الموضوع طويل شوية فاصبروا معايا…انا اتعرفت علي خطيبي من الشغل،كان كله تمام وقصة يتعمل منها فيلم وكان اول واحد احبه في حياتي والناس كانوا فاكرينا اخوات من كتر ما احنا شبه بعض…اخطبنا سنة ومن اول ما اتخطبنا وبدات المشاكل،كنا بنتخانق 3 مرات في الاسبوع وعلي هبل،اتاخرت خمس دقايق،مين يعدي مين في السكة….الاول كنت فاكرة المشكلة عندي لقلة خبرتي في الارتباط,بس الموضوع زاااد جدا.هو خطيبي عصبي اويييي وما عندوش حاجة اسمها مشكلة صغيرة,ردود افعاله واحدة,ده غير انه عنيييد اوي,دماغه بتاعة طفل 7 سنين,دايما سيء الظن يعني ما فيش حاجة اسمها حسن نية ولا ماكنش قصدي يعني اوقات بحس انه في حرب مع الناس وفاكر نفسه زكي وفاهم كل حاجة وكل الناس وهو غلبان جدا وبالتالي بيرفض نصيحتي في اي حاجة وبينقض كل حاجة في تصرفاتي من الالف الي الياء لدرجة اني بحس اني في مدرسة وبتعاقب..ويا سلام لو حصلت مشكلة واختلف رايي معاه مبدأ اني عندي رأي ده بالنسبة له عند وكلامي في اي حاجة يبقي جدال فتخلص المشكلة وتتقلب الاية عليا اني دايما غلطانة…ده غير اني بحس انه مش بيسمعني او مش بيفهمني او بيسمع اللي عاوزه وبس يعني اتكلم في الحاجة ساعة الاقيه رجع يتكلم فيها تاني
المهم حصلت مشكلة كبيرة و زعق في اهلي و دي حصلت مرتين قبل كده انه في خناقة يعلي صوته ومش بياخد باله مين قصاده ويرجع يعتذر بس اخر مرة تعدي حدوده اوي والكل فاض بيه وكنت خلاص تعبت من كتر مشاكله وطباعه فالخطوبة اتفسخت
مفيش يومين مروا الا ولقيته رجع تاني وعايز يرجع,قعد 3 شهور كدة وخد مني كلام ماحدش يقدر يستحمله بس فضل مصمم انه يرجع وكل كلامه انه بيحبني و نفسه يتغير بس عايز صبر…هو اصلا ولد كويس,طيب اوي.حنين جدا,اصيل,كريم,محترم مش بتاع بنات.وراجل بقي من يتوع زمان دوول,ومسئول وصريح جدا يعني مش بيعرف يتظاهر ابدا وده كان بيعمل مشاكل لكن بردو حاجة مش وحشة, وغير كدة بيحبني جدا…بالرغم من معارضات كتير صليت استخارة وقلت اديلوا فرصة تانية…رجعنا تاني بقالنا شهرين و حاسة الدنيا بترجع تاني زي الاول,هو قاللي انه التغيير عايز وقت وانه محتاجني في حياته عشان هو مر بظروف صعبة كتير في حياته بس انا خاااااايفة جدا وحاسة انه مش حايتغير…الكمال لله وحده بس انا نفسي في بيت مستقر و مش عارفة دي عيوب عادية و مميزاته كتير ولا اسيبه ولا اعمل اييييه,انا بحبه بس هو متعب جدا و احنا مختلفين جدا في طباعنا و افكارنا يعني هو في الشرق و انا في الغرب…..بجد ساعدوني مش عارفة اعمل ايييه!!!!!
انا والله زيك كده وبيشك فيا مع ان انا ش بعمل حاجه غلط بس عشان كمنتش بحبه نهائي خالص كنت مش قابله كلمه وحاسه انه بارد لكن عرفت ان كل دا عشان مكنتش بحبه بس لما نسيت اي حاجه كانت في دماغي اقتنعت انه مش شك عرفت انه غيره بس زايده شويه لو انتي مش بتحبيه مش هتقبليها ولو بتحبيه هتفرحي انه بيغير عليكي واله انا دلوقتي كنت كل امااجي افكر في حد غيره اتصل علي خطيبي واكلمه اعملي كده مش هتخسري حاجه والله هتحبيه بس هيا مجرد وقت وهتتعبي شويه بس وجع ساعه ولا كل ساعه وربنا يهدهولك ياعسل وتحبيه
شوفي يااختي الرجل داقديكون من جواه كويس قلبه ابيض لكن تصرفاته وعصبيته الزايدةهي لب المشكلة لابدمن التفكير بروية قبل الموافقة عليه حاولي تكون مرحلةالخطوبة دي مرحلةتشخيص الحالة اللي عنده وقربي منه اكثرومن اهله ممكن توصل لمعرفةحالةخطيبك عن قرب وماهي الاسباب التي تجعله عصبي وشكاك وبعدهالك حريةالاختيار اماالزواج منه اوفسخ الخطوبة وكلا يروح لحال سبيله ربي يوفقك ويسترعليك
خطيبى برده نفس الكلام عصبى جدااااااااااا وعنيد والموضوع عنده الكبير زى الصغير ومبيتحملش اى حاجه ابداااااا وبياخد كل حاجه على كرامته بس الحمد لله بيحبنى وانا بحبه بس لما الدنيا بتبقى حلوه والشغل كويس بيكون كويس جداربنا يرجعه بالسلامه يارب ويهديه ليا هو وخطيبك يااااااارب
السلام عليكم انا بالظبط زيك تمام خطيبي عنيد وبيعاملني المعامله بالمثل وبما انه لم يعرف في حياته غير الناس السيئه شكاك جدا ولكن نصيحه مني لو بتحبيه لاتتركيه يمكن انتي امله الوحيد في انه ثقته في الناس ترجع تاني يعني لو قدرتي تخليه يثق فيكي يبقا دي الحكمه الي ربنا قصدها من تجميعه بيكي ياريت تقدري تخليه يثق فيكي ومتتخليش عنه لانه من جواه انسان طيب جدا وحنين ودي حاجه نادره اليومين دول في الرجاله
شكلك بتحبيه … وعشان كده رضيتى ورجعتى … بس قوليله ان أحترامى واحترام اهلى فى كفه وجوازنا فى كفه وحاولى تمشى معاه على الأسلوب ده لحد ما يتصلح واديله فرصه اخيرة وربنايهديه يارب ليكى …. ومتنسيش تدعى ربنا ليه وليكى ان ربنايصلح لكم الحال ويهدى سركم يارب
انا هقولك ع حاجة ياقمر اولا ربنا يهديه ويخليكوا لبعض
انا زيك بالظبط خطيبى عصبى جدا ونفس الى بيحصلك بيحصلى وكنت تعبانة زيك بالظبط
بس انا اتكلمت معاه واتفاهمت معاه
عاوزاكى تعقدى معاه واقنعيه انه مهما حصل مش هتزعلى منه بس كل اللى بتعمله مش هيفيد بى حاجة غير الندم ومش هتستفاد حاجة
وحاولى انك تسكتى وتستحملى كل اللى بيعمله
ولما يجى يتخانق معاكى اسكتى واى حاجة يقولك عليك قوليله اوك هعمل كذا وهنفذ كذا
هو لما يلاقيكى بتسكتى وبتسمعى كلامه هيسكت وهيتغير
وعلشان انتى طول ما بتعاندى معاه هيفضل يعاند هو كمان
ومش هتخلصوا من المشاكل فا حاولى تتمالكى اعصابك وهديه
ولما تلاقيه مضايق استحمليه واعرفى منه سبب الضيق اللى فيه ممكن مش يكون منك
وممكن يكون بيجربك علشان يشوف اذا كنتى هتستحملى فى يوم من الايام وانتوا متجوزيين ولا مش هتستحملى وربنا يهديه ويصلح حاله
عفوا سمحينى خطيبك قليل الادب انه يعلى صوته على اهلك. بعد الجواز حيضربك قدامهم لانه مش عامل للكبار حساب وابحثى على حاجه اسمها الشخصية الاضطهادية معلش هو الاسم مجعلص شويه 🙂
ولو لقيتها هى خطيبك سيبيه فورا وقبلها تقدرى تخدى رأيى اى استشارى نفسى ومتحسسهوش انك بتفكرى تسبيه الا لما تخدى القرار فعلا والان عليكى ان تبذلى كل ما تقدرى على فعله معه واكثرى من الاستخاره وقول (اللهم دبرلى أمرى فأنا لا احسن التدبير) واقبلى على الله وعليكى بقيام الليل ودعاء السحر اما ان يهديه لكى او يعوضك عنه فان لم تجدى تحسن فلا داعى ان تخربى حياتك بنفسك ولكن رأيى ان ما تحكين نذير بأن خطيبك لا يصلح والله اعلم
mesh 7ayet3’ayar abdan insyyyy w sebyyyy
بصي اولا انتي لازم تقفي جمبة سيبك من اللي يقولك انتي صح مين قلك اية لازم تعرفي ان قدامك بيحبك ممكن يتغير علشانك بس براحة وعلشان تكوني عارفة ومتاكدة انا هديكي مثال بصي انتي مش احسن من الرسول علية الصلاة والسلام لما فضل يحاول انة يغير اهل مكة في حوالي 13 سنة فانتي اصبري ان الله مع الصابرين ياحبيتي وبعدين انتي لو بتحبية هتحاولي معاة مرة واتنين ومش هتزهقي وربنا يهديهولك يارب ويحسن ختامكوا وحاولي تحتوية وتكوني قريبة منة يمكن يتصلح حالوة وان شاء الله ربنا معاكي هو الموضوع مش صعب ومش محتاج اللي انتي فية دة وانك تزعلي نفسك هو بس محتاج شوية صبر وبعدين المفروض طرف يشد وطرف يرخي علشان الحياة تمشي وربنا معاكي يارب يهديكي ويهدية ويهدي المسلمين اجمعين وانا اسفة علي الاطالة
انا من راي ان هو مش هايتغير لان الى فية طبع مش بيبتلة ابدا فاانتى لو شايفة ان انتى ممكن تقدرى تستحملى عشان الحب دة وتكملى فا ربنا معاكى اما لو مش هاتقدرى فا ابعدى من الاول
محدش فكر ينصحها انها تشوف اييييه اللى بيوصلو لكده و تتفاداه علس\شان تكسبه و تكسب صفاته الطيبه . مين اكد انها هى اللى صح ؟؟
انا من راى انك تسيبيه لان اهم شرط فى الزواج التفاهم بين الطرفين لا نك هتتعبى كتير قوى بعد الجواز لانه مش هيسمعك ولا هياخد برايك فى اي حاجه تخصكو هيمشى بدماغه هو وبس
انا تقريبا عشت نفس التجربة بس اديتة بدل الفرصة الف وبالعكس متغيرش بلعكس كان بيزيد وصلت لدرجة الاهانة ومد الايد معتقدش انة ممكن يتغير لان دة طبع فية وربنا يوفقك ويقدملك اللى فية الخير
عملى استخاره وربنا يققدم لك اللى فيه الخير
الاخت العزيزه صفات خطيبك أصيله وصعب تغييرها لكن مش مستحيل ده عايز واحده غير صفاتك الا اذا كنتى تقدرى تتحملى وتصبرى عليه الأمر راجع لكى انتى وحدك. فى النهايه الحياه تكامل لازم تلاقى فيه اختلاف زوج عصبى وزوجه هادئه زوجه بخيله شويه زوج كريم والعكس بالعكس بين الزوجين لكن لابد من التكافؤ والتوازن حاولى معاه وقررى بنفسك وتحملى مسؤلية الاختيار. لذالك جعل الله فترة الخطوبه حتى يرى كل طرف ممكن يكمل أم لا.
السلام عليكم
خطيبك انسان شكاك وعنيد ولا يحب المناقشة ولا يحترمك وسوف يستمر على هدا الحال وأنت سوف لن تستطيعين تغيير تلك الصفاة السلبية التي فيه .ومن الأفضل أن تفسخي خطوبتك معه وان استمريت فسوف تعانين معه كثيرا وسوف تندمين أشد الندم . وبما أنك قلت صليت صلاة الاستخارة والأمور كما هي من سوء الى أسوء فماذا تنتظرين من خطيب يحرق ذمك كل يوم.
وأطلب من الله تعالى أن يرزقك بزوج صالح يصونك ويخاف عليك