انا ارتبطت بشخص اعرفه من 8 شهور، شخص كويس وذكي ومثقف وكويس معايا وطيب جدًا، اتعلقنا ببعض وكله على النت السوشيال ميديا بدون ما نتقابل في الواقع بسبب بعد المسافات بينا.
اعرف كتير عن حياته وهو صريح في الكلام عنها وكذلك يعرف عني، كلامنا كان بحدود واحترام وتقدير بس هو مريض بالسرطان ودا كان سبب عذابي، ولكن بدعي دايما ربنا يشفيه وعندي امل كبير في ربنا.
بس مؤخراً من فترة مش كبيرة، بدأ يعبر عن مشاعره اكتر بكلام حلو لكن بحدود، وفترة تعبه كان مبيتكلمش كتير ومبيحبش يتكلم عن التعب، وبيتعب نفسيا وجسديا، والكلام عن المشاعر دي يمكن اكتر حاجة كانت بتبسطه وتخفف عنه.
بس واحده واحده تعمق اكتر في الكلام، ومن اوله صديته كام مره وكان بيزعل جدا اني بكسفه بس بقوله بس عشان ربنا يكرمنا، بس واحده واحده الحدود دي اتشالت لما بدأ يقول كلام يأثر زي انا شايفك ليا وبس عمري ما هسيبك تضيعي من ايدي ومش هبقي لغيرك ومتحرميناش من حاجة بتبسطنا، انا بتعلق بيكي اكتر وبتغير 100 درجة وانا معاكي، وبشرتي متقبلش اي بنت غيرك انتي وكلام كتير.
ومستنين ربنا يشفيه او يبقي قريب ونلاقي فرصة نرتبط بيها ارتباط رسمي، بس سبته يتكلم كل ما بلاقيه بيزعل كام مره وقفته يقول كل ما نبقي مبسوطين لازم تنكدي وبينام زعلان.
ومن ضمن كلامه الي كان بيخليني اسيبه يتكلم، كان بيقول ان انا بخليه يتمسك بالحياه اكتر، وان انا بساعده وبس عايزني افضل جمبه، وان هو محتاجني وعايزني وحاسسني.
اتكلمنا مره واتنين وكل مره التفاصيل تزيد وانا ببقي مش مرتاحة، في مره زادت اوي كلام انا اول مره حد يكلمني فيه، في اليوم اللي بعدها قولتله خلاص مش حابه نعمل دا تاني ونتكلم فيه، انا معاك انا هصبر لو بتحبني اصبر، بس زعل بردو وبقاله كام يوم بيتكلم ولكن مش على طبيعته ومش موجود زي الاول.
وهو محتاج يتكلم في دا تاني لانه بيبسطه، بس انا بحس احيانا باستغلال وان دا غلط رغم اني غلطت كام مره، بس مش عايزة اغضب ربنا تاني حتى عشان يكرمنا، ومش عارفة اقنعه ازاي؟
بس لما كنا بنتكلم في الكلام دا كان بيبقي فعلا في حماس وسعادة اكتر، بس عارفة ان كل السعادة دي هتروح لان دا غلط مش صح وخداع بس وخصوصًا ان انا مش عارفة هو هيبقى معايا ولا لا؟ ومش عارفة اتصرف ازاي.
بيستغلك وبيستدرجك لأهدافه، ومرضه ذريعه لإستعطافك
البنت اللى بتقدم تنازلات نهايتها معروفة،
إبعدى عنه وإبحثى عن الحب الحلال وحافظى على حيائك وثقت أهلك،
الحب الحقيقى هو اللى بيكون تحت مظلة الأهل والشرع غير كدا ربنا مش بيبارك
صلاة الإستخارة قبل اي امر هام لمستقبلك ومصيرك ، لا تعلمي اين الخير مكتوب لك
اول شيء لا تقيمي اي رجل من كلامه ، لا يؤثر فيك كلام يروح يتعلمه في البيت ويتدرب عليه ويمكن يكون تعلمه من صاحبه او من حبيبة ساپقة ، وبالتأكيد اذا كنتي حلوة في نظره يقول لك كلام اي احد يشوفك بيقوله لك ، المهم سمعته ومعرفة الناس به وجيرانه وزملاءه ومعرفة اهله واصله وصحته ، انتي غير مسئولة عن مرضه تتحملي مشكلته ، له اجر لن تأخذي منه حسنة ،لا يستعطفك بمرضه او مشاكله ، زواجك نص حياتك ومستقبل ذريتك ، اهتمي بالاساسيات وعامليه رسميا ، سيبي الكلام الذي يختاره لك هو ليحصل عليك ، الكلام كل الناس يتكلمو بأي كلام فاضي ، اذا كان جاد للزواج ، سمعته واخلاقه وصحته ومين اهله اولا