مشاكل الحب والزواج

عاوزة تتجوزني وانا مش عارف اختار

السلام عليكم
– كمقدمة
انا واحد مليش في موضوع البنات ده ولا بفكر اني احب واحدة الا في الحلال فقط ان شاء الله يعني كل مشاعري تكون لصاحبة النصيب اللي هتجوزها بس اما بنات الناس فلا يليق اني العب بمشاعرهم ولا حتى بدي فرصة لاي واحدة قريبة او بعيدة ان تفكيرها يروح لبعيد .ومبكلمش اي بنات لاني عارف ان ده حرام الا للحاجة او الضرورة وكل تفكيري في شغلي والماجستير اللي بحضره وعاوز اسافر علشان احسن ظروفي المادية

حتى اني كان ليه زميلة في الشغل وبحكم العمل كنا انا وهي متواجدين كل يوم في نفس المكتب لاننا بنعمل في نفس المهنة ولا يوجد احد في المكان يعمل نفس عملنا .طبعا كنت حريص ان باب الغرفة يظل مفتوح دائما والا نجلس سويا على انفراد .وفي فترات كنت بحس انها عاوزة تقرب مني او معجبة بتصرفاتي وطريقة تعاملي مع الاخرين ومعالجتي للامور في العمل.وصراحة هي كانت من اسرة كبيرة وغنية واهلها لهم نفوذ ومكانة كبيرة في المجتمع. ولاني لا انوي الزواج الان فكنت باعاملها بحزم وجفاء الى حد ما علشان تبعد من دماغها هذا التفكير لو كان موجود.والموضوع انتهى لما ترقيت وانتقلت للعمل في مكان اخر وبعدها بكام شهر لما موظف قال لي في التليفون ان فلانة بتسلم عليك عملت نفسي مش واخد بالي.والموضوع انتهى

ومن فترة واحد انا بحترمه جدا عرض على والدي انه يجوز بنته لي وانه مستعد يوافق عليا لو تقدمت لبنته وهيرضى بظروفي مهما كانت بس انا لاني مكنتش مستعد نهائيا ولسه في اول الطريق فقلت لوالدي ينسى الموضوع وكأن مفيش كلام حصل بينهم والحمد لله الموضوع انتهى فورا وعلاقتي بالراجل ده كلها احترام لغاية دلوقتي
بعدها بسنة تقريبا واحدة معرفة والدتي جات لها البيت وقعدت معاها وقالت لها انها تتمنى اني اتقدم لبنتها وانهم هيوافقوا عليا وان بنتها متعرفش حاجة عن الموضوع وان الام هي اللي بتعرض العرض ده من نفسها .وايضا لاني مش جاهز قلت لوالدتي ” لأ ” ووالدتي ردت عليها والموضوع انتهى.

طبعا انا نسيت هذه المواقف والحمد لله مسابتش فيا اثر كبير

لكن منذ فترة قصيرة لقيت واحد صاحبي بيكلمني في التليفون وبيقولي ان فيه عروسة مناسبة لي تماما . فقلت له اني دلوقتي مش جاهز 100 % واني عاوز اسافر ، وحتى رفضت انه يقول لي على اسمها علشان مش انشغل بالموضوع ده .وقفلت معاه ورحت اكلم والدتي واختي وانا بهزر معاهم ان صاحبي جايب لي عروسة وهما يقولولي ان زوجة صاحبي ده كلمتهم على عروسة فعلا وخدنا الموضوع بهزار
– وبعدين
اللي غير بقى الموضوع وخلاني بكتب المشكلة دلوقتي إيييييه ؟
ان صاحبي ده بعد يومين لقيته بيتصل بي تاني وبيكلمني في نفس الموضوع .فرديت عليه بنفس الرد وقلبت الموضوع هزار وقلت له انه ممكن يكلم حد من صحابنا اللي لسه متجوزوش يمكن حد يوافق ويمشي في الموضوع ده .
وكانت المفاجأة !!!
قال لي يابني هيا عاوزاك بالاسم … هيا طالباك بالاسم

طبعا انا اتفاجأت وبقيت مش عارف اعمل ايه
لاني لا احب ابدا اني اكسر قلب اي بنت من بنات المسلمين ولا اني اشغل تفكيرها وقلبها يتعلق بي على الفاضي
وفي نفس الوقت فرحت وكنت طاير من الفرحة ان فيه واحدة بتحبني انا بالذات .ودي اول مرة اتعرض للشعور ده لان حياتي ليس فيها مثل هذه الامور
والصراحة انا كان جه في بالي خواطر في الماضي ان لو واحدة محترمة ملتزمة طلبت مني الجواز فانا لازم اتقدم لها واعفها واشيلها في عيوني واقدرها لان الدين لا يمنع هذا ما دام يتم بلا مخالفات شرعية كما اني قرأت قصص عن علماء وصالحين عملوا كده وكنت معجب بموقفهم جدا
ولما حصل اللي كان في بالي لقيت نفسي فرحان ورافض في نفس الوقت

انا قلت لصاحبي اني مش جاهز دلوقتي واني عاوز اسافر والارتباط دلوقتي هيعطل خططي للسفر وتكوين نفسي

أنا حبيت افضفض واكتب المشكلة
لاني حاسس بفرحة كبيرة من ساعتها
وبقول لنفسي اشتري اللي شارياك وانتهز الفرصة الرائعة دي
ولا تكسر قلب رقيق ليس له ذنب الا انه تعلق بك بدون ارتكاب اي حرمات
ولا تشمت فيها من عرفوا هذا الموضوع خاصة ان ظروفك ممكن تكون مقبولة الى حد ما
وان لما تكون البنت شارياك كل المسائل التانية تهون وكفاية انك تسعدها وتفرحها ولا تخيب ظنها

بس في نفس الوقت انا راسم خطة لتحسين ظروفي المادية وباسعى للسفر للخارج لان ظروفي المادية متواضعة
كمان انا مش عاوز اتدبس في موضوع لمجرد الشفقة
وانا لا اتحمل اي مسؤولية في تعلق هذه الفتاة بي لاني حتى لا اعرف اسمها ولم اعطها هي او غيرها اي وعود
وكمان ممكن لو تقدمت الاقي كلام تاني غير اللي انا رايح عليه والاقي طلبات تفوق قدراتي وساعتها هكون احرجت نفسي وهقول ياريتني خليتني في حالي وركزت في مستقبلي احسن .

مشاكل وحلول ذات صلة

اضيف بتاريخ: Thursday, January 12th, 2012 في 00:11

كلمات مشاكل وحلول: , ,

4 رد to “عاوزة تتجوزني وانا مش عارف اختار”

  1. الفهدالاسود
    15/03/2016 at 11:39

    اسمحللي اقولك انك شخص بلااحساس وبلامشاعر وعمرك ماتحب ولاهتعرف طريق الحب لوفضلت على الحالة دية انت شاب وموظف والمستقبل طويل قدامك ليه ماتفكرش في الحلال بدل من ان تقع في طريق المحرمات والمعاصي والفتن وليه تحكم على كل البنات انهم مش كويسين او وحشيين في بنات محترمات وشريفات يريدن العفاف والستر والزواج بابن الحلال فلماذا لاتبحث عنهن وتظفر بواحدة منهن تلاقي معها كل الخيروالرضاوالسعادةوراحةالبال والاستقرار في حياتك صدقني مثلما الزواج سترة للبنات ايضا هوسترة للشباب في هذالزمن الاغبر اللي حنافيها توكل على الله يارجل وتزوج واسمع كلام الناس اللي يحبوك ويريدون مصلحتك والخيرلك مافيش احلى ولااجمل من الزواج عندما تخش بيتك وتلاقي زوجتك تستقبلك بالاحضان والقبلات الحارة وتغيرلك ملابسك وتجهزلك الاكل وتجلس قدامك على السفرة وتفتح نفسك للاكل وتناولك كوب الشاي اوالقهوة وانت جالس على النت اوالتلفاز وتاخذهافي حضنك اوتداعبها اوتلعب معها وتقضي معها حاجتك الجنسية وتطفي نارشهوتك فيها وتحس باللذةوالمتعة معها وانتما تحت دش الحمام في البانيو احلى لحظات واجمل منها مافيش يااستاد ولاعاجبتك حياة العزوبية والضياع والسهروالسرمحة والبهدلة اللي انت فيها اتمنى انك تعي كلامي وتنفذه لانني كنت مثلك وجربت كلهذا ومريت به وحاسس بكل ماتعاني منه ومااستريحت الا بعد الزواج عرفت طعم السعادة والاستقرار وراحةالبال في حياتي اتمنى ان يحالفك انت الحظ وتبقي في احسن حال نشاءالله

  2. خوخة
    20/02/2012 at 21:43

    صلي كتييييييييير صلاة الاستخارة..لو كانت هي صاحبت النصيب يبقى توكل على الله… و حياتك الزوجية و الشخصية و سعادتك بعد الزواج اهم بكتير من الجانب المادي…… ربناا يسهل لك امورك

  3. حسين
    16/01/2012 at 10:00

    انا شاب زيك بس متجوز حاليا وكنت زيك كدة بالظبط فى موضوع الارتباط دة وهو انى مش هرتبط بأى واحدة الا اللى هتكون من نصيبى واتعرضت كتير لموضوع الترشيحات وانا حاسس برغبتك ان مرغوب من واحدة معينة لكن نصيحتى ليك كل حوارت ترشيح عروسة معينة من اصحابك واقاربك دايما مفروشة بالورود واقسم بالله الواحد كان بسمع اشعار فى اخلاق وجمال فلانة وعلانة ويتقدم وبعدها تلاقى حاجة تانية خالص…

    المهم فكك من انها عاوزاك وانا عارف ان دى حاجة تفرح بس هى مش عاوزاك لانها دايبة فيك وحباك هى نفسها تتجوز زى اى بنت خايفة تضيع منها فرصة ماتتعوضحش وانا احسبك كذلك.
    ماتتقدمش الا لو كنت مالى ايدك ماديا وكلة فى الاخر نصيب
    وركز جدا فى الاختيار واتحرى عنها كويس اوى حصوصا لو كانت مخطوبة فترة كبيرة ياعنى ارتبطت بخطيبها اوى وما حصلش نصيب(ودى حاجة ترجع لك) انا بقول كدة لانك ماعرفتش وبنات والحوارات دى فمن حقك تكون انت اول واحد فى حياة اللى هتتجوزها

  4. زيزو
    12/01/2012 at 07:30

    هيالبنات كلها عايزاك ولا ايه ياعم 😀
    بص انت تكلمها هي شخصيا وبعدين تتفق ع التفاصيل علشان انت خايف من الحرج او كدهـ
    طبعا هي افضل من غيرها طالما هي بتحبك .. واحسن حاجة انك تاخد اللي بتحبك
    وشوفها طبعا ولو عجبتك وكلوا تمام كلمها زي ماقلت لك وقلها التفاصيل وكدهـ
    وبالتتوفيق ليك ان شاء الله

    وممكن بردهـ تصلي صلاة استخارة ….

اترك رداً أو حلاً لهذه المشكلة