انا كنت بكلم واحد اتعرفت عليه من علي النت واعتبرته زى اخويا وهو كمان كان بيتكلم معايا عادى وبعد فترة بدا يلمح انه معجب بيا بطرق كتير في الاول انا كنت بقوله انه زى اخويا وان انا مش بفكر في انى احب بصراحة لانى مش بثق في كلام اى حد وخصوصا انى عرفته من النت بس في الفترة دى انا قربت ليه اوى لان مخنوقة في فترة دى وهو الوحيد اللي كان بيخرجنى من المود ده واتكلمنا اكتر وقالي انه بيحبنى انا مش صدقته لان مش مصدقة ازاى يحبنى من غير ما يشوفنى وكنت دايما بقوله كده بس كنت اتعلقت بيه كتير ومش قدرت انساه خالص واتعودت علي وجوده في حياتى ناو ان انا حبيته اوى رغم انا سمعت كلمه بحبك من ناس كتير بس عمرى ما ارتحت لحد غيره دايما يتكلم معايا انه انا اللي هيرتبط بيها بس مش بيتكلم معايا في موضوع الارتباط وانا خايفة استناه من غير امل كنت دايما بشكك في حبه ليا من تصرفات ليه واحيانا يكدب في حاجات تافهة بيخاف انه يدايقنى بس وبيتهرب احيانا لما اواجهه باي حاجة انا اتاكدت من حبه ليا بس موضوع الكدب ده اكتر حاجة بكرهها في اي انسان وبفكر ناو انى ابعد عنه وامسحه من حياتى كل ما اخد القرار برجع فيه لانى بحبه وكمان بحسسه كتير ان انا ممكن ابعد عنه في اي وقت لما بزعل منه ومش عارفة لانى مش ببحب حد يتجاهلنى ده خلاه يتغير شوية من ناحيتى انا مش عارفة اعمل ايه!!!
شوفي ياحبيبتي اعتبريني زي ابوك اللي خايف عليك ويبغا مصلحتك اي علاقة بين الشاب والبنت من خلال النت مش صحيحة ولاتؤدى الى الارتباط لانها قائمة على الكذب والخداع والتضليل كما حاصل من هذا الشاب معك فرجاء خاص اقطع علاقتك به نهائيا وللابد ولاتهتم به واياك والاستمرار معو في العلاقة دي وطالما انه كداب ويتهرب من الكلام في مواضيع مهمة فلا تثق فيه او تطمني له اتركيه وانسيه تماما وربنا بيكرمك ياقموره بحسن منه الف مرة بابن الحلال اللي يستاهلكي ويقدرمشاعركي ويصونها ويسعدكي العمر كله
أختي العزيزة أهلا وسهلا بيكي يارب تكوني بخير …….
بصي في البداية خلينا نقولوا ان في حاجات كتير لسة ناقصة بردوه ،،، بصي الكلام عن طريق النت غير التليفون غير المقابلات غير الحقيقة وكل ما اى اتنين في الدنيا بيشوفوا بعض وبيحتكوا ببعض اكتر بيعرفوا حاجات أكتر وأكتر عن بعض ،، يعني أكيد بردوه هو لسة ميعرفش عنك حاجات كتيرة وانتي نفس الكلام بردوه !!! ديه أول نقطة
النقطة التانية …
انتي اتكلمتي في حتة الكدب وهروبه من بعض المواضيع ،،،، تختلف مواضيع عن مواضيع مع اني مأيدك وأحب وأحترم جدا مبدأ الصدق والوضوح في كل مواضيع الحياة ،،، بس خلينا زى ما بتقولي بيخبي عليكي في بعض الأحيان وده كلامك عليه وانتي مش حابة كدة ، بس ايه نوع المواضيع ديه ،،، وهل هى انتقاص في حقك وساعتها بيهرب من الاجابات ،،، ولا حاجات خايفك تفهمي غلط مثلا فبيقول غير الحقيقة ،،، تفرق !!!
، وانتي أدرى بحكم تعاملك معاه ومعرفتك للحوار ايه !!!
ثالثا
بصي بقا
متمشيش ورا مشاعرك كتير عشان هتوجعك أوي ، وانتي اللي هتجرحي نفسك بنفسك ،،، اتعاملي مع الموضوع لا أكثر ولا أقل هو Friend
ليكي عالنت حتى الان ، ومش تطورت الحكاية لأكتر من كدة !!! ، متجرحيش نفسك بنفسك بقا وعيشي حياتك وبردوه متجييش عليه وسيبيه يعيش حياته لأن من كلامك لم تتعدا المرحلة أكتر من كدة
أنا بكلمك في كل كلمة من كلامي بمنتهى الوضوح والصراحة
وأحب ليكي التوفيق والنجاح في حياتك دايما يارب
أخوكي
الانسان الطيب
باختصار لو هو بيحبك يدخل البيت من بابه يعني لو هو جاد ييجي البيت ويقابل ولي امرك ابوكي او اخوكي او عمك ويطلب ايدك رسمي مش بس كدة ويحددميعاد للشبكة وكتب الكتاب والدخلة ميعاد لايجاوز سنة ويكون عنده شقة وتتفقوا علي التفاصيل – ده لو هو جاد في الارتباط – صدقيني انا اشك انه بيحبك وانه هيتجوزك – اتمني يكون صادق – ولوكذابت هيختفي الي غير رجعة وترتاحي – مع ملاحظة بان بعض الشباب المستهتر بيدخل البيت وعلي حس الشبكة او الخطوبة بيتجاوز حدود الخطوبة واحيانا البنات بتفرط في نفسها اعتقادا منها انه هيبقي جوزها وبتفقد عذريتها وبتفقد شرفها وبتفقد سمعتها – اتمني ليكي التوفيق وكل عام وانتم بخير .