السلام عليكم ورحمة الله وبركاته … لو سمحت احنا غلبنا فى حل المشكلة اللى سوف اعرضها دى فاتمنى انى الاقى الحل هنا … المشكلة تخص بإبن خالتى وهو شاب وسيم فى سن 27 وكان بيشتغل فى محل حيث يسكن ايضا وهو محل ملابس رجالى المهم جه فى يوم واحدة جت المحل ده عشان تشترى ملابس لزوجها المهم ربنا قدر انه ابن خالتى اللى يتعامل معها وفعلا قالتله انها عايزة ملابس لزوجها على مقاس كذا المهم جابلها اللبس وقالتله انه اللبس لو طلع كبير او صغير ينفع ارجعه فهو متعود على انه ياخد ارقام الزبائن بتاعته عشان ساعة لما يجوا يشتروا لبس يتصلوا بيه عشان يجهزلهم اللبس بتاعهم او اللى على مزاجهم لانه كان شغال فى محل كبير المهم قالها ممكن تدينى الرقم عشان اتابعك وتتابعينى عشان اشوف نتيجة اللبس اللى خدتيه فراحت اديتله الرقم ومن هنا بدأت المشكلة طبعا الشيطان دخل فى الوسط وبدأ ينشأ ما بينهم علاقة عن طريق الموبايل واتلاحظ عليه انه مابقاش ينام غير ساعة او 2 فى اليوم من كتر الكلام فى الموبايل وممكن ما ينامش خالص المهم خالتى عرفت بموضوعها واخدت رقمها من على موبايل ابنها من وراه وكلمتها وهددتها واديتهوملها يعنى وكان رد التانية على خالتى انها فضلت تعيط وتقولها هو اللى بيجرى ورايا وانا عندى (بنتين) وارجوكى مش عايزة فضيحة وراحت خالتى قالتلها زى ما جبتيه ابعديه عنك وغيرى رقمك وبالفعل غيرت رقمها وبقى ابن خالنى يومين ما كلمهاش ولا عرف يوصلها وكان بينام وماكانش فى تليفونات بتجيله خالص ، بعد اليومين فوجئت خالتى ان ابنها بيتكلم فى الموبايل وبالفعل كان رجعلها ورجعتله … دلوقتى بقى احنا مش عارفين نخليه يبعد عنها ازاى ولا هو راضى يسيبها ومتعلق بيها ولا هى كذلك وزوجها مش معروف طريقه وبيتها قريب من خالتى فقلنا لو ابن خالتى قدر يبعد عنها مش هاتقدر توصله تانى فقلنا تقطع خالتى عنه الفلوس اللى بتديهاله لانه ما بيشتغلش حاليا ومش عايز يشتغل لكن قطعان الفلوس ما نفعش الله اعلم بقى المتزوجة دى بتصرف عليه ولا لا … قلنا تقاطعه خالتى وابوه واخوه الوحيد وبالفعل قاطعوه وطردته خالتى كمان من البيت وبرده ما نفعش … وابن خالتى ده كان بيتكلم مع بنات كتييير وعرف كتيير ، وحالهم على قدهم وخالتى مش قادرة انها تجيبله شقة خاصة بيه يعنى اللى هايتجوزها هاتقعد مع اهله فى بيت خالتى ومن بعد ما بقى بيكلم المتزوجة دى مش عايز يشوف اى بنت تانية ولا يخطب اى واحدة وكدة كدة مش هاينفع عشان مش راضى يشتغل ولا معاه شقة ونادرا دلوقتى لما واحدة توافق انها تقعد مع اهل العريس … ولو قدرنا نوصل لجوزها ممكن يتطور الموضوع وتحصل جريمة مع مراته وابن خالتى ، والتهديد مع ابن خالتى برده مش نافع … دلوقتى بقى الحل ايه عشان احنا جيبنا اخرنا ومش عارفين نعمل ايه فارجوكم حد يفيدنى عشان امر ابن خالتى يهمنى وانا اسف على الإطالة
مشاكل الخيانة الزوجية
ابن خالتى بيحب واحدة متزوجة ومتعلق بها
اضيف بتاريخ: Saturday, October 21st, 2017 في 17:35
كلمات مشاكل وحلول: الخيانة الزوجية, شاب, متزوجة, مشاكل
ابن خالتك ده اخرته وحشة
اولا- لازم تبعدو ابن خالتك عن الست المتزوجة دي باي طريقة كانت مثلا تهددوها بانها اذا مابعدت عنه فانكم سوف تفضحوها امام زوجها واهلها ثانيا- برضو ابن خالتك ده لازم يتزوج تشوفواله بنت الحلال اللي تعفه عن الوقوع في المحرمات والمعاصي ويبقى راجل مسوول عن بيت وزوجة ويتقي الله فيها ويراعي ربنا ويبعدعن طريق الحرام اللي هوماشي فيه ثالثا-اذا لم يستجب لنصائحكم تلك وظل مستمر في العلاقة المحرمة مع هذة المراة المتزوجة التي الظاهر انها بتصرف عليه وسلبته عقله وتفكيره فلاخيارامامكم سوى الابلاغ عنه هو تلك المراة الخاينة الساقطة حتى يلقوا جزاءهم الرادع من العقوبة كالسجن وربنا يهديه ويصلح حاله ويبعده عن المحرمات والفواحش ويسترعليكم جميعا