السلام عليكم ورحمة الله وبركاته
انا اتقدم ليا الشاب ده الى هو خطيبى الان ، المهم انا بصراحه كنت مترددة انى اربتط بيه فى البداية اول ماشفته لقيت فيه انه انسان محترم جدااا مش زى شباب اليومين دول ،، المهم فى فترة التعارف الى استمرت يومين بس قبل الخطوبة وهو بيتكلم معايا دماغى مش عجبتنى وكنت عاوزة ارجع فى الاتفاق لولا الاهل وضغطهم عليا وانا قلت طيب يمكن هو يكون انسان كويس وانتى يابنتى لسه مش عرفتيه لأن انا اصلا عندى حساسيه شديدة فى اختيار زوج المستقبل لكم كلام الاهل والناس ليه عامل كبير اوووى فى الموضوع ده ،، المهم تمت الخطوبة ووافقت على اساس انهم قالولى يابنتى دى فترة خطوبة ولسه هتعرفيه ولسه ولسه مش تتبطرى مش مش ،، المهم تمت الخطوبة وابتدى الكلام ما بينا وهو اصلا الفترة الى هيقعدها معايا 3 اسابيع بس لانه مسافر بره شغله بره ،، المهم حاولنا نتكلم مع بعض اول مكالمة بينا بعد الخطوبة حسيت كلام غريب شعرك عامل ازاى وحضن ، المهم استغربت وقلت انا مش عارفة المخطوبين بيقولوا ايه انا اول مرة ارتبط بشاب واتكلم معاه فى حدود غير الزمالة المسموح بيها ،،، المهم سألت والدتى قلتلها هو المفروض يقلى كلام زى ده ومع العلم كان لسه مش تقل فى الكلام يعنى بيتكلم على الهامش،، قالتلى مش تقولى الى بيحصل بينكم بردو عشان انا معارضة الجوازة اقول يابنتى طيب ما يمكن عادى اى حد بيتكلم مع خطيبته كده ،، لحد ما ابتدى يتطرق فى الكلام الزبالة الى هو عاوز يتكلم فيه واحذره واقوله الى انا محتاجاه منه عشان مش اظلمه بيت اقله احنا محتاجين نقرب من بعض نفهم بعض اعرف انت بتحب ايه بتكره ايه نفسى تفهم دماغى انا عاوزة ايه مفتقدة ايه ، يوعدنى انه مش يتكلم معايا ويقلى من هنا لحد ما نتجوز مش هتكلم معاكى وحلف ليا فى اول خروجه ليا معاه وصدقنى من هتكلم معاكى ولا هجرأك يرجع تانى فى التلفيون بعد ما نتكلم كلمتين حلوين وانا بردو مش حاسه منه اى احساس يرجع يقلى اصل الكلام ده بيقرب واناا هقعد سنة مش اشوفك انا عاوز احب حبيبى واتشاقى معاه شوية لدرجة انه كان بيتكلم وانا اشوف هيوصل لحد فين واتوه واخد اى حاجة هزار لحد ما ارجع انا كمان اقله مينفعش ومن الضغط الى انا فيه اقول يابنتى يمكن عادى بس اناا مش حاسه انه عادى كل ما اتكلم مع حد يقلى الشباب كلهم كده ،، المهم بعد ما حلف ليا مرتين جه فى يوم يقلى ربنا يخليكى سيبينى اتكلم ان شاء الله حتى يوم واحد بس فى الاسبوع اقله مش ينقع لحد ما بردو غوط فى الكلام وانا بردو بشر ليا مشاعر وقرفانه وزهقانه ومش عارفة اعمل ايه لقيته بيقلى ما تقلعى كل ده على الفون طيب خلينا معرفش ايه ،، المهم قلتله لا وبعد ما قفلت معاه بعتله رساله وقلتله انا مش عاوزة نتكلم فى الكلام ده مش هينفع انا مش دى الطريقة الى انت هتكسبنى بيها انا مش ده الى انا عاوزاه فى شريك حياتى والله لو سمعتم كان بيقلى ايه ولا صوته ولا هو بيتحايل عليا ،، المهم بقة دخلت لماما وهى ماما اصلا ضدى شايفانى مش قابلاه وخلاص وانت بتتأمرى وهو ماله المهم دخلت عليها قلتلها هو ينفع يقولى كذا كذا المهم ماما طبعا فوجئت بالكلام وكلمت عمى وحكيته ليه اصلا لما قربت ليهم فى الاول ماما وعمى قالوا ليا ممكن يكون بيختبرك وبيشوف دماغك كلميه بحدة فى صوتك وحزم وطبعا عملت كده بس هو كان بردو الى فى دماغه فى دماغه ،، لحد ما كلمت عمى بعدها وقالى هو لسه بيتكلم قلتله المهم اتنرفز وقالى كلميه زعقيله وميهمكش وعرفيه انك هتدخلينى فى الموضوع ،،، لحد ما استنيت الفرصة وهو بيتكلم وزعقت فيه جامد لدرجة معرفش يرد عليا فيها واتصل بعدها اعتذر وقالى بس انتى لو فتحتى الوضوع ده تانى معناه انك مش عاوزة الموضوع ، قلتله مش هفتح الموضوع ده يتوقف عليك انت ،، حكيتلهم لماما وعمى وقالوا هو اعتذر شوفى بقة هيعمل ايه ،،، المهم هو سافر وكل ما اتكلم معاه مش حاسه منه اى كلمة يقلى انى جامدة فى مشاعرك اقله احنا لسه مش بقالنا شهر مع بعض انا واحدة واحده هقرب منك وبقيت اطلب منه حاجات واديله مفتاحى انه بعرف يتعامل معايا ولكن مش عارفة وفى نص الكلام بيبقى عاوز يرجع يتكلم تانى وانا عارفة انى لو سيبته هيرجع يتكلم تانى ويقلى انا عاوز احبك حب جامد اقله طيب ما تحبنى انا محتاجه انك تحبنى وانا احبك يقلى اصلك بتزعلى وانا بخاف اتكلم ،،، انا عارف انه غلط وانت صح بس الحاجات دى بتقرب وانا انام مبسوط وانتى تنامى مبسوطة لا حول ولاقوة الا بالله كمان مش هنكر انى بتأثر بكلامه وقلته ان دى فطرة ربنا خلقنا عليها مفيش حد جامد بس فى الى بيعرف يسيطر على مشاعرة وربنا مدينا العقل ،،، انا مش لاقيه منه الى انا عاوزاه هو بيتكلم معايا ويقلى انا هخليكى سعيدة واعملك وافسحك و و و اقول طيب ودلوقتى انا مش حاساه وقلت يمكن لما اتخطب ليه احبه مش عارفه كل مكاالمة اتخانق معاه اقله انا عاوزة نعرف بعض ونقرب من بعض يقلى انتى الى المفروض تعرفينى هو عاوز حب وحنيه طيب وانا هو فاكر بكلمتين دماغى هتميل له انا زهقت ومش عارفة اعمل ايه بصلى استخارة وادعى ربنا ان كان خير يراضينى بيه ولو شر يبعده عنى ،، مع العلم انه كان خطاب مرتين والكلام الى بيطلع منه بحس انه مش حاسه لانه هو اصلا لسه مش حبنى هو شايف حد كويس قدامه ولا مش عارفة ايه ده مش بيحاول اصلا كده يشوفنى انا ايه ولا كيانى ايه انا زهقت
قرأت مُشكلتك بالكامل، وبصراحة مش عارف أقول لك إيه.. أنا عن نفسي رافض الكلام اللي من النوع ده تمامًا في فترة الخطوبة.. والصحيح عُرفًا وشرعًا هو إن الواحد يمهّد للاتصال الجنسي اللي هيحصل لأول مرة بين الزوجين في الفترة اللي بين كتب الكتاب والدخلة لأنها في الحالة دي بتكون زوجته والكلام والتصرفات والأمور اللي من هذا القبيل بينهم مش حرام.. اقعدي معاه في أول إجازة ينزلها، أو حتى في التليفون، وكلميه بعقلانية وبهدوء وفهّميه إن الأمور اللي زي دي مالهاش أي داعي أبدًا في الوقت ده، وإنها بتفقد لذتها لما بتكون مُعتادة بين الطرفين، وإن مُتعتها الحقيقية لما بتكون أول مرة بين الزوجين، وإن حياء المرأة من الأمور اللي بيطلبها الرجل منها مش ينفر منها، وإن رفضك للأمور دي وحياءك منها المفروض حاجة تسعده مش تحزنه، وإن الزيجة عشان ربنا يبارك فيها لا بد تمشي بالضوابط الشرعية اللي فرضها علينا المولى عز وجل ووضّحها لينا الرسول صلى الله عليه وسلم، وإن المحبة بين الطرفين المخطوبين عمرها ما كانت قائمة على الجنس، وأخيرًا ربنا ييسّر لك أمورك ويكتب لك الخير في كل خطواتك ويهديكِ لما فيه الخير والرشاد..