انا اتخطبت من سنة والمفروض انى هتجوز اخر شهر 11 انا خطيبى على قد حالة وهو اول ماتقدملى انا رضيت علية باى وضع بس اهلى كانو معترضين بس انا وقفت قدامهم بس خطيبى دة كان بيشرب سجاير وحشيش بس انا سامحتة على اساس انة يبطل عشان كمان هو وضع عيلتة مشتت لان كل واحد فيهم بيحب بعض واللى شدنى لخطيبى دة انى اعوضة عن كل حاجة بس مكنتش عارفة انى لما ادخل عيلتة هتخنق كدة المهم كلة دة عدى على خير واستحملت وقولت مش مهم انا اصلا محدش من عيلتة كان بيجيى يزورنى خالص هو بس اللى بيسئل عليا
انا كان مضيقنى الوضع دة وخطيبى اتغير حالة شوية بطل صلاة وبعد مابطل حشيش رجع تانى بس هو مش بيشرب على طول فانا قولت لة ممكن قبل الجواز تبطل اى حاجة تغضب ربنا قالى لما نكون فى بيتنا ههيكون وضع تانى المهم انا صممت انة يبطل قبل الجواز فقولتلة لا وقررت انى اسيبة واللى زود الموضوع كمان انى عرفت انة كلم واحد كان بيحبها زمان بس هى اكبر منة ب13سنة وقالى انة كان متشاكل معايا وكان مخنوق وعايز حد يتكلم معاة وعلى فكرة هو عمل كدة كم مرة انة يكلم الست دى قبل كدة وانا سمحتة اكتر من مرة عشان بحبة وهو وعدنى انة مش هيعمل كدة تانى
بس انا خلاص سيبتة وخد شبكتة وهو عايز يرجع تانى وانا نفسى ارجع بس مش قادرة انسى اللى عملة فيا
بس انا عارفة انة بيحبنى بس خايفة ليتغير بعد الزواج وكمان خايفة من اهلة وبجد مش عارفة اعمل اية تعبانة اوى وكلة بيقولى ارجعى لة لو هو مكنش بيحبك مكنش عمل عشانك حاجة وانة بعد الزواج هيتظبط حالة عشان هو مش مستقر فى وسط عيلتة بس انا خايفة ارجع لة وبعد كدة اندم فى وقت ماينفعش فية ندم
انامن رائى انك هتندمى ندم عمرك لو رجعتى علشان اللى فية داء عمرة ما بيستغنا عنة ابدا وانا كنت مخطوبة لواحد زية بس سبتة علشان كان كل شوية اسيبة وارجعلة وكان بيتمرع لما برجع تانى بس دلوقتى ربنا رزقنى باحسن منة يا ريت تفكرى كويس جدا علشان دة جواز ونصيحة ما ترجعيش
اقول لكي على شيئ انا من رئي انك تسيبيه لانه ده ميستحقش بنوته تضحي عالشانة زيك او تحبية بس ملحوظة الي كان بينك وبينه مش حب ده كان مجرد عطف منك ليه واتمنى ليكي حياة افضل وسعيدة وربنا يعوضك خير ويرزقق بالزوج الصالح اللهم امين على فكرة ده ترجمة الكلام الذي قولته لكي
خلى بالك هو عايز يرجعلك علشان مش لاقى واحدة تانية ترضى بيه وانتى يابنتى لسة قدامك عمر طويل ان شاء الله فكرى تانى وماتغلطيش الغلطة دى وترجعيلهياشيخة ده كفاية اوى انه بيشرب حشيش وبيعرف ستات
من اهم الشروط فى الزوج
من كان عنده دين واخلاق
يعنى دين من غير اخلاق مينفعش
واخلاق بدون دين برضه مينفعش
هل خطيبك السابق عنده
دين
او
اخلاق
ردى ولم تردى هتعرفى اجابة سؤالك بالرجوع من عدمه
يا اختى اسمعى نصيحتى ده عمره ما هيتغير
لان بالعقل كده كلنا عارفين ان الانسان اذا كان ولد او بنت
بيحاول يتجمل فى فترة الخطوبه ويظهر نفسه قدام حبيبه على انه انسان كويس فى اخلاقه وكل مواصفاته وحياته
لكن ده بيظهر حقيقته انه انسان مش كويس يعنى كده هو حاجتين
اولا انتى مش فارقه معاه تستحمليه على كده يبقى يكمل معاكى او ما تستحمليش يبقى مش فارق معاه حاجه
ثانيآ طالما ما اتغيرش قبل الزواج يبقى بعد الزواج هيكون اكثر من كده
لانه هيكون امتلكك خلاص يتصرف زى ما هو عايز
وانتى مش هتقدرى تتكلمى لان اقل حاجه هيقولهالك انتى وافقتى عليا وكملتى معايا وانتى عارفه ان انا كده
وشوفى بقى ايه اللى هيحصلك بعد الجواز وانتى عايشه مع واحد زى ده
يا اختى فوقى من اللى انتى فيه انتى مش هتعرفى ان الانسان ده مش كويس الا لما تتجوزيه وتتعذبى بسببه
ياريت تبعدى عنه قبل ما ييجى اليوم اللى تندمى فيه فى وقت لاينفع فيه الندم
وصلى صلاة استخاره وربنا يوفقك ويقدملك اللى فيه الخير
(سيد العاطفى)
مصر—بنى سويف
السلام عليكم
لما اخذتى قرار بانك تسبيه, كان قرار صائب, فهو رجل ضال وغير سوى ,بجانب ادمانه للمخدرات وهذه معضلة كبرى.
وانا انصحك بعدم العودة اليه وعليكى ان تبحثى عن غيره, عسى الله يوفقكى الى ما هو افضل, فلا تستعجلى.
شهانة الحوينى
طالبة فى السنة الاخير/كلية الطب
السعودية_______مدينة الرياض
اسمعي يا اختي مشكلتك تقريبا متل مشكلتي انا خطيبي متل خطيبك بس انا ما كنت بحبو وتركتو واخترت حريتي ع اني اعيش مع واحد سكير وحشيش والي فيه عاده عمرو ما راح يغيرها يعني ذيل الكلب اعوج حتى لو حطناه في ميت قالب نصيحه مني ما ترجعيلو يعني ما راح يتغير الي ما بيتغير قبل الزواج ما راح يتغير بعد الزواج هاد رائي والقرار بيرجع الك
أما أنت بجد غريبة جداً فية كل المشاكل دي وكل العبر وانت لسة برة مغرقتيش وعايزة ومصرة برضوا تغرقي نفسك بنفسك ع العموم نصيحة لله بلاش تغرقي نفسك من واحد من اولها حشاش أما لو مصرة وعايزة تغرقي براحتك محدش هيمسك فيكي الله يخرب بيت الحب وسنينة.
انا مع راى كل من سبقونى من الاخوة الاعزاء وانضم لرايهم
الأخت السائلة بصراحة مش عارف انا حاسس ان القصة غريبة شوية ومش شايف دور لاهلك نهائياً فين هما من كل اللى حصل ده سمحو انك ترتبطي بواحد من عائلة مشتتة زي ما وصفتي يعني مش من عيلة كريمة وذات اصل وكمان ليس لديه وازع ديني والاكثر مدمن او بيشرب حشيش وعلى علاقات نسائية ايضاً مستنيه ايه بعد كده اختي واجهي نفسك بالحقيقة هذا الشخص غير امين عليكي واي وعود حالياً ما هي الى تسويف وتمضية وقت انصحك بالابتعاد وقربي من ربنا علشان يرزقك بابن الحلال المؤدب المتدين اللي يصونك ويحافظ عليكي .
المثل بيقلك الجواب باين من عنوانه
اهربي قبل ما تتورطي انت عملت الصح من البداية لا تخلي عواطفك تنهار امام الضغوط من طرفو
ابحثي عن رجل ترضين دينه وخلقه وصدقيني من وحدة متزوجة صعب الرجال يتغير فلا تضيعي عمرك على الفاضي
اوعى ترجعى,ده احتكاكك بعيلته حيبقى ساعتها الضعف,وهو لو كان حيتغير كان زمانه اتغير ,ده الجواز حيمكنه منك اكتر و مش حيحس انه محتاج يتغير خلاص
اولا من جهة انك هتندمى بعد الزواج فده اكيد جدا جدا جدا وهيكون اشد ندم مفيش انسان بيتغير فى يوم وليله زي مقالك هيتغير بعد الزواج ده بعد الزواج هيكون العن الف مره وهيخليكى جاريه تحت منو لانو متعاطى المخدرات سهل يتنازل عن زوجتو لاكن يستحيل يتنازل عن المخدرات وفى النهايه هترجعى لبيت اهلك وبدل متنتظرى سنه او اتنين لحضور عريس اخر هتنتظرى عمرك كلو مطلقه وقتها زي مقلتى لن يفيد الندم والمشكل انو بعد الطلاق الكل هينظرلك بنظره المطلقه الى الكل مشتاق ينهش لحمها ويفترسها اما الان الكل ينظرك اليكى بغرض الزواج لانك ما زلتى بنت وشكرا