حبيبى سابنى وبحاول اكلمه بيشتمنى و يزعقلي

انا بنت عندى 20 سنه و موجوده فى 2 كليه من 3سنين بالظبط اتقدملى واحد و اهلى كانوا موافقين على زواجي منه و انا كنت موافقه لانى اصلا مليش تجارب قبل كدا و كنت دايما مقتنعه ان ابن الحلال الى هيراعى ربنا فيا هيجيلى من بيت اهلى كنت بشوف بنات حواليا و احنا فى ثانوى يتكلموا مع ولاد و يخرجوا بس دايما كنت مقتنعه ان دا غلط جدااا و ان الحمدلله ربنا حفظنى و محولتش اعمل زيهم ابدا لحد ما جالى الشخص دا و انا فى ثانوى فرحت جداا و اتفقوا على قرى الفاتحه و كله بعدها بفتره عرفت ان الشخص دا بيكلم بنت تانيه و بيخرج معاها و انه قلها اكتر من مره انه بيحبها و انه عايز يسبنى مصدقتش الكلام دا خالص و رحت سالته قلى انه مريض بالقلب و حرام يظلمنى معاه و انه عايز يبعد موافقتش و قلتله لا انا هكون جنبك بعدها بفتره عرفت من والدته انه كويس و مش مريض و من وقتها عرفت انه كان بيكذب عليا و سبنى فضلت فتره تعبانه جدااا و اتحجزت فى المستشفى و مكنتش عارفه هو انا كنت صح لما مرضتش اعمل زى صحابى و استنى الحلال ولا انا صح طب لو انا صح ازاى يحصل فيا كدا و اتوجع كدا .. من بعدها جت صحبتى و ابن خالى وقفوا جنبى و ساعدونى اكون كويسه و قربت لربنا اكتر و قلت لعله خير و الحمدلله و كملت حياتى و لما كنت بشوفه تانى كان قلبى بيوجعنى بس كنت بمسك نفسى و بكمل لحد ما دخلت الكليه و من هنا عالم تانى ليا لانى مش متعوده اتعامل مع ناس ولا ولاد انطوائيه شويه
قبلنى ولد فى الكليه كنا بنعمل مشروع سوا جروب كلنا
الولد دا قرب منى بطريقه سريعه اوووى
كل شويه يبعتلى على الففيس و لو نزلت الكليه يجى يدينى اى ورق تبع المشروع و انا لاحظت قربه منى .. قررت ان دا غلط و مينفعش و قلتله انى مش مرتاحه و مش بحب حد يكلمنى و انى مش متعوده اتكلم مع ولاد .. مع العلم انى كنت حاسه انى بحبه و كنت بستنى اشوفه بس كنت خايفه اتوجع و يسبنى كنت خايفه اووووى . لما قلتله انى مش حابه انه يكلمنى و مش عجبنى الحال دا و كدا ممكن نعمل حاجه غلط لاقيته قلى انا بحبك و عيزك تستنيى .. قلتله مقدرش اققلك هستناك انا بنت و معرفش بكره فى ايه و كمان اققلك هستناك من ورا اهلى مقدرش اعمل كدا و لو سمحت متكلمنيش تانى .. روحت لابن خالى و صحبتى و نصحونى انى ابعد و كنت عارفه ان ابن خالى حاسس حاجه نحيتى بس انا بعتبره زى اخويا و لانه دكتور فوقف جنبى وقت تعبى كتير .. مع الوقت رجع تانى كلمنى و بدا يطلب منى اطلع ابن خالى من حياتى و انه بيحبنى و بيغير عليا و انى انا كمان باين عليا حبى ليه و كلامه كان صح لان حبى ليه كان باين فى عينى جداا .. حكتله على الى حصل معايا فى ثانوى و قلتله انى غصب عنى بخاف و ممكن اظلمه بخوفى دا و محدش بيقدر يستحمل يعيش مع حد بيخاف بطريقتى دى و هيتعب جدا معايا عشان يحسسنى بالاطمئنان .. قلى انا بحبك و هفضل جنبك و عمرى ما هسيبك بقيت بكلمه على الفيس و طبعا اهلى ميعرفوش و بنتكلم اصدقاء بس كان ممكن كلامه يقول فيه بحبك و هكذا .. حسيت انى كدا بغضب ربنا و اضيقت من نفسى و قفلت اكونت الفيس خالص و روحت حكيت لماما و اعتذرتلها زعلت منى فتره طويله و بعدها قالتلى راعى ربنا فى تصرفاتك عشان ربنا يراعيكى .. جالى فى الكليه و قلى انتى بتبعدى عنى ليه انا بحبك و مقدرش ابعد عنك و فضل فتره يتحايل عليا اكون معاه بس انا كنت برفض و شفنى و انا بعيط و بقله لا و قلتله ان دا غصب عنى مش هقدر اعمل حاجه غلط .. قلى مش هنعمل حاجه غلط و الحب مش حرام و انا هاجى اققابل مامتك بس مش دلوقتى و اوعدينى تستنيى قلتله مقدرش اوعدك و قلتله نصلى و ندعى ربناا .. بعدها بفتره مجاش الامتحان و سقط و مبقاش يجى الكليه سالت عنه صحابه قالولى انه فيه مشاكل عنده فى البيت فتحت الفيس بعتله اطمن عليه زعقلى و قلى انتى مش سبتينى عايزه ايه منى و فضل يزعق فيا جامد ولانى بحبه قلتله حقك عليا متزعلش منى و كل حاجه هتتغير و هكون جنبك و مش هسيبك لحد ما رجعنا نتكلم من ورا اهلى تانى بس قلبى كان بيحركنى كل تفكيرى انى بحبه عدينا الترم الاول و جه الترم التانى بدا يطلب منى مكلمش صحابى و مكلمش ابن خالى و مكلمش اقاريبى الولاد و انه بيغير عليا و بقا بيتحكم فى لبسى رغم ان لبسى كله محترم بس بردوا بقا بيرفض انى البسه فى الاول مكنتش بنفذ كلامه كنت بقله اقنعنى بيه عشان اعمله لكن مينفعش اعمل حاجه من غير ما تقنعنى يعنى لو لبسى مش محترم قلى و هنفذ كلامك يقلى لالالالالالا انتى لبسك محترم و انتى عارفه كدا .. طب معترض عليه ليه يقلى لا عيزك تتنقبى فعشان تعملى الخطوه دى لازم تعدلى لبسك الاول من هنا لهنا فضلت ارفض لحد ما زعقلى جامد و قلى انه زعلان منى و عشان مزعلهوش نفذت كلامه كله و بعد ما نفذته جه قلى انتى نفذتيه بعد ايه بعد ما قعدت اتحايل عليكى و حصل مشكله و اتصلحنا .. و يوم عيد ميلادى او غير عيد ميلادى دايما يعملى مفاجات تفرحنى اووى وقتها عرفت معنى دموع الفرحه كل مره يعمل حاجه تفرحنى ممكن تكون بسيطه بس كنت بفرح بيها جدااا
رجعنا تانى و قلتله ان حالنا كدا مش عجبنى و لازم نبعد عن بعض بس هستناه نطمن على بعض من بعيد لكن بلاش كلامنا الكتير و ربنل هيجزينا خير
طلب منى انه يكلم والدتى و انا ظروف بيتى كان فيها مشاكل مع خطيب اختى فمكنش ينفع افتح موضوع و فيه موضوع فى البيت فيه مشاكل و قلتله هفتح مع اهلى الموضوع اول ما المشكله الى فى البيت تتحل و اقتنعنا بكدا قعدنا اسبوع منكلمش بعض بس بنطمن على بعض من الفيس لو هو حط حاجه اطمن و هكذا و هو قلى اننا نصلى ركعتين بليل ندعى اننا نكون من نصيب بعض و قلى اننا نقرا كل يوم ايه فى القران نشجع بعض بيها و انبسط جدا بكدا ..و قعدنا فتره منتكلمش لحد ما لاقيته فجااه بعتلى يقلى انتى وحشتينى و شكلى مش فارق معاكى و مش بتسالى فيا و كلام كدا اضيقت اووى لما قلى كدا زعقت معاه قلتله انت عارف انا حاسه ايه و عارف محتجاك قد ايه و انت بتفكر فيا وحش عشان بعدنا كام يوم جى تقلى كدا اومال لو بعدنا شهر هتقلى انى مش بحبك و زعلنا سوا انا و هو بعدها محضرش تانى امتحان ليه و سقط .. روحت فضلت اتحايل عليه انه يحضر امتحاناته و عيط كتير و انا بتحايل عليه و مرضاش رجعت البيت طلبت من ابن خالى يعمله شهاده مرضى عشان نقدمها للكليه و يحضر الامتحان تانى و بعد ما عملتها روحت ادهاله مرضاش يخدها رحت للدر بتاع الماده و قلتله انه مريض و انه معاه شهاده مرضى و الدر حدد معاد تانى للامتحان و بردوا مرحش.. كنت حاسه ان قلبى بيتقطع و موجوع و عايزه اعمل اى حاجه ترضيه جبت رقمه من الفيس و اتصلت بيه ولاول مره اكلمه فى الموب فضلت اتحايل عليه كتير يحضر و قلتله انا بحبك و متاذنيش فيك و اتحيلت عليه كتير و طبعا كان فات المعاد التانى الى الدر حدده فكدا دى ماده ضاعت هى كمان
و رجعنا سوا تانى بس طول الوقت لو انا زعلته يقلى فاكره يوم كذا عملتى كذا و يفتحكل حاجه قديمه بنا و يزعقلى و ارجع اصلحه و حرام اوقات اكتر لما كان بيزعقلى جامد كان يرجع يقلى انا اسف انا كبرت الموضوع و حقك عليا و يصلحنى و كنت بتصالح على طول مكنتش حتى بعاتبه عشان ميزعلش من نفسه اكتر .. طلب منى ابعتله مسج على الموب فيها كلام حب و هكذا انا قلتله انى مش متعوده على كدا و انى من صغرى حاطه فى دماغى ان دا لجوزى بس او خطيبى لكن وضعنا دا مكنتش متخيلاه اصلا فمش متعوده بس واحده واحده هبعتلك و بعدين انت حبيبى المفروض تفرح بيا انى سايبه الحاجات دى ليك انت وبس عشان طعمها هيبقى احلى وافقنى كام يوم و رجع تانى يتعارك معايا انه محتاج حاجات منى و مش لاقيها و انه عيزنى ابعتله مسج و عايز صورتى و كنت برفض و بحس ان دا غلط و قلتله دا غلط اوووى و مع ذلك كان بيفتح كل الحاجات القديمه و يقلى انتى زعلتينى يوم امتحان كذا و سبتينى يوم امتحان كذا و سقط و حسيت بالنب انه بيقلى انى انا السبب فى كل الى بيحصله بس كلمته و فهمته ان الى بيحبوا بعض مينفعش كل ما تحصل مشكله يفتح القديم و انا غصب عنى كانت ظروف بيتى صعبه بابا ساب الشغل و كان تعبان و كنت متاثره بكدا اوى و حكتله انه يعذرنى و يستحملنى شويه .. استحملنى و يعد فتره رجع يقلى انا استحملتك و انتى بهدلتينى و دوستى عليا و ضيعتى مستقبلى و ولعتى فيا و كلام انا والله ما اعرف ازاى بيقلى كدا .. مع الوقت لاقيته بيقلى بشرب انا بشرب سجاير و بدا اسلوبه اتحول و فضلت اكلمه انه مينفعش كدا و نصحته بطريقه كويسه عشان لو زعقت معاه هيضايق منى فمكنتش بحاول اتكلم بطريقه تضايقه و فى نفس الوقت دا ابن خالى اتقدملى و اهلى وفقوا مبدائيا عليه و انا مكنتش عارفه اققول لحبيبى لحد ما جه وقت كويس و احنا بنتكلم قلتله انى محتجاله و حكتله زعق معايا جامد و بهدل الدنيا و بعدها قلى انا غيران عليكى و زعقلى روحت لماما و حكتلها عنه و ماما فتحت الموضوع مع بابا و قالوا طول ما انا عيزاه يبقى يوافقوا عليه و نهوا موضوع ابن خالى و استنوا انه يكلمهم روحتله و قلتله انى حكتلهم و انهم وافقوا هو انبسط و انا كنت مبسوطه بعدها رجع تانى يشرب سجاير فهمته ان دا غلط و ان صحتك ربنا هيحسبك عليها فضل يقول كلام غلط كتير و يقول ربنا مش موجود استغفر الله العظيم و كلام كتير جبت كتب للتفسير و القران و قعدت اققراها و اتصلت بيه افهمه و كنت كل ما اكلمه يزعقلى جامد و يقلى انتى مش فاهمه حاجه و يعقلى الفتره دى نفسيتى تعبت جداااا و طبعا اهلى مستنين انه يكلمهم و هو كل ما اكلمه يقلى مش مستعجل مش فارق اساله طب عيزنى ولا مش عيزنى يقلى مش عارف و فضلنا فتره كدا وتعبى بيزيد لحد ما اتصلت بيه و قلتله عايزه اشوفك و فعلا نزلت قابلته و جبتله هديه و رحتله و كان طبيعى جدا معايا و مسك ايدى لاول مره تحصل معايا و قلى انه بيحبنى و انه غصب عنه الى بيحصله دا هو مشوش و مش فاهم حاجه و قضينا اليوم و رجعت حكيت لماما و لاختى
تانى يوم بالظيط لاقيته بيكلمنى يقلى انا بحبك و موجوع منك و مش هقدر اكمل معاكى اساله عملت ايه يقلى فاكره زمان لما كنت بطلب منكمكون قريبن و كنتى بترفضى فاكره لما قفلتى الفيس و قلقتينى و فضل يجيب حاجات من حوالى سنه فاتت و يحاسبنى عليها و انا اصلا مش فاكره و مش فاكره الحاجات الى هو عملها مزعلانى نسيت كله لما كنت بزعل منه مكنتش بحاسبه لو صالحنى يبقى خلاص الحاجه فاتت و اتحيلت عليه ميسبنش قلى ما زمان كنت بتحايل عليكى انك تستنينى و كنتى بتفولى لالا قلتله عشان مقدرش اوعدك و بردوا سبنى فتره بتحايل عليه لحد ما رجع كلمنى و صالحنى و قلى انه بطل السجاير و انه بيحبنى و مش هيزعلنى تانى بعدها ب 3 ايام رجع يقلى انه رجع يشرب سجاير و بيشرب خمرا و بقا بيقولى كلام وحش فى الموب و يشتمنى و يقفل فى وشى و كنت تانى يوم برجع اكلمه يقلى انا مش فاكر ايه حصل امبارح ارجع اساعده يبطل و و كان بيرفض لحد ما خلصنا امتحانات و سقط فى ماده 3 رجع قلى انا مش عيزك و انتى السبب فى كل اجه و سبنى و بقالى 3 شهور بحاول اكلمه بيشتمنى و يزعقلى لحد ما نفسيا ادمرت و مبقتش عارفه انا فعلا السبب فى الى هو فييه ولا ايه
وكان بيفرحنى ليه زمان و دلوقتى انا مش فارقه معاه
طب انا ظلمته و وجعته فعلا انى مرضتش اكون معاه فى الاول
عايزه مساعدتكم و اسفه انى طولت عليكم بس انا ولا عارفه انساه ولا عارفه انا فعلا وجعاه ولا لا ولا عارفه اى حاجه

مشاكل وحلول ذات صلة

• حبيتها واتقدمتلها واهلها وافقوا وهي لا
• اعمل ايه عشان اخلى حبيبى يقنع اهله
• صاحبتى تعبت من تانيب الضمير
• خيبة بعد الزواج واشمئزاز من زوجي
• عاوزة ربنا يباركلنا و نتجوز كده اكون غلطانة
• بعد حب اربع سنين سابتنى
• بنت خالة خطيبي دمرت حياتي