الحب وفارق السن

خلاني احبه ودلوقتي يقولي نبقى اصدقاء

السلام عليكم .. اسعد الله اوقاتكم بكل خير
اصعب جرح من هو جرح القلوب وده السبب اللي كان دايما مخليني ابعد عن اي طريق يوديني للحب لدرجة اصحابي سموني معقدة لاني دايما كنت بتغلب على اي مشاعر احس انها بدأت تتكون جوايا ناحية اي حد وعدى العمر ووصلت لنهاية العشرين وقضيت عمري في الدراسة والشغل بس في الاخر انا بشر وطبيعتي الرومانسية واحتياجي للحنان كانوا بيموتوني وعشت حياة صعبة لحد ما قابلته
عمري ما اتخيلت اني احبه رغم انه ناضج وعاقل وفاهم الدنيا و صفات تانية فيه كتيرة حلوة الا فارق السن كنت انا اكبر منه ب 8 سنين وده يمكن كان مطمني وخلاني اتعامل معاه عادي بدون تردد او خوف
كان فيه حنان مشفتوش من اي بشر طيبة وحنية وخوف عليا اكتر من اهلي وده خلى له مكانه كبيرة عندي بس مش حب كنت بعتبره اخ او صديق وعرفني على اهله وحبوني وانا حبيتهم ودايما كنا بنسال على بعض
لحد ما في يوم قال انه مش قادره يخبي وانه بيحبني قولتله ينسى الموضوع لانه مش هينفع رفض وقالي انه هيتحدى الدنيا كلها واني اغلى امانيها ومش هيقدر على بعدي حاولت كتير اخليه يشيل الموضوع ده من دماغه وفي كل مرة كنت انا اللي بتعلق بيه اكتر لحد ما حصل اللي طول عمري بخاف منه وحبيته
وكل مره اصارحه بخوفي يطمني ويقولي انه هيقنع الدنيا كلها ومرت شهور وكلامنا على التليفون لظروفنا لحد ما في وقت حسيت اني لازم اعرف فعلا الموضوع ده ايه نهايته وقولتله بالكدب اني فاتحت اهلي وعليه هو يفاتح اهله
قالي انه قال لهم وسكت ومفهمتش منه حاجه حسيت انه ممكن يكون مقدرش يقول لهم او انه قال لهم وهما رفضوا بس هو سبق وقالي انه لمح لهم وهما موافقين وخصوصا باباه
لحد ما فات اسبوعين بعدنا فيهم عن بعض ولما رجعنا اتكلمنا طلبت منه يكون صريح معايا ويقولي ايه اللي حصل قالي انه راح لدكتور نفسي عشان يستشيره والدكتور قاله بلاش الموضوع ده مش هينفع لانه الناس مش هتسيبنا في حالنا هيقولوا انه ضحك عليا واحد صغير واهله واصحابه هيقولوا ان انا اللي ضحكت عليه وان لازم نرجع اصدقاء زي الاول تدريجي
اتصدمت لكلامه ازاي اقتنع دلوقتي بالكلام ده وانا سبق وقولته له كان بيرفضه وازاي وافق يتخلى عني وعن حبه عشان خايف من كلام الناس وهو سبق وقالي هتحدى الدنيا عشانك
حاولت التمس له عذر مقدرتش ملقتش سبب مقنع غير انه ضعيف وخايف من اللي حواليه رغم انه كان مبين العكس
ملقتش قدامي بعد كل ده الا اني اخرج من حياته غيرت رقم تليفوني واختفيت خالص بس انا حاسه بجرح كبير هو اللي خلاني احبه وكان كل شئ واضح من الاول وراجع دلوقتي يقولي نبقى اصدقاء طب ازاي وازاي هقدر اتحول على هواه مش عارفه هو ازاي دخل حياتي وهل هو حس باحتياجي للحب والحنان واستغل النقطة دي ودخل منها لحياتي ولا هو فعلا بيحبني بس ازاي حب مع ضعف
منتظره ردودكم … مع خالص الشكر والتقدير

مشاكل وحلول ذات صلة

اضيف بتاريخ: Saturday, March 17th, 2018 في 09:01

كلمات مشاكل وحلول: , ,

ردود to “خلاني احبه ودلوقتي يقولي نبقى اصدقاء”

  1. ابوالبتول
    17/03/2018 at 20:58

    شوفي يااختي عايز كون معك صادق وصريح ومش عاوزك تزعلي او تتضايق ابدا من الكلام اللي هقوله لكي نعم جوازك من هذا الشاب اللي يصغرك في العمر 8سنوات زواج فاشل من اساسه ولن تكوني سعيدة ولامرتاحة معو دي الحقيقة التي لزوم تعرفيها ناهيك عن كلام الناس ومنهم اهله واصدقاءه عنك وانك ضحكت على الولد وخليه يتزوجك في مجتمعنا الشرقي والمتعارف عليه ان الزوج يكون اكبر من الزوجة او هما في سن متقاربة تماما اما انها تكون اكبر منه في العمر فدي لايحببها الكثير من الاهالي والناس لاولادهم انت ماشاء الله زي القمر المنور والف من يتمناكي ياعزيزتي ولاتزال بعز شبابك وانوثتك وتلاقي نصيبك مع ابن الحلال اللي يستاهلك ويقدرك ويسعدك الدنيا لسه بخير وفيها اولاد حلال كثار ربنا بيكرمك ان شاء الله ولاتهتم لماحصل معاك كل شئ قسمة ونصيب وربنا يريد الخير لك وماحدش عارف نصيبو فين ولامع مين تاكدي انك هتلاقي نصيبك لامحال اصبري وخليك واثقة من نفسك ومعتزة باخلاقك وتربيتك وربنا بيكرمك من اوسع ابوابه

اترك رداً أو حلاً لهذه المشكلة