كنت بحب شخص جدا كان زميلى فى الكلية حب طاهر كان مستغرب اوى ان تكون فى واحدة حاسة بية اوى كدا ومريحاة فكان بيحبنى اوى وانا كمان لكن فرق السن كان مشكلة لان لسة قدامة الجيش ويكون نفسة اتفقنا انة مينفعش نكون لبعض بكل احترام واتفق معايا اننا نكون اصدقاء بعد مخلصنا كلية نطمن على بعض فقط ولكن كيف للأحبة يصبحوا اصدقاء فقررت نسيانة رغم الصعوبة فى ذلك عليا ولكن هو لم يقدر واراد كثير ان يكلمنى لكى يطمئن فقط وانة مش قادر ينسانى بس مش عايز يظلمنى معاة وكنت بحاول اهرب حتى لا اتعب وتقدملى كتير عريسان لكن موافقتش على احد خالص لان انا مش قادرة افكر فى احد غيرة وهو الان خلص الجيش وبيكون نفسة فأتصل بى وطلب منى انتظارة فقط سنة ويتقدملى لخطبتى ليكون كون نفسة ولانة مش قادر ينسانى وعلما انة رجل بكل ما تحملة الكلمة فماذا افعل ولكن انا خايفة لان عندى 24 سنة مش صغيرة على الانتظار اكثر ولا اعرف ماذا تحملة الايام لى ان انتظرت ارجوكم افيدونى برأيكم
الحب وفارق السن
احب شخص جدا وفرق السن مشكلة
اضيف بتاريخ: Tuesday, January 11th, 2011 في 22:30
كلمات مشاكل وحلول: الحب, فرق السن, مشاكل الحب
شوفي يااختي قال الرسول الكريم – من اتاكم من ترضون دينه وخلقه وامانته فزوجوه الا تفعلوا تكن في الارض فتنة وفساد كبير – ومن شروط الزواج ان يكون الرجل على دين وخلق ومقدرة على تحمل اعباء الحياة الزوجية بغض النظر عن العمر والفوارق الاجتماعية فالرسول تزوج من السيدة خديجة رضى الله عنها وهي اكبرمنه ارى انك تصلي صلاة استخارة وتنتظري الشاب حتى يتقدم لك وتحاولي اقناع اهلك بالقبول به زوجا لك والله يجعلكم من نصيب بعض ويتمم لكم بالخير نشاالله في هذة الحياة
يا بنتى احمدى ربنا لانه سبتلك انه بيحبك انسى فرق السن البنكم ال مهم انه بيحبك استنيه زى منتى استنيتى استنى دى سنة وحدة امال ال استنى اكثر من خمس سنين يعمل ايه
وحياة ربنا يبنتى انا مش عاوزة اعقدك بس انا مشكلتى اخت مشكلتك بالضبط وبردو كان زميلى فى الكلية وبردو بيكون نفسو هى هى واستنيت حوالى سنة بردو او 10 شهور تقريبا بس بعدها جة قالى اهلى رفضو الموضوع خالص ولابد وانا لاسف بردو عملت زيك قولتو نفضل صوحاب بس دة غلط لانى كدة بضيع فى عمرى انتى لو خايفة على نفسك ومش عاوزة يحصلك ال حصلى وقلبك يكسر وعمرك يضيع زيى قولى لة اخطبنى بدبلة وممكن نتخطب 2سنة او 3 سنين حتى بس لازم اى خطوة رسمية بلاش تعملى زيى وتخيبى خبتى رغم انى لحد دلوقتى بردو رغم اننا بعدنا بس بضعف لاسف وبنتكلم نطمن على بعض فوقى لنفسك انتى بتكبرى بجد سورى على الاطالة
بصى انسى حكايه السن دى خالص هو اكبر انتى اكبر مش مشكله لو انتى حاسه انه لما يتقدم دلوقتى ممكن اهلك يوافقو عليه خليه يتقدم يخطبك كام سنه ويحدد حيتجوز امتى ولو حاسه ان اهلك مش حيوافقو استنيه سنه مفيش مشكله لكن ممكن بعد السنه ماتعدى يرجع يقولك استنينى سنه تانيه ساعتها تخيريه اما يتقدم او تنسيه واول ما تتخطبى لواحد تانى بيحبك انتى كمان حتحبيه وحتقدرى تنسى بس تكونى عملتى اللى عليكى عشان متحسيش انك ظلمتيه ولا ظلمتى نفسك ربنا يرشدك للخير يارب
يعنى بترفضى عرسان بقالك ترليون سنه وجت على سنه يعنى !!؟
بس الاهم قبل ما تستنى سنه لازم تعرفى من اهلك انهم ممكن يقبلوا حد فارق عنك فى السن ولا لأ
عشان لما ييجى يتقدم ويترفض مش تدعى علينا احنا 😀
وان شاء الله ربنا يقدملك اللى فيه الخير
بس عليكى وعلى الأستخاره لأنها حلنا الوحيد فى كل المشاكل
وان شاء الله هتتجوزى حد كويس مهما كان سواء هو او غيره وتعيشى فى سعاده ويرزقك منه بالذرية الصالحه ان شاء الله
بسم الله الرحمن الرحيم
العلم عند الله اذا كان هذا هو زوجك ام لا ولن يستطيع انسان ان يقول لكى الحل استخيرى الله وبعدها اتركى الله يصرف الامور كيفما يريد. لان لا يعلم الغيب الا الله
بس السن مش هو المشكلة المشكلة فية هو لو حقيقى بيحبك يتقدم ليكى رسمى دلوقتى مش بعد سنة و بعدين سدقيننى ربنا هيرزقة عشانك انا عن نفسى خطبت و انا طالب محلتيش اى حاجة بعدين ربنا رزقنى بالعمل و المال دا بفضل استحمال مراتى معايا كنت بتعب عشانها و عشان كدة ربنا مخزلنيش و كرمنى عشان بقى فى انسانة مسؤلة منى مش استنينى سنة لا لالالالالا يتقدم و تستحملية العمر كلة مش سنة بس مدام دا اختيارك طبعا كل اللى قولتة يعتمد على مدى تفهم اهللك لهذا الوضع والله الموفق
على العموم انتى بتحبيه وهو بيحبك والسن مش مشكلة والرسول (ص)تزوج من السيدة خديجة وهى تزيد عنة بحوالى 15 عام
امال انا اعمل اه اللى بحب واحده اكبر منى ب9سنين وهى بتموت فيا
بصي هو فرق السن مش مشكله انتي بتحبية وهو بيحبك مافيش مشكله انتي عندك استعداد
تستنية استنية وانتي 24 سنة مش كبيرة لسة في بنات عدو ال30 متجوزش
سنه مش كتير ان شاء الله هتعدي
سبيها علي ربنا اهم شئ استغفري وصلي واستخيري
ان شاء الله ربنا يكرمك
لوبتحبية بجد مش كنتي هتتردي لان سنك مش كبير ومافيهاش حاجة لو استنيتي سنة عادي
انا بشكركم على الردود بس لازم اصلح حاجة انا اكبر منة ب 8شهور وهو قال لى علشان مظلمكيش لو حد كويس اتقدملك وكويس اوى ومواصفاتة تستهلك وافقى لانى مش ضامن الايام والظروف بتخبى اية لو لاء محدش جالك كدا استنيى وانا هجيلك بعد السنة دى على طول علشان اكون قد كلمتى اية رأيكم انا محتارة انا بحبة وخايفة من الايام
بصى لو واثقة منة استنية بس ممكن تعملوا حاجة تكلمى مامتك وتعرفيها الموضوع وتخلية يكلم مامتك ويحكلها ظروفة لو وافق يبقى شاريكى وبيحبك وطبعا صلى الاول استخارة وشوفى ربنا هيعمل اية عشان مضيعيش سنة من عمرك والاخر تصدمى لو اثقة اوى استنى على بركة اللة
انا برضة زيك ولسه في سنة 3 بس انا شايفة انك تستنيه عشان بتحبيه و مش هتقدري تكوني لحد تاني و خاصة انها سنة هانت يعني و ممكن تكلمي مامتك عنه عشان تعرف ظروفه لما يجي يتقدم و هو كمان يعرف اهله وكمان تصلي استخارة و ربنا يكرمك ويسعدك يا رب
٢٤ سنة مش كبيرة كتير انت مازلت صغيرة … المشكلة ليست في السن و إنما هل انت متآكدة من انه سيخطبك ام لا ؟ هل يحبك فعلا ؟ فإذا كنتي متآكدة فعلى بركة الله استنيه عام ما يضرش او على الاقل يتقدم على يعني يبين إنو رايدك مش كلام بس حتى لو كانت فيه ملاحظات من اهلك اهو بيٌن إنو شاريكي
هو انتى مستعجله ليه بيحبك وبتحبيه لو مية سنه هو فى غيرو جاهز وبتقولى عمرك 24 فى بنات عدو التلاتين ومستنين اقبلى واستنى لانه بيحبك وبلاش استعجال الامور وربنا معاكى
انا زيك على فكرة بس لسه للاسف ف اول الطريق لاننا لسه زملاء ف سنة تانية وبردو مش عارفة اعمل ايه
بس انا من رأيي يعني انك بجد صعب تنسيه وخصوصا انه راجل زي ما بتقولي .. علشان الرجالة بجد نادرين اوي اليومين دول وطالما بتقولي فاضله سنة واحدة استنيهاوخلاص ..
والاحسن من دة كله انك تصلي صلاة استخارة وقولي يارب يقدملك اللي فيه الخير سواء هو او غيره ..
انا اسفة فى عنوان المشكلة هو اكبر مني بشهور مش بشهر بحوالى 8شهور