت عايشة لنفسي بس لكن بعد فترة كانت صحبتي بتكلم حد ع الميل وكان من بلد غير اللي احنا عايشين فيها وهو طلب يشوف صورتها وكده وهي اديته صورة انا كنت معاها فيها المهم هما بعد الصور كانو اصحاب وبس وبعد فترة اتعرفت انا وهو واتكلمنا ميل وبعدها نزل وشافني واتقابلنا اكتر من 3 مرات بقالنا حوالي سنتين مع بعض انا شايفة ان هو حد محترم وكويس وانا كمان بحبه اوي بس هو لسه ف الكلية وظروفه متسمحش انه يتقدملي غير بعد سنتين وانا خايفة استمر معاه والاخر الموضوع يخلص ويبقي انا ضيعت معاه حياتي انا وهو بقينا حاجة من حيث تفكيرنا ومشاعرنا حاسة ان انا عمري مهلاقي حد ف الدنيا زيه وعمر محد هيفهمني غيره انا اتكلمت معاه كتير ف موضوع الخطوبة بس هو قالي انه ميقدرش يعمل حاجة دلوقت انا اتغيرت كتير اوي عشانه وساعات كتير بندم ع الايام اللي عشتها من غيره بس انا مصدقاه اوي وف نفس الوقت مش قادرة استحمل السنة ونص ومن فترة بيحاول شخص يحسسني باهتمامه ليا ووانا مش حاسة بنحية اي حد بحاجة ومش عايزة ابدأ حياتي مع حد غير حبيبي والشخص التاني ده مفيهوش حاجة وحشة وعايز يتقدملي وقولت للي انا بحبه قالي اعملي اللي انتي عايزاه بس الكلام من ورا قلبه انا مش عارفه اعمل ايه اضيع عمري مع الشخص ده ولا اشوف حياتي من غيره انا حاولت كتير ابعد عنه بس حسيت ان حياتي من غيره ملهاش لزمة

مشاكل وحلول ذات صلة

اضيف بتاريخ: Thursday, January 13th, 2011 في 02:40

كلمات مشاكل وحلول: , , , , , , , ,

7 رد to “بحبه بس حاسة اني هضيع عمري معاه”

  1. محمد شهريار
    14/01/2011 at 11:54

    بصى يا ست الكل
    حبى بقلبك واتجوزى بعقلك
    الطريق الوحيد ليكى هوه بيت اهلك
    والله لو جه اتقدملك دلوقتى يبقى خير
    غير كدا يبقى بتظلمى نفسك معاه
    ومعلش البنت المحترمه مش بتسلم قلبها لحد كدا
    قربى من ربنا وادعى ربنا يرزقك بالزوج الصالح
    واعرفى ان زوجك ربنا كتبهولك فى اللوح المحفوظ من قبل ما تتخلقى
    يبقى نتقى الله فى نفسنا
    عشان ربنا يكرمنا
    وربنا يهديلك حالك

  2. نونا
    13/01/2011 at 19:37

    هو لو حبيك بجد هيعمل عشانيك اى حاجة ولو هو جد خلية حتى يكلم مامتيك او اى حاجة تطمنيك ولو شوية ولو حاسة انو حد مش جد اوى يبقى عصفور فى اليد وربنا يوفقك وصللى صلاة استخارة

  3. زملكاوى
    13/01/2011 at 16:47

    ازاى تسيبى حد عرفتيه لمجرد ان ظروفه مش كويسه ؟
    هو ليه انتم يا بنات بقيتوا بتوع مصالح كدا
    دايماً عايزين حد غنى ومن عيله ويكون تعليمه كويس اوى !!
    امال انتى لزمتك ايه فى حياته ان شاء الله ؟ هتبقى متعته وخلاص
    انتى تقبلى على نفسك انه يبقى ناجح فى حياته ويومه ماشى تمام ويرجع البيت عشان معلش فى الكلمه ( تعلملوا علاقه زوجيه ) هو دا اللى انتم عايزينه ؟!!!

    واحد صحبى انا كان بيحب بنت من النت وحبها اوى اكتر من سنه وكانت هى مش بتحبه للدرجه يدوب متعلقه بيه مش اكتر وهو مكنش يعرف ومخلص ليها اوى
    وهو فى كليه عاديه مش كبيره اوى يعنى لكن الحمد لله ملتزم ويعرف ربنا وطموح وعيلته كويسه ومرتاح مادياً جداً وشغله جاهز من دلوقت بس هو يخلص تعليمه مش اكتر
    تعرفى ان البنت دى مره قالتله انا هبعد عنك عشان قال ايه انت سنى ومش بتشتغل وجايز مش نبقى لبعض !!
    تعرفى بعد ما حصلت مشكله وسابته جاله خبر ان شغله جاهز وهى مش كانت تعرف
    وشغله هيبقى شغل كويس اوى ومرتبه مكنش يحلم بيه ابداً
    شوفتى بقااا ربنا كرمه بحاجه كانت سبب فى انها تبعد عنه وحسسته بالعجز

    لازم تبقوا جمب اللى بتحبوه والحب اللى بجد صعب نلاقيه دلوقت ودا بصراحه بسبب انكم بتدوروا على الانسان الجاهز
    مش عايزين تتعبوا فأى حاجه
    وتعبكم فى انكم تقفوا جمب اللى بتحبوه
    اهم حاجه الطموح
    طالما عنده طموح هيقدر يوصل ويجهز نفسه بسرعه
    انما لما تكون البنت كبيرة خلاص تتجوز بقى اى حد عشان تلحق نفسها ودا عذر مقبول
    انما الصغيره !!
    تلاقيها عندها 18 سنه وتقلك انا عايزه ولد غنى وجاهز وشقه وعربيه وشغله يبقى كويس بمرتب عالى
    الله
    طب امال انتى لزمتك ايه !!؟

    ارجعى لربنا واستخيرى ربنا وان شا ءالله هيقدم اللى فيه الخير
    بس اوعى تسيبى حد لمجرد ظروفه
    ممكن بعد ما يسيبك على طول تسمعى انه كبر وبقى حاجه كبيره اوى
    وقتها هتتحسرى على نفسك
    والانسان الجاهز دا مش تلاقيه بيحبك اوى

  4. marim
    13/01/2011 at 16:39

    المشكلة مش مشكلة انه يشتغل ويكون مستعد بعد الكلية لكن المشكلة انه ف كلية من كليات القمة فهو مش هينفع يرتبط غير لما يخلص وانا معرفش ايه اللي ممكن يحصل بعد ميخلص عشان انا ممكن اهلي او اهلو ميوفقوش ع جوازنا لان انا من بلد وهو من بلد تانية وهو مينفعش يفتح الموضوع دلوقت

  5. ام ياسر
    13/01/2011 at 12:53

    يا ست الكل الرجل عرفك نويه وقلك اعملى الى انتى عيزاه يا حببتى ده مش بتاع جواز شوفى نفسك احسن

  6. ندى
    13/01/2011 at 12:30

    انا من رائىانه طالما قالك اعملى اللى انتى عايزه سيبك منه وخليكى مع اللى دخل البيت من بابه وثم انه لسه عيل بياخد مصروفه من اهله وانتى عشان بتحبيه بتحاولى تبررىلهكلامه لان قلبك هو اللى بيفكر مش عقلك وثم ان المقابلات دى دى حاجه تغضب ربنا ولو حتى اتجوزتوا حياتكم هتكون مش زى ما انتى متخيله لكن اقولك اعملى استخاره ع الشخص اللى متقدم لك وتوكلى على الله واسمعيها منى نصيحه الحب الحقيقى هو اللى بعد الجواز وليس قبل الجواز

  7. حد مش مهم
    13/01/2011 at 10:45

    PHحاولى تساعديه وتشجعيه انه يشتغل ويعمل حاجة عشان خاطرك ولو ملقتيش منه استجابة مضيعيش وقتك معاه , على فكرة انا اصغر منك بسنتين وبحب ابن خالتى واستغليت حبه ليا وشجعته يكمل دراسته فى الثانوى وكمان بيشتغل عشان خاطر لما يخلص تعليم يكون جاهز لخطبتى

اترك رداً أو حلاً لهذه المشكلة