الحب الاول

قاسيه على حبيبي بس غصب عني

السلام عليكم

انا بنت عندي 18 سنه اتعرفت على واحد على النت ساعتها كنت صغيرة اوي وكنت اخداها صحوبيه في الاول وصداقه مش اكتر بس بعد كده مع الوقت اتحولت لحب

انا اعرفه من 3 سنين بس بجد انا دلوقتي بحبه جدا وهو كمان بيحبني جدا ومتاكده من حبه ده المهم صارحت امي بالموضوع ده وهي في الاول رفضت لاني كنت صغيره وباعدين لما لقتني متمسكه بيه ولسه مع بعض تقبلت الموضوع واتعرفت عليه ولقته انسان كويس جدا وحبته واحترمته هو كويس معايا اوي اوي ومتمسك بيا جدا واقسم اني لو مكنتش ليه عمره ما هيتجوز هو بيحاول يرضيني باي شكل

بس مشكلتي معاه اني بقفله على الواحده ساعات كتير بزعل منه لاسباب تافهه وساعات بزعل علشان بس عايزاه يصالحني دلع ياعني بس الموضوع بيقلب بجد مع انه لما بيزعل بيزعل على زعلي مش لانه زعلان مني هي بيبقى زعلان اني زعلانه ومضايقه وبيحاول بكل الطرق انه يرضيني بس ساعات الموضوع بيكبر مني وبنزعل فعلا بس والله من غير قصد انا بحبه جدا بس كمان اللي مضايقني فيه انه بيأجل كل شويه موضوع الخطوبه وانا نفسي نبقى مخطوبين علشان محدش يقفلنا على الواحده ويقولنا انتوا بتعملوا ايه والكلام اللي انتوا اكيد عارفينه ورأي الناس في اي 2 بيحبوا بعض

مع اننا مش بنتقابل كتير ولو اتقابلنا بيبقى بعلم امي هو بس مش مقدر اني اتقدملي ناس قبل كده من عيله ماما ورفضت وفي ناس تانين ممكن يتقدموا بس من عيله بابا ودول مش اقدر ارفضهم لان مافيش سبب للرفض انا كل ما ارفض حد بيكون من غير سبب وبابا مش هيستحمل الوضع ده كتير وانا مش قادره اقوله تعالى اتقدملي كرامتي مش سامحالي اني انا اللي اطلب عايزه الموضوع يجي منه هو والموضوع ده برضه من الاسباب اللي بتخليني اتنرفز واتعصب عليه من غير ماقصد لاني زهقت من الوضع اللي انا فيه ده ومش قادره اوصله اللي جوايا  وكمان امي بتضغط عليا ان الوضع اللي احنا فيه ده مش كويس والمفروض يكون في حاجه رسمي قدام الناس

ياريت حد يقولي اتصرف معاه ازاي واعمل ايه انا مش طالبه جواز انا بس طالبه خطوبة حتى تدوم 4 سنين معنديش اعتراض بس ارحم من الوضع اللي انا فيه لو هو مش جاهز للجواز ودي حجه كل شاب دلوقتي وقت ما يجهز نتجوز مافيش اي مشكله اهلي مش هيعترضوا لاني لسه بدرس

كمان بيأثر عليا لما اشوف صحابي تلت تربعهم مخطوبين وهيتجوزوا كمان وهم ميعرفوش الاشخاص اللي اتخطبولهم الا من فتره قليله جداا اقل من الفتره اللي اعرفه فيها غصب عني الموضوع ده بيضايقني بس للاسف هو مش حاسس بكده خالص

مشاكل وحلول ذات صلة

اضيف بتاريخ: Wednesday, October 20th, 2010 في 01:43

كلمات مشاكل وحلول: , , , , , , , , , ,

20 رد to “قاسيه على حبيبي بس غصب عني”

  1. مجنون نسوان
    13/12/2015 at 00:23

    الحب شي عظيم ودام الشاب كويس وابن ناس محترمة وعلى دين وخلق ايه المانع انه يتقدم لاهلك ويخطبك رسمي تكلم مع الشاب واعرفي اسباب التاجيل منه واخبريه ان في ناس متقدمةلك وانك ترفضين لاجله لعله يتحرك ويتقدم لااهلك والا فتاكدي انه قاعديتسلى بك ويضيع وقت معك ليس الا فانسيه خالص واقطع علاقةبه نهايا وربك يكرمك بخيرمنه هتلاقي ابن الحلال فعلا اللي يستاهلك ويقدريسعدك ياست البنات

  2. ميادة
    13/10/2014 at 19:24

    الولد الزى يحب بنت ويقول للناس فى قصة حب بينا والناس تتكلم عليها دا اصلا ميستهلش انه يكون ابو عيالها وهى المفروض تسيبه وميفرقش معاها هو ولا غيره لو غيره زيه وف الاخر تطلع لبنت مظلومه لا قالتله بحبك ولا استنانى ولا عايزاك ولا انا شارياك ولا حاجة ويطلع فى الاخر هو وبس بكل المواصفات دى من ناحيته هو وبس بالله عليكم الشخص اللى زى كدة يبقى ايه هنتظر ردكو ميادة

  3. محمد
    08/06/2014 at 14:07

    سلام الموضوع بسيط مافي حب في النت احسن حل استعفي وارجعي لله راح يرزقك بالحلال مافي توفيف في هل الحاجات الي ماتمشي برضا الله الله يوفقك

  4. Ana Basma
    15/09/2013 at 20:33

    انا كمان زيك كده بالظبط ومعرفه امى بالموضوع برضوا بس انا ناويه اقوله انهارده على كل حاجه واعرفه انه لازم يجيلى اصل ده مش عيب لما اطلب منه انه يتقدملى العيب الحقيقى انى افضل فـ الضلمه :))

  5. ابواميرة
    04/01/2013 at 18:04

    الافضل لك ان يتقدم لاهلك ويخطبك رسمي والاكلواحد منكم يروح لحاله

  6. خوخة
    19/02/2012 at 16:47

    لازم يتقدم لك.اطلبي كدا بلاش كسوف

  7. lola
    28/09/2011 at 22:13

    بصي انا كنت نفس مشكلتلك بس انا عارفة ومتاكدة انه بيحبني جدا وفعلا اتقدملي برغم ان ظروفه كانت صعبة بس ده فعلا الحب اللي بجد انه يبيع الدنيا كلها علشانك والمفروض انه يبقي عاوز يتادملك اكتر ما انتي عاوزة ده لو بيحبك بجد انتي ليه مش بتسالي نفسك هو ليه ما اتقدمش لحد دلوقتي بالرغم ان مامتك عارفة يعني المفروض يقدر الوضع من نفسه بس حاولي تبيني انك زعلانة من الوضع ده علشان يصلحه ولو ما اتحركش يبقي مش بيحبك بجد ومش يستاهلك وبرضه استشيري مامتك مع انها اكيد هترفض طبعا اكتر ما هيا رافضة اما عن المشاكل فانتي برضه المفروض تعرفي تفصلي بين ده وده مع العلم ان المشاكل هيا اللي بتدي للحياة طعم عامة بس اتاكدي من مشاعرك ومنه لان هو ل بيحبك مش هيسمح لاي حد يفكر فيكي تفكير وحش او حتي يتكلم عليكي وهيتادملك من نفسه وربنا يوفقك ان شاء الله

  8. جوجو
    22/10/2010 at 19:14

    بصى ياقمر انا مش هقولك انك لسه صغيره مع انك لسه صغنتوته بس انت شكلك بتحبيه وهو كمان بيحبك زى ما بتقولى متحوليش تزعلو كتير كده لانك اكيد انت بتتعزبى لما بتزعليه بصى عشان مطولش عليكى كويس جدا انك مامتك عارفه طبعا ده اهم حاجه وهو طلما بيحبك ومش بيرضى يزعلك اكيد هيسمع كلامك لما تقوليلى على الخطوبه ومفيهاش اى حاجه لما تقوليلى وممكن كمان تقولى لماما تقوله ولو مرضاش مش تكلميه تانى وازعلى منه وهو لو مش بيحب يزعلك هيوافق صدقنى وربنا يوفقكم يارب على فكره انا فنفس سنك

  9. snow whight
    22/10/2010 at 01:22

    شكرا بجد على كلامكم الجميل ربنا يكرمكم كلكم
    انا بس عايزه ارد على الاخ الصريح انا مش زعلانه من كلام حضرتك بس برضو في اسلوب احسن من كده في الكلام انا مش اجبرتك انك ترد عليا فمن الاحسن انك مش ترد لو مش عندك رد كويس ومحترم والحمد لله مش انت اللي هتحاسبني اذا كنت بصلي ولا لا حسابي مع ربنا والحمد لله انا من اسره محترمه وتعرف ربنا ياريت بلاش تحكم على حد انت متعرفهموش لانك بتاخد ذنب كلامك اللي بتقوله وشكرا ليك جدا

  10. عروسة البحر الطنطاوية
    21/10/2010 at 14:40

    بصى ياقمر أنا هقولك على حاجة اهم من دا كلة أكتر حاجة ممكن تفرق بين أتنين بيحبو بعض هى الخناقات والمشاكل الكتير ودى عن تجربة صدقينى فحاول تكونى هادية جدا معاه طالما هو بيحبك وبيعزك كدة .تانى حاجة حاولى تفهيمية براحة أن الوضع كدة مش هينفع وإنه لازم يجى يخطبك لانك كدة ممكن تضيعى من إيده فهمية براحة وإن شاء الله يكون فى نتيجة كويسة وخدى بالك من نفسك ومن كلام الناس أختك( بسمة )

  11. شهد الغرام
    21/10/2010 at 11:05

    بصي مش هتكلم كتير معاكي انتي لسه صغيره يعني18 سنه مش كتير ولو انتي فعلا ذي ما بتقولي انه بيحبك للدرجه الي بتوصفيها اوعي تحاولي تبعدي عنه وتسيبيه اقوي على جرحك لكن متقويش على جرح حبيبك هو بيحبك قوي باين من كلامه فا متحوليش تجرحيه بانك تبعدي عنه حتى لو عاوزه تبعدي انتي من جواكي اقسي على نفسك واستحملي لما تيجي منه هو وبعدين انتي لو عاوزه تكلميه في موضوع الخطوبه ده فا انا عاوزه اعرفك ان الحب بيقوي مبيضعفش والحب من غير كرامه مبينفعش فمتقوليش كرامتى ومش عارف ايه مفيش كرامه مبين اي اتنين بيحبو بعض والا تبقى حياتهم فشلت ولازم تقدري ان فعلا الشباب بيعانو وفعلا الدنيا بقيت غلا انت ممكن تقليلو انك هتستنيه وابتدي بدبله اول فترة الخطوبه لغاية ما ربنا يعدلها مع انك بتقولي انك هتستنيه حتى لو اربع سنين فحاولي مضيعيش الحب الي بنتيه بسهوله وتاكدي ان في الاول وفي الاخر ده نصيب والي مكتوب عند ربنا هتشوفيه$شهد الغرام$

  12. سيع سنين
    21/10/2010 at 04:12

    انا قعدت سبع سنين قبل الخطوبه بس انا كنت عايز البنت ديه والحمدلله انا مش طماع
    والحمدلله اشتغلت وفي خلال سنه خطبت.

    بصي ممكن يكون هو مش مأهل للموضوع ده يعني حاسس نفسه صغير او معندوش الثقه انه يعمل كده

    حاولي تعالجي الامور ببساطه وبلاش الانفعال

    ومن الاخر صلي صلاه استخاره

    ربنا يوفقك

  13. غادة
    20/10/2010 at 22:52

    الموضوع مش فيه مشكله لما تفهميه الوضع وتقوليله عن ظروفك ووضعك وربنا يرفقك

  14. ميدو
    20/10/2010 at 16:13

    نفضيله وسيبك منه ده ******

  15. الصريح
    20/10/2010 at 14:36

    عزيزتى انتى عين فى الجنه وعين فى النار وكلامك كله كلام بنت مراهقه لانك يا استاذه حبيتى وانتى صغيرة فمتشعلقة فى حاجه حلوة
    ارجوكى ياريت يبقى ليكى شخصيتك المستقله المنفرده بالقرار
    أو الاستاذ اللى بتحبيه انتى ماجبتيش سيرة عن سنة او أو هو شغال ولا لا او يقدر يفتح بيت ولا لع وضعه الاجتماعى
    وغير كده انتى لسة بتدرسى خليكى فى دراستك ام ان كونتى عايزة ترتبطى خذى ما يتقدم لاهلك بعد ان تصلى استخاره ان كنتى بتصلى اصلا !!!!!!!!!!!!!!!!!

  16. الأحلام الضائعة
    20/10/2010 at 12:57

    صدقيني بجد لو هو بيحبك هياخد خطوة إيجابية بأي شكل من الأشكال
    مش هيصبر ع الموضوع كدة تقبلي تحياتي بدون ضيق أو أزعاج.

  17. حياة
    20/10/2010 at 06:06

    لو انتى كرامتك مش سمحالك انك تكلميه خالى مامتك تكلمه بس ماتضغطش عليه يمكن ليه اسبابه

  18. اسلام
    20/10/2010 at 02:33

    واوالله انا رأيي انها تقوله طلاما بتحبو وربنا يوفقك

  19. ميزو
    20/10/2010 at 02:19

    بصى لو انتى حاسه انه بيحبك بجد فاتحيه انتى فى الموضوع بس بشكل غير مباشر يعنى مثلا قوليلو فرح زميلتى قريب عقبالك وكدةوهاتيها معاه براحة لو لقتيه لسة برضه ممكن تكونو ظروفو مش سامحة دلوقت او تخلى والدتك تكلمه تقولو انه بيتقدملك ناس وكدة ياترى اخر علاقتكو دى ايه وخلى والدتك تصارحه وربنا يوفقو انشا ءالله

  20. سيد العاطفى
    20/10/2010 at 01:55

    اقطعى عرق وسيحى دمه
    اقصد انك بدون احراج تقوليله
    لو عايزنى بجد تعالى اخطبنى لاننا مش هينفع نستمر على كده
    خصوصآ ان انا جايلى عرسان الايام دى
    واهلى عايزين يجوزونى وهما مش عاجبهم الحال اللى انت فيه ده
    وهو لو عايزك هييجى يتقدملك
    ولو مش عايزك يبقى انسيه وسيبك منه الجواز مش لعب عيال
    وربنا يجعله من نصيبك ويسعدك ويوفقك
    (سيد العاطفى)
    مصر___بنى سويف
    واوعى تكونى ضعيفه قدامه

اترك رداً أو حلاً لهذه المشكلة