مشاكل الحب والزواج

تزمت الأهل في الخطوبة

انا بنت عندي 22 سنة و مخلصة كلية اقتصاد و علوم سياسية السنة دي , قضيت الأربع سنين لوحدي بدون أهلي نظرا لظروف عملهم في الخارج .. فضلت طول فترة دراستي محافظة على أهلي و حاطة صورتهم دايما قصاد عيني و اني افضل رافعة راسهم و مفتخرين بيا و الحمد لله اتخرجت بتقدير جيد و الجميع يشهد لي بأني انسانة محترمة و في حالي و ماليش دعوة بحد .. المهم في نص السنة الأخيرة ليا في دراستي اتعرفت على شاب بطريق الصدفة لكن عارفين لما فجأة تقول هو ده الانسان الصح ! هو أصغر مني ب 8 أشهر بس و خريج تجارة لكن الحمد لله ميسور الحال و لما صارحني بحبه قولتله اني لازم اقول لأهلي لأني مش بحب اعيش في الضلمة و وافق و فعلان قلت لأهلي و رحبوا في البداية لكن أخويا الأصغر مني عارض و تصور عننا حاجات بشعة لأن أخويا ده كان بيعرف بنات كتير و الله اعلم وصل معاهم لحد فيييين !! هو كمان قال لاهلو و مش عارفة اقولكو هو بيتعب قد ايه عشان يجهز نفسه لأن المفروض اننا اتفقنا على سنة واحدة يجهز نفسه و يجي يتقدملي , اكون انا قضيت السنة دي مع اهلي خارج مصر .. و ربنا يعلم انا اتغيرت ازاي من ساعة ما عرفته و اكبر تغيير اني ماكونتش بصلي و الحمدلله مبقتش بسيب فرض 🙂 طبعا ده بعد هداية ربنا , هو انسان مكافح وانا مش بتمنى حاجة من ربنا غيره .. المشكلة ان اخويا وقفلي في الموضوع بحجة انه متقدمش من بداية الموضوع مع ان الولد ده كلم بابا و كل حاجة … لكن دماغ اخويا بحسها عيالي !!! و كمان بابا رجع غير رأيه بحجة انه تجارة وانا سياسة و اقتصاد !!!!!!! و فرق الشهور اللي بينا !! و اني كمان هسكن في بلد غير بلدنا ,, هي تبعد عنها ساعة و نص بس !!! مش عارفة اقنعهم ازاي بجد حرام يضيعو حبنا لبعض و احترامنا عشان حاجات مالهاش اي لازمة !!!! قولولي اعمل ايه ؟؟؟؟؟؟

مشاكل وحلول ذات صلة

اضيف بتاريخ: Tuesday, August 20th, 2019 في 02:38

كلمات مشاكل وحلول: , , , , ,

4 رد to “تزمت الأهل في الخطوبة”

  1. fearless
    13/09/2019 at 17:47

    اقنعى والدك و اتكلمى معاه كتير و كلمى والدتك تاثيرها هايكون افضل على والدك طالما الولد كويس و طموح و محترم و انتى معاه اتغيرتى للافضل اوعى تفرطى فيه و توقفى محاوله
    و اخوكى باذن الله ربنا يبعده عن طريقكم يعنى هو لو وحش والله اعلم ليه حابب يبوظ اى حاجه ممكن تكون كويسه
    ربنا يهديه و يبعده عن طريقك
    و فرحينا باذن الله لما الموضوع يتم و ربنا يسعدكم و يكتبلكم الخير

  2. المصري
    02/09/2019 at 00:47

    بصي زي ماقالك -الانسان الطيب- ده الكلام الصحيح واللي مفروض تعمليه وربنا يجعله من نصيبك ياعسل وتفرحوا كدا عماقريب ان شاءالله

  3. الانسان الطيب
    22/08/2019 at 06:09

    أختي العزيزة …
    أولا أهلاً وسهلاأ بيكي ….
    ثانياً أكيد ما دام أى حاجة فيها خير حتلاقي ربنا دائما ما بيفتح الأبواب المغلقة عشان تروحي للطريق ده !! تمام ؟؟ !! ، انتي معملتيش حاجة غلط مكسرتيش قلب حد ،، متعاملتيش غلط يعني مع الموضوع
    حتة أخوكي ديه طبعاً المفروض ملوش دخل ولا له دعوة لا بيكي ولا بحياتك ولازم يعرف كدة !! ، هما بابا وماما بس طبعاً اللي ليهم القرار اما أخوكي زيك زيه خصوصاً انه أصغر منك ، فطبعاً أكيد الصح متاخديش بكلامك وكلامك واضح أصلاً انك مش مقتنعة باللي بيقوله
    وواضح أوي أوي انه كان سبب رئيسي من كلامك ان بابا يغير رايه ،، مش شايف مبرر صراحة في اللي بتقوليه تجارة واقتصاد وعلوم سياسية زى ما بابا بيقول بحجة كدة مش حجة ،، فرق الشهور اه ممكن بس ديه اللي الشاب يشتكي منها مش البنت عموماً مش حجج بصراحة واضح ان أخوكي لعب في دماغ بابا ـ، بصي
    خدي وادي مع بابا واكلمي معاه ووصليلوه وجهة نظرك ،، وحاولي توصلي معاه لحل يرضي كل الأطراف ما دام الأمر بيده وأهوه تبقي عملتي اللي تقدري عليه ، مقدرتيش
    فلكل نصيب كتاب وأكيد ربنا مش هيبعد عنك أى طريق فيه الخير ليكي
    تحياتي
    ربنا يسعدك ويفرحك يارب

  4. البرنس
    20/08/2019 at 05:23

    طالما الشاب ابن حلال وكويس اوعي تفرطي فيه وحاولي اقناع ابوك عشان يوافق عليه امااخوك فده لسه عيل ولاله كلمة عليك طالما ابوك موجود وهو ولي امرك ربنا يجعله من نصيبك ويتمم لك بالخير ويؤفقك ويسعدك معه في حياتكم القادمة

اترك رداً أو حلاً لهذه المشكلة