مشاكل الخطوبة

امي بتجبرني اكمل الخطوبة بسبب كلام الناس

السلام عليكم.
انا عندي 20سنه انا من و انا صغيرة و كانوا ف العيله دايما بيقولوا انتي لابن خالك و كبرت انا و هو متعلقين ببعض و لما دخلت الكليه و كان عندي 18سنه ابن خالي ده اتقدملي بس كان في 8 شهور قبل الخطوبه بس الناس كلها عرفت أنه اتقدم و إننا وافقنا بس قبل م نشتري الشبكه و نعمل حفله الخطوبه انت لقيت أنه مش بيهتم بيا خالص ولا بينا اي كلام و حتي لما بيجي البيت بيقعد مع اخواتي و يلعبوا و انا مش بيرضي أنه يتكلم معايا حتي لما بفتح معاه كلام مش بيرضي يتكلم و بعد كده عرفت أنه كان بيصاحب بنات و أنه بيكون مشغول معاهم علشان كده احنا مش بنتكلم فون و مرضتش اكمل ف الخطوبه و بابا و ماما زعقولي بس لما عرفوا اسبابي وافقوا و مكملتش الحمدلله.
و بعدها انا بقيت مش عايزة ارتبط بحد لاني اصلا عايزة اكمل دراستي و ثانيا لاني كنت لسه متعلقه بيه.
و حاليا انا ف تالته كليه و خلاص نسيته و الموضوع بالنسبالي اتقفل و قولت لماما أن لو جيه حد محترم هوافق بس اهم حاجه أنه يحترمني و انا اعجب بيه …. بس انا عيبي اني كتومه شويه و مش بعرف اعبر عن اللي جوايا.
المهم اتقدملي واحد بس ابن خالي التاني هو اكبر مني بسنه واحده و دكتور اسنان و انا و هو اكتر من اخوات و كنا نقعد سوا علطول يحكي لي عن البنات اللي بيصاحبهم و نقعد نتكلم سوا مفيش مرة نقعد فيها إلا و يكلمني عن صحباته و ف مرة كنت خارجه مع صاحبتي و شوفته هو و بنت و عرفني عليها و قالي يعني أنه بيحبها وان دي الوحيدة اللي بيفكر يتجوزها.
و انا و هو كنا بنتعامل علطول ع إننا اخوات و بس.
و لما جيه حد يتقدملي كان عن طريق والده و ساعتها رفض و قال لاهلي أن الشاب ده مينفعنيش و بعد فترة جيه الشاب ده اتقدم تاني ف بابا قاله لا يجي و احنا نشوف ينفعها ولا لأ.
و قبل م بقولنا المعاد اللي المفروض اقابل فيه الشاب ده .
قالنا أن ابنه اللي انا و هو بنعتبر بعض اخوات بيحبني و عايز يتقدم .. و من ساعتها و بابا و ماما قعدوا يزنوا عليا و يزعقولي علشان اوافق عليه و انا اقولهم لأ ده اخويا و ماما تقولي مفيش حاجه اسمها اخوات ده واد محترم و دكتور مش هيجيلك حد زيه و قالتلي لو انا موافقتش هي و بابا هيزعلوا مني و اني اروح ل بابا بنفسي و أقوله اني موافقه و قالتلي لو انا بعد كدة حسيت اني مش مرتاحه معاه اقولها و مش هيكون في مشاكل .
و فعلا سمعت كلامها علشان مش عايزاه هي و بابا يزعلوا مني و قولت ل بابا اني وافقت و أعلنا قدام الناس إننا هنتخطب بس لسه مجبناش شبكه و الموضوع كده بقاله شهر و نص.
انا لحد دلوقتي بتتقابلوا كتير تقريبا يوم اه و يوم لأ .. بس لحد دلوقتي انا حاسه أنه اخويا و مش متقبله فكرة أنه يبقي خطيبي و بعدين جوزي و خصوصا أن الخطوبه هتكون طويله 5 سنين.
و هو يعني مش بخيل و حد طريقته ف الكلام كويسه و قالي أنه بيحبني بس انا مش مصدقه ده لاني كنت عارفه كل حياته مع البنات اخر واحده سابها علشان يتقدملي و هو ف مرة بيتكلم معايا بعد الخطوبه و حكالي عن كل البنات اللي يعرفهم و لقيت كلامه اتغير أنه مش بيحبني من زمان زي م بيقول ولا حاجه و إن كان في بنت فعلا متعلق بيها و عايز يتجوزها و اتصاحبوا سنتين بس هي سابته من مفيش 6شهور.
و انا مش متعلقه بيه حاسه أنه اخويا و موضوع البنات ده كمان و البنت مخليني مش متقبلاه زياده.
و كلمت ماما باني مش عايزة اكمل قبل م نشتري الشبكه ولا اي حاجه بس هي زعقتلي جامد و قالتلي انا مش هزعل اخويا علشان واحدة مش محترمه زيك و قولت 100مرة مفيش حاجه اسمها اخوات و بكرة و بعده تتعودي عليه و تحبيه.
و لو محبتيهوش و اتعودي عليه ف الخطوبه يكفيكي أن انا و ابوكي موافقين عليه و عايزينك تكملي معاه و يبقي ف الجواز اتعودي عليه.
و انا خلاص مش مستحمله الموضوع و مش عايزة اكمل و مش عارفه اعمل ايه و قولت ل ماما.
و هي زعقتلي تاني و قالتلي و الناس بتقول ايه لما يكون الاتنين ولاد خالك و متكمليش يبقي اكيد انتي اللي فيكي حاجه غلط و مش محترمه و الا ليه خطوبتين ميكملوش و هيطلع عليكي كلام زي الزفت و دلوقتي مش بتقولي حاجه غير أن الناس بتقول أن انا مش محترمه و أنهم مش هيحترموني و أن سمعتي مشوهه و أن هي مش هتزعل اخوها منها و انا هتغصبني اكمل غصب عني.
اعمل ايه كدة

مشاكل وحلول ذات صلة

اضيف بتاريخ: Thursday, January 10th, 2019 في 15:37

كلمات مشاكل وحلول: , , , ,

ردود to “امي بتجبرني اكمل الخطوبة بسبب كلام الناس”

  1. ابوالبتول
    11/01/2019 at 13:51

    شوفي يابنتي الحبيبة كلامك امك هو الصح ومعها الحق في كل ماقالت لك عايزه الناس تقول عليك ايه فسخت خطوبتها مرتين من عيال خالها اكيد انها كدا وكدا الى اخره وانت طبعا مايرضيكي الناس تتكلم عنك وحش ولاعن اهلك استهدي بالله عزوجل وارضي بالقسمة والنصيب والجدع ابن خالك شاب طبيب وله مستقبل والف وحدة تتمنى الزواج من شخص كهذا خلال فترة الخطوبة هتعرفوا بعض اكثر ويحصل التفاهم والارتياح بينكما ومسالة انك تشعري انه زي اخوك وانكم اخوات مو طبعا انتم زي الاخوات فهو ابن خالك وانت بنت عمته ولكنه مش من محارمك يعنى يجوز له الزواج منك واغلب الشباب قبل الزواج بيكون لهم علاقات مع البنات ودي مرحلة يمر بها معظم الشباب في هذا العصر لكنه اختارك انت لتكوني شريكة حياته ويرغب في الحلال فليه انت معترضة على هذا الشئ كل شئ قسمة ونصيب وصدقيني سوف تحبيه اكثر خلال فترة الخطوبة وتتعلقوا ببعض اكثر توكل على الله وماترفضيه او تزعل اهلك منك وربنا يؤفقكم ويتمم لكم بالخير ويسعدكم في حياتكم القادمة

    قَـيّـم هذا الحل: Thumb up 0 Thumb down 0

اترك رداً أو حلاً لهذه المشكلة