انا معايا بكالوريوس هندسه وعندي 23 سنه والحمد لله متدينه ومحترمه وانا الحمد لله مقربه من ربنا وبدعيه يحققلي امنياتي
عندي مشكله كل اللي اتقدمولي انا بحس انهم مش مناسبين واخر عريس اتقدملي معاه بكاوريوس تجاره وشغال محاسب ف السعوديه ومعندوش شقه هو محترم ومؤدب بس عاوز الخطوبه تبقي هنا اسبوعين ويسافر ع طول عشان هو ف اجازة وبعدها يجي بعد سنه ونص يأجر شقه نقعد شهر وياخدني معاه هناك ع طول واروح واجي معاه
وانا مش عايزة كده وخايفه من الموضوع بصراحه وعندي طموح اني اشتغل مع اني مش لاقيه حاليا بس عندي الطموح ده واما سألته ع الشغل قالي عادي ابقي اشتغلي اي حاجه ف السعوديه عشان مفيش شغل مهندسات هناك
المهم بقي بابا وماما قلقانين اكمني رفضت كتير وكمان اهلي بيتكلموا عليا وانا كل اللي رفضتهم مش مناسبين وصليت استخاره ف الاخير حلمت حلم مش حلو وبيقولي اكمني اصلا مضايقه اليومين دول فحلمت حلم مش كويس
انصحوني ربنا يكرمكوا 🙂
مشاكل البنات قبل الزواج
مترددة في اختيار العريس واهلي قلقانين
اضيف بتاريخ: Saturday, November 23rd, 2013 في 07:43
كلمات مشاكل وحلول: الزواج, بنت, عريس, مشاكل البنات
اختي العزيزة انتي فاهمة صلاة الاستخارة غلط ، مفيش حاجة اسمها اشوف حلم بعد الصلاة انما بتستخيري وتتوكلي علي الله فاذا الامر فيه خير بيتيسر لوحده واذا لا هتلاقي اي حاجه تحصل تبوظه يقول رسول الله ( صلي الله عليه وسلم ):(إذا همَّ أحدكم بالأمْر فليَركع ركعتين من غير الفريضة، ثم ليقل: اللهم إني أستخيرك بعلمك …. الخ )
وانا شايفه انك لسه صغيرة متجبريش نفسك علي الزواج من حد انتي مش متقبلاه او حتي نمط حياته اما لو حاسة براحة من ناحيته يبقي توكلي علي الله وان شاء الله ربنا يوفقك للي فيه خير ليكي .