مشاكل التعليم الجامعي

تخرجت من الثانوية بالسعودية ولا اعلم ماذا افعل لمستقبلي

السلام عليكم ورحمة اللله وبركاته انا فتاة متخرجه من الثانوية عمري 18 عايشه في جده واجنبيه غير سعوديه كمان ماني مصريه وماني عارفه اعمل ايش لمستقبلي حاولت ابحث في النت حاولت افكر اكلم اهلي صحباتي ما عرفت ياجماعه انا حيرانه وحاسه نفسي ضايعه وشايله هم فوق ما تتخيلوا يمكن لمن اقولكم السبب حتضحكوا بس الي زي حالتي حيفهمني كويس مشكلتي ما تتعلق بمستقبلي بس مشكلتي تتعلق بنفسي وشخصيتي كمان انا دحين دوبي متخرجه من الثانوية وماني عارفه رجلي من راسي ما ني عارفه ادخل ايت جامعه ؟؟طب حقدر ادخل اصلا؟؟ طب اذا دخلت ايت تخصص بدخل؟؟ حتى اذا دخلت هل حفلح في ولا حنجح بالدفه او ارسب؟؟ او مايناسبني التخصص واندم ؟؟ افكر ليل ونهار كيف حيكون مستقبلي وشايله هم فوق ما تتخيلوا المشكلي انو نسبي سيئه صح برضوا احمد ربي على دي النسب في اسوء منوا بس برضوا منتوا فاهمين انا اجنبيه في السعوديه يعني باختصار ماليه مستقبل ما ساروا يقبلوا في الجامعات ابدا اجانب واذا اذا قبلوا يقبلوهم بموزون عالي جدا وبالدفه وبتخصصات بسيطه انا طموحي اعلى من كدا بكثير المشكله مو فدي بس المشكله اني حاسه نفسي غبيه جدا وهبله ما اقدر اعمل شي ماني فالحه في شي وانا كده فعلا في الحصص اربعه وعشرين ساعه سرحانه سرحان ما تتخيلوا ماني مركزه مع المعلمه ابدا وغير كده غيابي كان كثييير مره وفي المسائل الرياضيه غبيه جده دايما اخبص في الرياضات ما اكمل دفاتري ما اشارك وفي البيت ما اعرف اطبخ ما اعرف اكوي ما اعرف اغسل ما اعرف اشغل الفرن من اصلوا من الاخر خيبه وكمان انا شخصيه اتكاليه جده لازم اعتمد على احد عشان يعملي كل شي في الثاناويه كنت اطلب التاشير والملاحظات من صحباتي وغير كده خطي معفن دا غير انوا شكلي موحلوا وشعري معدوم دي حكايه تانيه طبعا انا دحين اكتبلكم الرساله دي وانا قاعده ابكي لاني جدا زعلانه على نفسي

1_تخصصص الحاسب:ما يناسبني ليش ؟ لانوا انا ما اعرف الاشياء الي تتخصي بيها بالحاسب زي الفوتيشوب وغيره رغمني الجلوس على الكمبيوتر هو الشي الوحيد الي اقدر اعمله عندي في دمان رهيب اربعه وعشرين ساعه راكبه فوقوا وعلى ما اعتقد انوا تراجع درجاتي في الثانويه بسبب ادماني على الكمبيوتر.

2_تخصص الطب لي حالتين
دكتوره:اولا تخصصات الطب بشكل عام في السعوديه لغير الاجانب مرفوض وممنوع غير التمريض وغير كده ما ابغا اسير دكتوره عشانوا سنوات الدراسه بيها جدا طويله حيضيعلي سنوات عمري كلها.
تمريض:دا التخصص انا قلت انوا جدا يناسبني لاني ما اخاف من الدم ولمن كنت صغيره كنت احب التمريض موت كنت اسرق من الممرضات ابر وكممات ولصق وحقت السان وكمامه كانوا الممرضات مره يكرهوني بسبب الشي دا هههههههههه بس للاسف اولا اهلي رافضين جدا فكره التمريض ومانعيني وغير كدا انا غبيه وما عندي سرعة بديهه ومعروف الممرضه لازم تكون مصحصحه وتتصرف بسرعه وكمان انا ما اعرف اكتب كويس خطي معفن فوق ما تتخيلوا وبطيييييئه ما حقدر اكتب الاسماء والاشياء الي يطلبها مني الطبيب كمااان انا عندي هوس نضافه واخاف من الجراثيم يجيك الواحد يكحكح في وشك ويعطس وينف وفوق كدا تكون ريحته فايحه كمان
طب بيطري: انا مرررره احب الحيوانات وعندي موسوعات كثير عنهم كنت ملمه بعلم الحيوانات وجبت حيوانات كثييبر في بيتي (اسماك -قرد -بسس-سلاحف -همستر-كتاكيت-ارانب-عصافير وغيره كان عشقي الحيوانات بس اولا هنا مافي تخصص للطب في السعوديه مسموح للاجانب وما اعتقد انوا عندهم بيطره اصلاوكمان الصراحه ما صرت احب الحيوانات زي اول.

3_الهندسه : اولا اساسا مافي جامعات تخصصات هندسه للاجنبيات الا عفت وعفت فلوسها كثيييير ميزانيتنا ما تسمح وغير كدا انا الصراحه ما احب الهندسه داك الشي فكرت اذا دخلت الهندسه ادخل هندسه كيميائيه لاني احب الكيمياء بس للاسف فيها الفيزيا والرياضيات اكثر مادتين اكرههم في حياتي وغير كدا ما اعتقد اني حقدر افلح في فكرت في هندس معماريه لاكني للاسف فاشله في الرسم فوق ما تتخيلوا.

4_الكيمياء : ماده احبها فكرت اتخصص في الجامعه بيها لاكن فيها بدرس رياضيات وفيزياء باختصار ليها علاقه بالحساب اكثر شي اكرهو بحياتي.

5_الانجليزي: فكرت اني ادرس ادب انجليزي لاني الصراحه كنت فالحه في الانجلزي ودرجاتي كانت عاليه في الانجليزي وكنت شاطره في الاختبارت النهائيه غالبا تكون كامله درجتي فيها والاختبارات الشهريه كمان لاكن اولا موزوني ما يدخلني انتظام لانو الانتساب ما فيلوا لغه انجليزيه غير كده على قد شطارتي على قد خيبتي في انا فلح في الانجليزي في الاختبارات والدراسه بس غير كدا في الحياه العاديه مررررره سيئه في ما اقدر اقرا كلمتين على بعضها ودايما في النت لمن تجيني صفحه كلها انجليزي ما اعرف اقرى كلمه في المدرسه كنت افلح في الاختبارات بس غير كدا في الحصص اطالع على الكتاب مبلمه او مستصيبه كاني شايفه رموز هيروغليفية . من الاخر خيبه

6_ الاحياء :
ماده حلوه ومره كنت احبها وكنت شاطره فيها كنت ابغا ادخلها بس الاحياء والتخصصات العلميه للسعوديين فقط واعتقد الطلاب بس ماني متاكده وغير كده اذا درستها حندرس النباتات والمخلوقات الي في المملكه بس ايش الي يخصبني ادرس نبته صحراويه ميته ناشفه ولا حدرس عن غنمه ولا جمل انا كنت ابغا ادرس النباتات الي موجوده بره مثلا في الادغال الغابات غابة ابجد غابات امزون الغابات الافريقه غابت اوروبا كندا اليابان .

7_التاريخ انا احب التاريخ والاشياء التاريخيه والاساطير والملاحم التاريخيه لاكن احب اقرا عن التاريخ الاوروبي مثل العصر الفكتوري والعصور الوسطى وغيرها فقط و لااحب الغزوات والتاريخ العربي بشكل عام مافي تخصص عن التاريخ الاوروبي واصلا اعتقد التاريخ كان لازم امون ادبي

7_ الدراسه في الخارج :
الدراسه في الخارج يعتبر الحل الجذري لحاله مثل حالتي لكن اولا اهلي لا يسمحون لي بالسفر بالخارج قطعا ومنعا باتا ورافظينوا رفض شديد اخويه ما يبغا يسافر معايا عشان ادرس رغمنوا ما عندوا شي حاليا مره فاضي اسافر لوحدي ممنوع لسبب اجتماعي وبسبب غبائي يقولوا اذا سافرت لوحدي حتظيعي وما حتعرفي تتصرفي وما حتصصحي وممكن يخطفوكي مررره رافضين .

8_اللغه اليابانيه والدراسه في الخارج لليابان .انا من عشاق الانمي واليابان من انا صغيره من وانا عمري ثانيه ابتدائي من 12 سنه تقريبا واكثر حلمي كان اني اتعلم اللغه اليابانيه واتخذها كمهنه جديه واساسيه في حياتي لاكن ماكان في امكانيات وانا صغيره اني اتعلمها دحين انتشرت لغة اليابن واليابنين في الاونه الاخيره لاكن الان فقط يعني ان شاء بتعلمها لاكن ما حقدر اني اتخذها كمهنه .بالنسبه للدراسه في اليابان هي تعتبر من الدراسه في الخارج فاكيد حتكون مرفوضه ومافي فلوس ولاكن لو نفترض اذا وافقوا واكتسبت منحه للدراسه في اليابان المشكله هي اللغه حتقولولي عادي وتتعودي مع الوقت وزي كده ولاكن طلعت المشكله اكبر من كده بكثيير اولا درجتي سيئه واللغه لااعرف انجليزي او ياباني قلت ماشي مافي مشكله ححاول افهم الانجليزي قد ما اقدر واتكلم بي ححاول والللغه اليابانيه ححاول اتعلم اللغه اليابانيه والم بها قدر المستطاع طلع لا يقولك لمن تروح تدرس في اليابان جامعه يعني تبغا تاخد بكالوريوس لسع مااخذتعا لااااازم تكون عارف معرفه تامه باللغه اليابانيه ومجيدها اكثر من الانجليزي لانو الدراسه في الجامعات اليابانيه عشان تاخد بكالوريوس تكون فيها المحاضرات بالغه اليابانيه فقط لاغييير لازم تاخذ سنتين قبل ما تروح اليابان تدرس فيها الللغه اليابانيه في بيتك عشان تجيدها وتتقنها عشان تقدر تسافر وتتعلم وبحكم اني امراءه للاسف السنه الوحده مهمه ليه ما اقدر اضيعها .

شرطيه او ظابطه: انا عارفه خبصت الموضوع بدي النقطه بس فعلا انا كان نفسي اكون شرطيه اوضابطه او معلمة كرتيه لاني احب العنف والقتال ومتيمه بالفنون القتاليه لاكن وللاسف انا مريضه عندي سكري >>انخفاض في السكر لا استخدم ابر الانسولين واهلي رافضين اني ادخل كراتيه من اساسه واصلا اصلا مافي حاجه زي كدا هنا.

ملحوظه :انا احترم السعوديه والسعودين وما قصدي بكلامي شي ابدا انا بس اتكلم عن الحاله الي انا فيها.
نسبتي في الثانويه :علمي: 92. القدرات :فوق ال75 مايوصل ال80. التحصيلي :فوق ال88.

مشاكل وحلول ذات صلة

اضيف بتاريخ: Monday, June 13th, 2016 في 19:34

كلمات مشاكل وحلول: , , , , ,

6 رد to “تخرجت من الثانوية بالسعودية ولا اعلم ماذا افعل لمستقبلي”

  1. Lonelyheart
    16/07/2017 at 23:02

    على فكره أنا مادخلت المطبخ إلا وانا عمري ٢٠ سنه وبعدها صرت ماشاءالله طباخه درجه اولى إتعلمت من الكتب وبرامج الطبخ في التلفزيون طبعا التلفزيون السعودي والدتي كانت رافضه نجيب دش وإنترنيت نهائيا

  2. Lonelyheart
    16/07/2017 at 16:54

    ياأختي اولا أنا مريت بنفس ظروفك أنا برضو أجنبيه من مواليد السعوديه ولما إتخرجت من الثانويه هذا كان زمان ١٩٩٦
    أهلي ماكانوا راضيين أسافر سوريا ولا اليمن اكمل تعليمي وكان كل همهم أكنس وأمسح وأطبخ المهم أنا كنت اقول لوالدي
    بمره لاسمح الله لو أنفصلت من العمل أو حصل مرض كيف راح نعيش لو مادرسنا شي نقدر نلاقي فه عمل شريف المهم الله يرحمه كان يضحك ويقول ماعندك أيتام تصرفين عليهم ولا تعرفين ايش بيحصل في المستقبل ولا حياة لكن تنادي حتى رفض والدي إنه يكلم شخص قريبنا هو عنده الجنسيه السعوديه وممكن يتوسط لي أدخل معهد التمريض حق الحكومه مثل ما إتوسط لبنات قبلي لكن برضو والدي رفض بحجة إنه ممكن يحسب والدي قصده يعرضني عليه يعني إتزوج بنتي بطريقه غير مباشره!!!
    المهم قضيت سنوات أخدم أهلي وأخواتي الصغار إتخرجوا من الثانوي ونفس الوضع جلسنا جنب بعض
    وحصل اللي كنت خايفه منه أنفصل والدي من عمله ومرض وتوفى الله يرحمه
    وإضطريت أشتغل في بيوت الناس علشان نقدر ندفع الإيجار والمصاريف
    ماقصدي أخوفك ولا أجيب لك اليأس لكن لازم تدرسين شي ينفعك بكره الله أعلم بكره ايش راح تصير الظروف
    معنى الممرضه من أشرف المهن واحسنها انا إشتغلت مستعدة تمريض قبل ٣ سنوات في مستشفى حي الجامعه
    مظيرة التمريض الله يجازيها الجنه مارضت تشغلني عاملة نظافه ولأنه الإنجليزي حقي كان ممتاز فطلبت من الممرضات يدربوني وفعلا صاروا يحبوني لأني صرت أسمع كلامهم ومااعارض اي شي يطلبوه مني وكمان سنه ونص في العمل وصىت أشتغل مع الاستشاريين في العيادات اللي قدام المستشفى وإتعلمت اقيس الضغط واوزن الناس وكمان إتعلمت جميع الأعمال الإداريه من تسجيل المرضى ومساعدة الطبيب وطلب الملفات
    لدرجه إنه كان االدكاتره متأكدين إني متخرجه من أحسن كليات التمريض وأنا فقط معايا ثانويه عامه
    كلمي أهلك في الموضوع وبرضو إهتمي شويه في شغل البيت وإتعلمي تدخلين المطبخ وإتعلمي تطبخين من اليوتيوب مادام عندكم نت ٢٤ساعه ماشاءالله هههه إتعلمي الحلويات و الكيكات والاكلات الخفيفه
    سبحان الله ممكن بكره يجي لك.عريس الواحد ماهو عارف متى يجي نصيبه
    نصيحتي تدخلي كلية التمريض في كليات أهليه كثيره في جده زي كلية مستشفى الدكتور سليمان فقيه او كلية إبن سيناء لكن سمعت إنه كلية مستشفى الدكتور سليمان فقيه وقفوا يعطون دبلومات فقط بكالوريوس وكمان معاملتهم مع الطالبات ماهي كويسه الله أعلم
    كمان برمجة الحاسب تخصص ممتاز وأكيد راح تلاقين فيه عمل كريم وهو اكثر تخصص مطلوب في سوق العمل السعودي وفي شركات كثيره ممكن توظفك حتى مستشفيات
    شغل مساعد طبيب اسنان كمان شغل حلو وفني مختبرات طبيه فني أشعه شغل حلو
    لو الظروف الماديه ماسمحت أظن بكالوريوس تمريض ب٤٠ ألف ريال سعودي في الأربعه سنين لو حابه تدرسي تجميل ممكن مثل مااشار الأخ فوق
    في في الجمعيه الخيريه في حي النزله اليمانيه يدرسون هذا التخصص لمدة ٣شعور ب١٥٠٠ريال وراح يعطوكم شهاده مختومه وممكن تشتغلين بعد التخرج في أي مشغل نسائي مع إنه حسب الأنظمه الجديده لازم تنقلي كفالتك على محل العمل
    الله يوفقك لكن كلمي أمك في الموضوع وقوليله على قصتي يمكن تاخذ العظه والعبره

  3. moon
    18/10/2016 at 20:53

    اقول لك الصراحة انا زيك احب الانمي واليابان ولما جيت اسوي مقارنات وتابعت احلامي جاني احباط عالم الاحلام والاماني شي والواقع شي تاني ففكري على قدك حتى هنا بالسعودية في جامعات خاصة تكاليفها منخفضة نسبيا ممكن التخصصات مو مرة تناسبك بس مجرد ماتدخلي شي حتحبيه على فكرة انه انتي تحبي شي مو لازم تكوني شاطرة فيه انتي تحديه ادرسيه افهميه وقولي انا اقدر عليه وحتمشي فيه انا دخلت تخصص مااطيقه والحمد لله ماشية فيه صح مو متميزة فيه بس الحمد لله مستواي عادي وكان ممكن يكون سيء لو انا مااجتهد والحمد لله على كل حال اياً كان تحدي نفسك لا تقولي مااحب خلاص ماحسوي مااعرف خلاص ماراح اعمل صاحبتني دخلت تخصص انجلش وهي ماتفهم شي طورت نفسها وعلى طول تجلس عالنت هيا 24 ساعة صارت بس تتفرج افلام وماشاء الله تشوفيها تتكلم تقولي امريكية كله بتعب وجهد لها سنتين دحين بالتخصص ترا مو شي صعب انك تسعي وتتعلمي بس انتي محبطة نفسك ترا لسا صغيرة وقدامك العمر وقدامك تجارب وعالم جدا كبير ماتعرفي عنه حاجة فحضري نفسيتك انه تواجهيه مو بالاحلام الضعيفة لا بالواقع القوي انه تحدي الصعاب واشتغلي بجهد ربي مايضيع جهد احد ترا انا معاك الواحد يطفش ويأجل بس تعلمي تجاهدي نفسك ولا تقولي انه كلامي تهزيء ولا شي مو قصدي والله بس من حبي لك وانو عشت نفس تجربتك عشان كذا حبيت افيدك كلنا كذا بذا العمر عندنا احلام بس ان شاء الله ربي يسهل لك اللي فيه الخير

  4. صاحبة المشكلة
    15/06/2016 at 11:46

    معدين الصراحه أنا ما ني شايفه انك حليتلي المشكلة أصلا بالعكس إنتا ردتها إنتا بس عاتبتني واحتقرتني وبس يجيك الواحد مقهور ومهموم وماهوا طايق شي الواحد ماهوا ناقص ولو سمحت لا تقول على أمي كدا اي نعم صح أمي كانت المفروض انها تعلمني بس برضوا هي ما كان قصدها انها تخليني زي كدا

  5. صاحبة المشكله
    14/06/2016 at 22:37

    اولا شكرا على ردك ومحاولتك لحل مشكلتي لاكن اريد ان اوضح بعض النقاط

    1-حكاية شباب وما شباب لازم تعرفوا انوا انا ابدا وعمري في حياتي ما كللمت شاب واحد او حبيت طول عمري وانا بعيده عن دي الاشياء ممكن انكم تستغربوا من كلامي حتقولوا وحده جالسه على الكمبيوتر اربع وعشرين ساعه مستحيل ماتكون كلمت احد او اتعرفت على احد وانا جيت هنا وقلت كل السلبيات وكل شي محرج عني وكل عيب في وكل شي قلتلكم ياه اقرب مني ما يعرفها ازا كنت فعلا اتعرفت على واحد او كلمتوا كنت حطيطوا مع الكلام الي قلتوا ما فرقت ماهو انا قلتلكم كل شي.

    2-انا قلتلكم انوا حكاية سعودي واجنبي مش اني عنصريه او اني اكره السعوديين مثلا بالعكس انا احبهم واحترمهم وعندي صحبات كثير سعوديين ومره احبهم واكلمهم عادي انا بس اتكلم عن الحاله الي انا فيها هو صح فعلا وانا ما انكر انو في حامعات تقبل اجانب بس المشكله انوا انا الصراحه ومعليش رغم فشلي بس انا فعلا ابغا اروح جامعه معترف بيها زي ما بقية اهلي واخواني ماشاء الله واللله يحفضهم دخلوها وانا ما اقول كدا حسدا ليهم مثلا بل العكس انا جدا ومره فرحانتلهم انهم دخلوا جامعات كويسه وفخوره بيهم كمان بس انا نفسي اعمل زيهم نفسي ادخل مثلهم نفسي اصير زيهم هما مثلي الاعلى ما ابغا ادخل شي مضروب .

    3-في البدايه لمن هزئتني شويه وقلت اني كسلانه واني خامله واقضي جل وقتي خلف شاشات الابتوب الصراحه عجبني كلامك وحسيت انك فعلا تبى تنصحني مو زي اي احد تاني اقولوا مشكلتي يصرفني ويقولي انتى شاطره وكل شي حيكون تمام بس معليش وانا اسفه اني حكلمك كده بس مو زودتها شويه بالعكس انتا كدا دمرتني اكثر ما انا مدمره خصوصا لمن شبهتني بالحيوان.

    4- حكاية اني فاشله وغبيه وما اعرف اسوي شي الصراحه وعذرا على الي اقولوا بس الصراحه مامتى الله يحفضها ويخليها ليه حاسه ليها سبب في الموضوع لاني اتذكر لمن كنت في الابتدائي والمتوسط كنت اترجاهم انهم يعلموني اولع البتقاز او الطبخ او اي شي المشكله انوا هما اهلى ما ادري بس مرررره مررره يخافوا عليه ما يخلوني اسوي اي شي لوحدي الين ما كبرت وصرت اخاف اني اسوي اي شي لوحدي ويخرب حتى لمن كنت في الثانوي ما جربت طعم العلمي الحقيقي في التجارب كنت اخلى البنات هما يسوها كنت اخاف افشل اذا عملت غلط في التجربه وكنت ما احب اشارك عشان احس كل اجاباتي غلط وانا مررره مرررره احب مامتي مامتي نور حياتي وعيوني بس هي كانت تبغى تفرحني وما اتعب وكانت مافي شي ماطلبتوا الا وتجبلي ياه بس وللاسف ياريتها ياريتها علمتني حاجه التدليع الي دلعتني ياه حاسه انوا جابلي نتائج سلبيه جدا وللاسف الشديد دحين ماما مررره مررره تعبانه وانا مررره خايفه عليها وقريب لازم لازم تعمل عمليه ودا شي دمرني اكثر واكثر وخلاني ابكي ليل ونهار حتستغرب اني طب ليش ما حطيت حكاية مرض امي في الرساله حقولك وكتوا ما كانت الحكايه جديه كانت نفس الاوجاع الي من زمان زمان كانت توجعها فقلت انها مو مره بس طلعت الحكايه كبيره ولازم لها عمليه

    5-للاسف الشديد صح كلامك بالميلي ودا الكلام كنت دايما اقوله لاختي وامي واخويه عشان يحاولوا يحلولي مشكلتي بس كلهم يقولولي معليش معليش ان شاء الله كله بسيط بس محد فاهمني وهو انوا انا كبرت وسرت زي البغله وماني عرفه اشغل فرن!!!! اندومي ما اعرف اسوي !! الي يردعني انثي اتعلم شي جديد هو انوا احس انوا فات الالوان وما حقدر اتعلم شي خلاص كبرت ودحين مافي فايده دحين اتعلم اي شي
    انتا بتفكر انو حكاية فات الاوان انوا عذر انا عشان ما اتعلم شي بس والله والله اني نفسي اتعلم فوق ما تتخيل بس انتا فكر بالعقل يقولك التعليم من الصغر كالنحت على الحجر دحين ازا حاولت اتعلم ايش الفايده خلاص كبرت غيري اتزجوا وخلفوا وشايلين بيت وانا لمن كنت صغيره كنت متامله في دا العمر انتا منتا عارف القهر الي عايشتوا كنت انتظر دا العمر بفارغ الصبر كنت اشوف اختي وهي في دا العمر وكنت اشوف البنات وهما في دا العمر في التلفزيون والواقع والانمي والكارتون كنت اقول انشاء الله لمن اوصل دا العمر حكون جميله وماهره في الطبخ والغسيل وحلوه وشعري طويل وحاخد ميه في النهايه وحسافر وادرس بره وحكون شخصيه بارزه ومتعلمه والكل نفسهم يكون زي وحكون شي …في النهايه… طلعت ولا شي وفوق كدا امي سارت مريضه ودا اكثر شي كنت خايفه انوا يحصل لمن اكبر وكنت يقينه شدة اليقين انوا حسوي وكنت متاكده ما اعطيت لنفسي مجال انوا ممكن ما يتحقق الي ابغا.وفي النهايه لازم اقولكم اللله يخليكم ازا تبغوا تردوا ما تقولولي اكله وشاربه واخذه من خيرات البلد ومن دا الكلام الفاضي ولا تقولوا دا الكلام من فراغ وانتوا ماانتوا عارفين شي عننا وانا ابدا ماني عنصريه (ارجوا ان تدعوا لامي بالشفاء)

  6. ابوالبتول
    14/06/2016 at 01:36

    اختي العزيزة لاشك ان الشعور بالاحباط اللي تعانين منه متاصل فيك ولايمكن ان ينفع معه حتى الطبيب الجراح ولا كل ادواته الجراحية لانك مع الاسف الشديد انت من جعلت من نفسك في هذي الحالة كيف ولماذا سوف اخبرك بالحقيقة الغايبة عنك تمام هل يعقل ان فتاة في 18سنة من العمر ولاتجيد الطهي او حتى اعداد كوب من القهوة اوالشاي ولاتعرف طريق المطبخ نهائيا العيب يقع على امك المحترمة في المقام الاول ليه ماتعلمك وتطلب منك مرافقتها في المطبخ وتحرص على تعليمك مثل هالامور الصغيرة وتجعل منك فتاة يجيها اليوم وتتزوج وتذهب لعش الزوجية مع زوجها وتكون مسوولة عن زوجها وبيتها واولاد المستقبل فمن يرضى بالزواج من واحدة مثلك لاتجيد الطبخ اوحتى اعداد فنجان من القهوة اوالشاي هل هذا يعقل ونحن في هذالعصر الحديث اللي متوفرة فيه كل اساليب التعليم من مدراس اوكتب اونت وخلافه انت بدل ماتقضي وقتك الكبيرعلى النت وخلف شاشة الكمبيوتر في اللهو والتسلية والكلام الفارغ اوالمحادثات مع الشباب الضائعين والمنحرفين كان الافضل انك تقضيه لكي تتعلمي امور دينك ودنياك وحياتك وتستفيدي منه في مايعود عليك بالفائدة العظيمة والنفع الكبير من اكمال دراستك من خلال النت او تعلم الطباخة اوالخياطة اوفن الرسم اوالكوافيرة او عمل الاشغال اليدوية فانت مازالت شابة في عزشبابك وبكامل عافيتك ولاعذر لك في الكسل والخمول وعيشة اللامبالة اللي انت عليها حرام حياتك تضيع هباء منبثا دون فائدة حتى لنفسك وتلقين باللوم على الاخرين اوالانظمة الموجودة في البلد التي تعيشين في خيرها وامنهاانت واهلك طوال تلك السنين فالانسان العاجز مثلك هومن يقول كلهذا الهراء والكلام الفارغ المعتوه اللي مايصدر الامن شخص مثلك لاقيمة له في هالمجتمع ياكل ويشرب وينام ويلبس ويتفرج ويلهوويعبث كانه مثل الحيوان بل احيانا الحيوان انفع منه وخير منه هذي هي الحقيقة حتى لو كانت مرة يجب عليك تحملها وفيك تغييرن من نفسك وتطوري حالك للافضل والاحسن فكل الفرص لاتزال موجودة امامك لاتضيعها من يدك فتلاقي كل الندم والحسرة طوال العمر اتركي عنك اللهو والدلع وحياة الترف اللي انت فيها واجعلي لك طموح وهدف تريدين الوصول اليه وتحقيقه وهذا لاياتي وانت على هالحال ابدا لازم تجدي وتجتهدي في الوصول الى طموحك في هالحياة لكل مجتهد نصيب ومانيل المطالب بالتمنى لكن بالاصراروالارادةوالعزيمة والتوكل على الله والاعتماد على النفس والسعي للعمل تكوني حققت كل ماتتمني الوصول اليه وتسعدي نفسك اولا واهلك والاخرين وتكوني عضوة نافعة لمجتمعك الاسري والكل يشيد ويفخر بك ويتمنى ان يكون مثلك ادخلي جامعة اهلية وهي ليست حكرا للسعوديين بل فيها الكثرمن الاجانب ورسومها مخفضة وليست بمرتفعة الثمن او تدخلي معهد تتعلمي فيه لغات اجنبية كاللغة الانجليزية اوالفرنسية وغيرها او تدخلي معهد لتعلم فنون الخياطة اوالرسم اوفن الكوافيروالتجميل وكلها 6شهور وتحصلي على شهادة منهم وتكوني قادرة على العمل في نفس التخصص اللي درستيه ومستقبله الوظيفي مضمون ومربح لك ولمثل ظروفك الاجتماعية اعرف واحدة تخرجت من معهد للكوافيرة والتزين وصارعندها صالون خاص بها تربح منه عشرات الالوف من الريالات واصبحت ثرية وهي فتاة في مثل عمرك ولكنها استطاعت النجاح والتفوق واصبحت تعول وتصرف على اسرة كبيرة من اهلها وتتحمل كل طلباتهم حتى جاءها ناس يرغبون الزواج منها وكانت ترفض الزواج في البداية حتى وافقت على الزواج من شاب من اسرة عريقة وغنية استطاع ان يطور من موهبتها وتعليمها وصارعندها اكثر من مركز للكوافيرة والتجميل وتحت اشرافها ورعايتها هكذا يكون النجاح والتفوق يااختى اتمنى انك تحذي حذوها وتصير مثلها بل ربما احسن منها بمراحل متى ماوجدت عندك الاصراروالعزيمةوالارادة والتحدي والتوفيق بيدالله عزوجل عذرا على الاطالة وارجوا لك دوام التوفيق والنجاح في حياتك ونسمع عنك الاخبار السارة نشاءالله

اترك رداً أو حلاً لهذه المشكلة