اولا .. السلام عليكم ورحمة الله وبركاته
ثانيا .. نبدا بسم الله الرحمن الرحيم
انا مشكلتى تتلخص فى شوية احاسيس واستنتاجات مش اكتر ولا اقل .. يعنى (تفصيلا بقى ) انا مخطوبة من حوالى سنة كدا والموضوع بدا عادى شافنى.. عجبته …جه اتقدم…. فكرت….. وافقت ….. بس موافقتى كانت بعد موااال يعنى انا ف الاول مش كنت موافقة على الموضوع كله (الارتباط يعنى) بس اهلى شافوه بنى ادم كويس وانى اقدر اتجوز وادرس ( مع العلم انى ف كلية والموضوع دا حصل بعد الثانوي مباشرة ) بس انا كنت بقولهم دايما انى مش هاقدر ورحم الله امرئ عرف قدر نفسه بس فضلو يلحو ويقنعونى بشتى الطرق المهم انى وافقت بناء على جملة واحدة مش اكتر (يمكن يكون هو فارس احلامك اللى بتدوري عليه).. المهم انى وافقت وحصل كل شئ كما اراد الله قرينا الفاتحة وجبنا شبكة وخلافه وطول الفترة دى وهو يشجينى بكلام الحب وما الى ذلك ودايما يطلب انه نفسه يعرف حقيقة شعوري تجاهه واذا كنت بحبه ولا لا وانا اقوله مرة ما ينفعش تسالنى كدا ومرة اقوله يعنى مش بحبك بس مش بكرهك بس طبعا هو ما بيتوصاش ف الالحاح يعنى تقريبا كل ما نتكلم يقولى الجملة دى وانا بجد مش بحب الالحاح خالص .. كلامه معايا بحس فيه بانانيه وتكبر يعنى مثلا يقولى هو انا اي حد دا انا مش عارفة ايه كدا … ف الاول كنت بحسبها هزار عشان ساعات كتيير كانت بتبقى ف اوقات هزار بس هوا بيقول حاجات زي كدا كتييير يبقى دا اييه ؟؟؟ واخر مرة قالى انتى اشتمى واضربي اللي انتى عاوزاه دا انتى خطيبة فلان الفلانى ( سمى اسمه يعنى ) طبعا انا اتصدمت اول ما سمعت الكلمة دى وقلت له ازاى يعنى يعنى انت ينفع تعمل كدا قالى ما لكيش دعوة بيا انتى اعملى كدا براحتك وانا وراكى ؟؟؟ يبقى دا اييه ؟؟؟ واحنا بنتناقش ف حاجات كتيير وبقوله رايي بكل صراحة وباخد موقف بس هو بعد كدا ف مكالمة تانية يعنى يقولى عايزك تاخدى موقف كدا ويبقالك راي .. اقوله يا بنى ما انا بتكلم وبقولك رايي وباخد موقف … يقولى يعنى في حاجات كدا بسكتى فيها … وانا عايزك تتكلمى كدا وتعبري عن رايك بكل صراحة ( يعنى كانه بيتكلم ويرد على نفسه وكانى ما قولتش حاجة ع الطرف التانى ) وحكاية بصراحة دى دايما يطلبها منى مع انى بتكلم بكل صراحة وباقوله انا بحب الصراحة ومش بتكلم غير بيها وما تقولش كدا تانى .. يرجع يطلبها تانى … ودايما يطلب منى انى اقوله بحبك وكلام من دا ودايما يوجه كلام من نفسه لنفسه كدا من غير ما اقول حاجة يعنى يقولى مثلا مش هاتقولى كلمة حلوة كدا لخطيبك حبيبك وقلب الايه دلوقتى يعنى ف الشهور الاولى كان يفضل يقول الكلام دا كتير اما دلوقتى بيطلب انى اقوله .. مشكلتى ف كدا انه بيلح مع انى باطلب منه انه ما يقولش كدا ولا يطلب منى كدا وبعد الجواز نبقى نقول كل اللى نفسنا فيه .. بس هو يستغرب وينفض ع الاخر ويظل على الالحاح بتاعه … كمان لما نيجى مثلا نتكلم على حاجة ف شغله او حاجة هو عارفها وانا اول مرة اسمعها واسال عنها يقولى وانتى ايش فهمك ف الحاجة دى اصلا ملكيش دعوة بيها … كنت ف الاول باخدها بهزار بردو بس كنت بالفت نظره هه ولكن هيهات هيهات بحس انه مش عايزني اقول غير اللى هو عايزه ولا عايزنى اعمل غير اللى هو عايزه … انا كل يوم عن اليوم اللى قبله بيحصلي فتور تجاهه ومش ببقى عايزة اتكلم معاه او اشوفه اصلا لانى مش بحب طريقته دى ودا محسسنى انى ظالماه وببقى عايزه اسيبه ساعات كتير بل انى بفكر ازاى اعمل دا كتيير بس مش عارفة اذا كان كل دا مجرد تخمينات وخلاص بس هوا معقول قلبى اللى حاسس بكل دا يبقى كدا بلاش معقول عنيا اللى شايفه كل دا كدابة .. اذنى اللى سامعة كل دا كدابة ؟؟؟ بصراحة انا احترت وعايزة اقول حاجة اخيرة بس انا استخرت ربنا مرتين ف الاولى محصلش حاجة بس التانية من بعدها بدات احس بالنفور دا وكل يوم باكتشف فيه حاجة تزود الاحساس دا انا خايفة ان دا يكون تاثير موافقتى المستعجلة لانى وافقت ف لحظة حسيت فيها انى محتاجة الموضوع ( كنت ف اجازة ) وخايفة اكون بظلمه بس هو بيستفزنى كتييير وصراحة مش عارفة احدد اي حاجة خالص ارجوكم لو حد فهمحاجة يقولى وانا اسفة جدا على الاطالة ^__^
مشاكل الخطوبة
نفور تجاه خطيبي وخايفة اكون بظلمه
اضيف بتاريخ: Friday, October 6th, 2017 في 23:32
كلمات مشاكل وحلول: الحب, الزواج, حب, زواج
شوفي يابنت الناس انت لم تذكري شي عن دين خطيبك ولاعن اخلاقه ولاعن تربيته ولاعن اهله وكل كلامك عنه مجرد اشكاليات بسيطة تحصل بين الشاب والفتاة في فترة الخطوبة في البداية لااظن انها تؤثر على حياتكم الزوجية في المستقبل كمان انت لم تكون صادقة وصريحة معه عندما سالك هل عن حقيقة مشاعرك نحوه قلت لاحبك ولااكرهك واي شاب يتمنى يسمع الكلمة الحلوة من خطيبتها والا ايه قد يفكر انك مغصوبة عليه من اهلك او انك لاسمح الله على علاقة بااخر اوقلبك مشغول بحد ثاني انت غلطانة كان صراحتيه بمشاعرك طالما انه خطيبك وانت واهلك وافقتم عليه ومسالة ماداربينكما من حوار ونقاش بيخصل عادي بين اي اثنين مخطوبين بس انت مكبره الموضوع ويمكن عاوزه تفركشي تلك الخطوبة باي طريقة والسلام لوكنت فعلا غير متفاهمة ولامرتاحة مع الشاب قوليها له ولااهلك من الان قبل فوات الاوان وكلواحد ينام على الجنب الذي يريحه بلاش اللف والدوران وطالما انك تشعري بالنفور من علاقتك به فمن الاحسن انهاء تلك الخطوبة فورا
هو خطيبك ظابط شرطة ولا ابوه مسئول كبير .. انتي مش عارفة انا مين دي ده نرجسي ولا اصلا شخص شايف نفسه على الناس.. المهم لو ما اترحتيش الحقي نفسك واخلعي قبل ما تدبسي وساعتها ها تشوفي ايام سودا